Kamis, 31 Maret 2011

Berita Si Meriah Ngerembakken Kita Ras Dibata (Kisah Para Rasul 8:4-13)

BAHAN PJJ GEREJA BATAK KARO PROTESTAN
TANGGAL 3 – 9 APRIL 2011

Perbahanen Rasul-Rasul 8:4-13

Tema : Berita Si Meriah Ngerembakken Kita Ras Dibata

LATAR BELAKANG
1. Penghambatan ras penganiayaan siilakoken pemerintah, pengadilan agama ras Saulus erbahanca nterem kalak si tek man Yesus Kristus ipenjaraken ras ibunuh, termasuk Stepanus, sekalak diaken si mbaru ipilih para rasul guna nampati pelayanan meja (band. Perbahanen 6:5), janah kalak sideban (kalak si tek) kiam ku kuta-kuta sideban, termasuk ku Samaria. Kalak si tek merap i kuta Samaria.
2. Pilipus (Labo rasul, tapi sekalak diaken si radu ras ipilih ras Stepanus) mberitaken kerna si Engkelini siipadanken Dibata man kerina jelma. Pemberitaan Pilipus enda irespon kalak Samaria, emaka nterem kalak si tek man Yesus Kristus. Ibas pemberitaan siitekanken Pilipus enda, erkiteken memang kin cukup nterem kalak Samaria sinimai kerehen Mesias si ipadanken Dibata. Sebab memang kalak Samaria enda, situhuna bagin ibas bangsa Israel, tapi erkiteken enggo terjadi kawin campur ras dualisme kiniteken, bagepe unsur politik, dungna kalak Jahudi lanai ngkira kalak Samaria eme baginna ntah pe seninana.
3. I kuta Samaria labo berarti pendahin Pilipus la lit tantangan, lit nge, tantangan e eme kuasa kegelapan siipake Simon, sekalak kepala sekte (persekutuan ilmu hitam). Alu litna ilmu hitam ibas Simon e, maka melala sihir-sihir siibahanna, janah akap kalak, enda tanda sengget ibas Dibata nari, emaka nterem pengikutna, janah ihamati kalak pe ia. Tapi ibas pendahin Pilipus ras tanda-tanda sengget sijadi, ifokuskan ku pepalem kalak sakit ras mpelawes setan-setan, maka “kuasa” Simon jadi lemah, dungna pengikutna bagepe ia mereken dirina guna iperidiken, jadi pengikut Kristus. Kai siibahan Pilipus tuhu-tuhu ngena kal ate jelma si nterem, emaka subuk di laki bagepe diberu, termasuk pe Simon enggo jadi pengikut Kristus.
4. Tupung Pilipus berhadapan ras kuasa kegelapan, kalak sinterem mbading-mbandingken kuasa si lit bas Simon ras si lit bas Pilipus, tapi dungna kuasa Dibata nge simenang, janah si mamang ateta eme Simon la merawa, padahal selaku manusia kuasa ras kehamatanna lanai lit.
5. Pemberitaan kerna Mesias ras tanda-tanda sengget siibahan Pilipus erbahanca jelma sinterem ngaloken Yesus alu meriah ukur, la lit paksaan, emaka ibas kota Samaria e idemi alu keriahen.

APLIKASI
Ibas sejarah keselamatan manusia, Dibata pedatandakan ise diriNa ras ate Dibata gelah kita selaku tinepaNa nggeluh alu make erbage-bage sarana, eme 1). Dibata sendiri sipetandakan diriNa man sesekalak jelma, emaka tek kalak e man Dibata. 2). Make gerejaNa. Gereja erdahin alu mberitaken mberita keselamatan, Berita keleng ate Dibata man doni enda, emaka doni enda termasuk manusia jadi tek man Yesus Kristus. 3). Dibata make kita selaku anakNa Mberitaken Berita Si Meriah man ise saja arah kata ras perbahanan, gelah kalak si deban tek man Tuhan Dibata. Emaka situhuna berita Si Meriah enda merupaken sada Berita si banci ngerembakken kita ras Dibata.
Erkiteken bentukna Berita si meriah maka funsina eme gelah ise si megiken Berita Si Meriah enda ndatken keriahen, janah tetap ia nggeluh ibas kerembaken ras Dibata. Sebab situasi doni enda (peperangen, praktek-praktek ketidak-adilen, penindasan, KKN, cuaca pancaroba ras keegoisan manusia, rsd) erbahanca kita nggeluh ibas kepiceten, perbeben ras kiniseran. Kegeluhen sibagenda erbahanca geluhta nggeluh ibas ketertekanan jiwa, mental ras jasmani pe, emaka tempa kita la ngasup nggeluh ibas keriahen, bagepe ngerembakken diri ras Dibata, sebab erkiteken picet ukurta, mekisat kita ku gereja ras kebaktin-kebaktin sideban, emaka erdauhna kita ras Dibata. Tapi adi siangka lah maka Berita Si Meriah e, subuk khotbah, bagepe pelayanan-pelayanan gereja sideban mbaba keriahen man banta, janah enda ibas Dibata nari maka si lit bas kita eme mbuka pusuhta guna ngaloken Berita Si Meriah Berita si mereken keriahen ras pengapul man banta alu bage tetap nge kita rembak ras Dibata ras la nggit nadingken perminggun (gereja). Sebab ibas kita megiken kata Dibata, maka kinitekenta ertambah-tambah, sebab erdewasana kinitekenta salah sada eme arah megiken kata Dibata, emaka adi litlah cupingta begikenlah (Matius 13:9; 13:16; Markus 4:9,23; Ketangkasen 2:7, 11, 17, rsd).

Pdt. Steven Kumenit, STh.,M.Min.

Tidak ada komentar:

Posting Komentar