Mulihlah Dibata Enggo Sikap Ngalo-Ngalo Kam (Lukas 15:11b-32)

BAHAN KHOTBAH GEREJA GBKP
MINGGU TANGGAL 10 JULI 2011
===========================
Introitus : I bas kiniseranku nari kulebuh Kam o TUHAN janah ialoiNdu aku. I bas doni kematen si mbagesna nari nderkuh aku mindo penampat, e maka ibegikenNdu aku. Ogen : Masmur 107:1-22.
Khotbah : Lukas 15:11b-32.
Tema : Mulihlah Dibata Enggo Sikap Ngalo-Ngalo Kam.

LATAR BELAKANG.
1. Turi-turin kerna anak si bene ibas oratenta sendah, eme sada gambaran kegeluhen paksa sie, bagepe sada gambaren kalak singgeluh ibas dosa tapi jera ras nggit mulih ku Bapa sinisurga si dem alu kebayaken.
2. Paksa sie merupaken sada kebiasaan sekalak anak perana sienggo dewasa umurna lawes ku tanah perlajangen guna ndarami dahin ije. Enda jadi erkiteken keadaan i kutana si cukup mesera (miskin).
3. Pembagin erta warisan merupakan sada kebiasaan ibas kalangan bangsa Jahudi, janah enda lit ibas hukum kalak Jahudi. Ija anak singuda dat bagi sepertelu ibas erta bapana nari, e pe enda banci ibagi adi orang tua enggo mate, janah anak sintua dat bagin dua pertelu (Ulangan 21:17).
4. Anak singuda simindo baginna janah berkat ia ku kuta kalak, ngambarken sekalak si ndarat ibas persadan ras Tuhan, nggeluh ibas dosa, emaka konsekwensina nggeluh ibas kiniseran ras dem alu penghinaan. Tapi kalak si banci ialoken Bapa, adi igejapkenna kegeluhenna tuhu-tuhu la erguna adi sirang ras Bapa, bagepe pertobaten harus alu pusuh si dem penyesalan, emaka banci ia mulih ku Bapa. Ibas kecibal sibegenda ialoken Bapa me ia alu meriah ukur.
5. Anak Sintua ngambarken kalak farisi, guru-guru agama si la nggit ngaloken kalak si enggo jera, bagepe lit pernembeh ate ngenen kalak si enggo jera.
6. Perumpamaan enda ibahan Yesus erkiteken, kalak Parisi ras guru-guru agama jungut-jungut paksa Yesus man ras pengalo cuke ras kalak perdosa sideban. Perlu siteh, pengalo cuke la isenangi (ibenci) kalak Jahudi, janah akapna pengalo cuke eme kalak perdosa, sebab pengalo cuke dahinna eme ngutip pajak siberlebihen asa patutna. Janah siimaksudken ras kalak perdosa si deban eme kalak sierbahan dosa i luar perbahanen kalak pengalo cuke.

APLIKASI
Kita enda kalak si enggo iselamatken Yesus Kristus. Janah ibas kita nggeluh ibas dunia keselamatan, lit kap si la meriah ukur nandangi kita eme si iblis. Emaka ibas kerina cara ras bentuk, icubaina kita, emaka mekatep kita ndabuh ku bas dosa. Janah dosa enda me sierbahanca kita sirang ras Dibata, lebih asangken sie kita banci dat penghukuman ibas Dibata nari.
Tentuna kita selaku kalak sitek man Tuhan Dibata hal sibagenda la kita nggit ngalokenca. Dibata bage ka, la ate Dibata kita nggeluh ibas dosa ras penghukumanNa, erkiteken sie, katawari paksa pe kita idiloNa guna jera ras reh ku Ia. Pendilo Dibata erbage-bage cara ras bentuk, banci arah gereja (pelayanan gereja), banci arah temanta, banci ka arah Dibata sendiri.
Perlu siteh la meriah ate Dibata ngenen anak-anakNa (kita) sirang ras Ia, Emaka marilah kita mulih kempak Dibata adi kita enggo erbahan Dosa. Dibata tetap ngalo-ngalo kita kerina. Memang sisadari agak mesera kita mulih kempak Dibata adi sipake gegehta, sebab gegehta la ngasup naluken kuasa si iblis, erkiteken sie me nina Yesus : Roh penurut tapi daging lemah (Matius 24:41). Emaka guna naluken sie gelah kita ngasup mulih kempak Dibata, la banci lang kita harus mindo penampat man Tuhan Dibata. Janah harus ka siinget tuhu seh genduari Dibata nimai kita ras tetap ngalo-ngalo kita, tapi enda lit batasna eme si pemena kalak si erkadiola ras nggejapken maka ia enggo ersalah ras nggit mulih ku Dibata, emaka erlebu kita kempak Dibata guna mindo pengalemi dosa man Tuhan. Sipeduaken : Ope dengan kita mate, sebab adi kia enggo mate berarti kita enggo terlambat. Sipeteluken : Kita reh man Tuhan ope denga Yesus Kristus reh peduakaliken. Sebab ibas Yesus reh peduakaliken berhubungen ras penghakiman. Jadi tuhu Dibata e perkeleng, tapi lit batasna, emaka gelah ula terlambat kita, marilah pedas reh ku Tuhan Dibata, gelah kita tetap nggeluh ibas keselamatan.

Pdt. Steven Kumenit, STh.,M.Min.