Kamis, 05 Mei 2011

BUAH-BUAH ROH (Galatia 5:22-26)

BAHAN PJJ GEREJA GBKP
TANGGAL 8 – 14 MEI 2011
GALATI 5:22-26.

Tema : Ulih Kesah Si Badia (Buah-Buah Roh).

LATAR BELAKANG
1. Secara umum Kitab Galati enda eme surat rasul Paulus man perpulungen Galati, janah fungsina eme guna menasehati perpulungen, sebab paksa sie lit kelompok kristen asal Yahudi sitetap njemak ajaran agama Yahudi. Ajaran enda ngataken keselamatan labo bias adi terjeng tek man Yesus Kristus saja, tapi pe harus ngikuti Taurat, khususna kerna sunat, emaka ajaran enda erbahan “kebingungan man perpulungen, bagepe nggo lit siterikut kubas ajaran e. La saja pengajaren enda si turah ibas perpulungen, tapi pe lit “hasutan-hasutan” gelah perpulungen ngelawan Paulus, sebab Paulus labo rasul. Enda ibahan Paulus sebab, perpulungen Galati, Paulus sendiri simantekisa.
2. Ibas pandangan Paulus kerna kalak si enggo tek man Tuhan Yesus Kristus eme kalak si enggo tek man Tuhan berarti ia enggo bebas ibas kutukan Hukum taurat. Siimaksudkan kutukan hukum taurat eme sada pandangan singataken maka arah hukum taurat, ntah ibas patuh ndalanken hukum taurat maka manusia banci selamat. Paulus ngataken enda sebab keselamatan labo arah ndalanken hal-hal si formalitas agama khususna kerna sunat, tapi kerna tek man Tuhan saja. Jadi kalak si enggo bebas lanai ia terikat man hukum taurat tapi ndalanken kai singena ate Tuhan. Janah enda me siikataken pendahin Kesah Si Badia.
3. Paulus mereken penjelasan kerna makna kalak si enggo tek man Yesus Kristus, ija kalak si enggo tek man Yesus Kristus berarti “kerincuhen dagingan” lanai erkuasa bas diri kalak si enggo tek man Yesus, sebab sipat-sipat kedagingan enggo ibunuh i kayu persilang, tapi si lit eme ulih Kesah Si Badia. Ulih Kesah Si Badia lit erkiteken batang si mejile, janah batang e eme Yesus Kristus (band. Yohanes 15).
4. Paulus makekan kata buah (band. Bahasa Karo = ulih) gelah mpertegas kerna makna buah, ija buah e la pernah iban, tapi jadi alu sendirina. Sehubungen ras si enda, ate Paulus ngataken man perpulungen Galati eme kerna makna ulih Kesah Si Badia. Ulih Kesah Si Badia sipatna eme mpersadaken manusia.
5. Nasehat Paulus man perpulungen i Galati enda khususna kerna ulih Kesah si Badia eme gelah pepulungen nggeluh ibas ulu kegeluhen eme Kesah Si Badia. Jadi, kegeluhen situhu-tuhu merupaken penekanan Paulus. Perpulungen Galati enggo nggeluh erpalasken Kesah Si Badia emaka ula min bene keselamaten e erkiteken kerincuhan daging. Sebab adi bas perpulungen lit meganjang ukur, la lit kekelengen, la lit kesabaren, erbahan si la mehuli ras la terkuasaina dirina, rsd berarti ngelawan Kesah Si Badia, emaka ije lanai lit keriahen ras kemalemen ate. Jadi alu litna ulih Kesah Si Badia ibas diri anggota perpulungen maka siterjadi i tengah-tengah perpulungen eme hubungen si harmonis, bagepe perpulungen ndalanken kai siisura-suraken Kesah Si Badia, alu bage maka la sia-sia kematen Yesus Kristus i kayu persilang.

THEOLOGIA NASKAH
- Ulih Kesah Si Badiah la lit isingetken ibas undang-undang.
- Kalak sienggo jadi sikerajangen Kristus, perukuren secara manusia enggo ibunuh ibas kayu persilang, rikut ras kerincuhen dagingna bage pe sura-surana.
- Erkiteken Kesah Si Badia me si mereken kegeluhen man banta, e maka lagu langkahta pe arus rikutken peraten Kesah e.

APLIKASI
Ulih Kesah Si Badia eme pemere Dibata, janah enda kerina lit bas kita, sebab kita enda manusia simbaru. Manusia si nggeluh ibas makna Paskah. Janah tujun ulih Kesah Si Badia eme gelah kita tetap jadi anak-anak Dibata ras tetap nggeluh ibas persadan, bagepe gelah gereja Tuhan lebih maju. Janah lebih asangken sie, ibas sipraktekkan ulih Kesah Si Badia, emaka alu sendirina enggo sicidahkan karakterta selaku kalak si erkiniteken man Tuhan Dibata. Janah reh rusurna kita mpraktekkan ulih Kesah Si Badia ibas kegeluhenta, maka reh dewasana kegeluhenta erkiniteken man Tuhan, sebab kita ngasup mpraktekkan ulih Kesah Si Badia erkiteken siteh nge maka la sia-sia kita ndalanken kerina e, janaj pagi dat kita me rudang-rudang kegeluhen siibereken Tuhan man banta. Kita ngaloken pasu-pasu idur Dibata nari. Emaka gelah ulih Kesah Si Badia e berkwalitas ibas kegeluhenta, kita harus tetap nggeluh ras Tuhan, sebab Ia nge sipengasup kita guna ndalanken sie. Bagepe alu litna ulih Kesah Si Badia bas kita, berarti kegeluhenta ras kinitekenta bertumbuh. Sebab lalit Ulih (Buah) ibas batang kayu si enggo mate, kerina buah reh ibas batang kayu si nggeluh. Bage me kerna kegeluhenta arus maka nggeluh, janah rurat (berakar) kubas Yesus Kristus.
Ulih Kesah Si Badia si lit man banta mbaba pengaruh si positif ku bas kegeluhenta, la saja secara pribadi erkiteken kita nggeluh ibas keriahen, kemalemen ate, nggeluh ibas kesabaren, ndalanken perbahanen simehuli, setia, ukur meteruk ras banci ngkuasai dirinta. Bagepe ngena ate kalak man banta sebab sipraktekken ulih Kesah Si Badia. Bagepe siharapken man kalak sideban gelah ia pe banci mpraktekkenna ulih Kesah Si Badia si lit bas kita ibas kegeluhenna tep-tep wari, alu bage banci ia terkelin.
Memang bagi simesera siakap mpraktekkan ulih Kesah Si Badia e erkite-kiteken perbeben ras kiniseran sireh man banta. Tapi situhuna adi lalap kita ersada ras Tuhan. Maka ngasup nge sipraktekken kerina e.

Pdt. Steven Kumenit, STh.,M.Min.

Tidak ada komentar:

Poskan Komentar