Musyawara Ngawan (Heber 10. 25-35)

BAHAN PJJ GEREJA GBKP
TANGGAL 19-25 FEBRUARI 2012.
============================
Heber 10:25-35.

Tema : Musyawarah Ngawan.

LATAR BELAKANG
1. Perkembangen kekristenan ibas abad-abad pertama tuhu-tuhu ndatken tantangen, ija kalak kristen ndatken penganiayaan, termasuk kalak kristen asal Jahudi simerap marpar i taneh perlajangen. Emaka kinitekenna enggo mulai “luntur”, erkiteken sie kalak kristen enggo mulai nadingken kegeluhen kekristenanna eme kerna ersembah man Dibata ibas gereja. Enda jadi erkiteken lit sada pengakap man kalak kristen tempa-tempa sia-sia iakapna jadi kalak kristen, sebab lalap nge nggeluh ibas penganiayaan subuk ibas pemerintah nari bagepe kalak Jahudi, emaka ibas penganiayaan enda kalak kristen nggeluh ibas kiniseran.
2. Ibas situasi sibagenda me reh surat Heber, alu tujun mpersingeti kalak kristen gelah tetap nggeluh selaku kalak kristen siersembah man Tuhan, janah sapih-sapih kalak kristen harus nggeluh sikeleng-kelengen ras saling mperdiateken sada –ras sidebanna, emaka selaku kalak kristen harus min siah-iahen ia guna reh ke perpulungen, sebab la sia-sia kalak kristen tutus ersembah man Tuhan, sebab wari Tuhan pasti nge reh. Penekanen kern wari Tuhan pasti nge reh gelah kalak kristen meteh ibas kerehen wari Tuhan ije me manusia iranaken (iadili).
3. Erkiteken perkuah ate Tuhan nge kalak kristen enggo nggeluh ibas keselamaten, tapi adi sengaja erbahan dosa maka la lit persembahen sideban sibanci nasapken dosa manusia. Manusia banci masap dosana erkiteken Yesus Kristus enggo persembahken dirina. Janah enda pe mbukaken kerna pengangkan kalak kristen asal Jahudi sierpengakap arah persembahen tutungen ras persembahen pengalemi dosa me, dosa-dosa manusia banci imasapken, lang. Lanai lit persembahen sideban sibanci nasapken dosa manusia. Dosa manusia banci masap erkiteken perkuah ate Tuhan saja.
4. Penulis Kitab Heber enda mpersingeti kerna penghukumen sindauh lebih berat adi kalak kristen la ngergaken Anak Dibata (Jesus Kristus) ras megombang man Kesah Si Badia, sebab adi Dibata singukumsa tentuna la lit ise pe sibanci nahansa.
5. Penulis la saja ngerana kerna penghukumen sibanci ialoken kalak kristen adi nggeluh ibas dosa, tapi pe penulis kitab heber enda mereken pergegeh gelah tetap ibas pengarapen man Tuhan saja ras tetap ndahiken dahin simehuli amin gia nggeluh ibas perbeben, sebab ibalik sie lit siterulin sibanci ialoken kalak kristen si tahan rasa lalap, eme kegeluhen.

APLIKASI
Temanta sendah eme Musyawarah ngawan. Musyawarah ngawan eme sada bentuk “perjumpan si lit i tengah-tengah gerejanta siilakoken sekali ibas sada tahun. Janah ibas tahun enda kalender kerja GBKP, Musyawarah ngawan ibahan ibas tanggal 25 Maret 2012. Amin gia Musyawarah Ngawan enda “penglibatan” anggota ngawan, tapi Musyawarah Ngawan e labo muat sada keputusen. Musyawarah Ngawan enda guna menggumuli kegeluhen pelayanen tri tugas gereja. Erkiteken Musyawarah Ngawan enda labo pengambilan keputusen tapi guna megiken laporan perkembangen perpulungen sedekah sada tahun si enggo erdalan, bagepe guna mereken usul-usul kerna pelayanen tri tugas gereja (band. Tata Gereja GBKP BAB V Pasal 31).
Harus sipahami Musyawarah Ngawan merupaken hal sipenting guna perkembangen perpulungen (gereja), emaka siharus ikut ku Musyawarah Ngawan e harus min anggota ngawan si aktif ras tutus ibas kegiaten gereja, gelah itehna perkembangen gereja. Janah erkiteken enda merupaken perjumpaan ibas gereja, maka sijagalah kebadiaan ibas perjumpaan e. Emosi ras pengerananta harus min terjaga, gelah teridah kita enda nggeluh ibas persadan gereja.
Marilah sibahan Musyawarah Ngawan i tengah-tengah gerejanta, gelah tambah warina erdewasana kiniteken ras pengarapen anggota perpulungen man Yesus Kristus.

Pdt. Steven Kumenit, STh,M.Min.

Perayaken Nggeluh (Johanes 13:34-35).

BAHAN PJJ GEREJA GBKP
TANGGAL 12 – 18 FEBRUARI 2012.
==============================
JOHANES 13:34-35.

Tema : Perayaken Nggeluh.

LATAR BELAKANG
1. Igejapenken Jesus kematenNa enggo ndeher, erkiteken sie iberekenNa sada perentah simbaru man ajar-ajarNa kerna kekelengen. Ajar-ajar Yesus harus nggeluh sikeleng-kelengen, bagi Kristus ngkelengi ajar-ajar, bage me ajar-ajar harus nggeluh sikeleng-kelengen sapih-sapih ia. Alu bage kerina kalak meteh ia kerina eme ajar-ajar Yesus.
2. Perintah enda ibereken Jesus man ajar-ajarNa erkite-kiteken piga-piga sebab, eme : 1). Litna penghianatan Judas man Jesus. 2). Iidah Jesus litna “penyangkalan” Petrus. 3). Erbage-bage karakter ras sura-sura si lit bas ajar-ajar Jesus “memungkinken” ajar-ajar Jesus nggeluh ibas keegoisan. Emaka pernah nge ajar-ajar Jesus ngerana soal jabatan ras keduduken ise kin si kundul ibas i kemuhen ras kawes Jesus. 4). Bagepe persoalen sibanci reh kenca Jesus lanai nggeluh ras ajar-ajarNa erkiteken harus mate ras imuliaken. Sebab kegeluhen selaku ajar-ajar siharus ndalanken kai singena ate Tuhan ibas doni enda harus “berhadapan” ras situasi ibas doni enda, sibutuh kerja sama.
3. Kekelengen siberpusatken bas diri Jesus, ngataken maka kekelengen e harus murni ras ndarat ibas pusuh simbages nari si la lit unsur-unsur kai pe i je tapi ibas rangka nggeluh ibas keselamaten, sebab erkiteken kekelengen me Jesus reh ku doni enda guna nelamatken doni enda.
4. Perintah simbaru siibereken Jesus man ajar-ajarNa imaksudken labo guna merendahken perintah kekelengen si lit ibas padan si ndekah eme ngkelengi kalak sideban bagi diri sendiri (Imamat 19:18). Harus siteh perintah Dibata kerna kekelengen bermakna kekal. Tapi ibas perintah simbaru siikataken Jesus enda bentukna menekanken ntah pe mperjelas kerna makna kekelengen siharus idalanken ajar-ajar Jesus. Erkiteken sie nina Jesus bagi Aku enggo ngkelengi kam, kam pe min arus sikeleng-kelengen, ermakna “kesetiaan” (la pekulah-kulah). Sebab kekelengen Jesus seh ku kedungenna. Bagepe kekelengen e harus lit ncidahken biak meteruk ukur ras nggit melayani, bagepe nggit berkorban. Makna sideban eme posisi ajar-ajar selaku perpulungen ibas padan si mbaru. Siimaksudken jenda eme penolaken kalak Jahudi nandangi Jesus ras lit kalak Junani si enggo mulai tek (band. Joh.12:2-22), merupaken “babak baru” terbentukna perpulungen simbaru. Guna sie me praktek nggeluh sikeleng-kelengen harus icidahken gelah kerina kalak meteh ia kerina eme ajar-ajar Jesus.
5. Jadi nggeluh ibas kekelengen harus jadi karakter ajar-ajar Jesus. Kegeluhen sibage me simbedaken kekelengen si lit ibas doni enda.

APLIKASI
Kita selaku kalak kristen iperintahken gelah nggeluh sikeleng-kelengen, janah enda harus jadi karakterta, sebab ibas kita mpraktekken kekelengen alu la pekulah-kulah siberbeda ras kekelengen doni enda, maka kalak sideban banci tek maka kita enda eme kalak situtus. Tapi siterjadi genduari enggo terjadi penurunan kerna kekelngen e, emaka siteridah subuk ibas jabu, bagepe hubungenta ras sapih-sapihta manusia lanai harmonis, termasuk pe hubungenta ibas bergereja. Tentuna enda mpengaruhi hubungenta ras Tuhan, sebab adi mejile hubungenta ras sapih-sapihta manusia, i je me kita ipasu-pasu Tuhan.
Adi siperdiateken ibas pustaka si badia kerna kekelengen, maka sidat kepeken kekelengen e rehna ibas Dibata nari janah Kristus me ulu kekelengen e, bagepe kekelengen siicidahken Jesus Kristus ngasup nalamatken kerina jelma. Bagepe siidah ibas kalak sitek mpraktekken kekelengen ibas kegeluhenna tep-tep wari (nen = gereja mula-mula), ngena ate kalak man perpulungen e, emaka ertambah-tambah jumlah kalak si tek man Jesus Kristus. Alu bage idat sada kesimpulan maka nggeluh sikeleng-kelengen eme salah sada buah kiniteken kalak kristen, siertujun nggeluh ibas keselamaten. Enda situhuna tujun utama ibas kita nggeluh selaku kalak kristen. Tapi la ka sipungkiri selaku kalak kristen singgeluh i tengah-tengah doni enda lit sijadi perayaken geluhta eme uga maka berarti min kegeluhenta nandangi temanta manusia terlebih man Tuhan. Emaka adi ateta geluhta banci berarti man kalak sideban maka siharus sidalanken ibas kegeluhen enda eme kekelengen siibas Dibata nari, siicidahken Jesus Kristus. Alu bage ngena me ate kalak man banta terlebih Tuhan. Mari sipraktekken kekelengen si murni e ibas kegeluhenta tep-tep wari.

Pdt. Steven Kumenit, STh,M.Min.

Kerja Rani (Kejadin 4:1-7)

BAHAN PJJ GEREJA GBKP
TANGGAL 5 – 11 PEBRUARI 2012.
==============================
Kejadin 4:1-7.

Tema : Kerja Rani

LATAR BELAKANG.
1. Dosa siengkenai manusia erbahanca kegeluhen manusia ras Dibata lanai bagi sigel-gel eme nggeluh harmonis. Sie iangkai manusia, termasuk Kain ras Abil. Emaka ibas pengangkan selaku manusia tinepa Dibata maka harus me Kain ras Abil mbaba persembahen tutungen, arah ulih pendahinna, ija Kain arah ulih jumana, janah Abil arah ulih asuh-asuhen. Tapi siidah ibas persembahen Kain ras Abil, persembahen Abil ngenca siialoken Dibata. Ibas sie erbahanca nembeh ate Kain, janah merawa ia man agina si Abil.
2. Persoalen ialoken ras la ialoken Dibata persembahen e, merupaken hak preogatif Tuhan, saja siidah ibas bahanta, ialoken Dibata persembahen Abil e erkiteken ngena ate Dibata persembahen Abil, janah persembahen Kain la ngena ate Dibata. Sijadi penungkunen, engkai maka la ialoken Dibata persembahen si Kain ? Enda palasna eme inen Dibata pusuh Kain la mehuli.
3. Amin gia Dibata la idah manusia, tapi Dibata tetap natap kempak manusia, emaka amin gia lit pengakap paksa sie Dibata eme Dibata sitransendental (Dibata sindauh), tapi pe merupaken Dibata siimanen (Dibata sindeher ras manusia). Enda teridah uga Dibata banci ngenen ayo ras pusuh Kain (merawa ras jutjut ayona).
4. Lit telu hal siipersingeti Dibata man Kain eme 1). Kai palasna Kain merawa ras jutjut ayona adi perbahanenna la mehuli. 2). Erkiteken perbahanen sijahat nge maka dosa ngerimrim ilebe-lebe pintun. Enda ikataken Dibata gelah Kain sadar kerna sie janah ngasup ngkuasai dirina, sebab adi dosa enggo nggeluh janah enggo kuasai Kain, maka perbahanen-perbahanen si la mehuli si la ngena ate Dibata nge siilakoken Kain, janah enda me siterjadi (nen = Kain bunuh Abil agina sendiri). 3). Amin gia lit kuasa dosa, tapi situhuna ibas manusia lit kuasa singasup naluken dosa e. Erkiteken sie me Kain harus naluken dosa e.
5. Persembahen siipersembahken Kain ras Abil eme persembahen siterulin ibas ulih jumana.

APLIKASI
Ibas minggu enda kita ipersingeti kern minggu Kerja Rani, amin gia situhuna adi siperdiateken ibas program pelayanen gerejanta (GBKP), pelaksanaan Kerja Rani ilakoken ibas tanggal 4 Maret 2012. Enda ipersingeti gelah kita banci mensosialisasiken Kerja Rani enda alu mehuli. Adi kin harus ibentuk panitia, gundari me paksana, gelah panitia banci erdahin alu maksimal, bagepe perpulungen banci ersikap-sikap. Kerja Rani bas gerejanta ilaksanaken sada tahun sekali. Amin gia situhuna lit bas kita anggota perpulungen si rani lebih sada kali, janah pe lit singatakenca aku la lit jumaku emaka agak janggal siakap adi kubereken persembahen kerja rani. Perlu siteh kai pe dahinta (nen = dahin simehuli), em jadi jumanta.
Kerja Rani eme respon kiniteken man Tuhan Dibata erkiteken Dibata enggo masu-masu juma ras pendahinta. Bagepe kerja Rani enda merupaken persuruhen Dibata man bangsa Israel gelah bangsa Israel ngerayakenca tep-tep tahun. Genduari perentah enda la saja ibereken man bangsa Israel tapi pe man banta selaku kalak sierkiniteken man Tuhan. Janah harus siteh persembahen Kerja Rani enda berbeda ras persembahen-persembahen sidebanna. Janah adi sinen ibas pelaksanaan Kerja Rani i tengah-tengah gerejanta (GBKP) erbage-bage model pelaksanaanna ras mengekspresiken keriahen ukurna. Lit deba mbaba persembahen Amplop persembahen Kerja Rani ku lebe ibas kebaktin minggu. Lit deba Amplobna ikutip, tapi lit deba erbahan pesta. Tapi harus siinget bentuk kai pe siibahan kita enda kerina bentukna guna kemulian Tuhan. Janah harus ka siinget ibas kita nehken persembahen Kerja Rani, haruslah simehulina si lit bas kita, ras ula meros, bagepe harus alu pusuh dem pengataken bujur. Alu bage ipasu-pasu Tuhan persembahenta.

Pdt. Steven Kumenit, STh,M.Min.

Dibata Empelimbarui Gegeh Kalak Si Tek (Jesaya 40:21-31).

KHOTBAH MINGGU GEREJA GBKP
TANGGAL 5 FEBRUARI 2012.
=============================
Introitus : Tapi kalak si ernalem kempak Dibata, tetap ipelimbaruiNa gegehna. Desken rajawali kabang, lalap ia reh ganjangna. Kiam ia, tapi la ia ngelabuh, erdalan ia tapi la akapna latih (Jesaya 40:31).
Ogen : Markus 1:29-39.
Khotbah : Jesaya 40:21-31.
Tema : Dibata Empelimbarui Gegeh Kalak Si Tek.

LATAR BELAKANG.
1. Kegeluhen sierbana-bana siicidahken bangsa Yahuda erbahanca peturah pernembeh ate Tuhan, emaka ihukum Tuhan ia kerina alu make bangsa babel. Bangsa Yehuda itaban i Babel, alu sada pengarapen bangsa Yehuda enda banci mulihi nandai Dibata ras mbiar man Dibata saja. Tapi kenca piga-piga tahun dekahna (40 tahun) kalak Yehuda i Babel nggeluh ibas kiniseran, janah kalak enda enggo mulai “meraguken” kerna kekelengen Tuhan. Ibas situasi sibagenda me bahan Kata Dibata seh man bangsa Yehuda.
2. Deotro Yesaya enda ernubuat kerna eksistensi Dibata nandangi doni enda. Memang tuhu igejapken Yesaya agak sulit guna meyakinken peranen Dibata ibas kegeluhen manusia ras doni enda man kalak Jahudi si lit ibas pembuangen. Tapi Yesaya lit sada pengarapen kerna kalak Yehuda sibanci tek mulihi man Dibata. Erkiteken sie me eksistensi Dibata icidahkenna mulihi, nina : Dibata e, Dibata si mada kuasa, kuasana melebihi kuasa-kuasa siapai pe si lit ibas doni enda, termasuk kuasa-kuasa penguasa (pemerintah/raja), bagepe kuasa-kuasa bintang si lit i langit. Perlu lebe siteh, sengaja Yesaya ngangkat kerna bintang-bintang, sebab ibas kiniteken kalak Babel, bintang eme ihormati sebage “ilah”. Tapi i lebe-lebe Dibata bintang-bintag e pe harus patuh man Dibata, erkiteken Dibata sinamaken bintang-bintag e ibas inganna. Erkiteken sie me nina Yesaya : ras ise kin banci terperseri Dibata ? Enda ikataken Yesaya gelah : 1). Mengejek para pembuat patung. 2). Gelah kalak Yehuda banci ngenen mulihi kerna kuasa Dibata si la ersibar e. Janah alu tersirat pe Dibata ngasup naluken kuasa-kuasa bangsa Babel (ayat 23).
3. Bagepe kalak Yehuda si lit ibas pembuangen ipersingeti Yesaya kerna Dibata sinepa doni enda. Enda ikataken gelah bangsa Yehuda sadar maka Dibatana ndauh ganjangen ras erkuasa asangken dibata-dibata si lit ibas doni enda.
4. Hal sideban sijadi penekanen Yesaya eme ibas kalak Yehuda nimai ras tetap erpengarapen man Tuhan, maka kalak Yehuda dat gegeh simbaru, sebab ibas erpengarapen man Tuhan, berarti kegeluhen kalak Yehuda tuhu-tuhu tergantung man Tuhan saja, emaka kalak Yehuda ngenen Tuhan selaku penampat kegeluhenna, la lit dibata sideban. Sebab kalak sierpengarapen man Tuhan, ipadankenNa : 1). Gegeh Dibata mpelimbarui (menyegarkan) kalak Yehuda ibas kelemahenna. 2). Kalak Yehuda ngasup mengatasi perbeben ras kiniseranna. 3). Ngasup kiam tapi la ngejapken latih sebab isampati Tuhan.
5. Ibas Yesaya ncidahken kerna kuasa Dibata e, siniharapken man bangsa Yehuda gelah ulanai jungut-jungut, tapi tetaplah erpengarapen man Tuhan. Sebab ibas perbeben ras kiniseran Tuhan tetap nempati. Mata Tuhan tetap natap kempak bangsaNa.

APLIKASI
Adi siperdiateken ibas kegeluhenta, maka erbage-bage perbeben ras kiniseran sibanci ngkenai kita, ntah erkiteken ekonomi, keluarga, bagepe pinakit, rsd. Kerina enda banci mpeturah jungut-jungut adi kinitekenta la paguh. Sebab perbeben ras kiniseran e banci erbahanca kinitekenta “drop”/turun, emaka mesukah kal kita ndarami konpensasi-konpensasi, termasuk nalahken Tuhan. Padahal adi sirenungken maka : 1). Iblis banci bengket ku bas situasi perbeben ras kiniseran. 2). Tuhan ngasup nampati kita ibas erbage-bage perbeben ras kiniseran si lit bas kita. Emaka adi jumpa kita perbeben ras kiniseran marilah sipindo penampat man Tuhan. Bagepe adi siperdiateken ibas kegeluhenta selaku manusia, la lit sada jelma pe si la pernah jumpa perbeben ras kiniseran. Tapi adi siidah erbage-bage penanganan perbeben ras kiniseran e. Bagepe siidah lit kita si langasup naluken perbeben ras kiniseran e. Cuba sinen ibas berita televisi ras koran, lit sindarami dalan keluar pe alu bunuh diri. Jadi situhuna perbeben ras kiniseran bagin ibas kinata kegeluhenta, janah sada paksa ngkenai kita.
Dibata eme Dibata sierkuasa ras Dibata siperkeleng. Eksistensi Dibata enda me siharus iangkai kita selaku kalak si tek man Yesus Kristus. Sebab ibas pengangkan sibagenda me kita ngasup nggeluh ibas pengarapen man Tuhan saja, janah enda me sierbahanca kita megegeh katawari paksa pe, termasuk paksa kita lit ibas perbeben ras kiniseran. Sebab Dibata siisembah kita ibas Tuhanta Yesus Kristus eme Dibata singasup nampati kita. Jadi harus sipahami ibas pengenalen simehuli kerna Dibata, maka kita ngasup megegeh nggeluh ibas doni enda. Sebab harus sipahami pengenalen kerna Dibata, banci mpengaruhi kegeluhen kinitekenta. Adi mehuli ras payo pengenalenta kerna Dibata, maka kai pe si terjadi bas kita, Dibata saja sijadi pengarapenta. Tapi adi kurang penandainta kerna Dibata, maka adi jumpa perbeben ras kiniseran, minter kita ndabuh ku bas dosa. Bagepe harus sigejapken ibas kita jumpa perbeben ras kiniseran, alu ikuasa Kesah Si Badia kita harus merenungken kerna eksistensi kita selaku manusia tinepana. I ja kita enda eme manusia si lemah sikatawari pe banci ndabuh. Ibas pengangkan sibagenda maka harus sigejapken ibas perbeben ras kiniseran seharusna min ngasup kita ngangkai rencana Dibata ibas kegeluhenta tep-tep wari. Salah sada rencanaNa eme kita harus patuh man baNa saja. Bagepe ibas ateta ndat gegeh simbaru ras semangat simbaru ndalanken kai singena ateNa, maka ula kita putus hubungenta ras Dibata, harus kita ernalem ras ertoto man baNa.

Pdt. Steven Kumenit, STh,M.Min.