Nehken Persembahen Pengataken Bujur Bagi Singena Ate Dibata - Mere Alu Kristiani (Mazmur 4:4-9)

BAHAN PJJ GEREJA GBKP
TANGGAL 22 – 29 MEI 2011
==========================
MAZMUR 4 : 4 – 9.

Tema : Nehken Persembahen Pengataken Bujur Bagi Singena Ate Dibata (Mere Alu Kristiani)

LATAR BELAKANG
1. Mazmur enda selain Mazmur pertoton paksa berngi (muat tunduh berngi), tapi pe igelari Mazmur Perngandungen (bah Indo = Ratapan). Ibas Mazmur enda, teridah kal pemazmur ncidahken kinitekenna man Tuhan erkiten perlindungen Tuhan man bana. Bagepe pemazmur ncidahken eksistensi Tuhan, sienggo milih ia jadi serayanna (raja bangsa Israel), bagepe pe megiken penderkuh pemazmur.
2. Pemazmur nggejapken ibas perlindungen Tuhan, geluhna lit ibas perdamen ras ketenengen, emaka banci pemazmur medem, ntabeh pertunduhna dingen teneng. Enda me simbedaken pemazmur (Daud) ras siernembeh ate man Daud (musuh-musuh Daud). Sebab i mata Tuhan, Daud punya nilai tersendiri, erkiteken sie me adi Daud erlebuh mindo penampat man Tuhan, ibegikenNa, sebab Daud eme raja bekas pilihenNa.
3. Ibas pertoton pribadi Daud enda, Daud mpersingeti musuh-musuhna gelah mbiar man Tuhan ula man manusia, gelah musuh-musuhna la erdosa, sebab adi erdosa maka mpereh pernembeh ate Tuhan, erkiteken sie me maka, kalak siernembeh ate man Daud ibas ingan medem (ope tunduh) harus rukur alu mbages. Maksud Daud gelah kalak si ernembeh ate man Daud banci rukur alu mehuli, ula terikut emosi. Rukur sangana tayang i kamarna, ngataken gelah perukurenna la terpengaruh ku perukuren kalak. Jadi murni kesimpulanna sendiri siidatna.
4. Gelah la reh rawa Dibata man musuh-musuh Daud, maka siharus ibahan musuh-musuh Daud eme rekonsiliasi (erdame) ras Tuhan arah nehken persembahen sipatut man Tuhan. Sebab ibas nehken persembahen sipatut man Tuhan, maka banci ermakna man musuh-musuh Daud. Ibas teologi persembahen bangsa Israel, kalak sinehken persembahen alu meriah ukur sue ras undang-undang agama kalak Yahudi maka ialoken Dibata me persembahenna, bagepe dosana nggo ialemi Dibata. Lit empat bentuk persembahen sibanci Dibata ngalemi dosa kalak, eme 1). Persembahen tutungen (Imamat 1:3-17; 6:13, tujunna penebusan dosa. 2). Persembahen pengalemi dosa (Imamat 4:1-5:13; 6:24-30), tujunna penebusan dosa. 3). Persembahen penebus salah (Imamat 5:14-6:7; 7:1-10), tujunna penebusan dosa alu ganti rugi. 4). Persembahen sajian (Imamat 2:1-16; 6:14-23), tujunna, mindo gelah Dibata masu-masu (bah. Indo = berkenan).
5. Pertoton Daud enda itujuken man kalak sigombang-gombangi ia. Jadi penungkunen ise kin kalak sigombang-gombangi ia ? eme Absalom, anakna sendiri arah ndeharana Maakha, ia la kalak Israel, Maakha anak raja Gesur. “Igulingken Absalom raja Daud ibas kursi rajana. Enggo melala pengikut Absalom. Erkiteken sie me raja Daud cebuni, janah ibas ingan cebuni ertoto ia.

THEOLOGIA NASKAH
- Daud eme raja pilihen Tuhan, emaka adi erlebuh ia man Tuhan, ibegiken Tuhan ia.
- Nggirgir ras gentarlah i adep-adepen Tuhan, olanai kam erdosa. Janah ertotolah man Tuhan.
- Persembahkenlah persembahen sipatut man Tuhan.

APLIKASI
Persembahen labo saja bagin ibas liturgi kebaktin, tapi persembahen eme bagin kegeluhen kalak kristen. Emaka kerina bentuk kegeluhenta harus berbentuk persembahen, gelah kita tetap nggeluh bagi singena ate Tuhan.
Lit dua bentuk persembahen : 1). Persembahen siberbentuk kula (band. Roma 12:1; bagepe Yesus Kristus mpersembahken diriNa guna nebusi dosa manusia). 2). Persembahen materi. Persembahen enda pe lit piga-piga bentuk, eme a). Sen. b). Perhiasan. c). Inatura (berbentuk barang hasil bumi). Janah sijadi bahasenta skali enda eme persembahen siberbentuk materi.
Sijadi penungkunen man banta engkai kita harus nehken persembahen, subuk ibas kebaktin, PA ras nehken persembahen persepuluhen , pengataken bujur ras persembahen kerja rani ? Jawabanna eme erkiteken Tuhan e sinepa (pencipta), Tuhan e ulu pemere (pemberi), janah Tuhan enggo masu-masu kita. Tuhan enggo leben mere man banta. Jadi adi kita mere persembahen erkiteken kita ngekelengi Tuhan asa ukurta, asa tendinta, dingen asa gegehnta lit. Memang Tuhu, labo jumlah nominalna siibutuhken Tuhan, tapi arah pusuh siersuruh, tapi labo berarti nominal la perlu, perlu, sebab mbue sitikna persembahen kita, tergantung kinitekenta man Tuhan Dibata. Bagepe ibas kita nehken persebahen harus mehuli ras benar. Jadi penungkenen, uga ka carana mere alu payo (benar) ras ialoken Tuhan persembahenta. Persembahen alu payo (benar) ras ialoken Tuhan eme 1). Lit persiapen (ertoto ras nikapken esai kai siharus ibereken). 2). Mere alu tan kemuhen, la banci iteh tan sikawes. 3). Mere asa gegehta. 4). Mere alu kiniteruken ukur, rsd. Jadi ibas kita mere persembahen suelah ras singena ate Tuhan, eme ulihken man Tuhan kai si enggo sialoken ibas Tuhan nari janah neruskenca man kalak si mbutuhkenca. Bagepe ibas kita mere labo guna ncidahken kinibayakenta (guna membanggaken diri), tapi ibas rangka mpermuliaken Tuhan. Emaka ibas kita nehken persembahen alu mehuli ras benar,maka kita ipasu-pasu Tuhan.

Pdt. Steven Kumenit, STh.,M.min.