Selasa, 05 Juni 2012

Kata Dibata Jadi Palas Nggeluh Anak-Anakta (2 Timotius 3:15-17).

BAHAN PJJ GEREJA GBKP
TANGGAL 10-16 JUNI 2012
==========================
2 Timotius 3:15-17.

Tema : Kata Dibata Jadi Palas Nggeluh Anak-Anakta.

LATAR BELAKANG.
1. Secara umum banci sikataken kitab timotius enda merupaken kitab Pastoral. Enda ikataken kitab pastoral sebab bentukna eme pengalayasi ras pengepkepen rasul Paulus man anakna ibas kiniteken eme Timotius siitadingkenna ibas perpulungen Epesus guna nampati pelayanen i perpulungen Epesus. Timotius selaku anak siumurna nguda denga, emosionalna pe banci sikataken lenga stabil, janah pelayanenna cukup melala ras mberat sebab ije pe lit ajaren-ajaren sipapak si man hadapennA, maka mbiar kal rasul Paulus adi kari mundur kiniteken Timotius, emaka arah suratna ikepkepna Timotius gelah tetap megegeh, tetap njemak kebenaren sienggo iajarken Paulus ras tetap melayani amin gia lit perbeben ras kiniseran. Ate paulus gelah Timotius tetap megenggeng.
2. Perlu siteh Timotius enda tubuh ras mbelin ibas latar belakang keluarga siberagama Jahudi. Nandena kesusuren kalak jahudi eme Eunike (gelar Junani), bapana sekalak kalak Junani. Janah ninina eme Lois. Subuk ninina Lois ras orang tuana tek man Jesus Kristus kenca rasul paulus nehken berita si Meriah i Listra. Emaka situhuna ope denga Timotius iajarken kerna pengajaren kerna Jesus Kristus, Timotius enggo ndatken pengajaren kerna kata Dibata ibas padan sindekah. Erkiteken sie me Rasul Paulus mereken pergegeh arah nuriken latar belakang Timotius simegegeh e, gelah kebenaren kerna situhu-tuhu, subuk kata Dibata siidatna arah padan sindekah, bagepe pengajaren siiajarken rasul paulus tetap ijemak. Sebab pengajaren e me lit kepentaren situhu-tuhu simereken keselamaten.
3. Ijenda Paulus ngerana kerna kewibawaan Pustaka Si Badia (kitab suci). Pustaka Si Badia amin gia itulis manusia, tapi ije lit kebenaren ras kepentaren situhu-tuhu sibanci mbaba (menuntun) manusia ku keselamaten. Sebab Pustaka Si badia gia isuratken manusia, tapi manusia e iilhami Kesah Si Badia (Dibata). Bagepe Pustaka Si Badia bertujun guna ngajarken kalak, pekenah sisalah dingen erguna ibas mereken pedah-pedah gelah banci nggeluh alu mehuli. Jadi Pusataka Si badia iilhamkan Tuhan janah lit manfaatna. Jadi Pustaka Si Badia eme salah sada sarana siipake Tuhan guna lebih mendewasakan kiniteken kalak Si tek man BaNa.
4. Ibas Paulus nuriken kerna latar belakang Timotius ras wibawa Pustaka Si Badia, ate Paulus gelah Timotius tetap nggeluh ibas Pustaka Si Badia janah pengajaren Pustaka si Badia enda saja siipake paulus ibas pelayanenenna, termasuk ngelawan ajaren-ajaren sipapak siberkembang i tengah-tengah perpulungen.
5. Paulus menekanken pengajaren arah Pustaka Si Badia man Timotius, gelah Timotius la saja njemak pengajaren ibas Pustaka Si badia ras kebenarenna, tapi pe gelah enda pe iajarken Timotius man perpulungen gelah perpulungen Epesus la terikut ku bas pengajaren si papak. Alu bage perpulungen tetap iperlengkapi ras nggeluh ibas kiniteken siserta.

APLIKASI
Ibas Pjj-nta sekali enda kita ibabai guna lebih ngangkai kern makna kata Dibata ibas kegeluhenta tep-tep wari, khususna kata Dibata ibas dunia pendidikan sisemakin hari tempa lanai lit inganna ibas sekolah-sekolah formal. Erkiteken sie me perbahanen-perbahanen si la mehuli rusur terjadi man anak-anak (pelajar ras mahasiswa). Adi lit mata pelajaren agama enda pe kurang denga, sebab siiprioritasken eme pemeteh ngenca.
GBKP ngenen Kata Dibata harus jadi bagin si la terpisahken ibas kegeluhenta tep-tep wari, khususna man anak-anak. Kata Dibata jadi penuntun geluhna, gelah anak-anak banci terhindar ibas kegeluhen si la mehuli. Erkiteken sie me Kata Dibata la saja iajarken i tengah-tengah gereja (khotbah minggu), bagepe ibas rumah, tapi pe ibas sekolah. Janah Kata Dibata harus iajarken se dini mungkin. Emaka Ibas GBKP majekken PAUD (Pendidiken Anak Usia Dini), la saja gelah anak-anak jadi pentar, tapi pe kepentaren anak erpalasken kata Dibata. Alu bage ibas kerina perbahanenna kebenaren, etika ras moral simehuli singena ate Dibata siicidahken anak-anak.
Ibas PAUD (0-6 tahun), anak-anak enggo perlu ndatken pendidiken kerna iman kristen, sebab i je me masa pertumbuhan ras pembentuken anak. Emaka ibas iman kristen iajarken i PAUD dungna terbentuk me karakter simehuli singena ate Tuhan.
Ibas Undang-undang Sisdiknas Pasal 1 butir 4 ngataken maka PAUD adalah suatu upaya pembinaan yang ditujukan bagi anak-anak sejak lahir sampai 6 tahun yang dilakukan melalui pembinaan rangsangan, pendidikan untuk membantu pertumbuhan dan perkembangan jasmani dan rohani agar anak memiliki kesiapan ibas memasuki pendidikan lebih lanjut.
Ibas ngenen enda me maka GBKP majekken PAUD. Alu bage siniharapken gereja GBKP kita kerina banci ikut terlibat ibas perkembangen PAUD enda. Emaka sangat iharapken adi ibas runggun-runggun si lit potensina guna majekken PAUD, pajekkenlah.

Pdt. Steven Kumenit, STh, M.Min.

Tidak ada komentar:

Posting Komentar