Minggu, 03 Juni 2012

Perayaken Jabu Kalak Kristen (Matius 6:19-34)

BAHAN PEKAN KEBAKTIN KELUARG
GEREJA GBKP
WARI V. KAMIS 7 JUNI 2012.
=============================
Introitus : Tapi si pentingna kal, daramilah lebe KinirajanNa, janah dalankenlah si ngena ateNa, maka icukupiNa kai si perlu man bandu (Matius 6:33).
Ogen : Kejadian 13:8-12.
Khotbah : Matius 6:19-34.
Tema : Perayaken Jabu Kalak Kristen.

LATAR BELAKANG
1. Ibas bahan khotbahnta enda lit dua hal siisingetken Jesus eme kerna erta ras kearun ate. Adi siperdiateken ibas kegeluhen ntah pe pengangkan kalak Jahudi kerna erta, maka kalak Jahudi erpengakap erta merupaken sada tanda pasu-pasu Dibata man manusia. Jadi adi ia bayak maka lit pasu-pasu Dibata man bana, sebalikna adi musil ia maka la lit pasu-pasu Tuhan man baNa. Emaka kegeluhen kalak Jahudi (kalak Farisi) lalap ngukurken kerna erta. Emaka siterjadi rusur ibas kegeluhen kalak Jahudi ndarami/ndatken erta alu cara-cara si la nai payo (mbungaken sen alu bunga simeganjang ras menindas, rsd). Jadi tuhu-tuhu erta enggo jadi perayakenna pelin-pelin. Ibas sie Jesus mpersingeti ibas khotbahna gelah ula ernalem man erta, sebab sada paksa kerina e banci bene. Emaka sipaling penting bas kalak sitek uga ia makeken mata pusuh alu mehuli. Sebab alu mata pusuh simehuli maka pengidahna pe mehuli.
2. Bagepe Yesus mpersingeti jelma sinterem kerna kai ertina mengandalken kuasa Dibata. Kuasa Dibata e banci mereken kai siiperluken kita. Kuasa Dibata banci mereken gegeh ras kegeluhen man kalak si tek ibas kegeluhna,amin gia jumpa perbeben ras kiniseran, Engkai ? sebab Dibata e, Dibata si dem alu kebayaken si tetap ngasuhi kegeluhen anak-anakNa. Emaka kegeluhen simengandalken Tuhan ibas kegeluhenna berarti nggeluh ibas kepatuhen nandangi kerina perentah-perentahNa.
3. Yesus erkhotbah kerna kearun ate, erkiteken biak kalak Jahudi secara umum merupaken bangsa perbinaga (pedagang) cenderung lebih ngergai erta doni. Emaka ipersingeti Yesus gelah kalak sitek ula ku je kal ukurna, janah ula min erta jadi penalemenna, sebab adi erta jadi penalemenna maka kalak sitek nggo nembah man dua tuan, sada man Tuhan, sada ka man mamon (erta). Ijenda Jesus ngataken maka mamon banci jadi “berhala” siisembah kalak.
4. Yesus mereken contoh sikongkrit kerna perbedaan manusia (kita) ras perik. Nina Yesus ndauh ergan manusia (kita) asangken perik. Maka perlu siteh ibas kerina siijadiken Dibata, manusia nge sisempurnana, tapi amin bage gia kerina nge ijaga ras iasuhi Tuhan. Tuhu ergan manusia asangken perik, sebab ibas diri manusia lit misi siharus idalanken eme gelah doni ras kerina isina nggeluh ibas keselamaten. Emaka sipaling penting man manusia (banta) ula kal aru ateta kerna kebutuhen jasmani, sebab enggo isikapken Tuhan nge kai siiperluken kita. Sebab labo lit kearun ate singasup mereken serpang pulah ras sipegedangken umur manusia ibas doni enda, tapi sebalikna manusia nggeluh ibas kematen (band. Roma 6:23). Alu kata sideban, adi Yesus ngataken man jelma sinterem kerna pangan ras inemen labo perlu jadi hal kebiaren ntah pe kearun ate. MaksudNa pangan ras inemen e me hal si kitik. Emaka ula kal kearun ateta e berlebihan, seh maka nggo lanai siinget lit kepe siterbelinen siharus idalanken, eme kekelengen ra nehken keselamatan man doni enda, ras pe ndalanken peraten Tuhan.. Contoh ersura-sura kita jadi bayak, tapi ibas kita ndaramisa ras makeken kebayaken e sipake cara-cara si la ngena ate Dibata.
5. Erta doni tuhu penting, tapi lebih penting eme Kinirajan Dibata, sebab erta doni rehna ibas Dibata nari. Emaka simegi khotbah Jesus enda isingetken maka silebih penting lebe eme ndarami nilai-nilai rohani ras Tuhan saja sijadi penalementa (nen = penyerahan diri total demi kerajaan Allah). Ibas kalak sitek ndarami kinirajan Dibata, berarti nilai-nilai singena ate Dibata siharus idalankenna. Bagepe soal kebenaren Dibata siharus icidahken ibas kegeluhen tep-tep wari. Alu bage ipasu-pasu Tuhan me kalak situhu-tuhu mengandalkan Tuhan.

APLIKASI
Perayaken nggeluh jabu kalak kristen eme nggeluh ibas kemalemen ate. Ibas palas sie me ateta jabunta ipasu-pasu Tuhan. Tapi kenca sidalani kegeluhenta i tengah-tengah doni enda, guna ndatken kemalamen ate ibas jabunta maka siilakoken rusur erpalasken kemalamen ate doni enda, eme erta, pangkat, jabatan ras gelar, rsd. Janah erkiteken sie mekatep keluarga “terabaikan”, janah orang tua nyekolahken anak seh meganjang, tapi la barengi alu palas kiniteken. Emaka siterjadi anak kurang tutus ersembah man Tuhan (jarang ku kebaktin). Seharusna ibas ateta ndatken kemalemen ate, sipaling penting bas keluarga kristen eme nggeluh ernalem man Tuhan. Totalitas kegeluhen keluarga kristen harus patuh man Tuhan ras dalanken kerina sura-suraNa. Ibas erti kata keluarga Kristen harus nggeluh erkemalangen man Tuhan ras ndalanken kebenaren, kekelengen, kedamen, rsd. Tapi adi perayaken kemalemen ate erpalasken doni enda, maka siterjadi eme la lit kekelengen (turah perubaten) ras labo lit keharmonisan.
Keluarga Kristen harus ngangkai maka ia eme alat Dibata guna ncidahken kinirajaan Dibata ibas doni enda, janah harus pe ngangkai apai simehuli sipereh pasu-pasu Tuhan bas kita selaku keluarga kristen. Bagepe harus pe ngangkai maka ibas keluarga kristen tetap mengandalkan Tuhan ibas kegeluhenna tep-tep wari maka Tuhan la pernah nadingken kita, janah ibereken Tuhan kecukupen man keluarganta.

Pdt. Steven Kumenit, STh,M.Min.

Tidak ada komentar:

Posting Komentar