Peran Ende_enden Ras Musik Ibas Kebaktin (Mazmur 68:25-28)

BAHAN PJJ GEREJA GBKP
TANGGAL 21 – 27 AGUSTUS 2011-08-15
==================================
Mazmur 68:25-28.

Tema : Peran Ende-Enden Ras Musik Ibas Kebaktin.

LATAR BELAKANG
1. Mazmur enda merupaken Mazmur Daud (raja Daud), janah sipatna eme puji-pujin kemenangen.
2. Mazmur puji-pujin enda merupakan sada respon kiniteken pemazmur, erkiteken idahna uga belinna kuasa Dibata, kerina musuh-musuhNa talu ibahanNa, janah kalak benar ermeriah ukur. Kemenangen demi kemenangen, khususna sialoken bangsa Israel erkiteken Dibata hadir ije, janah simbol kehadiran Tuhan eme “Tabut perjanjin”. Perlu siteh lebe, tabut perjanjin enda i laja/pikul, emaka adi bangsa Israel erperang, Dibata pe ikut ije.
3. Tabut Perpadanan simerupaken simbol kehadiran Tuhan, pernah tading i rumah Obet Edom. Enda jadi erkiteken seharusna Daud harus mbaba peti perpadanan ku Yerusalem, tapi erkiteken mbiar ia man Tuhan, maka peti e “isimpanna” i rumah Obet Edom. Tapi erkiteken ibegina (Daud) keluarga Obed Edom ipasu-pasu maka ibuatna mulihi, janah ibabana mulihi ku Yerusalem. Ibas perdalanen bangket ku Yerusalem i Sion enda me, kerina kalak ngidah tabut Perpadanen e.
4. Ibas perdalanen arak-araken e, teridah lit kelompok-kelompok siertugas. Siarah lebe kelompok perende-ende, sedangken siarah pudi eme kalak si ngkuit kulcapi, sedangken i tengah-tengah kelompok singuda-nguda si malu gendang, janah lagu si endeken eme Pujilah Dibata i tengah-tengah perpulungenNa. Pujilah Tuhan o kerina kesusuren Jakup kerina. Ende-enden enda merupakan pengajuk gelah kerina bangsa Israel muji Dibata, selaku Raja.
5. Ipihak sideban, mazmur enda merupaken sada kata persinget man kerina bangsa-bangsa gelah ngakui Dibata e ras menghormati bangsa Dibata.

APLIKASI
Ende-enden ras musik gereja eme sada bagin si la terpisahken ibas liturgi ntah pe ibas ibadah gereja, adi la lit ende-enden ras musik gereja, tergejap kal tempa lit sikurang, bagepe “la siakap kita beribadah” man Tuhan. Jadi ende-enden ras musik gereja merupaken sada hal si sentral ibas kebaktin. Erkiteken merupaken sada hal sipenting maka ende-enden ras musik gereja tuhu-tuhu harus ipersiapken. Ipihak sideban ende-enden ras musik gereja enda merupaken sada respon kiniteken perpulungen man Tuhan.Alu kata sideban musik eme cetusan ekspresi isi hati yang diungkapkan dalam bentuk bunyi yang bernada dan berirama, khususna dalam bentuk lagu dan nyanyian. Jadi musik gereja eme sada cetusan ekspresi isi hati orang percaya yang diungkapkan dalam bentuk bunyi-bunyian yang bernada dan berirama secara harmonis. Emaka seharusna kita rende harus tuhu-tuhu guna memuliaken Tuhan ras sue rikutken kalender tahun gereja.
Perlu siteh lebe, musik banci ibedaken njadi dua bentuk eme musik intrumental ras musik vokal. Musik intrumental, bersumber ibas alat-alat musik siigunaken guna menghasiken bunyi (gitar, piano/kibord, rsd). Sedangken musik vokal bersumber ibas sora manusia nari.
Ende-enden siiendeken ibas kebaktin, sipatna eme ende-enden perpulungen (nyanyian umat), emaka ende-enden enda harus iendeken kerina perpulungen. Alu kata sideban gereja eme perpulungen si rende. Sebab alu rende perpulungen saling erlajar ras mengajar kerna kiniteken ibas Kristus. Jadi rende eme hakekat gereja. Saja ibas perkembangen musik gereja, khususna ibas kebaktin enggo lit song leader. Tapi siterjadi song leader enggo ambil alih peranan perpulungen, padahal sipat song leader eme mimpin/menopang lagu ngenca. Ibas erti kata, tugas song leader mbabai perpulungen rende alu mehuli, emaka sora song leader la banci lebih megang asangken sora perpulungen, kecuali ibas sada-sada bagin lagu si lenga iteh perpulungen ngedekenca, maka sora song leader harus ikerasken. Bagepe Koor ntah pe vocal group. Koor ras vokal group eme simewakili perpulungen guna rende ras ncidahken isi pusuh perpulungen man Dibata, la lebih.
Erkiteken penting kal ende-enden ras musik gereja ibas ibadat, maka gereja harus mpersiapkenca secara mehuli lagu-lagu sibakal iendeken ibas kebaktin. Janah lagu-lagu e harus sesuai ras tema kebaktin. Adi bage, tentu harus lit persikapen ntah pe latihen ope kebaktin.
Guna njadiken kebaktin nggeluh maka peranan musik gereja haruslah tuhu-tuhu nggeluh, emaka runggun gereja harus mpersiapken pemain musik ras songh leader, alu mehuli.

Pdt. Steven Kumenit, STh.,M.Min.