Jabu Kalak Kristen Si Missioner (Matius 7:21-27).

BAHAN PEKAN KEBAKTIN KELUARGA
GEREJA GBKP
WARI VII, SABTU 9 JUNI 2012.
==============================
Introitus : Ipujina Dibata, janah kerina kalak erngena ate man perpulungen e. Tep-tep wari itambahi Tuhan ku perpulungen e kalak si iselamatkenNa (Perbahanen Rasul-Rasul 2:47).
Ogen : Perbahanen Rasul-Rasul 2:42-47.
Khotbah : Matius 7:21-27.
Tema : Jabu Kalak Kristen Si Missioner.

LATAR BELAKANG
1. Bahan khotbahta eme bagin terakhir ibas khotbah Jesus i datas uruk. Janah ibas khotbah enda ikataken Jesus ise situhuna si banci bengket kubas Kinirajaan Surga. Si Banci bengket ibas kinirajaan Surga eme sidalanken KataNa tep-tep wari alu meriah ukur ras tutus, la saja terjeng tek. Tuhu la “terpungkiri” kalak sitek man Jesus nggeluh ibas keselamaten, tapi erkiniteken man Jesus harus teridah ibas perbahanen tep-tep wari, sebab ibas wari pendungi pagi, la kap bias kalak terjeng nandai Tuhan saja. Bagepe terjeng ernubuat ras pelawes setan sebab enda pengakun verbal denga ntah pe banci guna kepentingennna ngenca emaka labo lit perbahanen simehuli, maka kerina enda sada bentuk kejahaten, emaka sienda la banci jadi palas guna bengket kubas kinirajaan Surga. Sebab pengakun silatuhu-tuhu ras perbahanen si la tutus erbahanca sia-sia kegeluhenta ibas wari pendungi, sebab la itandai Tuhan kita.
2. Hal sipeduaken sitekanken Jesus eme pentingna ndalanken pengajarenna tep-tep wari i tengah-tengah doni enda. Pengajaren Jesus merupakan sada palas gelah kalak sitek banci tetap tedis ras nggeluh amin gia reh erbage-bage perbeben ras kiniseran. Tapi kalak si la ndalanken pengajaren Jesus, adi reh perbeben ras kiniseran minter ia ndabuh, minter ia terbaba ntah pe mombak ibas doni enda, emaka mate me ia. Ibas anding-andingen enda, ate Jesus ngataken memang tuhu kalak si tek bali nge kerina, tempa la teridah ras la terbedaken apai kalak sitek si tutus ras si la tutus. Bagepe la kita ngasup ngataken siapai si salah ras sibenar, sebab kalak si tek si tutus ras si la tutus teridah mbangun kegeluhenna secara rohani, tapi ibas paksa reh perbeben ras kiniseran, terteh ise kalak sitek simegiken kata Jesus ras ndalankenca ras si lang.
3. Pengajaren Jesus labo saja terjeng guna konsumsi intelektual (pemeteh), tapi merupaken konsumsi totalitas geluhta gelah kalak sitek nggeluh ibas keselamaten, la saja selamat ibas doni enda tapi pe nggeluh ras Tuhan ibas Kinirajaan Surga. Ate Jesus ibas pendungi pengajarenna ngataken maka ula sia-sia pengajaren e ntah pe terjeng jadi konsumsi intelektual saja, tapi harus idalanken, sebab siiperluken Tuhan la saja terjeng tek tapi ikut ije perbahanen, enda sierbahanca kalak sitek itandai Tuhan.
4. Ibas anding-andingen enda amin gia duana majekken rumah, tapi lit sada perbedaan sicukup prinsipil siicidahken Jesus. Perbedaan enda teridah ibas kegeluhen tep-tep wari. Perbedaan enda teridah ibas hasil. Terdauhen, Ate Jesus arah anding-andingen enda gelah simegiken kataNa e njadiken Jesus selaku palas ibas kegeluhenna, sebab jaminen kegeluhen lit bas Jesus. Bagepe nggeluh ras Jesus la saja mbaba persadan bage-bage saja, tapi mereken gegeh man kalak sitek guna tetap nggeluh alu benar ras ndalanken singena ate Tuhan. Nggeluh ras Jesus ngasup mengaplikasiken kern kai siiajarken Jesus ibas kegeluhen tep-tep wari.
5. Ate Jesus gelah Ia saja sijadi palas, tapi la “serta merta” ikataken Jesus mari ikutlah Aku, tapi enda tetap jadi pilihen man kalak simegiken pengajarenna. Saja enggo ikataken Jesus kern akibat si negatif ras sipositif. Pilihen kegeluhen tergantung man simegiken kataNa e. Adi ateta nggeluh maka Jesuslah jadi palas ras dalankenlah KataNa alu tutus ibas kegeluhen tep-tep wari.

APLIKASI
Ope denga terdauhen kita ngenen keluarga kristen simisioner, padin siteh lebe kai kin misioner e. Misioner eme sibersifat misi. Ertina kai silakoken kita sipatna misi ntah pe sangana ndalanken dahin singutus kita. Jadi adi kita kalak kristen maka kita harus ndalanken dahinta simehuli singena ate Tuhan i tengah-tengah doni enda. Janah dahin siidalanken kita la saja kerna kata tapi pe kerna perbahanen.
Keluarga kristen si misioner eme siijadiken Tuhan ras siitempatken Tuhan ibas doni enda harus bermisi. Keluarga kristen la banci sinik saja ibas kegeluhenna sigenduari. Keluarga kristen harus tuhu-tuhu nggeluh ibas perbahanen. Janah harus pe siteh nggeluh ibas keluarga simisioner berarti ndalanken kai singena ate Tuhan alu meriah ukur ras meteruk ukur gelah Tuhan siterpuji ras termulia. Emaka perbahanen kekelengen harus ipelebeken. Janah perbahanen kekelengen e ula pekulah-kulah, sebab ibas keluarga ndalanken perbahanen kekelengen e alu mehuli ras erpalasken kata Dibata, maka ngena ate kalak man keluarga kristen, alu bage, la pe sikataken mari jadi kalak kristen lah kam, nggit nge pagi ia jadi kalak kristen. Enda me sada bentuk misinta. Tapi harus ka siinget perbahanen simehuli eme guna nehken kekelengen man doni enda, termasuk nampati kalak sierkekurangen, nampati kalak simembutuhken penampatta, rsd. tapi ula min ibas kita nampati tujunta gelah ia jadi kristen, tapi ibas palas keleng atelah.

Pdt. Steven Kumenit, STh, M.Min.