Jabu Si Nggeluh Bagi Kula Ni Kristus (Efesus 4:12-16)

PEKAN KEBAKTIN KELUARGA
GEREJA GBKP
WARI 1, TANGGAL 5 JUNI 2011
===========================
Introitus : Bagi sada kula melala ringringna, bage me Kristus e. Amin gia melala ringring e, tapi sada kula nge (1 Korinti 12:12).
Ogen : 1 Korinti 12:20-27.
Khotbah : Epesus 4:12-16.
Tema : Jabu Si Nggeluh Bagi Kula Ni Kristus.

Senina ras turang ibas Yesus Kristus !
Kitab Efesus eme surat rasul Paulus siikirimkenna paksa Rasul Paulus sangana ibas penjara, janah sue ras bahan khotbahnta, penekanan Paulus eme nggeluh ibas persadan siirakut ibas Kesah Sibadia. Nggeluh ibas persadan ras makeken karunia-karunia si lit maka perpulungen sada paksa seh me kubas tingkat kiniteken si serta, ntah pe pemahaman si payo kerna Yesus Kristus si mate ras si enggo nggeluh e. Enda itekanken Paulus, gelah persadan si nggo tercipta tetap nggeluh sikeleng-kelengen. Alu bage penekanan enda berbeda kal ras penekanan persadan siitekanken Paulus i perpulungen Korinti (1Korinti 12), Sebab ibas perpulungen Korinti sengaja itekanken Paulus kerna persadan, sebab paksa sie perpulungen nggeluh ibas “pengkoktak-kotaken”, nggeluh la ersada, tapi i perpulungen Epesus lain, amin gia perpulungen Epesus keanggotaanna lit ibas dua latar belakang suku bangsa ras budaya, eme bangsa ras budaya Yahudi ras Yunani, tapi siterjadi ibas perpulungen eme tetap nggeluh ibas persadan. Kalak kristen siasalna Yahudi la mbaba budaya ntah pe latar belakang keagamaanna ku persadan i Epesus. Siimaksudken latar belakang keagamaanna eme hukum taurat. Sebab ibas ingan-ingan si deban kalak kristen si asalna Yahudi rusur mberatken/maksaken kalak kristen asal Yunani, alu ngataken maka keselamaten siialokenna lenga kuh (sempurna) erkiteken lenga ngelakoken taurat, adi ate nggeluh ibas keselamaten maka harus ndalanken hukum taurat, khususna sunat, sebab sunat merupaken ikaten perpadanen Tuhan ras Abraham (Kejadin 17). Amin gia reh Yesus Kristus tapi labo berarti hukum taurat enda lanai ipake, janah justru keselamatan enda arah kalak Yahudi, erkiteken kalak Yunani enggo jadi “kristen”, maka otomatis jadi kesusuran Abraham, alu bage harus isunat. Enda me si la lit bas persadan i tengah-tengah perpulungen Epesus, emaka persadan e nggeluh. Janah serayan Tuhan, bagepe karunia-karunia si lit tujunna gelah lebih nandai Yesus Kristus si nggeluh e.
Jadi adi sinen terbagesen maka kai siibahan Paulus enda bentukna pengelayasi ras njaga persadan si nggo lit gelah perpulungen la pecah, sebab adi pecah maka perpulungen Epesus lanai teridah selaku gereja Tuhan. Adi bage maka bali kepe paksa perpulungen lenga nandai Yesus Kristus. Padahal selaku persadan (gereja), maka persadan e harus berbeda ras persadan ope lenga nandai Yesus Kristus (persadan kalak kafir). Sebab persadan ibas gereja eme nggeluh ibas sada ukur ras sada penggejapen ras persadan e ipinpim Kesah Si Badia.

Senina ras turang ibas Yesus Kristus, ibas berngi enda, pekan keluarga wari si pemena, kita isingetken uga seharusna jabu singgeluh bagi kula ni Kristus. Harus lebe sipahami jabu eme persadan sosial sikitikna si lit i tengah-tengah masyarakat, janah ibas pandangan teologis, jabu eme gereja sikitik. Jadi penungkunen engkai jabu ikataken jabu eme gereja si kitik ? maksudna eme jabu e Tuhan kap sibentuksa, jabu e bekas pendilo Tuhan, janah jabu e takalna eme Yesus Kristus. Erkiteken sie me maka jabu kalak kristen eme jabu singgeluh ibas persadan, la saja persadan sapih-sapih anggota keluarga, tapi lebih asangken sie eme persadan ras Yesus. Erkiteken sie me selaku gereja sikitik, maka siharus lit ras teridah ibas jabu eme nggeluh si keleng-kelengen. Ndehara harus ngkelengi perbulangen, bagepe perbulangen harus ngkelengi ndehara, janah adi tambah angggota keluarga (anak), maka orang tua harus ngkelengi anak-anak si enggo ipelimiken Dibata i tengah-tengah jabuna, bagepe anak harus ngkelengi orang tua (band. Efesus 5:22-6:5). Sikeleng-kelengen harus ibas erbage-bage situasi, subuk paksa meriah ukur, bagepe paksa nggeluh ibas perbeben ras kiniseran (band = perbadanan ibas liturgi pemasu-masun). Alu bage jabu kristen teridah selaku jabu si berbeda ras jabu si lenga nandai Tuhan Yesus Kristus.
Tapi siidah genduari jabu kalak kristen ndatken melala tantangan-tanangan ibas doni enda, apakah arah ekonomi, sakit ras persadan, rsd. Mekatep tantangan-tantangan enda la ngasup terbaba kita, emaka lit senina turangta jabuna nggeluh ibas perbeben, janah guna ngatasi perbeben e ia muat dalan pintas, adi perbebenna ekonomi, maka siilakokenna eme erjudi, korupsi, rsd. adi sakit, ertambar ia ku guru sibaso, rsd. Bagepe ibas persadan i tengah-tengah jabu terganggu erkiteken perbulangen ntah pe ndahara nggeluh ibas keegoisan. Janah melala denga bentuk-bentuk si deban, sierbahanca jabunta lanai teridah jabu singgeluh bagi kula ni Kristus. Emaka adi ateta jabuntah nggeluh bagi kula ni Kristus siharus lit bas kita eme 1). Kita harus nggeluh ibas persadan ras Yesus Kristus. Maksudna eme keluarga kristen harus tutus ertoto ras erbahan kebaktin keluarga. Sebab ibas kita ertoto ras erbahan kebaktin adi la ateta ngendesken jabunta katawari paksa gelah ipinpin Tuhan. Bagepe kita harus ersembah man Tuhan ibas kebaktin minggu ras perpulungen jabu-jabu, bagepe ibas PA (Mamre ras Moria). Ibas bagin enda melala denga jabu-jabu kristen kurang aktive, janah melala alasan ras sebabna, mulai pendahin sitempa la banci tertadingkenna,seh ku mekisat ku gereja. Padahal ersembah man Tuhan merupaken sada tanggungjawabta man Tuhan erkiteken Tuhan enggo nelamatken kita ibas dosa nari, bagepe merupaken tanda pengataken bujurta man Tuhan Dibata, bagepe ibas kita ersembah radu ras, ras kalak si sada kiniteken ikut ersembah man Tuhan. Emaka kalak si la nggit ersembah (beribadah), tandana ia la patuh ras la ngataken bujur man Tuhan ibas erbage-bage perbahanen ras pasu-pasu Tuhan si enggo seh man bana. 2). Nggeluh sikeleng-kelengen ras sisampat-sampaten. Maksudna ibas jabu harus lit tanggungjawab bersama. Ibas jabu harus itanemken kerna tanggungjawab bersama. Ija bahtera keluarga labo merupaken tanggungjawab sesekalak jelma, apakah e perbulangen, ntah ndehara, tapi perbulangen ras ndehara bersama mbaba bahtera keluarga seh ku tujun, eme nggeluh harmonis ras bengket kubas surga. Bagepe harus pe itanemken tanggungjawab anak ibas keluarga. Alu bage ras-ras nggejabken maka kegeluhen jabu eme kegeluhen ras-ras, emaka nggeluh me sikeleng-kelengen ibas jabu. Pendahin ibas jabu idahiken ras-ras. Jadi lit pengurbanan anak jabu ibas jabuna. 3). Siajar-ajaren ntah pe saling mpersingeti sada ras sidebanna. Maksudna gelah jabu tetap erbahan simehuli singena ate Tuhan. Sebab ibas zaman genduari adi la kita metenget maka siterjadi eme kita pasti ijolah-joleken pengajaren ras tawaren doni enda, sierbahanca kita nggeluh ibas dosa. Emaka ibas siajar-ajaren ntah pe saling mpersingeti, anak jabu tetap nggeluh ibas rel-rel kebenaren. 4). Ndalanken kebenaren ibas jabu. Maksudna, jabu kalak kristen harus steril ibas hal-hal si la mehuli. 5). Nggeluh ibas persadan. Maksudna, jabu kalak kristen harus tetap nggeluh ibas keharmonisan, bagi tangtanga Dibata ndilo kita guna bengket kubas ikaten perjabun. Tuhu melala kita jumpa perbeben ras kiniseran sedekah kita ngeluh ibas doni enda, tapi ula min perbeben ras kiniseran e erbahanca lanai lit keharmonisen jabunta, sidungna sirang kita ras teman geluhta.
Ibas perbahanenta sibage maka enggo sipraktekken ras sicidahken kerna jabu singgeluh bagi kula ni Kristus. Sebab alu kata gendek, jabu singgeluh bagi kula ni Kristus berarti ersada ibas kerinana, sada guna kerinana sierpalasken keleng ate Kristus. Alu bage kita ipasu-pasu Tuhan, janah kalak sideban pe banci ngusih kai siibahan jabunta. AMIN.

Pdt. Steven Kumenit, STh.,M.Min.