BAHAN PERPULUNGEN JABU-JABU GBKP
MARKUS 7 : 1 – 13.
Isi : Er-Marturia Ibas Konteks Budaya.
LATAR BELAKANG
1.Pribadi Yesus Kristus enggo mbar I belang-belang Yerusalem ras sekitarna,
emaka ja saja Jesus lawes reh kalak jumpai Ia. Ibaba kalak erbage-bage kalak sipinakiten ku Jesus, guna ipepalem Jesus, ras kerina enda madan ibahan Jesus, janah lit ka perbahanen sideban siibahan Jesus eme pelawes setan, rsd. Mjizat siibahan Jesus enda, seh ku kalak Farisi, janah kalak Farisis enda mesera kal ngaloken mujizat-mujizat siibahan Jesus e. Emaka ibas kerina kesempaten idaramina kesempaten guna nerang ras atena nangkap Jesus.
2. Sijadi oaretenta sekali enda, sengaja kin rombongan kalak Farisi ras guru-guru agama reh I Jerusalem nari guna njumpai Jesus, ras atena nidingi Jesus. Alu bage banci Jesus itangkap ras ihukum. Perlu siteh kalak Farisi enda eme sada aliran rohani si lit i Israel, janah kalak enda pe cukup nterem sebage ahli taurat. Kalak Farisi enda lebih m,enekankan kerna kalak Israel banci selamat adi tetap setia ndalanken Taurat ras adat istiadat simenyempurnakan Taurat.
3. Kalak Farisi enda lebih menekankan kesalehan nggeluh, sierpalaskan hukum taurat ras kebiasaan siibahan nini-ninina ndube. Erkiteken sie, kenca idahna ajar-ajar Jesus man la mburihi tan lebe, maka enda jadi palas guna nerang ras nidingi Jesus. Kalak Farisi ras guru-guru agama, janah khusus kalak Farisi akapna ia saja sibenar ras saleh, la melket. Janah guna njaga sie la ia nggit bergaul ras kalak sideban. Adi ku tiga ia, janah adi nggo mulih ku rumah, minter ibersihkenna badanna, sebab mbiar ia adi sen, ntah pe ingan siikunjungina enggo melket erkiteken enggo ipake lebe kalak siperdosa (kalak najis). Janah kalak Farisi enda pe erpengakap maka kebiasaan nini-ninina (adat istiadat) lebih meganjang ras lebih penting asangken Kata Dibata. Emaka kalak simelanggar kebiasaan nini-nini ndube (adat istiadat), ia enggo melket, sebab ia bali ras pembunuh ras enggo erluah-luah. Alu bage ia enggo melanggar sepuluh pedah Dibata. Man kalak Farisi ras guru-guru agama kalak sibage la banci ideheri ras harus ihukum sebab enggo erbahan dosa si cukup mberat.
4. Guna njawab penungkunen enda, sekaligus ate Jesus mereken penekanan kerna makna kebiasaan (adat istiadat) simerupakan tradisi lisan ras makna kebadiaan situhuna. Erkiteken sie me Jesus make ntah pe ngutip kai siikataken nabi Jesaya kerna kegeluhen kalak Farisi si genduari eme terjeng biber ngenca bangsana nembah Aku, tapi situhuna ukurna sirang ras Dibata. Jesus sengaja ngutip enda, gelah kalak Farisi ras guru-guru agama banci ngangkai kerna sie. Sebab adi Jesus saja singerana la ibegiken kalak enda.
5. Penuriken Jesus kerna adat istiadat sienggo jadi “darah daging” la kerina idalankenna, simenguntungken dirina saja siidalanken, tapi adi akapna merugiken ia labo idalankenna. Kalak Farisi ras guru-guru agama kurang mementingkan erti kekelengen. Emaka situhuna percuma nge njaga kebersihen diri ras barang-barang badia si lit ibas rumah pertoton, adi la idalanken kekelengen. Contoh kerna makna persembahen. Tuhu persembahen wajib idalanken, janah enda jadi korban, emaka lanai banci bereken man ise pe termasuk man orang tua. Tapi situhuna dalil enda ipake gelah tanggungjawab anak nandangi orang tua la man isehken. Adi orang tua mindo sen man anak, anak la nai ibere anak e sebab enggo isehken sebage korban persembahen man Tuhan. Enda me situhuna perbahanen sipekulah-kulah. Kebadiaan si la tuhu.
THEOLOGIA NASKAH
- Kalak Farisi ras guru-guru agama ngenen ajar-ajar Jesus man la mburihi tan lebe.
- Jesus ngutip kitab Jesaya guna mereken pengertin man kalak Farisi ras guru-guru agama.
- Kalak Farisi lebih mementigken kesalehan pribadi asangken matuhi Kata Dibata ras ndalanken kekelengen.
APLIKASI.
Kita selaku gereja (pribadi bagepe institusi), situhuna nggeluh ibas budaya ras adat kalak Karo. Janah gereja idilo ibas rangka keselamatan, emaka situhuna gereja la banci lepas ibas eksistensina selaku gereja i tengah-tengah budaya ras adat. Jadi penungkunen man banta, banci kin gereja meneken adat ras budaya siberkembang genduari. Memang lit gereja si secara tegas la nggit bergaul ras adat bagepe budaya, iambengkenna ibas kegeluhenna. Tapi lit ka lang, janag gereja GBKP termasuk ije. Sebab gereja (GBKP) ngenen, ija kenca kita tubuh, kita enggo lit i tengah-tengah adat ras kebudayaan. Kebudayaan e terserab ku bas dirinta, janah kita terserap ka ku bas budaya e. Tuhu gereja la banci seri ras doni enda, tapi labo berarti gereja harus memisahkan diri ras kebiasaan, adat ras budaya si lit ibas doni enda.
Ibas 1 Korinti 7:17 nina “Kerina min nggeluhken geluhna rikutken kai si enggo itentuken Tuhan man bana sekalak-sekalak, bali ras asum ia ipilih Dibata nai. Enda me aturen si kuajarken i bas kerina perpulungen.” Maksudna adi kita nggo jadi kalak kristen tetaplah kita jadi kalak Karo, janah tetap ndalanken kai si jadi budaya kalak Karo. Saja si jadi penekanan ijenda budaya ntah pe adat si enggo bertentangan ras kinitekenta, e harus siambengken. Janah ula min ganjangan budaya ntah pe adat asangken kegeluhen erkiniteken man Tuhan. Tapi harus min kiniteken singerakut kerina e. Alu bage kita kerina tetap nggeluh ibas keselamaten, amin kita teta ndalanken budaya ras adat istiatan daerahnta.
Pdt. Steven Kumenit.
