Etika Dalam Ibadah (1 Timotius 2:1-10)

BAHAN PJJ GEREJA GBKP
TANGGAL 20 – 26 MARET 2011
1 Timotius 2 : 1- 10.

Tema : Etika Bas Ibadah.

LATAR BELAKANG
1. Si jadi oratenta sendah eme pengelayasi rasul Paulus man Timotius sisangana erdahin i perpulungen Epesus. Pengelayasi enda tujunna eme gelah Timotius banci meteh kerna makna nggeluh selaku kalak kristen, bagepe gelah Timotius banci pe ngelawan ajaran-ajaran papak singgeluh paksa e.
2. Ibas pengelayasi e, iajarken Paulus kerna kewajiban kalak kristen guna notoken kerina jelma, gelah kerina jelma banci nggeluh ibas keselamatan. Ibas pengajaren enda, maka Paulus ngelawan pemahaman si papak kerna keselamatan hanya man kalak tertentu ntah kelompok tertentu saja. Sebab lit pengajaren si berkembang paksa sie, eme siiajarken kelompok gnostik, singataken maka keselamatan hanya imiliki man kalak tertentu saja si enggo ndatken tingkat kerohanian si meganjang, jadi hasil usaha manusia. Bagepe lit kelompok kristen Jahudi, singatakenca maka keselamaten banci idatken adi isunat, jadi la terjeng tek man Yesus ngenca.
3. Bagepe itekanken Paulus man Timotius, gelah enda siiajarken Timotius man perpulungen eme tanggungjawab perpulungen (kalak si tek) notoken raja-raja ras penguasa gelah kalak kristen banci nggeluh senang ras dame. Pengajaren Paulus enda labo erkiteken Paulus mbiar, tapi bage kin seharusna kalak kristen nggeluh selaku masyarakat ibas sada negara. Sebab adi lalap sitotoken raja-raja ras penguasa e, maka kuasa Tuhan me sierdahin man raja-raja ras penguasa e, alu bage kepemimpinan raja-raja ras penguasa erpalasken kepentaren si murni. Jadi ibas raja-raja ras penguasa merentah, maka iperentahna alu bujur ras adil (band. Jeremia 29:7). Situhuna siitekanken Paulus, labo gelah kalak kristen nggeluh mehuli, lanai lit tekanan ras hambatan ibas pemerintah, tapi gelah raja-raja ras penguasa pe nggeluh ibas keselamatan.
4. Keselamaten banci imiliki kerina jelma erkiteken Kristus. Janah enda sue ras sura-sura Dibata. Ema ka si tuhuna ceda ate Dibata paksa manusia nggeluh ibas dosa. Emaka keselamaten labo milik jelma ntah pe kelompok tertentu saja, tapi milik kerina jelma.
5. Paulus la saja menekanken kerna hubungen gereja ras masyarakat, tapi pe kerna ggeluh badia ibas kalak si tek man Tuhan. Selaku kalak si tek man Tuhan, harus ersembah man Tuhan saja. Janah ibas ersembah man Tuhan harus ibas ukur ras pusuh sibersih, kai siteridah i darat, e ka si lit i bas. Erkiteken sie me penekanen Paulus man si dilaki ibas ersembah harus ncidahken perbahanan si mehuli janah ibas ertoto harus nadingken perbahanen-perbahanen si la mehuli, gelah man Dibata saja perukurenna. Bagepe man si diberu, perhiasenna sebo arah darat, tapi perhiasan si lit ibas pusuh sibersih nge si jadi palas jumpa ras Tuhan. Jadi adi peruis harus sopan ras sederhana saja. Penekanan enda, labo berarti Paulus melarang diberu make perhiasan ras ngikuti sue ras trend si genduari, tapi siitekanken Paulus eme kai si lit ibas pusuh, e ka si lit ibas darat.

THEOLOGIA NASKAH
- Totoken man Tuhan kerina jelma, termasuk pe raja-raja ras penguasa gelah ia kerina selamat.
- Erkiteken Kristus maka kerina jelma banci selamat.
- Subuk dilaki ras diberu ersembahlah man Tuhan alu pusuh sibersih.

APLIKASI
Ibadah eme tanggung jawab kita selaku kalak kristen, sebab ibas kita ersembah man Tuhan berarti kita patuh man Tuhan saja. Tapi ibas kita ersembah, labo berarti ersembah bage-bage saja, tapi lit etika ibas kita ersembah.
Perlu lebe si teh, adi kita ngerana kerna etika maka kita ngerana kerna kai simehuli sue ras golongan ntah masyarakat. Alu bage situhuna etika enda banci erbeda-beda sue ras ingan ras masyarakat tertentu. Tapi adi kita ngerana kerna etika ibas ibadah maka tentuna kita ngerana uga gelah cocok ras payo i lebe-lebe Dibata. Emaka sipaling penting ibas kita ersembah man Tuhan, sikapta harus tuhu-tuhu sikap ersembah man Tuhan, janah la banci pekulah-kulah ibas ibadah. Harus min kita mbiar man Tuhan. Emaka ula kita gejek, adi sangana kebaktin, bagepe ula kita rusur ndarat guna koyok-koyok ras ngisap rokok i darat (bagi sidilaki). Sebab ibas perbahanenta si bage, berarti la kita mehamat man Tuhan. Padahal ate Tuhan, ibas kita ersembah man baNa, kita ras Tuhan banci nggeluh ibas persadan ras la banci i ganggu sura-sura daging. Janah kerna peruista, tentuna harus ka isesuaiken ras makna kita ersembah man Tuhan. Emaka perlu siteh ersembah man Tuhan merupaken “pesta kiniteken”, emaka kita nggeluh ibas keriahen. Erkiteken kita nggeluh ibas keriahen, tentuna peruista pe harus uius si “pantas”, rapi, sopan ras ngena ate Tuhan.

Pdt. Steven Kumenit, STh.,M.Min.