Kamis, 11 Agustus 2011

Nggeluh Bagi Kalak Si Enggo Ibebasken Dibata (HUT RI 66) - 1 Petrus 2:11-17.

BAHAN PJJ GBKP
TANGGAL 14 – 20 AGUSTUS 2011
=============================
1 Petrus 2:11-17.

Tema : Nggeluh Bagi Kalak Si Enggo Ibebasken Dibata (HUT RI 66)

LATAR BELAKANG
1. Sijadi bahan oratenta sekali enda eme sada kata persinget rasul Petrus man kalak Kristen asal Yahudi si lit i taneh perlajangan, si paksa sie ngenanami kiniseran. Kata persinget enda ertujun gelah kalak kristen tetap nggeluh selaku kalak kristen, eme nggeluh nadingken sura-sura daging, nggeluh ibas kerembaken man Dibata saja, ras patuh man raja saja.
2. Selaku kalak “sikesilang i kuta kalak” janah kegeluhen (style) siberbeda ras kalak sideban tentuna erbahanca kalak kristen dat perlakuan si la mehuli. Tuduhen-tuduhen si la mehuli rusur ialoken, tapi ula min kerina enda erbahanca kiniteken kalak kristen bene (band. Ayat 1). Tapi amin gia lit perlakun si la mehuli man kalak kristen, tetaplah ndalanken kegeluhen si mehuli, gelah tuduhen-tuduhen si la mehuli e, salih jadi kemenangen man Tuhan, erkiteken enggo ipujina Dibata. Kerina enda tentuna, kalak kristen harus ercurmin man Kristus, uga Kristus itulak kalak ras la iergaken kalak, tapi ipilih ras iergaken Dibata Ia (ayat 4). Jadi kalak kristen harus tetap megenggeng ibas ngenanami erbage-bage perbeben ras kiniseran. Kejahaten ula ibalas salu kejahaten, tapi balaslah alu erbahan si mehuli.
3. Bagepe selaku kalak sikesilang i kuta kalak , haruslah patuh man pemerintah, em tanggungjawab selaku kalak kristen singgeluh i kuta kalak. Maksudna gelah kalak kristen harus menjadi warga negara simehuli. Sebab paksa sie salah sada tuduhen man kalak kristen eme “pemberontak”. Erkiteken sie warga negara simehuli harus patuh man pemerintahen sipil ibas kerina tingkaten. Ibas perbahanen sibage, khususna pemerintah (raja) la lit kecurigaan-kecurigaan man kalak kristen guna erbahan “keonaran”. Alu bage kalak kristen banci dat perlakun simehuli bagi masyarakat setempat (band. Yeremia 29:7).
4. Perbahanan sibage eme nggeluh simehuli ras si la erpandangen merupaken “wujudnyata” ibas pendilo Dibata man kalak kristen ibas gelap nari bengket ku bas terang gelah mberitaken perbahen-perbahen Tuhan simbelin (ayat 9).
5. Bage ibas pengaplikasian nggeluh erkiteken man Tuhan, maka secara la langsung, kalak kristen enggo mberitaken, maka kegeluhenna erbeda ras kalak sideban. Tapi amin gia erbeda, labo berarti kalak kristen harus nggeluh “menyendiri” tapi tetap tading ras bersosialisasi ibas masyarakat ras tetap jadi warga masyarakat simehuli.

APLIKASI
Bangsanta genduari enggo berumur 66 tahun, tentuna harus ka sisadari enggo cukup melala perkembangen pembangunan siilakoken pemerintahta. Tapi la ka banci situtup matata lit denga kita sikurang puas ibas pembangunan ras kebijaken pemerintah, emaka nterem denga masyarakat ibas ncidahken “ketidakpuasanna” man pemerintah erbahan si la mehuli. Bagepe nterem denga masyarakat, termasuk ije kalak kristen erbahan si la mehuli ibas kegeluhenna tep-tep wari selaku masyarakat bangsa Indonesia (nen = KKN, penebangan hutan, penjarahan taneh, rsd).
Nina Leimena : kalak kristen lit dua warga negarana, eme warga negara Surga ras warga negara sipil. Selaku warga negara Surga maka kalak kristen harus patuh man Yesus Kristus selaku Raja, tetapi selaku warga negara sipil, kalak kristen harus mengaplikasiken kemerdekaanna sienggo ialokenna arah Kristus Yesus ibas kegeluhenna tep-tep wari. Alu bage kegeluhen kalak kristen la banci nggeluh rate-ate, tapi harus tetap nggeluh selaku kalak sierkiniteken man Tuhan Dibata. Kalak kristen amin gia tading ibas doni enda tapi kegeluhenna la banci seri ras doni enda. Kegeluhen kalak kristen harus tuhu-tuhu erbeda ras kalak sideban. Kalak Kristen harus mpraktekken nggeluh sikeleng-kelengen sapih-sapih ia. Maksudna kalak kristen amin gia lit ibas perbeben ras kiniseran ula min si ndarami “kambing hitam” ras saling mempersalahkan sada ras sidebanna, tapi harus saling memotivasi ras nggeluh ibas persadan. Bagepe ibas kita tading ibas bangsa enda si multi agama (pluralitas agama), kita harus nghamati agama kalak sideban, gelah tercipta nggeluh saling menghargai sesama agama si lit i Indonesia enda. Bagepe pemerintah, kita harus patuh man pemerintah, sebab pemerintah eme wakil Dibata ibas doni enda, emaka tanggungjawabta uga kita harus notoken pemerintah gelah pemerintah banci ndalanken kebijaken-kebijaken simehuli guna kemajun bangsa ras negara Indonesia.

Pdt. Steven Kumenit, STh.,M.Min.

Tidak ada komentar:

Poskan Komentar