Maksimalken Pemaken Rumah Pertoton (Matius 21:12-17).

BAHAN PJJ GEREJA GBKP
TANGGAL 19 – 25 JUNI 2011
=========================
Matius 21:12-17.

Tema : Maksimalken Pemaken Rumah Pertoton.

LATAR BELAKANG
1. Sijadi bahan oratenta sendah eme sada perbahanen Yesus “mpebadiaken” Rumah pertoton si enggo “melket” erkiteken enggo lit kalak sierbinaga ras ingan nukar sen ije. Situhuna adi sinen arah undang-undang agama kerna ersembah ras nehken persembahen, situhuna hal enda banci ikataken la salah, sebab ibas undang-undang agama Yahudi lit sada undang-undang simengatur kerna nehken persembahen, khususna persembahen pengalemi dosa sue ras status sosial. Adi kalak bayak ia, maka ia berhak mereken persembahen pengalemi dosa berupa lembu, tapi adi man kalak si lenga ngasup nikapken biri-biri ras lembu maka iberekenna dua ndukur ntah pe dua nderapati (band. Imamat 5:7), Tujunna gelah kerina bangsa Israel banci nehken persembahen ras nggeluh ibas kebadiaan. Bagepe undang-undang agama Yahudi maka anak si enggo berumur 19 tahun harus nggalar bea (pajak) rumah pertoton.
2. Persembahen asuh-asuhen bage pe dua ndukur ntah pe dua nderapati harus simehuli ras mejile kal siipersembahken. Janah guna nentuken simehuli ras mejile, biasana harus imam. Situhuna la lit sada peraturan si mengatur maka persembahen asuh-asuhen ntah pe ndukur ras nderapati harus itukur i rumah pertoton. Saja erkiteken imam sinentukenca, maka mekatep persembahen siibaba i darat nari rusur itolak imam alu alasen kurang mejile, emaka erkiteken enggo tersedia asuh-asuhen ras ndukur bagepe nderapati (lih= enggo lit kerja sama ras imam), maka padin iakap kalak nukur bahan persembahen i rumah pertoton saja, sebab adi tukur i rumah pertoton minter ialoken imam. Tapi hargana tuhu-tuhu meherga, banci dua ntah telu kali lipat keuntungenna, janah lit ka persenna ku rumah pertoton. Bagepe kerna bea rumah pertoton. Tep-tep kalak Yahudi harus nggalar pajak rumah pertoton sebesar setengah shekel (mata uang Yahudi). Penggelaran pajak harus make shekel. Jadi adi la lit shekel maka ia harus nukar i rumah pertoton. Ijenda me si enggo jadi masalah, sebab ingan nukar sen e pe nggo rate-ate, banci ndarami keuntungen simelala, seh seratus persen. Emaka terjadi me rusur tawar menawar sierbahanca gejek. Ibas situasi sibagenda me merawa Yesus, emaka itunggalbalikkenNa meja-meja penukar sen e.
3. Kai siilakoken Yesus, eme sada penggenapen ibas Yesaya 56:7 kerna rumah pertotonku igelari rumah ingan ertoto. Bagepe Yeremia 7:11 kerna Rumah Pertoton iakap rumah penamun.
4. Bagepe enda ilakoken Yesus erkiteken makna Rumah pertoton lanai lit. Padahal bagi kalak Yahudi Rumah pertoton eme jadi sentral spiritualitasna, erkiteken Dibata hadir ije, rumah pertoton eme rumah Dibata (band. 1 kronika 17:2,12). Emaka rumah pertoton merupakan rumah Badia, erkiteken Dibata Badia. Isamping sie, erkiteken rumah pertoton ringan i Yerusalem ija Dibata ringan ibas Rumah Pertoton e maka tep-tep tahun kalak Yahudi reh ku Yerusalem guna ertoto ras nehken persembahen man Tuhan ku rumah pertoton.
5. Kenca Yesus pebadiaken rumah pertoton, reh me kalak pentang ras simate serapen man Yesus, ipepalem Yesus ia duana. Dua kejadin enda mbaba anak-anak ersura-surak alu ngataken “pujin man anak Daud”. Enda situhuna merupaken sada proklamasi ntah pe sada hal siipebetehken kerna Yesus eme Mesias. Kejadin enda erbahanca nembeh ate imam-imam ibas rumah pertoton man Yesus. Janah atena pe gelah ipesinik Yesus surak-surak anak-anak e, sebab imam-imam e la nggit ngakui Yesus selaku Mesias. Tapi ijabab Yesus, enda merupaken sura-sura Dibata, labo Ia sierbahanca. Alu bage enda merupaken penggenapen Mazmur 8:3.
THEOLOGIA NASKAH
- Yesus bengket ku Rumah Pertoton janah ipebadiakenna Rumah Pertoton si enggo jadi sarang penamun.
- Yesus pepalem kalak sakit ibas rumah pertoton, ras anak-anak ersurak muji Yesus.
- Ngilas ate imam-imam kepala ras guru-guru agama ngidah tanda sengget siibahan Yesus, ras rende muji Yesus siibahan anak-anak.


APLIKASI
Man banta genduari pengertin rumah Pertoton eme gereja. Gereja eme sada sarana siipake guna ingan ersembah ras mpemuliaken Tuhan alu bentuk kebersamaan. Bagepe adi siidah genduari, enggo lit piga-piga anggota perpulungen secara pribadi reh ku gereja guna ertoto, rsd. Janah harus siteh gereja berbeda ras rumah pribadi, erkiteken sie kita harus “melakukan” gereja e melebihi peran ras fungsi rumah pribadi. Ibas erti kata “kenyamanan tuhu-tuhu harus sijaga. Tapi siidah genduari lit dua paradoks (bertentangan), ija sada pihak lit gereja-gereja irawat alu mehuli, ras kenyamanan iutamakan alu masang AC ras lit petugas kebersihanna, subuk kebersihan ibas gereja bagepe i darat gereja, bagepe enggo lit sada peraturan singatakenca la banci ngisap rokok, man belo bagepe man ibas ruangan gereja. Bagepe enggo lit pe ruangan gereja si tuhu-tuhu ifungsiken sebage ingan ersembah saja, adi lit sidang runggun ras latihan koor, e enggo lit ruangan sendiri. Janah la saja terjeng sie tapi taman bunga pe enggo ipikirkenna. Tapi lit ka runggun si kurang mediate kerna kebersihan gereja, emaka kenyaman ersembah man Tuhan kurang kal, sebab subuk ruangan gereja (ingan ersembah) ras kamar persikapen enggo teridah melket (lit lawa-lawana).
Kita harus sadar maka enda merupaken gereja, ingan kita ersembah man Tuhan, ingan kita jumpa ras Tuhan. Janah harus ka sigejapken gereja e harus badia, emaka hal-hal siberhubungen ruangen si melket, tentuna mengurangi kebadiaan gereja, erkiteken sie, gereja (subuk runggun gereja, bagepe anggota perpulungen harus mperdiateken kebersihen ras kenyamanan gereja, alu bage kita banci alu teneng ras nyaman ersembah man Tuhan.
Ipihak sideban, ibas pengertin kita memaksimalkan Rumah Pertoton (gereja), maka gereja harus jadi ingan pepalem kalak sakit. Ibas erti kata arah khotbah ngasup min pengkhotbah pepalem pusuh anggota perpulungen, janah adi banci pe pepalem kalak si sakit jasmani. Ipihak sideban gereja harus ipakeken guna ingan muji Tuhan ras ersaksi kerna Yesus eme Tuhan ras Mesias (band. Ayat 15), ula sipake gereja e, jadi ingan ercian ate ras ingan rubat (band. Ayat 16).

Pdt. Steven Kumenit, STh.,M.Min.