Tema : Nggeluh Ibas Kata Dibata (Jesaya 55:1-6)

BAHAN PJJ GEREJA GBKP
TANGGAL 24-30 JUNI 2012.
=============================
Jesaya 55:1-6.

Tema : Nggeluh Ibas Kata Dibata.

LATAR BELAKANG
1. Bahan oratenta sekali enda eme kern kitab Jesaya, siisuratken man kalak Israel si lit ibas pembuangen,
khususna nandangi dungna pembuangen i Babel. Alu tujun mbpekeke mulihi kiniteken bangsa Israel sienggo mulai “bene” erkiteken kiniseran siinanamina sedekah ibas taneh pembuangen. Erkitekem sie me enggo sempat lit perukuren bangsa Israel singatakenca maka Tuhan lanai mperdiateken bangsana. Emaka situhuna kiniseran bangsa Israel si lit ibas taneh pembuangen enda, menyangkut soal jasmani ras rohani.
2. Ibas situasi sibagenda me reh nabi Jesaya, ernubuat ia kerna keselamaten situhu-tuhuna. Ija bangsa Israel enggo nadingken Dibata ras kai singena ateNa, genduari itenahken Dibata ka gelah reh ersada ras Tuhan mulihi. Tapi lit syaratna eme bangsa Israel harus nggeluh ibas kelihen ras muas kerna kinijeran ras hubungen si tuhu-tuhu ras Dibata gelah ipasu-pasu Tuhan. Pasu-pasu Tuhan mbaba kegeluhen situhu-tuhu man bangsa Israel, janah enda la perlu igalar alu sen, tapi alu perbahanen singgit jera ras kiniteken man Tuhan. Tole, Jesaya mpersingeti bangsa Israel gelah ula nari nukurken duitna kempak barang si la erbahan besur, sebab enda kerina sea-sea. Ibas erti kata situhuna sia-sia me ndarami kesejahteraan ibas taneh pembuangen. Jadi situhuna ibas Jesaya ndilo bangsa Israel gelah nggeluh mulihken ras Dibata emaka ipasu-pasu Dibata me ras nggeluh ibas keselamaten. Enda iandingken man kalak simuas maka lau nemen enggo isikapken, janah man simelihe man ia asa puasna sebab nakan pe lit, bagepe anggur ras susu banci ibuat la nukur, ngataken maka lau ras nakan merupaken sada kebutuhen pokok manusia ras merupaken sada bentuk kiasan sinjelasken kerna pangan rohani, khususna menyangkut kata Dibata siipeseh guna ibegiken . Bagepe kegeluhen manusia sitek man Tuhan, kegeluhenna labo itentuken alu roti saja tapi ibas kai siibelasken Dibata (nen = Ulangen 8:3; Matius 4:4). Sedangken anggur merupaken simbol kern kata Dibata singasup mereken keriahen (nen = anggur man bangsa Israel merupaken keriahen), sedangken susu eme simbol simereken pertumbuhen (nen = 1 Petrus 2:2). Jadi situhuna la lit ibas doni enda simereken keriahen ras kedamen, selain bas Dibata.
3. Kegeluhen bangsa Israel tergantung kap man Tuhan. Tuhan simereken kegeluhen man bangsa Israel adi bangsa Israel megiken kai siikatakenNa ras nggit mulihken ku Tuhan. Alu bage Dibata erbahan perpadanen si la ermasap-masap. Kekelengen Tuhan sinteguh man Daud ibereken ka man bangsa Israel. Jadi perpadananen Tuhan eme kekelengen. Ibas erti kata adi bangsa Israel tetap nggeluh ibas kesetiaan man Tuhan, maka kekelengen Tuhan tetap rasa lalap man bangsa Israel. Emaka adi bangsa Israel lit ibas perbeben ras kiniseran maka Tuhan kap sinampati dingen simereken serpang pulah, janah adi bangsa Israel pagi nggeluh bagi si langena ate Tuhan maka reh kap Tuhan mpersengetisa gelah bangsa Israel banci robah ras tetap nggeluh ras Ia.
4. Bagi Daud jadi agen Tuhan ibas bangsa Israel guna nehken ku keselamaten man bangsa Israel, bageme bangsa Israel idilo Tuhan guna jadi agen keselamaten ka nandangi bangsa-bangsa ibas doni enda. Dibata kap smereken kepentaren ras pemeteh guna ndalanken sie.
5. Hal sideban, Jesaya mereken kata himbauan man bangsa Israel gelah tetap ndarami Tuhan tupung banci denga jumpa ras Ia, ertotolah man bana tupung Ia ndeher denga. Enda ngataken : 1). Maka banci saja sada paksa Dibata lanai banci ijumpai erkiteken dosa-dosa bangsa Israel. Dibata jadi ndauh man bangsa Israel. Tapi genduari Tuhan enggo mperembakken diriNa (ndeher) ras bangsa Israel, bagepe nggo idilona bangsa Israel guna reh kubas persadanNa, emaka “moment”/kesempaten enda ula kal isia-siaken bangsa israel guna jumpai Tuhan. 2). Erkiteken Tuhan enggo ndeher maka bangsa Israel harus ertoto mindo penampat, sebab kalak sireh mindo penampat man Tuhan, pasti isampatiNa. Bagepe situhuna secara terbuka ate nabi Jesaya ngataken man bangsa Israel, Tuhan e ndeher kap bagepe bangsa Israel ras Ia erkuasa ibas kerina ingan. Jadi salah me pengangkan bangsa Israel sedekah enda kerna Dibata e ndauh ras la erkuasa si taneh Babel.

APLIKASI
Pustaka si Badia eme kata Dibata, amin gia Pustaka si Badia isuratken manusia, tapi manusia e ndatken “ilham” ibas Dibata nari. Ibas Pustaka si Badia nuriken ntah pe ersaksi kerna Dibata sitelu sada ras karya keselamatenna. Karya keselamaten Tuhan berpusat ibas diri Jesus Kristus. Pustaka Si Badia merupaken tendang man nahenta ras nerangi dalan siidalani kalak sitek (band = Maz.119:105). Bagepe jadi pedoman ibas perbahanen ras kegeluhen kalak si tek (band. 2 Timotius 3:16-17).
Ibas pemahaman sie situhuna perlu kal kita selaku kalak sitek erlajar kerna Pustaka Si Badia gelah kita banci meteh kai sura-sura Tuhan ibas kegeluhenta. Janah harus siinget maka Pustaka Si Badia iajari labo guna kepentingen pemeteh ngenca, tapi ibas rangka mpeseh keselamatenta. Emaka selaku kalak sitek tutuslah ngoge pustaka Si Badia sebab ije nari sidat kata Dibata situhu-tuhu alu bage sipraktekken ka ibas kegeluhenta tep-tep wari, emaka kita banci nggeluh ibas kedamen ras kemalemen ate.

Pdt. Steven Kumenit, STh, M.Min.