Rabu, 17 Februari 2010

PJJ GBKP TANGGAL 21-27 PEBRUARI 2010

Matius 25:14-30.

Isi : Ngembangken Talenta Guna Ndukung Biaya Pelayanen Gereja

LATAR BELAKANG
1. Ibas oratenta Yesus ngerana kerna Kerajaan sorga alu make anding-andingen, maksudna gelah ajar-ajarna lebih meteh kerna keselamaten. Ibas anding-andingen sekali enda, iandingken Yesus kerna Kerajaan Sorga eme bagi sekalak tuan siberkat ku luar kota, janah senna ipokokkenna man juak-juakna. Ibereken tuanna man si sada juak-juakna 5 talenta, sada nari ibereken tuanna 2 talenta, janah sada nari ka iberekenna 1 talenta. Enda ibereken tuanna sue ras kengasupen juak-juakna e.
2. Talenta eme ukuran berat, janah biasana sijadi patokan eme telenta perak, janah sada talenta perak nilaina Rp.360.000.
3. Kenca piga-piga tahun reh me tuan ndai janah idilona kerina juak-juakna ndai guna erkira, janah juak-juak si muat lima talenta enggo ertambah keuntungenna lima talenta, si dua talenta enggo ertambah dua talenta, janah sidua juak-juak enda ibereken tuanna perkara siterbelinen. Tapi juak-juak si dat sada talenta e la iusakenna gelah erta sada talenta enda banci erbunga, sada talenta e ibunikenna, bagepe ipersalahkenna tuanna. Sienda ibahanna, kepeken ibas rangka menutupi kemalasenna. Emaka merawa tuanna janah ihukum tuanna ndai ia. Siidah ijenda maka bali ras kerajaan Sorga e ije lit ije pengadilen. Jadi situhuna kalak sibengket ku bas Kinirajaan Sorga eme kalak sisetia ibas persuruhen Dibata.
4. Talenta siimaksudken ijenda labo sen, tapi bakat sienggo ibereken man banta guna ipakeken alu mehuli bagi singena ate Tuhan. Ipake labo saja guna keselamaten dirinta sendiri tapi pe keselamaten jelma sinterem.
5. Merawa tuan e man si la ngembangken pemere tuan e, la saja erkiteken ia mekisat, tapi pe egois, sebab la iberekenna man kalak sideban guna ndahiken dahin Tuan e.
6. Amin gia kengasupen siibereken Tuhan pelain-lain, tapi sipentingna eme harus sipergunakenna alu mehuli ras ertanggunjawab man Tuhan. Sebab kegeluhen manusia siidilo Tuhan ibas rangka berkarya guna keselamaten.

THEOLOGIA NASKAH
- Pemere Dibata harus ikembangken ras ipertanggungjawabken ilebe-lebe Dibata.
- Bali ras kerehen Kerajaan Sorga lit pengadilen.
- Ise si setia ibas perkara sikitik ibereken Tuhan me perkara siterbelinen, janah nggeluh ibas kesenangen ras Tuhan.

APLIKASI
Isadari hampir kerina program pelayanen gereja mbutuhken dana, tapi siidah bentuk pemasuken keuangen guna mendukung pelayanen e banci sikataken e lalap, eme arah kolekte, persepuluhen ras lelang-lelang. Kinatana enda kerina la bias guna mendukung pelayanan gereja. Engkai, lenga bo kerina kita mere, apai ka gerejanta la seri ras gereja sideban ntah pe runggun si galang, sipendapaten keuangen arah kolekte ras persepuluhenna cukup galang.
Program pelayanen si lit ibas gereja, labo sekedar gelah teridah maka gereja e lit aktivitasna secara organisasi, tapi lebih asangken sie, eme gelah arah program pelayanen, Tuhan ipuji ras imuliaken. Kita ras doni enda nggeluh ibas keselamaten. Emaka program pelayanen arus ibahan sue ras kengasupen ras talenta si lit. Ibas erti kata amin gia kitik program e tapi ngasup kita ndalankenca. Isamping sie, banci saja sibuat program si “spektakuler” tapi adi ngasup kita ndalankenca, janah ngasup ka keuangenta. Em mekatep sijadi hambaten man banta. Tapi sisadari lit talenta, sebab kita kerina enggo ipasu-pasu Tuhan, janah enggo iberekenna man banta kepentaren, emaka ngasup nge kita nciptaken bentuk-bentuk sideban guna mpereh ras nambahi keuangen gereja, gelah pelayanen-pelayanen i tengah-tengah gerejanta banci erdalan. Janah ibas rangka ndalanken kerina e, kita kerina harus ersada ras nggit ndahikenca. Emaka ula ka sikataken, kita enda la lit talentana. Kerina kita enggo ibereken Dibata talenta. Emaka ula sipersoalken mbelin ntah kitikna talenta si lit bas kita. Tapi uga carana mekekenca ras memanfaatkenca alu mehuli. Alu bage terpuji gelar Tuhan.

Tidak ada komentar:

Posting Komentar