Kematen ras Kekeken Jesus Mpelimbarui Geluhta (Markus 15:16-20; 42-47)

BAHAN PJJ GEREJA BATAK KARO PROTESTAN
TANGGAL 27 MARET – 2 APRIL 2011
Markus 15:16-20; 42-47.

Tema : Kematen Ras Kekeken Jesus Mpelimbarui Geluhta.

LATAR BELAKANG
1. Sura-sura guru-guru agama, imam-imam kepala ras kalak Farisi nandangi seh, sebab kentisik nari Yesus iputusken selaku kalak siersalah, amin gia situhuna, alu jelas labo lit iidah Pilatus kesalahan Yesus. Amin gia lit kuasa Pilatus guna mbebasken Yesus, tapi i sada pihak, Pilatus la pang mbebasken Yesus, sebab mbiar ia man jelma sinterem janah banci terjadi kerusuhan, bagepe Yesus tetap sinik, amin gia kai siituduhken jelma sinterem la tuhu, sebab enggo iteh Yesus, maka dalan guna nelamatkan manusia harus arah kiniseran ras kematen, sebab nggo pernah ipindoken Yesus ibas pertotona, paksa Yesus ertoto i peken Getsemane, nina “ o Bapa adi banci min calung kiniseran la ku inem. Telu kali Yesus ertoto, tapi dungna nina Yesus, peratenNdu lah si jadi. Jadi memang enda kerina enggo she paksana Yesus ndalani pelayanen arah kiniseran ras kematen, gelah manusia terkelin.
2. Iendesken Pilatus Yesus man prajurit-prajuritna, emaka minter igombang-gombangi prajurit-prajurit pilatus Yesus. Ipakeken prajurit-prajurit uis megara (ungu) simerupaken simbol sekalak pahlawan si mbaru saja menang ibas peperangan. Sebab biasana sekalak pahlawan adi ia menang, janah muat bengket ku kota siitalukenna, biasana pake uis megara (ungu). Bagepe iteh prajurit-prajurit pilatus maka kalak Jahudi sangana nimai Mesias guna banci mbebasken kalak Jahudi, termasuk mbebasken kalak Jahudi ibas kekuasaan bangsa Romawi, emaka ibayuna me tengkuluk duri janah ipakeken ku takal Yesus, bagi tempa ihormatina, padahal merupakan sada ejeken nge man Yesus, termasuk pe man kalak Jahudi. Kenca puas prajurit gombangi Yesus, maka ibabana Yesus ku darat istana guna i salibkan.
3. Penyiksaan siinanami Yesus, memang merupakan sada kebiasaan siilakoken prajurit nandangi kalak siihukum mate. Emaka seh me kai siinubuatken nabi Yesaya eme Ia itulak dingen igombangi igengkenna kiniseran ras si mesui. Ciga ate kalak ngenen ia, la iergaken, la lit si mperdiatekenca (Yesaya 53:3).
4. Kenca Yesus enggo mate reh me sekalak kalak bayak, anggota pengadilen agama, gelarna Yusuf kalak Arimatea man Pilatus guna mindo mait Yesus gelah ia saja singuburken Yesus. Perlu siteh, sengaja Yusuf mindo mait Yesus e ope jam enem karaben, erkiteken wari sabat lenga benaken. Memang wari sabat ibas wari sabtu, tapi persikapen guna wari sabat enggo ibenaken mulai jam enam karaben ibas wari jumat. Emaka mulai wari jumat jam enem karaben kalak Jahudi lanai banci erdahin. Erkiteken sie maka iupayaken Yusuf gelah mait Yesus banci ikuburken ope jam enam karaben, janah tangtangna mamang ate Pilatus, sebab ibas pikiranna Yesus lenga mate, tapi kenca isuruhna prajurina guna mastikenca, janah idatna laporan ibas prajurit nari maka Yesus tuhu-tuhu enggo mate, minter iueken Pilatus, janah Yesus ikuburken i peken Yusuf Arimatea, janah kuburen enda memang kin enggo isikapken Yusup.
5. Ibas kebiasaan siterjadi man kalak si ihukum mate (isalibkan), adi ibas wari e, ope denga jam enam karaben (wari jumat), si ihukum e lenga mate, maka ia harus ibunuh janah harus minter ikuburken (Yohanes 19:31). Sie me si ipastiken Pilatus, apakah Yesus enggo mate ntah lenga.

APLIKASI
Dosa erbahanca hubungenta ras Dibata lanai harmonis. Bagepe erkiteken dosa, kegeluhenta lalap ibaluti alu erbage-bage perbeben ras kiniseran, tapi enda kerina jadi perhatin Dibata. La ate Dibata kita nggeluh ibas situasi sibage, bagepe nggeluh ibas kematen (band. Roma 6:23), erkiteken sie me Yesus jadi “Biri- biri” guna jadi korban pengalemi dosa. Ibas kematen Yesus kerina dosa-dosa manusia ikut itanemken, alu bage dosa lanai erkuasa man banta. Janah ibas kekeken Yesus Kristus ibas simate nari, ngataken maka kuasa iblis la banci nahan Yesus ibas doni kematen (kerajaan setan), kuasa Yesus lebih meganjang asangkan kuasa setan. Alu pengertin sideban italuken Yesus kuasa setan. Radu ras sie, kita pe ikut imenangken, emaka ibas kekeken Yesus, kita ngaloken kegeluhen simbaru, ngaloken keselamatan. Emaka kalak singaloken keselamatan harus min merespon alu ndalanken kai singena ate Dibata ibas perbahanenta tep-tep wari, ulanai kegeluhenta ikuasai si iblis.
Kekeken Yesus tuhu-tuhu mpelimbarui kegeluhenta, emaka kita si enggo ipelimbarui harus tetap ndahiken dahin simehuli alu la mbiar-biaren man doni enda.

Pdt. Steven Kumenit, STh.,M.Min.