Alemi Min Salah Kami Bagi Nialemi Kami Salah kalak Kempak Kami (Matius 6:12).

BAHAN PEKAN DOA GEREJA GBKP WARI V. KAMIS 27 SEPTEMBER 2012. ================================== Introitus : Tapi i bas Kam lit pengalemi dosa gelah kami malang man baNdu (Mazmur 130:4). Ogen : Mazmur 130:1-8. Khotbah : Matius 6:12. Tema : Alemi Min Salah Kami Bagi Nialemi Kami Salah kalak Kempak Kami. LATAR BELAKANG 1. Ibas bahan khotbahnta sekali enda, simerupaken sada bagin ibas pertoton Tuhan iajarken Yesus man ajar-ajarNa kerna ise sipatut ngalemi salah manusia. Memang harus siteh lebe, ibas Matius ngataken salah e berarti dosa. Jadi ibas konteks Matius, khususna ibas pertoton Tuhan, salah bali ras dosa. Emaka salah manusia simerupaken dosa e Dibata ngenca sibanci ngalemisa, la lit sideban. 2. Dosa eme kegagalan ngelakoken kern simehuli ras benar siiperintahken Tuhan. Bagepe dosa eme sada pemberontaken nandangi pemerintahen Tuhan. Erkiteken sie kalak sierbahan dosa berarti ia lanai patuh man Tuhan, alu bage ia harus ihukum. Penghukuman enda patut ialoken manusia erkite-kiteken manusia merupaken tinepaNa, manusia eme sikerajangenNa. Bagepe dosa mpedauh kita ibas pasu-pasu Tuhan nari. Enda me si ola seh man banta manusia. 3. Isamping sie erkiteken Dibata badia, maka anak-anakNa pe harus badia, emaka kebadiaan e Dibata kap simerekenca. Alu bage ajar-ajar isingetken gelah harus tetap nggeluh ibas kebadiaan. Ipihak sideban iajarken Yesus ka man ajar-ajarNa kerna kiniteruken ukur ras pang ngakuken salah man Bapa (Dibata). Alu bage ajar-ajar nggejapken kepeken ia enggo erdosa ras la kap metunggung i lebe-lebe Dibata. 4. Siimaksudken Yesus gelah ajar-ajar badia i lebe-lebe Tuhan, labo berarti terjeng ngelitken relasi ras Tuhan saja, tapi harus pe teridah ibas relasi ras sapih-sapih manusia. Erkiteken sie me ibas pemindon gelah Dibata ngalemi salah/dosa ajar-ajar, maka sipaling pentingna kal ajar-ajar harus lebe nggit ngalemi salah kalak siibahan kala kempak dirina. 5. Ibas ajar-ajar nggit ngalemi salah kalak berarti enggo kap nggeluh perkuah ate ibas pusuh ajar-ajar. Emaka relasi antar manusia tetap terjaga. Lebih asangken sie, ajar-ajar Yesus enggo terhindar ibas biak egois ras nggit ngukum kalak, sebab penghukuman hanya hak Tuhan. APLIKASI Secara emosi banci sikataken paksa manusia sipemena (Adam ras Hawa) ndabuh ku bas dosa seharusna min Dibata nasapken ia duana, jenari njadiken manusia simbaru. Tapi perukuren manusia berbeda ras Tuhan. Ate Dibata manusia singgo ndabuh ku bas dosa e nggejapken kerna keberdosaanna, janah ngakuken dosa man Tuhan, kenca sie ngadi ibas perbahanen dosa-dosa nari, emaka teridah manusia e tinepa Dibata simehuli. Perkuah ate Dibata sinelamatken kita ibas dosa nari teridah ibas diri Yesus Kristus. Yesus Kristus nggit ngasamken kesahNa guna nebusi dosa-dosanta. Alu bage seharusna kita nggeluh ibas keriahen ukur ras tetap ngayuken perkuah ate Tuhan e arah ndalanken kai singena ateNa. Tapi siterjadi la bage. Nterem denga kita sitetap ndalanken kai sila ngena ate Tuhan. Padahal perbahanen sibage peturah penghukuman man banta. Dosa tetap ngelangketi pusuh ras peratenta. Kesah Si badia siseharusna nggeluh ras ngerajai pusuh ras peratenta, tempa la nai lit inganna. Erkiteken sie me biak egois ras nggit subuki sijahat alu sijahat jadi bagin kegeluhenta. Ibas kegeluhenta tempa la nai lit perkuah ate, emaka la kita ngasup ngalemi salah kalak, bagepe siambil alih dahin Tuhan guna ngukum kalak sierbahan salah kempak kita. Sekali enda kita isingetken maka jadilah anak-anak Dibata simehuli ras tetap ndalanken kai sibenar i lebe-lebe Dibata. Memang sisadari ibas kita nggeluh i tengah-tengah doni enda banci saja sadar ntah pe la sadar kita enggo ngelakoken kai si la ngena ate Tuhan. Emaka penting man banta guna nggejapken kerna salah ntah pe dosanta e i lebe-lebe Tuhan. Bagepe sigejapkenlah adi la isampati Tuhan kegeluhenta maka sia-sia me kegeluhenta i bas doni enda. Emaka alu meteruk ukur ras pang, mari siakuken dosa ras kesalahenta man Tuhan. Janah pindolah gegeh man Tuhan gelah iberekenNa man banta kengasupen guna tetap nggeluh metunggung i lebe-lebeNa. Termasuk i je kita ngasup ngalemi salah kalak kempak kita. Ula kita sangsi adi kita ngakukenca alu meteruk ukur maka Dibata si perkuah ate e nggit ngalemi salah ras dosanta. Emaka alu bageme kita tetap bersih ras badia i lebe-lebeNa. Pdt. Steven Kumenit, STh, M.Min.