Erti Ras Makna Sejarah Reformasi Gereja. (2 Raja-Raja 23:1-3; 24-24).

BAHAN PJJ GEREJA GBKP
TANGGAL 10 – 16 JULI 2011
=========================
2 Raja-raja 23:1-3; 24-25.

Tema : Erti Ras Makna Sejarah Reformasi Gereja.

1. Secara umum banci sikataken Yosia paksa umurna 8 tahun. Yosia eme sekalak raja simbiar ras erkemalangan man Tuhan. Ope ras sangana ibas pemerintahanna, bangsa Yehuda ras Yerusalem ngelakoken kai si la ngena ate Tuhan. Bagepe bangsa Yehuda ras Yerusalem ersembah man baal ras nehken persembaen man baal (2 Raja-raja 22:17). Ibas situasi ras keadaan sibagenda me, tepatna tahun pe sepuluh waluhken pemerintahan raja Yosia i reformasina keagamaan bangsa Yehuda ras Yerusalem. Janah sipertama kal ireformasi Yosia eme dirina sendiri lit penyesalan ras pertobatan (2 Raja-raja 22:11), kenca sie idilona pemimpin-pemimpin reh ku rumah pertoton, janah ije me terjadi perpadanan antara pemimpin-pemimpin ras Tuhan guna nggeluh sue ras peraten Tuhan (Band. Bahan oratenta).
2. Ibas rumah pertoton jadi ingan perpadanan pemimpin-pemimpin, para imam, kerina masyarakat ras Tuhan erkiteken rumah pertoton man bangsa Israel eme sentral kegeluhen spritualitasna, sebab ije tading Dibata. Emaka ibas pengogen hukum Tuhan (sepuluh pedah Dibata) merupaken simbol kesetiaan baru man Tuhan Dibata.
3. Secara berbangsa reformasi ibenaken Yosia i rumah pertoton nari, enda ilakoken Raja Yosia erkiteken bangsa Yehuda la berdiri sendiri, tapi bangsa Yehuda ras Yerusalem, Dibata kap siempuna, Dibata sinjadiken Israel enda jadi sada bangsa, janah Yosia jadi raja erkiteken Dibata kap simlih ia, alu karya Dibata sendiri. Emaka kepemimpinan sekalak raja labo saja sekedar memimpin bangsa Israel ibas bentuk politik sosial saja, tapi pe njaga kegeluhen spiritual bangsana.
4. Ibas perpadanan siterjadi maka terjadi me pembersihan ibas rumah pertoton. Rumah pertoton tuhu-tuhu jadi rumah Dibata, ras jadi rumah si Badia. Kenca sie terjadi me pembersihen besar-besaran i tanah Yehuda ras Yerusalem, mulai ibas kalak si beluh ndilo begu-begu ras ngoge nasip ipelawes raja Yosia seh ku kerina sembah-sembahen keluarga, berhala-berhala ras sembah-sembahen sideban imasapken raja Yosia kerina.
5. Enda ilakoken Raja Yosia ras kerina masyarakat Yehuda ras Yerusalem erkiteken respon kenca megi pedah Dibata ras turah pengangkan mulihi kerna kiniteken. Kepeken kai sidekah enda terjadi “menyalahi” kiniteken bangsa Yehuda ras Yerusalem man Dibata. Sebab la kap ngena ate Tuhan bangsaNa ersembah man dibata-dibata si deban.

APLIKASI
Adi kita ngerana kerna sejarah reformasi, tentuna kita harus ngerana, engkai maka terjadi reformasi ibas gereja, siibahan Marthen Luther, Yohanes Calvin ras zwingli. Reformasi jadi erkiteken gereja paksa sie lanai teridah selaku gereja, janah serayan Tuhan paksa sie lanai teridah selaku serayan Tuhan. Sebab kemuliaan Dibata enggo “itangko” ibas gereja ras pemimpinna. Erkiteken sie me Marten Luter menentang alu mpedarat 95 dalil. Ije me benai reformasi gereja. Janah teologi sipaling terkenal ibas reformasi Luther eme Sola scriptura (hanya oleh firman Tuhan/Alkitab), Sola Fide (hanya oleh iman), Sola Gratia (hanya karena anugerah). Tapi kemudian ikembangkan Calvin, alu ditambahkenna sola Kristo (hanya oleh Kristus) ras Soli Deo Gloria (Kemulian hanya bagi Allah).
Teridah ijenda inti reformasi eme gelah penaran ras fungsi gereja harus teridah. Gereja eme alat Tuhan ras fungsi gereja mbabai perpulungen gelah erkemalangen man Tuhan. Arah gereja iajarken uga erkemalangen man Tuhan. Ibas kita erkemalangen man Tuhan, dua lisme kiniteken la banci. Bagepe ate gereja, arah pelayanenna kita selaku perpulungen Tuhan banci nggejapken kerna keleng ate Tuhan. Erkiteken sie me reformasi (pembaruan) ibas pelayanan iperluken ibas gereja. Janah adi siidah ibas reformasi siibahan Yosia, maka dat sada kesimpulan maka reformasi siharus ilakoken sipemena : Pemimpin gereja (serayan Tuhan). Sipeduaken : Perpulungen. Sipeteluken : Gereja e sendiri. Sipeempatken : Kiniteken.
Jadi adi ateta nggeluh badia, bagepe gereja e jadi gereja situhu-tuhu, emaka kita kerina harus nggeluh ibas pembaharuan (reformasi). Nina Paulus : Ola pelepas dirindu jadi seri ras doni enda, tapi berelah maka perukurenndu ipelimbarui Dibata. Alu bage banci idatndu kai sura-sura Dibata, kai si mehuli, kai si ngena ateNa, janah kai si sempurna (Roma 12:2).
Perlu siteh, reformasi ibas gereja tetap erdalan, sepanjang e siidah kai siibahan gereja lanai sue ras peraten Dibata, termasuk kebaktinna ras ende-enden pujinna, bagepe cara kita ersembah.

Pdt. Steven Kumenit, STh.,M.Min.