Selasa, 08 Februari 2011

Makna Teologis Kerna Kegeluhen Kepate (Solidaritas) - Matius 25:31-46.

BAHAN PJJ GBKP

Matius 25:31-46.

Tema : Makna Teologis Kerna Kegeluhen Kepate (Solidaritas)

LATAR BELAKANG
1. Ibas kerehen Yesus Kristus peduakaliken ku doni enda radu ras penghakiman alu universal. La lit sitading ibas penghukumen e. Ibas penghakiman e, Yesus Kristus mpeserap kalak si setia ras kalak si la setia man Yesus, bagi sekalak permakan sinerapken biri-biri ras kambing ope denga bengket kubas karang. Biri-biri merupaken lambang nandangi kalak sitek man Yesus Kristus, sebab biri-biri e biakna patuh man tuanna, janah biakna melemuk. Sedangken kambing merupaken lambang nandangi kalak si la tek man Yesus Kristus. Sebab kambing e mekeng (keras kepala), janah mesera man aturken, la nggit patuh man tuanna.
2. Sijadi oratenta merupaken klimaks ibas pengajaren Yesus man ajar-ajarNa, janah penekanenna eme sedekah Yesus lanai ras ajar-ajar ibas doni enda maka ajar-ajar harus ndalanken perbahanen simehuli singena ate Dibata, sebab enda mpereh pasu-pasu Tuhan man bana. Tanggungjawab pelayanen ibas doni enda, khususna kerna keleng ate harus idalanken ajar-ajar.
3. Yesus nuriken man ajar-ajarNa kerna siterjadi ibas wari pendungi, eme Ia sendiri sireh guna mengadili doni enda (manusia). Janah perbahanen simehuli mpereh keselamaten. Perbahanen simehuli e erkiteken buah ibas kinitekenna nari, labo erkiteken keterpaksaan. Sijadi perhatin eme kalak marginal (yang dipinggirken, sirusur la iperdiateken kalak). Isi simperdiateken kalak sibage, eme mere man simelihe, mereken ingan kesilang man kalak pertandang, mere uis man si la ruis,nandangi kalak sakit iadep-adep bagepe man kalak siipenjara, idahi. Enda merupaken perbahanen-perbahanen nandangi Yesus Kristus. Tapi sebalikna kalak sila ngelakoken sibage e me si la setia man Tuhan.
4. Yesus menggambarkan, situhuna ibas kalak simenderita ije Ia hadir. Ntah pe Yesus nggeluh ersada ras kalak si nggeluh ibas perbeben ras kiniseran. Emaka perbahanen simehuli la banci pekulah-kulah, ntah pe ngenen status sosial, tapi harus ngenen perbahanen e tempa-tempa ngelai Yesus.
5. Pemisahan biri-biri ku kemuhen, ngataken maka kalak si benar i lebe-lebe Yesus iperkenanken Yesus guna bengket kubas kinirajaan Surga, tapi kalak si lapatuh ras la ndalanken perbahanen simehuli erpalasken keleng ate ibas Kristus nari, iambengken ku bas ingan penghukumen sila erkeri-kerin (kambing).

THEOLOGIA NASKAH
- Yesus Kristus reh peduakaliken ibas kemuliaanNa ku dobni enda, janah radu ras sie Ia mengadili manusia secara universal.
- Perbahanen simehuli nandangi kalak simemerluken penampat ras perhatinta eme perbahanen simehuli, emaka nggeluh ibas Kinirajaan Surga.
- Perbahanen si lamehuli silangena ate Tuhan, iambengken kubas penghukumen sikekal.

APLIKASI
Nina ibu Theresa ku idah lit ayo Yesus ibas kalak musil, melihe, tertindas (kalak si imarginalkan), erkiteken sie me ibu Theresia nggit ngelai ku kalak si imarginalkan kalak paksa sie, janah enda merupakan sada bentuk kepate (solidaritas) siicidahken ibu Theresa. Bagepe enda situhuna pendilo Tuhan nadangi ibu Theresa.
Perlu siteh kegeluhenta ibas doni enda la banci nggeluh sisada, sebab kita itempatken Tuhan radu ras kalak sideban. Alu bage kita isuruh guna nggeluh ersada. Janah ibas kegeluhen ersada, status sosial si lit bas kita la banci jadi benteng guna berinteraksi ras kalak sideban. Alu kata si deban kita harus mperdiateken kegeluhen sada ras sideban. Secara teologis, kita enda sada keluarga, emaka ikatan kekelengen harus nggeluh ije. Janah tentuna ibas kegeluhen sosial erbage-bage perbeben ras kiniseran sibanci ijumpai ije, bagepe banci saja sada paksa kita ikenai perbeben ras kiniseran. Ibas undang-undang kekristenan tentuna simegegeh harus nampati si kurang megegeh. Masalahna genduari, uga gelah simegegeh banci nampati si kurang megegeh. Enda banci terdalanken adi lit sada penggejapen i tengah-tengah kegeluhen sosial, sebab ibas sada perasaan e, terdorong man banta guna nampati senina turangta. Ibas pihak sideban e bentukna perintah. Tuhan singataken/merentah gelah simegegh nampati si kurang megegeh. Contoh, isuruh Tuhan gelah bangsa Israel harus nampati man anak melumang, diberu balu-balu ras kalak pertandang, janah adi rani harus itadingken man kalak musil, la banci kerina juma e i perani. Bagepe ibas padan simbaru khusus sijadi oratenta, ngataken harus solider man kalak simembutuhken penampat. Jadi solider bentukna aktif.
Kita banci ncidahken sikap solider (perasaan yang bersatu dengan orang) nandangi kalak sideban adi kita meteh maka kita ras kalak sideban eme radu ras tinepa Dibata, ras guna nggeluh sikeleng-kelengen. Kita la ngasup ncidahken soliderta nandangi kalak sideban adi spiritualitasta la nggeluh. Perlu siteh ibas kita ncidahken soliderta nandangi kalak sideban enda harus murni, la banci mengharapken balas, sebab sipatna tulus, janah tujunna gelah kalak sideban banci nggejapken kerna keleng ate Tuhan, ras ipujina Tuhan.

Pdt. Steven Kumenit, STh.,M.Min.

Tidak ada komentar:

Poskan Komentar