Palas Rukur Jabu Kalak Kristen (Matius 5:3-12)

BAHAN PEKAN KEBAKTIN KELUARGA
GEREJA GBKP
==================================
WARI 1, 3 JUNI 2012.
Introitus : Kalak benar itegu-tegu dingen ikawali TUHAN , tapi si jahat lit i bas dalan ku kebenen (Mazmur 1:6).
Ogen : Mazmur 1:1-6.
Khotbah : Matius 5:3-12.
Tema : Palas Rukur Jabu Kalak Kristen.

LATAR BELAKANG
1. Kenca Jesus ras ajar-ajarNa nusur ibas uruk nari, kepeken iteruh uruk enggo nterem kalak sinimai Jesus. Kalak sinterem ndarami Jesus erkiteken lit keperlunna secara jasmani ngenca, khususna gelah kinirajaan Daud banci ipajeken mulihi. Ibas arti kata gelah bangsa Jahudi banci bebas ibas kekuasaan bangsa Romawi nari, bagepe gelah sisakit banci madan, rsd. Latar belakang sie enggo teroge Jesus, emaka iajarken Jesus me kerna kemalamen ate situhu-tuhu ras kerna kinirajaan Surga. Ibas pengajaren enda sitandai alu khotbah Jesus i das uruk.
2. Bahan oratenta sendah labo menekankena kerna hal-hal “jasmani” tapi lebih menekanken kerna spiritualitas. Maksudna guna ndatken kemalemen ate ras nggeluh ibas kinirajaan Sorga prinsip-prinsip kebenaren Dibata harus nggeluh ibas diri manusia. Erkiteken sie sipaling penting man manusia eme lit sada penggejapen maka ia labo lit kai pe i lebe-lebe Dibata (nen = miskin). Alu kata sideban, adi geluhta nggeluh ibas kiniteruken ukur, janah man Dibata saja inganta mindo ras ernalem (nen = tempa-tempa jadi pemindo-mindo), janah geluhta siteh labo lit kai pe i lebe-lebe Dibata, ku Ia ngenca kita mindo penampat ras perkuah ateNa, maka man kalak si bage me sibengket ibas Kinirajaan Surga. Enda me simbedaken Kinirajaan Surga ras kinirajaan doni.
3. Penekanan Jesus man kalak simegiken khotbahNa, eme gelah kerina ia nggeluh ibas pertobatan janah kegeluhenna nggeluh ibas kinijeraan ras nggit ndalanken kai singena ate Tuhan. Harus siteh lebe simegiken khotbah Jesus eme kalak Jahudi. Kalak Jahudi enda ndekah kal ertima-tima kern kinirajaan Sorga, bagepe nterem kalak Jahudi enda banci sikataken sedekah enda nimai kinirajaan Surga alu bentuk fisik ras nterem ka ia nggeluh erbana-bana. Erkiteken sie me penting man kalak Jahudi nggeluh alu tuhu-tuhu selaku bangsa pilihen Dibata.
4. Tole selaku kalak si tek man Dibata seharusna min kegeluhenna nggeluh ibas ceda ate, sebab kegeluhen sierceda ate ngataken, maka isadarina kegeluhenna tuhu-tuhu enggo ndalanken kai si la ngena ate Dibata. Bagepe ibas kegeluhen tep-tep wari harus nggeluh ibas kiniteruken ukur, alu bage iapuli Dibata me ia emaka geluhna nggeluh ibas kemalemen ate. Bagepe harus lit kegeluhen si muas ras milihe nandangi kebenaren (nen = kebenaren ibas Dibata nari), sebab kegeluhen sibage me berarti nggit erdame ras Dibata. Sebab harus siinget erkiteken dosa me maka manusia enggo “ermusuhen” ras Dibata, emaka patut nge manusia ndatken penghukuman, erkiteken sie me maka manusia la nggeluh ibas kemalemen ate. Ibas pengangkan si bage me berarti kita labo banci nggeluh adi la ras Dibata, emaka kegeluhen si muas ras melihe nandangi kebenaren intina nggit erdame ras Dibata. Erkiteken sie me kegeluhen e harus nggeluh ibas perkuah ate ras perkeleng ateNa, sebab kegeluhen sibage nge simaba kedamen man doni enda. Maksudna kegeluhen e harus badia ras tuhu-tuhu nadingken kegeluhen si pekulah-kulah.
5. Kegeluhen siberbeda, karakter siberbeda siicidahken kalak si tek man Tuhan, adi sada paksa jumpa ia perbeben ras kiniseran la mis putus asa.

APLIKASI
Kerina manusia singgeluh perayakenna eme ndarami kemalemen ate.Tuhu melala kal kemalemen ate siitawarkan doni enda man banta, entah e reh arah jabatan, erta, pangkat, rsd. Tapi situhuna adi siukuri alu mbages, bentuk kemalemen ate siibereken doni enda lenga bo kemalemen ate situhu-tuhu. Janah harus siteh adi genduari enggo sigejapken enggo tempa kebenen kemalemen ate ras nggejapken tempa-tempa lit “kehampaan hidup”, e tandana kita enggo mulai kebenen kemalemen ate, bagepe kita enggo ndauh ibas ulu kemalemen ate e.
Palas gelah ndatken kemalemen ate eme kita harus tading ras nggeluh ibas Tuhan alu ketutusan simehuli. Sebab ibas kita mbangun “keintiman” ras Tuhan, janah tetap ngelitken waktunta guna ngukuri kata Dibata suari ras berngi maka keleng ateNa maler ndemi pusuhta. Sebab kai ? sebab kata Dibata dem alu perintah ras padan. Emaka siniharapken bas jabu-jabu kalak kristen gelah ndatken kemalemen ate, marilah kata Dibata (nen = firman Tuhan) jadi palas perukurennta. Jabu-jabu kalak kristen harus sada pengangkan kerna Kata Dibata.

Pdt. Steven Kumenit, STh, M.Min.