PENDAHIN SERAYAN TUHAN

BAHAN PJJ GEREJA GBKP
TANGGAL 25 APRIL – 1 MEI 2010

Johanes 10 : 11 – 16.

Isi : Pendahin Serayan Tuhan.

LATAR BELAKANG
1. Sijadi oratenta eme sada penjelasan Yesus man ajar-ajarna kerna sada perumpamaan siibereken Yesus man ajar-ajarna (band. Ayat 1-5), khususna kerna permakan nandangi biri-birina.
2. Ibas oratenta, Yohanes mereken pandangen baru kerna permakan situhu-tuhu, sebab ibas padan sindekah, khususna ibas Esekiel 34, sekalak permakan (pembesar) lanai iperdiatekenna biri-birina (umatna), janah enda sada persinget Esekiel nandangi pembesar paksa sie. Ipersingeti Esekiel sebab pembesar lanai ertanggungjawab alu mehuli, bagepe “nangko” ras pebayak diri sendiri. Tuhu-tuhu la diatena rakyatna. Ibas pandangan simbaru, Yohanes ngenen, ibas diri Yesus sendiri nge permakan e. Yesus selaku permakan nggit ngasamken KesahNa guna biri-biriNa.
3. Kai siituriken Yohanes enda sekaligus mengkritik kalak Jahudi sierkuasa si la mperdiateken rakyatna (band.Psl. 9:13-34). Kalak Jahudi sierkuasa, bagepe kalak parisi eme kalak pentang. Emaka la banci kalak pentang negu kalak pentang.
4. Yesus alu make perumpamaan ngataken tuhu Yesus selaku permakan mperdiateken biri-birina, Itandai Yesus biri-biri e, bagi Bapa nandai Ia, bagepe Yesus nandai biri-biriNa e, emaka ilindungina biri-biri e ibas pinangko (serigala) nari. Em simbedakenkenca ras permakan upahen, sebab permakan upahen (permakan) palsu ras mesias palsu si reh ope denga Yesus, labo permakan situhu-tuhu, bagepe la itandai biri-biri sora permakan e. Bagepe permakan upahan kenca idahna serigala reh, kiam ia, itadingkenna biri-biri e.
5. Arah enda, Yesus menyataken diriNa selaku permakan (Raja) man kerina bangsa Israel. Bagepe nandangi si labo kalak Jahudi. Ibas rangka sie maka kegeluhen permakan (Yesus) eme nggeluh alu ertanggungjawab gelah biri-birina pe nggejapken keamanan. Enda me permakan situhu-tuhu.


THEOLOGIA NASKAH
- Aku me Permakan situhu-tuhu singgit ngasamken Kesah guna biri-biri.
- Bapa nandai Yesus, janah Yesus Nandai biri-birina
- Biri-biri si lenga bengket ibas karangna, harus ibaba ibas sada karang, gelah itandaina sora Yesus ras jadi sada rarasen me ia kerina.

APLIKASI
Permakan situhu-tuhu eme Yesus Kristus, janah kita enggo idilona jadi permakan guna permakani biri-biriNa. Maksud pendilo Tuhan man pendeta, pertua ras diaken, rsd., gelah biri-biri Dibata ilindungi, banci dat nakan ras inemen sicukup. Alu bage biri-biri Dibata nggejapken keriahen ras kemalemen ate. Ibas rangka sie tentuna komitmen ngelai harus nggeluh ibas kita selaku serayan Tuhan. Sebab ibas litna komitmen selaku permakan maka kita ngasup melayani alu mehuli ras ertanggungjawab. Sebab siidah cukup nterem anggota perpulungen simuas ras melihe. Emaka ula mamang ras nembeh ateta adi lit anggota perpulungen siterikut ibas ajaren-ajaren sideban siiajarken permakan sideban, bagepe lit anggota perpulungen si ersembah ibas ingan-ingan sideban. Sie kerina la perlu ndarami ise si salah, sipenting genduari uga kita banci jadi permakan sibertanggungjawab. Emaka la banci lang kita harus nggeluh ersada ras Yesus Kristus. Kegeluhen spiritualitasta harus teridah. Alu bage itandai biri-biri soranta. Alu kata sideban permakan ras biri-biri nggeluh ibas sada penggejapen. Sorapermakan ibegi biri-biri, janah sora biri-biri ibegi permakan.
Perlu siteh ibas perkembangen sigenduari, cukup nterem kegeluhen biri-biri bagi terancam. Emaka peranen permakan guna mpermakani biri-biri e cukup penting. Permakan harus meteh kebutuhen ras perbeben biri-biri, janah sibereken dalan keluar sierbahanca malem atena.

Pdt. Steven Kumenit, STh.,M.Min..