Tema : Ngerembakken Diri Ras Dibata Arah Pertoton (Matius 6:5-13).

BAHAN PJJ GEREJA GBKP
TANGGAL 17-23 JUNI 2012.
=============================
Matius 6:5-13.

Tema : Ngerembakken Diri Ras Dibata Arah Pertoton.

LATAR BELAKANG
1. Ibas jaman Tuhan Yesus, kalak Yahudi erpengakap hal ertoto merupaken sada kewajiban agama. Erkiteken pemahaman sibage me khususna man kalak Parisi maka ibas ia ertoto icidahkenna kiniganjangen ukurna. Emaka ertoto ia alu nggedang gelah iidah kalak ia sekalak sibeluh ertoto. Bagepe ibas budaya agama Jahudi lit kap jam-jam ertoto eme jam 9, jam 12 ciger ras jam 15 karaben, itambah ka pertoton ope man. Ibas pertoton e pe lit rumusen-rumusenna, tapi kalak Jahudi meteh maka banci ka itambahi rumusen-rumusen pertoton e. Ibas budaya jam ertoto enda me siterjadi man kalak Parisi enggo memamerken kerna “kesalehan” ras kebeluhenna ertoto, erkiteken sie me adi enggo seh jam ertoto, lawes ia ku simpang-simpang ras ku rumah pertoton gelah iidah kalak sinterem. Perbahanen sibage me siidah Jesus perbahanen sipekulah-kulah. Sebab situhuna ibalik kesalehanna tersimpan kiniganjangen ukur.
2. Nina Jesus : Tapi adi ertoto atendu, bengketlah ku bas kamarndu, eruk pintun jenari ertotolah man Dibata si la iidah e. Dibata si ngidah perbahanenndu e mereken upah man bandu. Bage pe adi ertoto kam ola mulih-ulih bagi kalak si la nandai Tuhan. Ia erpengakap maka adi gedang pertotonna ibegiken Dibata kap. Maksud Jesus enda gelah kegeluhen kalak sitek labo terjeng ngelakoken kewajiban agama ngenca, tapi merupaken sada kewajiban nandangi Dibata. Sebab ertoto merupaken sada komunikasi manusia ras Tuhan, ras memang hanya itujuken man Tuhan, labo man manusia. Siilakoken kalak Farisi ertoto itujuken man manusia.
3. Pertoton sipekulah-kulah e me si la ngena ate Jesus emaka iajarken Jesus me uga seharusna ertoto man ajar-ajarNa. Pengajaren Jesus enda sekaligus mengkritik perbahanen kalak Parisi e. Padahal ibas ajaren agama kerna ertoto, seh pe lit jam-jam ertoto enda gelah kalak Jahudi ngelitken hubungen secara pribadi ras Dibata ras litna kesalehan situhu-tuhu.
4. Emaka ibas pertoton siiajarken Jesus gelah min sihindari kiniganjangen ukur (sombong), ntah pe motivasi guna memamerkan diri ibas ertoto. Sebab pertoton siisehken guna ndarami pujian manusiawi, e labo ertoto gelarna. Tapi ibas ertoto sipentingna eme kiniteruken ukur ras lit ibas keheningen (khusuk). Maksudna gelah ibas ertoto man Tuhan, la lit siganggu kita. Alu bage pertoton e banci terkonsentrasi, erkiteken sie me nina Tuhan Yesus : bengketlah kubas kamar janah eruklah pintu kamarndu.
5. Bagepe pertoton siiajarken Jesus gelah kalak si tek lit ketergantungen man Tuhan saja selaku Bapa, ras man Tuhan saja kap ingan pemindon, ras nggeluh ibas kai singena ate Tuhan. Erkiteken sie ibas pertoton e lit ibereken nakan sicukup ibas wari sisendah enda ras pedauh min kami ibas siilat nari ras reh min KinirajanNdu. Kalak si tek ertoto ndilo Tuhan selaku Bapa, erkite-kiteken kalak sitek nggo iangkat jadi anak-anakNa.

APLIKASI
Nina Calvin : pertoton eme Kesah kalak si tek man Jesus Kristus. Arah enda banci sisimpulken maka adi ateta nggeluh ibas doni enda bagepe i Surga maka kita harus tutus ertoto man Tuhan Dibata. Sebab ibas pihak sideban pertoton eme komunikasinta ras Tuhan, bagepe “pencurahan diri” i lebe-lebe Dibata. Ibas pertoton sipeseh me kai sura-suranta, kelsehen, kearun ate, kebiaren, pengharapen ras keriahen ukurta man Tuhan Dibata. Emaka pertoton eme sada “pencurahan hati” siipeseh secara terbuka man Tuhan. Emaka ibas kita ertoto man Tuhan berarti kita nggeluh ibas persadan ras Tuhan. Alu bage kalak si la nggit ertoto man Tuhan sienggo nelamatken kita, kalak sibage bali ras ersembah man “berhala”. Sebab alu la ertoto berarti la mehamat man Tuhan ras sipersokan kap kern keberadaan Dibata e.
Kita ertoto labo guna Dibata, tapi gunanta tujunna eme gelah kita ipasu-pasu Tuhan. Janah adi lit perbeben ras kiniseran, kita banci isampati Tuhan. Ibas pemahaman sibagenda me sewajarna kita harus tetap ndeher ras Dibata. Kita harus ngerembakken diri man Tuhan. Salah sada bentuk kita ngerembaken diri man Tuhan eme arah pertoton. Tapi ibas kita ertoto man Tuhan lit etikana, eme la banci kita menganjang ukur, tapi harus meteruk ukur, bagepe la banci mulih-ulih ras pekulah-kulah, janah harus lit ibas pusuhta ngakui Dibata e Dibata situhu-tuhu erkuasa, emaka si lit bas kita eme ketergantungen kita man Tuhan saja. Bagepe ibas kita ertoto, labo terjeng paksa lit ibas perbeben ras kiniseran, tapi ibas kerina eksistensi kegeluhen, kita harus ertoto man Tuhan. Emaka ibas kita tetap ertoto, kegeluhenta pe reh deherna ras Dibata, bagepe itandai Dibata me kita enda anak-anakNa, emaka ijaga ras ipasu-pasuNa kita.

Pdt. Steven Kumenit, STh,M.Min.