Mpebelin Biak Kristus Ibas Jabu Kalak Kristen (mATIUS 5:17-48)

BAHAN PEKAN KEBAKTIN KELUARGA
GEREJA GBKP
WARI III, 5 JUNI 2012.
==================================
Introitus : Perukurenndu bali min ras perukuren Kristus Jesus (Pilipi 2:5).
Ogen : Pilipi 2:4-11.
Khotbah : Matius 5:17-48.
Tema : Mpebelin Biak Kristus Ibas Jabu Kalak Kristen.

LATAR BELAKANG
1. Ibas bahan khotbahnta sekali enda, terdiri ibas piga-piga bagin (perikop), tapi intina merupakan sada makna eme uga ngangkai kerna hukum taurat ras ndalankenca. Emaka ibas bagin sipemena Jesus ngerana kern wibawa hukum taurat simerupakan undang-undang siibereken Dibata man bangsa Israel. Ibas pengajaren Jesus, Jesus mpertegas kerna kerehenNa labo guna Meneken hukum taurat tapi ibas rangka memperlengkapi. Enda ikatakenna gelah jelma sinterem la salah pengangkanna kerna kerehen Jesus e. Tapi ibalik sie ate Jesus gelah kalak si tek ngenen maka hukum taurat labo sada perintah guna patuh gelah banci ndatken keselamaten, tapi hukum taurat harus inen selaku panduan moral nandangi kalak sienggo iselamatken. Sebab enda me siterjadi maka kalak Jahudi patuh man hukum taurat, tapi moralna la mejile. Bagepe indalankenna sada hukum, tapi hukum sideban la idalankenna. Emaka kerehen Jesus mpertegas maka kalak sitek harus lit kepatuhen nandangi undang-undang Tuhan dingen nggit ndalankenca ibas kegeluhenna tep-tep wari.
2. Kerehen Jesus labo guna meneken hukum taurat tapi guna melengkapi hukum taurat teridah ibas ayat 21-26. Kalak Farisi ras guru-guru agama ngenen hukum si pe 6 ibas hukum taurat labo terjeng pembunuhan secara fisik saja, tapi kerna merawa, kern ngisakken kalak la banci nggeluh ibas diri kalak sitek, sebab enda banci erbahanca dosa (nen = memang labo kerina merawa tergolong ibas dosa). Sebab adi enggo erdosa berarti hubungan ras Tuhan terganggu emaka sia-sia me nehken persembahen pe. Perbahan sie harus lebe lit biak nggit ngalemi ras pusuh sibersih bas kalak sinehken persembahen, gelah persembahenna e ialoken Tuhan.
3. Ibas hukum sipepituken ibas hukum taurat ngerana kerna erlua-lua, nina Jesus ise singenen sekalak diberu alu lit rincuhna nandangi diberu e situhuna ia enggo erlua-lua. Ibas erti kata erlua-lua ijenda menyangkut bas pusuh perukurenna. Sebab paksa sie lit sada pengangkan ia ikataken erlua-lua adi enggo terjadi kontak fisik ngenca. Jadi hawa nafsu sierbahanca kita ndabuh ku dosa erlua-lua harus iambengken ibas pusuh nari. Jadi penekanan Jesus harus lah nggeluh ibas persadan siharmonis ibas jabu.
4. Bagepe pengajaren Jesus kerna pembalasan. Man kalak Jahudi pembalasen eme sada keharusan, emaka man kalak Jahudi labo lit kata pengampunan. Pengajaren Jesus la bage. Kejahaten harus nge ibalas alu kekelengen, sebab ibas perbahanen sibage kalak sierbahan kejahaten man banta banci mela akapna, dungna nggit ia jera.
5. Terdauhen Jesus ngerana kern makna kekelengen. Man kalak si tek kekelengen e la banci man sikelengina saja, tapi pe man imbang-imbangna, janah pe harus ka itotokenna imbang-imbangna e, sebab enda me simbedaken kekelengen kalak sitek man Tuhan ras si la tek. Erkiteken sie Jesus ngataken maka Dibata ngkelengi kerina jelma, erkiteken sie me perkuah ate Tuhan igejapken kerina jelma termasuk kalak jahat (nen = ayat 45,46). Ibas arti kata anak-anak Dibata harus nggeluh serta (nen = sempurna). Jadi kegeluhen anak-anak Dibata teridah ibas kata ras perbahanenna siseri eme ngelakoken simehuli singena ate Tuhan.

APLIKASI
Keluarga eme gereja sikitik, emaka adi kita ngerana kerna gereja sikitik maka situhuna banci dat sada kesimpulan keluarga e me kula ni Kristus. Bagepe keluarga kristen idilo ras itempatken Tuhan ibas doni enda ibas rangka ncidahken kai singena ate Tuhan. Keluarga kristen banci jadi usihen man keluarga-keluarga sideban. Tapi bas kinata geluh enda siidah isekelewetta reh meningkatna jumlah keluarga-keluarga si la harmonis, jadi enggo lunturna kekelengen jabu e. Lenga ka kenakalan orang tua (nen = erlua-lua, perselingkuhan), bagepe anak-anak i tengah-tengah jabu nterem terikut ku bas pinakit masyarakat sigenduari. Bagepe nterem nge keluarga kristen sila tutus ibas ernalem man Tuhan. Sienda kerina erbahanca la lit dame bas jabu, emaka uga maka kita banci nilahken sie kerina, enda me siharus sibahan ibas kegeluhen keluarga kristen. Keluarga kristen harus ndalanken biak Dibata eme lit kekelengen, meteruk ukur, nggeluh ibas erkemalangen man Dibata ras ncidahken buah Roh ( nen = Galati 5:22-23) singgeluh bas kita. Persoalenna uga carana gelah e (biak Kristus) nggeluh bas kita. Carana kita harus nggeluh ibas persadan ras Kristus. Keluarga kristen selaku kula ni Kristus harus njadiken Kristus takal keluarga. Bagepe nggit kita ngukuri kata Dibata suari ras berngi, sebab ibas kata Dibata nge lit pengajaren ras perintah ndalanken kai singena ate Tuhan.

Pdt. Steven Kumenit, STh,M.Min.