Mari Siperdiateken Pendidiken Anak-anakta (Heber 12:3-11).

BAHAN PJJ GEREJA GBKP
TANGGAL29 MEI – 4 JUNI 2011
=============================
HEBER 12 : 3 – 11

Tema : Mari Siperdiateken Pendidiken Anak-anakta.

LATAR BELAKANG
1. Secara umum banci sikataken kalak kristen sitading i taneh perlajangen (ndatken tantangen sicukup mberat akapna (nggeluh ibas perbeben). Tantangen e reh ibas pemerintah nari ras kalak Yahudi, emaka kalak kristen enggo mulai kecewa nandangi kekristenan, janah enggo mulai rukur guna muliken ku agama Yahudi, sebab tupun ia agama Yahudi labo ia isak-isakan kalak. Alu kata sideban kalak kristen asal Yahudi paksa sie lit ibas bahaya kebenen pengarapenna man Yesus Kristus, emaka mulih atena ku Yudaisme.
2. Ibas situasi sibagenda me reh surat Heber enda, guna mpegegehi kalak kristen si lit ibas perlajangen gelah tetap njemak ras nggeluh ibas pengarapen, sebab nggeluh ibas pengarapen labo kap sia-sia, janah sinenlah enda tempa nggeluh ibas perlumbaan, janah mata harus tertuju tetap man Yesus Kristus Kristus, sebab ibas mata si tertuju man Yesus Kristus maka kalak kristen la putus asa, sebab kai ? sebab Yesus simerupaken ulu pengarapen kalak Kristen enggo leben ngenanami sie, janah menang Ia. Tujun penulis ncidahken kerna pengurbanan Yesus, gelah kalak kristen tetap megenggeng, ras megegeh ibas ngenanami perbeben ras kiniseran, sebab ibas megenggeng ras megegeh ibas ngenanami perbeben ras kiniseran berarti perpulungen enggo ngelawan dosa.
3. Penulis ncidahken maka kerina e merupaken sada pendidiken “rohani” gelah perpulungen banci berhasil. Kiniteken perpulungen ergegehna sebab perpulungen banci meteh kerna kai siharus iban adi reh ujin bas kegeluhenna. Enda ibahan sebab perpulungen merupaken anak-anak Dibata. Penuls sengaja ngelayasi perpulungen gelah meteh, maka ia kerina anak-anak Dibata, erkiteken sie, ibuatna kai siisuratken ibas Jop 5:17; Kuan-kuanen 3:11-12. Enda iangkat sebab perpulungen reh ibas latar belakang agama Yahudi, emaka enda isingetken mulihi man bana, kerna karya keselamatan sierdahin ibas perbeben ras kiniseran. Jadi, man kalak kristen kiniseran eme bagin ibas pendidiken.
4. Merupaken kewajaren adi sekalak anak ididik ras iajarken kerna erti ras makna nggeluh ibas sekalak bapa nari. Enda itekanken kerna makna ras tanggung jawab pendidiken man kalak Yahudi lit ibas sekalak bapa. Emaka erna sie enda harus min iteh perpulungen, alu bage perpulungen lanai jungut-jungut ras lanai erpengarapen man Tuhan.
5. Nasehat siibereken penulis enda, gelah perpulungen (kalak kristen) singgeluh ibas perbeben banci menyadari maka perbeben ras kiniseran banci mendewasakan kalak kristen, emaka kegeluhen kalak kristen banci megegeh, la gampang putus asa.

THEOLOGIA NASKAH
- Ingetlah Kerna Yesus singgeluh ibas kiniseran gelah kalak kristen tetap megegeh.
- Selaku anak Dibata, perbeben ras kiniseran e merupaken pendidiken ibas Bapa nari.
- Perbeben ras kiniseran, njadiken kalak kristen dewasa.

APLIKASI
Adi kita ngerana kerna pendidiken sidat sada kesimpulan maka pendidiken e terbagi ibas dua bentuk, eme pendidikan formal ras pendidiken non formal. Janah subuk pendidikan formal ras non formal merupaken tanggungjawab orang tua. Adi bage maka tentuna selaku orang tua harus terus memantau perkembangen pendidiken anak. Sebab banci sikataken pendidiken menentuken masa depan anak. Emaka gelah anak banci berhasil ibas pendidiken, sipaling utama harus iajarken lebe man anak kerna nggeluh erkemalangen man Tuhan (Band. Kuan-kuanen 1:7). Alu bage anak banci meteh kerna kai sijadi tanggungjawabna.
Harus sitanamken; la saja man anak tapi pe man orang tua maka pendidiken e butuh perjuangen. Alu bage subuk anak bage orang tua harus tuhu-tuhu berjuang ibas pendidiken anak, gelah anak banci berhasil ibas geluhna. Anak tetap erlajar ibas sekolah, kenca mulih sekolah pe, tanggung jawab orang tua tetap memantau ras membmbing anak ibas pendidikenna i rumah. Janah siimaksudken memantau ras membembing anak ibas pendidikenna, la saja terjeng kai siiajarken guruna ibas sekolahna, ntah pe ibas pendidiken ekstra kulikuler, tapi pe ibas pergaulan, gelah anak berhasil ibas pendidiken formal ras pendidiken non formal. Sebab pendidiken non formal (Band = nggeluh te-tep wari) banci erbahanca anak ndabuh kubas hal-hal si la mehuli (nen = penakit masyarakat), tapi adi orang tua tuhu-tuhu mperdiateken ras tetap ngajarken anak ku hal-hal simehuli maka anak banci berhasil. Tapi ibas rangka sie, selaku orang tua pindolah gegeh, kengasupen ras kepentaren ibas Dibata nari, gelah orang tua ngasup pebelin-belin anak-anakna, gelah anak banci berhasil.

Pdt. Steven Kumenit, STh.,M.Min.