Keluarga Dan Kekayaan (Matius 6:24-34)

PEKAN KEBAKTIN KELUARGA
GEREJA GBKP
WARI III, TANGGAL 7 JUNI 2011
Introitus : Dungna rukur ia, janah nina i bas ukurna, 'Kerina si erdahin bapangku riba-iba panganna, tapi aku i jenda menam mate kelihen (Lukas 15:17).
Ogen : Lukas 15:11-17.
Khotbah : Matius 6:24-34.
Tema : Jabu Ras Kinibayaken.

LATAR BELAKANG
1. Secara umum banci sikataken oratenta sendah eme sada bagin si la tersirangken ibas khotbah Yesus i das uruk (pasal 5 – 7). Tapi khusus sijadi oratenta Yesus ngerana man jelma sinterem kerna kearun ate.
2. Ibas khotbah enda, Yesus mpersingeti jelma sinterem kerna kai ertina mengandalken kuasa Dibata. Kuasa Dibata e banci mereken kai siiperluken kita. Kuasa Dibata banci mereken gegeh ras kegeluhen man kalak si tek ibas kegeluhna,amin gia jumpa perbeben ras kiniseran, Engkai ? sebab Dibata e, Dibata si dem alu kebayaken si tetap ngasuhi kegeluhen anak-anakNa. Emaka kegeluhen simengandalken Tuhan ibas kegeluhenta berarti nggeluh ibas kepatuhen nandangi kerina perentah-perentahNa.
3. Yesus erkhotbah kerna kearun ate, erkiteken biak kalak Jahudi secara umum merupaken bangsa perbinaga (pedagang) cenderung lebih ngergai erta doni. Emaka ipersingeti Yesus gelah kalak sitek ula ku je ukurna, janah ula min erta jadi penalemenna, sebab adi erta jadi penalemenna maka kalak sitek nggo ersembah man dua tuan, sada man Tuhan, sada ka man mamon (erta). Ijenda Yesus ngataken maka mamon banci jadi “berhala” siisembah kalak.
4. Ituriken Yesus enda,alu sada pengarapen gelah kalak si tek (pengikut Yesus) banci “terbebas” ibas kearun ate. Emaka isingetken Yesus gelah kalak si tek tetap nginget kerna penemani Dibata. Enda banci sibandingken ras Josua. Maka Josua pang ngataken adi ia ras isi jabuna Tuhan saja nge siisembahna ( Josua 24:15), erkiteken nggo inanamina kerna pengkelengi Tuhan man Josua ras isi jabuna. Amin gia jumpa rusur perbeben ras kiniseran, tapi tetap lit serpang pulah siibereken Dibata man Josua ras keluargana. Tuhu Josua nggo ngidah lit kiniseran ras pasu-pasu Tuhan ibas jabuna, tapi idatna sada kesimpulan maka mbuen kepe pasu-pasu Tuhan sialokenna asangken kiniseran.
5. Yesus mereken contoh sikongkrit kerna perbedaan manusia (kita) ras perik. Nina Yesus ndauh ergan manusia (kita) asangken perik. Maka perlu siteh ibas kerina siijadiken Dibata, manusia nge sisempurnana, tapi amin bage gia kerina nge ijaga ras iasuhi Tuhan. Tuhu ergan manusia asangken perik, sebab ibas diri manusia lit misi siharus idalanken eme gelah doni ras kerina isina nggeluh ibas keselamaten. Emaka sipaling penting man manusia (banta) ula kal aru ateta kerna kebutuhen jasmani, sebab enggo isikapken Tuhan nge kai siiperluken kita. Sebab labo lit kearun ate singasup mereken serpang pulah ras sipegedangken umur manusia ibas doni enda, tapi sebalikna manusia nggeluh ibas kematen (band. Roma 6:23). Alu kata sideban, adi Yesus ngataken man jelma sinterem kerna pangan ras inemen labo perlu jadi hal kebiaren ntah pe kearun ate. MaksudNa pangan ras inemen e me hal si kitik. Emaka ula kal kearun ateta e berlebihan, seh maka nggo lanai siinget lit kepe siterbelinen siharus idalanken, eme kekelengen ra nehken keselamatan man doni enda, ras pe ndalanken peraten Tuhan.. Contoh ersura-sura kita jadi bayak, tapi ibas kita ndarami ras makeken kebayaken e sipake cara-cara si la ngena ate Dibata, rsd.

THEOLOGIA NASKAH
- Ise pe la banci ngikutken dua tuan, la banci lang sekalak keleng atena, sekalak nari nembeh atena.
- Ola aru atendu kerna nakan sipepagi.
- Sipentingna daramilah lebe kinirajanNa janah dalankenlah singena ateNa, maka icukupiNa kai siperlu man bandu.

APLIKASI
Kerina kita ersura-sura jadi bayak, janah enda labo merupaken sada hal sisalah. Bagepe ate Dibata adi kita bayak, maka teridah me teridah pasu-pasu Tuhan man banta. Tapi simerawa ate Dibata, adi kebayakenta e sidat alu la payo.
Erta erta eme pemere Tuhan man banta, sebab ate Dibata gelah ibas erta siibereken Tuhan man banta gelah banci tercukupi kerina kebutuhen rumah tangganta. Tapi la saja terjeng je, ate Dibata pe gelah arah erta banci sipake guna erdiakonia, alu bage terpuji gelar Dibata. Ibas perbahanenta sibage maka Dibata tetap masu-masu kita.
Siidah lit ka senina turangta nai bayak ia, tapi genduari enggo musil, sebab enggo idayakenna erta-ertana, ntah pe idayaken anak-anakna. Enda jadi erkiteken la mampu ngaturken keuangan ibas keluarga, bagepe terlalu simajakan kal anakta alu kemudahan-kemudahan nikapken keperlunna, emaka anak la nggit erdahin (daya juangnya tidak ada), ntah pe lit dahinna tapi lalap nggejapken lalap la bias kerna kai si lit bas ia.
Ibas pihak sideban, nterem denga kita ngeluh ibas kebiaren kerna nakan/keperlun sipepagi, emaka idarami me dalan pintas guna ndatken sura-surana. Tapi marilah sidarami kinirajan Dibata ras kebenarenNa lebe, janah sidalanken me kai singena ateNa, maka icukupi Dibata me keperlunta. Tapi adi enggo sicukupi Dibata keperlunta, ula kita lupa man Tuhan, janah sipakelah kebayakenta guna kemulian Tuhan.

Pdt. Steven Kumenit, STh.,M.Min.