Kamis, 10 Maret 2011

Arti dan makna unsur-unsur dalam Kebaktian (Mazmur 100:1-5)

BAHAN PJJ GEREJA BATAK KARO PROTESTAN
TANGGAL 13-19 MARET 2011
Masmur 100 :1-5.

Tema : Erti Ras Makna Kerna Unsur-Unsur Ibadah

LATAR BELAKANG
1. Bentuk mazmur enda eme puji-pujin, janah sipatna eme nenahken jelma sinterem guna reh ku rumah pertoton ras ersembah man Tuhan alu rende ras meriah ukur. Pemazmur nenahken jelma sinterem ku rumah pertoton, erkiteken ibas rumah pertoton Dibata hadir, rumah pertoton eme ingan Dibata.
2. Tenah pemazmur man kerina isi doni gelah ersembah man Tuhan ibas rumah pertoton, sebab pemazmur enggo nggejapken uga riahna ras senangna ersembah man Tuhan ibas rumah pertoton (Mazmur 84:11). Ibas penggejapen enda me ate pemasmur mbagiken man doni enda (jelma), gelah doni enda pe banci nggeluh ibas keriahen.
3. Pemazmur ncidahken eksistensi Tuhan ras manusia. Ikatakenna maka Tuhan e Dibata kap, Janah Dibata kap sinjadiken manusia, Manusia sikerajangen Dibata, erkiteken sie me maka itegu-tegu Dibata manusia e, Dibata tuhu-tuhu jadi permakan man manusia. Enda ikataken pemazmur sebab lit alasenna, sipemena : ibas kerina tinepa Dibata, manusia me siipilih Dibata jadi alatna guna njagai ras ngusahai tinepa Dibata. Sipeduaken : bangsa Israel ipilih secara khusus, emaka itegu-teguNa bangsa Israel ibas perdalanen bangsa Israel ndarat ibas taneh perbudaken nari ku taneh Kanaan. Ibas perdalanen ku taneh Kanaan, Tuhan jadi ingan cicio ras benteng sinteguh, emaka amin gia jumpa musuh, musuh e talu ibahan Dibata. Sipeteluken : Pemasmur nggejapken perlindungen Tuhan secara pribadi. Sipeempatken : Amin gia manusia enggo erdosa, tapi lalap ateNa reh man manusia gelah manusia nggeluh ibas kebadiaan, erkiteken sie iberekenNa pengalemi dosa man manusia. Ibas palas enda me teridah tuhu-tuhu Dibata setia ras perkeleng kap man manusia.
4. Terdahuen, icidahken pemazmur kerna sie, gelah salang perukuren manusia, kepeken manusia e, tinepa Dibata si ndatken ingan sikhusus ibas Dibata. Emaka erpalasken sie me maka manusia harus reh ku rumah pertoton (ingan Dibata) guna ngataken bujur alu ende-enden pujin.
5. Ende-enden pujin harus isehken man Tuhan ibas rumah pertoton, sebab ibas ende-enden pujin, manusia banci ncidahken ukurna man Tuhan. Jadi ende-enden pujin merupaken salah sada respon kiniteken, janah ibas ende-enden pujin je lit sada kesaksin kerna ise Dibata ras kerna pemeliharaan Tuhan man manusia. Lebih mbages ate pemazmur gelah manusia ersembah man Tuhan saja, ula man dibata-dibata sideban.

THEOLOGIA NASKAH
- Itenahken pemazmur kerina manusia ijapa pe guna reh ku rumah pertoton.
- Ula lupa maka Tuhan e Dibata kap, Tuhan sinepa manusia, mannusia sikerajangenNa ras manusia e rarasanNa. Janah Tuhan e mehuli, perkeleng ras setia.
- Rendelah alu meriah ukur ras katakenlah bujur man Tuhan ibas rumah pertoton.

APLIKASI
Tahun 2011 enda perayaken gereja GBKP salah sada eme litna peningkaten mutu kebaktin. Erpalasken enda maka kita iajuk guna meteh kerna bentuk kebaktinta. Secara umm bentuk kebaktinta eme erpalasken tahun gereja.
Tema pjj eme erti ras makna unsur-unsur kebaktin, tapi secara teologis, siimaksudken eme unsur-unsur ibas Liturgi. Sebab adi kita ngerana kerna kebaktin maknana eme “sembah bakti” kita man Tuhan. Tapi liturgi eme “alat” sipejumpaken kita ras Tuhan. Janah ibas liturgi lit unsur-unsur siharus iikuti gelah ibas kita ersembah man Tuhan la meros, tapi tuhu-tuhu alu meriah ukur ras dem pengataken bujur.
Perlu siteh, bentuk kebaktinta eme bebas ras merdeka, maksudna la lit tekanan ras beban. Guna sie me, liturgi harus menjembatani gelah kita siersembah man Tuhan alu meriah ukur. Erkiteken sie me pengertin liturgi i jenda eme sada alat guna kita ersembah, erkiteken sie me, rusur sibegi liturgi kebaktin ntah pe tata cara kebaktin.
Ibas Liturgi enda lit unsur-unsurna. Secara “baku” si lit ibas liturgi GBKP eme Votum, Salam, Introitus, Pengakun dosa, Berita pengalemi dosa, Ngoge kata Dibata, khotbah, pengakun kiniteken, persembahen, pertoton Tuhan, pemasu-masun. Bagepe ibas liturgi e lit rende, tedis ras ertoto. Unsur-unsur enda lenga simaknai alu mbages, erkiteken sie lit singatakenca monoton bentuk kebaktinta, emaka lit anggota perpulungen erkebaktin ku ingan sideban. Adi sinen “urutan-urutan” si lit ibas liturgi maka ibabai kita guna ngeluh badia, ras ndalanken kegeluhenta tep-tep wari kerna kai singena ate Tuhan.
Mekatep sijadi persoalen ibas kebaktin eme pemilihan lagu si la cocok ras unsu-unsur liturgi ras tema ibas kebaktin. Jadi harus siteh rende ntah pe ende-enden pujin labo pelengkap ibas kebaktin, tapi ende-ende punya makna mbelin si seri ras unsur-unsur liturgi si lit. Janah perlu pe si teh, unsur-unsur si lit ibas kebaktin eme sada kesatuan si la banci ipisahken, emaka salah situhuna adi lit anggota perpulungen si reh terlambat ras mulih ope pemasu-masun.

Pdt. Steven Kumenit, STh.,M.Min.

Tidak ada komentar:

Posting Komentar