Selasa, 01 Maret 2011

AYAKILAH SI MEHULI (Lukas 10:38-42)

SERMON KHOTBAH
MINGGU, 6 MARET 2011
KLASIS PEMBANGUNAN MEDAN DELI TUA.

Introitus : Tapi kerina si nai kuakap untung, genduari kinirugin kuakap
erkiteken Kristus (Pilipi 3:7).
Ogen : 1 Korinti 13:1-13.
Khotbah : Lukas 10 : 38-42.
Tema : Ayakilah Si Mehuli.

LATAR BELAKANG
1. Adi si nen kerna turi-turin kerna keleng ate si ituriken Yesus man kalak Farisi alu make anding-andingen kalak Samaria si erkeleng ate (ayat 25-37), maka sijadi bahan khotbahnta sekali enda tempa lit kontradiksi kal. Sebab Marta si kuskas guna ngelai Yesus janah guna ncidahken perhatin ngalo-ngalo temue, seharusna dat pujin ibas Yesus nari tapi kepeken lang. Tapi adi siperdiateken kerna turi-turin kalak Samaria ras bahan khotbahta sekali enda eme nuriken kerna keleng ate secara horisontal (Kalak Samaria sierkeleng ate) ras secara Vertikal (Maria).
2. Ibas bahan khotbahnta sekali enda icidahken Lukas kerna dua karakter ras prioritas, janah sie iperanken Marta ras Maria. Karakter siicidahken Marta eme ngalo-ngalo temue entah pe uga bentuk ras cara ngal-ngalo Yesus alu ngidangken “pangan ras inemen” ( sekalak diberu sikuskas erdahin) tapi Maria lang. Karakter maria eme persinik, teneng, sederhana ras kundul isamping Yesus, janah enda sijadi prioritas Maria.. Padahal adi sinen arah “Tata krama” ngalo-ngalo temue, kai siibahan Marta eme simehulina, tapi ibas perspektif, ras ibas kacamata keselamatan, justru perbahanen Maria nge si tepat. Soalna siibutuhken Yesus eme kerna prioritas, ate Yesus eme siharus jadi prioritas ibas kegeluhen manusia. Sebab kerehen Yesus ibas doni enda labo guna ielai, tapi guna ngelai (band. Matius 20:28).
3. Siitekanken Yesus eme, manusia harus lit keterikaten pribadina ras Yesus selaku Mesias ras Tuhan. Ibas erti kata manusia harus lit waktu guna megiken pengajaren Yesus (Kata Dibata), sabab kata Dibata mereken kegeluhen (Band. Matius 4:4). Erkiteken sie me Yesus reh. Jadi kerehen Yesus labo guna man tapi guna ngajarken kerna kinirajan Dibata, kerna keselamaten.
4. Erkiteken marta sibuk ngelai, dungna ia ndabuh kubas dosa. Dosa silit bas Marta labo erkiteken ia sibuk nikapken pangan ras inemen guna Yesus, tapi dosa si lit bas Marta eme Marta terlalu sibuk guna hal-hal nikapken pangan maka la lit waktuna guna megiken kata Dibata, janah kesibukenna gelah ia ipujiken Yesus me ras gelah iteh Yesus maka si Maria enda sekalak diberu siperkisat.
5. Perlu siteh, maka kejadin enda ntah pe turi-turin enda paksa Yesus sangana i rumah Lazarus eme i Betania, sada kuta si ndeherken Yerusalem. Ibas refrensi sideban, kepeken Yesus piga-piga kali reh ku rumah Lazarus, janah paksa sie Lazarus la i rumah. Emaka si ngalo-ngalo Yesus me turang Lazarus eme Marta ras Maria.
6. Sada catatan, ibas perbahanen Marta sibage, labo berarti Marta la mediate nandangi kehadiran Yesus, tapi harus siteh bage me bentuk pengalo-ngalo Marta nandangi kehadiran Yesus. Emaka adi sinen ibas refrensi sideban, khususna ibas kitab Yohanes, tuhu-tuhu lit sada pengakun Marta kerna Yesus eme ise si tek man Yesus dat kegeluhen amin gia ia enggo mate (band. Yohanes 11:26-27). Emaka situhuna, teguran Yesus man Marta, labo guna menyalahkan Marta, tapi guna ngingetken man Marta gelah Marta la sibuksa nandangi hal-hal si jasmani, si ermasap-masap, amin gia situhuna e pe penting. Tapi sipaling penting eme pusuh sisalang guna ngalo-ngalo Yesus ras memprioritasken Yesus. Jadi, ate Yesus ngataken man Marta gelah ula min hal-hal si jasmani mperbudak Marta, sebab adi enda siterjadi maka Marta “ndabuh” kubas kesibukenna sendiri alu bage tading me hal sihakiki ibas kegeluhen kalak si tek man Yesus eme megiken KataNa.
7. Hal siterbaik si la banci itangko ise pe eme megiken kataNa, sebab ibas kata Yesus nggeluh kegeluhen si rasa lalap. Ibas nggeluh ersada ras Yesus kebenaren ras kearun ate la banci “menggerogoti” kegeluhen manusia. Ibas nggeluh ersada ras Yesus maka manusia ngasup ndalanken kai singena ate Tuhan.

APLIKASI.
Adi sinen ibas kejadin 1, maka kerina si lit ibas doni enda mehuli nge, ijadiken Dibata mehuli kerina, saja erkiteken manusia enggo nggeluh ibas dosa, dungna kai simehuli ndube icedaken manusia (kita), bagepe enggo cukup mesera ngenen ras ndarami simehuli. Emaka siterjadi genduari mekatep mehuli rikutken ukurenta nge sirusur sibahan, dungna kita nggeluh ibas dosa, sebab kai simehuli sijadi ukurenta, la seri ras si mehuli menurut ukuren Dibata. Emaka ibas paksa enda sijadi penekanan eme mehuli ukurenta, terlebih mehuli ibas ukuren Dibata. Jadi penungkunen man banta, uga gelah sidat simehuli si ngena ate Dibata ? Janah kai-kai saja simehuli e. Adi arah bahan khotbahnta maka simehuli eme nggeluh ibas keterhubungenta ras Yesus Kristus, sebab ibas kita nggeluh ersada ras Yesus maka kita nggit megiken kata Dibata, janah arah je siaplikasiken simehuli singena ate Dibata, eme kekelengen. Kekelengen enda me si enggo mesera siakap ndalankenca, janah siakap rugi adi sipraktekkan (ibas ukuren manusia), sebab adi sipraktekkan enda, maka lit pengorbanan bas kita, apakah pengorbanan materi ntah pe pengorbanan waktu ras tenaga.
Kita harus nggeluh ibas kekelengen, sebab enda merupaken undang-undang (band. Matius 22:37-40). Hukum enda ibuat ibas padan sindekah nari eme Ulangen 6:4-5, simenekanken gelah bangsa Israel harus ersembah man sada Tuhan saja, emaka ngekelengi Tuhan harus ibas totalitas pribadi. Alu kata sideban ula lit Dibata sideban ibas kegeluhen bangsa Israel. Bagepe ibas Imamat19:18, menekankan kerna la menuntut balas nandangi kejahatan kalak sideban ras harus ngekelingi musuh.
Perintah enda me si lanai sidalanken. Sinen Paulus, ope ia itangkap Kristus jadi serayanNa, akapna kai siibahanna merupakan sada keuntungen man bana eme kiniganjangen ukur ras ngayaki, niksa ras munuh pengikut Kristus, tapi kenca Paulus itangkap Kristus, kerina siakapna mehuli (untung) kepeken kerina e kerugin man bana. Ija kin palasna emaka ikataken rugi? Palasna eme siibahanna erpalasken sura-sura manusia.
Jadi simehuli eme ndalanken kekelengen, sebab ibas kita ndalanken kekelengen dirinta ersada ras Tuhan ras ersada ras jelma sideban. Sebab ibas kita nggeluh ibas kekelengen maka man Yesus saja siikelengi ras siisembah kita, bagepe sedekah kita tading ibas doni enda Yesus Kristus saja sijadi pengarapenta. Emaka lanai kita pang erbahan si la mehuli ibas kegeluhenta (simenurut doni, enda mehuli), enda ngasup silakoken erkiteken kata Dibata palasna ras Kesah Si Badia singajari kita guna erbahan simehuli singena ate Tuhan, bagepe ngasup sicidahken biak sikeleng-kelengen. Biak sikeleng-kelengen enda erkiteken kita nggeluh ibas sada komunitas, apakah ibas gereja ras masyarakat (kuta ras ingan pendahinta). Ibas kita ndalanken kekelengen ibas sada komunita maka siharus nggeluh bas kita eme kiniteruken ukur, lemah lembut, saber ate, la pergelut (band. Epesus 4:2). Ibas kita nggeluh ibas sikeleng-kelengen maka kita kerina nggeluh ibas sada kula. Janah adi lit perubaten ibas sada komunitas e, minter kita sialem-alemen, emaka la sempat siibahan ku pengadilen. Engkai enda terjadi erkiteken keleng ate Tuhan enggo jadi sikerajangenta, emaka enda lalap sipraktekken ibas kegeluhenta. Janah lebih asangken sie la ateta ncedai dirinta, bagepe keluarganta ras temanta sendiri. Emaka marilah adi ateta dat simehuli la banci lang nggeluh lah ibas persadan ras Yesus Kristus janah sibegikenlah kataNa.

Pdt.Steven Kumenit, STh.,M.Min.

Tidak ada komentar:

Posting Komentar