Persekutuan Anaka-Anak Tuhan Dalam Jemaat (1 Johanes 1:1-7)

BAHAN PJJ GEREJA BATAK KARO PROTESTAN
TANGGAL 6 – 12 MARET 2011
1 Johanes 1:1-7.

Tema : Kiniersadan Anak-Anak Dibata Bas Perpulungen.

LATAR BELAKANG.
1. Perkembangen kekristenen ibas abad-abad sipemena cukup mberat, sebab la saja kalak kristen erhadapan ras pemerintah si la meriah ukurna nandangi pekembangen kekristenan, tapi pe kekristenan paksa e iperhadapken ras piga-piga ajaren si papak, janah pengajar si papak enda nai sada persadan ras kalak kristen, tapi “genduari” lanai, bage ibas ajaren gnostik nari. Jadi tuhu-tuhu pengajaren enda enggo ersada ngelawan kalak kristen, si dungna kalak kristen nggeluh ibas perbeben kiniteken (bigung). Pengajaren siikembangken pengajar sipapak eme keselamatan banci idatna sendiri, la arah Yesus Kristus. Bagepe arah ajaren gnostik, nina : Yesus Kristus labo Mesias, Yesus hanya manusia biasa, janah kematen ras kekeken Yesus, sada “khayalan” ngenca. Jadi labo Yesus si mate e. Bagepe nina, Yesus ras Mesias dua oknum siberbeda, janah Ia la ersada.Tentuna enda mpengaruhi kiniteken perpulungen.
2. Ibas situasi sibagenda me surat 1 Petrus isuratken man perpulungen kristen, gelah kinieken perpulungen megegeh ras tetap terjaga.
3. Ibas surat enda, “rasul Yohanes” nuriken kerna eksistensi Yesus sue ras pengalamenna, sebab Yohanes merupaken salah sada “teman” Yesus, jadi itehna kegeluhen, kuasa ras ke-Tuhanan Yesus. Jadi penuriken Yohanes, sipatna eme kesaksin. Erkiteken sie nina,enggo idah, ibegi kami ras enggo idadap kami alu tan kami (ayat 1-3).
4. Kesaksin Yohanes kerna Yesus eme Kata simereken kegeluhen. Maksudna Yesus enda me Dibata situhu-tuhu. Nai ope denga doni enda lit, ijadiken Dibata kerina subuk doni enda bagepe manusia arah kataNa, janah kenca kerina e jadi, maka terjadi me kegeluhen, emaka sipat Dibata eme mereken kegeluhen (band. Yohanes 1:1-4; 6: 63; 14:6), janah kegeluhen e mereken terang man manusia. Ertina ibas kegeluhen manusia lit kebenaren, keadilen, keriahen, kebadiaan ras kemulian. Janah guna sie me situhuna kalak kristen idilo, sebab kenca manusia ndabuh kubas dosa, sie tempa enggo bene bas kegeluhen manusia nari, janah erkiteken Yesus maka manusia enggo banci mulihi dat kegeluhen arah Terang si lit bas Yesus, sebab Yesus me Terang e (band. Yohanes 8:12), biak sigelap labo lit bas Yesus.
5. Ate Yohanes nuriken kerna sienda kerina, gelah perpulungen nggeluh ibas persadan ras Dibata bagepe ras sapih-sapih kalak kristen. Janah enda me sipat Dibata nggeluh ibas persadan. Emaka kalak singgeluh ibas persadan subuk ras Dibata bagepe ras sapih-sapih kalak kristen, kalak kristen harus erdalan ibas Terang e (Yesus Kristus), janah harus ibersihken ibas dosa-dosa nari, sebab e biak si gelap, janah enda me si enggo ibahan Yesus arah kematenNa. Jadi ate Yohanes ngataken maka Yesus simerupakan Anak Dibata ras Mesias tuhu-tuhu enggo mate guna manusia.

THEOLOGIA NASKAH
- Yesus eme Kata simereken kegeluhen.
- Yesus eme Mesias jine, tuhu-tuhu nggeluh sebab enggo iidah, ibegi ras idadap kami.
- Yesus eme Teang e ras si enggo mate guna mbersihken kerina dosa-dosa nari.

APLIKASI
Adi kita ngerana kerna persadan anak-anak Dibata, berarti kita ngerana kerna gereja situhu-tuhu, sebab gereja situhu-tuhu eme jelmana (kita). Emaka selaku gereja kita la nggeluh ibas persadan ras sapih-sapih kalak kristen si tek man Yesus Kristus, tapi pe kita nggeluh ibas persadan ras Yesus Kristus, sebab Takal ereja eme Yesus Kristus. La lit sibanci ngataken ia gereja, tapi la ersada ras Yesus Kristus. Ibas persadan ras Yesus Kristus, kita nggeluh ibas keselamatan. Bagepe ibas bentuk sideban, ipakeken Yesus gereja guna mbina ngajarken kerna kegeluhen keselamatan man banta selaku anak-anakNa. Pengajaren Yesus e harus irealisasiken ibas kegeluhen anggota perpulungen (anak-anak Dibata), salah sada pengajaren e, kita selaku anak-anak Dibata harus mpraktekken kerna kekelengen. Sebab ibas kita merealisasiken enda maka kita banci sisampat-sampaten ras banci mereken serpang pulah man anggota sideban singgeluh ibas perbeben ras kiniseran. Alu bage anak-anak Dibata banci ngenanami kehadiran gereja. Emaka ibas gereja biak kegelapan harusna min la nggeluh, sebab adi nggeluh enda me si “menghambat” kiniersadan perpulungen.
Ibas peran gereja siinanami anggota perpulungen maka anggota perpulungen nggejapken ia lit ibas kedamen, alu bage la atena nirangken persadan e, janah perkembangan gereja, subuk spiritualitasna, bagepe kuantitasna ertambah-tambah tep-tep wari. Guna sie gereja harus menata kerna eksistensina, kebaktinna ras pengajarenna. Maksudna gelah peranan gereja sue ras kebutuhen anggota perpulungen, labo sue kebutuhen pribadi runggun gereja ntah jelma tertentu.

Pdt. Steven Kumenit, STh.,M.Min.