Njagai Ras Mpekena-Kena Doni Tinepa Dibata (Mazmur 104:10-18)

BAHAN PJJ GEREJA GBKP
TANGGAL 31 JULI – 6 AGUSTUS 2011
=================================
Mazmur 104 : 10-18.

Tema : Njagai Ras Mpekena-Kena Doni Tinepa Dibata

LATAR BELAKANG
1. Sijadi oratenta enda merupaken sada kesatuan ibas ayat sada nari, ras merupaken sada puji-pujin sibentukna refleksi kerna kuasa Dibata. Pemazmur muji kuasa Dibata, simereken kegeluhen man doni enda, ras kerina isina. Kerina terintegrasi. Jadi Dibata eme pemere kegeluhen. Kuasa Dibata labo saja terjeng njadiken doni enda, tapi pe njagai doni enda.
2. Tuhan me pemere kegeluhen teridah ibas Dibata mbukaken kerina sumbul lau siberasal ibas samudra raya nari, sindube “terpenjara” ibas bumi (band. Kej.7:11). Janah singaloken keleng ate Dibata eme asuh-asuhen ras perik-perik. Bagepe ibas Dibata pesusur udan emaka doni ras kerina si lit ibassa banci” besur” erkiteken perbahanen Dibata simbelin e, maka kerina sinuan-sinuan banci turah.
3. Pemazmur pe merefleksiken kerna kegeluhen manusia erkiteken Dibata. Enda teridah arah pangan (sinuan-sinuan turah guna iusahai manusia), anggur ras minak. Telu hal enda merupaken simbol kegeluhen siermalem ate (sejahtera), sebab bagi bangsa Israel telu hal enda merupaken sada hal sipenting ibas kegeluhen.
4. Pemazmur ncidahken uga Dibata ngasuhi tinepana alu dem keleng ate, gelah kerina tinepana banci nggeluh alu ermalem ate. Erkiten sie me udan ras mata lau tuhu-tuhu maler, ras batang-bantang kayu ibas deleng libanon turah alu subur, emaka jadi ingan rasar perik-perik, ntah pe ibas pengertin sideban, ingan cicio perik-perik ras asuh-asuhen, janah enda kerina bekas Dibata sinepasa.
5. Ibas puji-pujin enda maka, pemazmur ersura-sura ncidahken kuasa Tuhan man kerina jelma, janah ngatakenca, la lit Dibata sideban, ras pe la lit manusia siapai pe ibas doni enda singasup erbahan sibage, Tuhan ngenca sibanci erbahan bage. Emaka segedang-gedang geluhna pemazmur, tetap ngeandalken Tuhan, bagepe manusia la banci meganjang ukur, khususna kalak perdosa ras kalak jahat masap kerina ibas doni nari erkiteken perbahanen Tuhan e (band. Ayat 34-35).

APLIKASI
Doni ras kerina isina Dibata kap sinjadikenca, janah kita manusia isuruhNa guna njagai ras ngusahai (band. Kej.1:28). Maksud Dibata gelah kita selaku anak-anakNa banci dat nakan arah kerina siijadiken Dibata e, em sebabna manusia jadi “top” ibas kerina tinepa Dibata, janah jadi perpanjangan tan Tuhan ibas pekena-kena doni enda. Tangtangna kerina enda erdalan alu mehuli, tapi kenca manusia ndabuh kubas dosa, keharmonisan manusia ras Tuhan terganggu, janah berdampak kubas tinepa Dibata sideban. Manusia jadi “serakah”, emaka tinepa Dibata sideban eme alam ras asuh-asuhen enggo ceda ras “punah”. Ekosistem terganggu.
Memang adi sinen kerna cedana lingkungan hidup (ekosistem) terjadi erkiteken piga-piga hal, sipemena : Kemiskinan. Negara-negara berkembang ngenen salah sada cedana lingkungan hidup erkiteken kemiskinan. Sipeduaken : Kemajun teknologi. Ibas majuna teknologi maka melala produk-produk teknologi sincedai alam enda. Sipeteluken : Pertambahan jumlah penduduk. Bertambahna jumlah penduduk, erbahanca bertambahna pertumbuhen pemukiman penduduk, sidungna mbuka lahan baru guna pemukiman penduduk. Sipeempatken: Kegoisan manusia. Keegoisan manusia erbahanca lingkungan hidup, bagepe hutan ras asuh-asuhen enggo melala ceda. ras melala denga bentuk-bentuk sincedai tinepa Dibata sideban. Tapi inti kerina enda eme lanai kita mbiar man Dibata. Harus siinget kita enda anak-anak Tuhan sienggo nggeluh ibas keselamatan. Erkiteken Tuhan Yesus mate ibas kayu persilang, maka keharmonisan geluhta ras Tuhan enggo ipehuli. Kosekwensina kita harus jadi imago Dei situhu-tuhu.
Harus min siinget, ibas cedana lingkungan hidup, ibas hal enda ceda me hutan, asuh-asuhen mate erkiteken kita, maka dungna dampakna man banta. Kegeluhenta ibas doni enda terancam., janah sila ersalah pe kena dampakna, sebab terjadi eme tanah longsor, terjadi banjir, pinakit pe ertambah, rsd. Kerina enda labo berarti la banci ipengadi, banci. Kita banci pengadi kerina enda adi tuhu-tuhu kita erkemalangen man Tuhan, bagepe ngangkai maka tinepa Dibata sideban e perlu nggeluh ka. Jadi pegeluhkenlah buah-buah Roh (band. Galati 5:22-23) bas dirinta gelah malem ateta. Janah marilah kita memuliaken Dibata ara kata ras perbahanen, khususna njagai ras pekena-kena doni tinepa Dibata.

Pdt. Steven Kumenit, STh.,M.Min.