Tema : Erlajar Segedang Geluhta (Kuan-kuanen 27:17; Epesus 4:25-32).

BAHAN PJJ GEREJA GBKP
TANGGAL 29 APRIL – 5 MEI 2012.
=================================
Kuan-Kuanen 27:17; Epesus 4:25-32.

Tema : Erlajar Segedang Geluhta.

LATAR BELAKANG
A. Kuan-Kuanen 27:17.
- Kepentaren merupaken sada hal siitekanken ibas kitab enda. Emaka jadi pentar kepeken la saja dirinta si ndarami kepentaren e, tapi pe kalak sideban harus ikut nampati.
- Koholet menekanken kerna makna teman. Teman harus berfungsi guna mereken kepentaren man temanna sendiri. Gelah temanna e banci meteh kerna perbahanen sindalanken eme simehuli ibas kegeluhenna tep-tep wari. Jadi erteman la saja erteman bage-bage saja tapi punya tujun eme mbangun ras memajuken kalak sideban.

B. Epesus 4:25-32.
- Paulus menekanken kerna kearusen nggeluh ibas persadan gereja ntah pe ibas sada kula. Nggeluh ibas persadan gereja ntah pe sada kula eme harus nggit ngambengken biak-biak si la ngena ate Tuhan, eme erbual , adi merawa, ola seh erdosa ras ola simpan rawandu seh ben, ola bereken kesempaten man si iblis, ola nangko, erdahinlah alu mehuli guna ncariken keperlunndu, la banci egois, ola turiken cakap si la erturin-turin. Bagepe ola ceda ate Kesah Si Badia, tadingken biak cian ate, perampus, pernembeh, ola siisak-isaken ntah sicekurak-cekuraken, olanai sitik pe erelem-elem. Tapi siharus idalanken eme biak melias dingen mesayang, nggit sialem-alemen bagi Dibata enggo ngalemi perpulungen Epesus.
- Enda itekanken Paulus, sebab nggeluh ibas sada kula harus tuhu-tuhu”utuh”, la banci ceda. Amin gia situhuna nggeluh ibas sada kula lit ring-ring, tapi ring-ring e harus irakut ibas sada kula e. Ibas erti kata kerina ring-ring harus saling membutuhken sada ras sidebanna ntah pe nggit sisampat-sampaten, “saling menjaga perasaan”. Memang isadari selaku manusia biak manusia mekatep murah emosi, tapi emosi ntah pe merawa ula min seh erdosa. Maksud Paulus eme adi merawa kita, haruslah ibas inganna (band. Yesus merawa ibas rumah pertoton), erkiteken sie merawa e ula seh ku ben wari, sebab banci saja emosi si lenga ngadi e muat kesempaten iblis, guna ngkuasai kalak simerawa e.
- Paulus la saja menekanken kerna hubungen ras sapih-sapih perpulungen selaku sada kula, tapi pe Paulus mereken kata ajar gelah perpulungen ula ncedaken hubungenna ras Tuhan arah ncedaken Kesah Si Badia. Enda itekanken sebab Kesah Si Badia eme Dibata jine si mereken cap maka perpulungen Epesus eme sikerajangen Dibata. Jadi Kesah Si Badia eme “oknum siberpribadi”. Perpulungen Epesus ula erbahan si bertentangen ras sura-sura Kesah Si Badia. Sebab ibas perbahanen sibage berarti perpulungen Epesus enggo jadi imbang Kesah Si Badia, alu bage cap si lit ibas perpulungen selaku sikerajangen Dibata lanai lit, si lit eme imbang Dibata (band. Perbahanen Rasul-rasul 5:3, 5).

APLIKASI
Adi kita ngerana soal pendidikan tentuna la lit batasna. Janah harus ka isadari pendidikan enda lit dua bentuk eme pendidikan formal ras pendidikan non formal. Pendidikan formal banci sidat arah sekolah (TK – Perguruan Tinggi), tapi pendidikan non formal banci sidat arah pergaulenta tep-tep wari i tengah-tengah masyarakat ras gereja, termasuk pe ngoge-ngoge buku, koran/majalah ras nonton berita, rsd. Ibas dua bentuk pendidiken enda tetap saja kita harus erlajar katawari paksa pe. Ibas erti kata adi erlajar la lit kata tamat.
Memang ibas dunia pendidikan formal lit ijasah simerupaken bukti kita enggo tamat ibas sekolah e, tapi situhuna e terjeng pengakun tamat ibas sekolah ngenca, sebab adi siukuri situhuna lit denga penemuan-penemuan simbaru ntah pe hal-hal simbaru siharus siteh, emaka erlajar alu ngoge ras megiken tetap banci idalanken.
Bagepe ibas kita erlajar i tengah-tengah masyakat, khususna kerna karakter ras kebiasaan masyarakat tetap silakoken. Enda tentuna harus tetap sipelajari sebab kita selaku kalak sitek harus tuhu-tuhu ncidahken maka kita enda eme sikerajangen Dibata, emaka perbahanen si la ngena ate Tuhan la banci sidalanken i tengah-tengah doni enda, termasuk ncedai hubungenta ras sapih-sapih kita, terlebih ncedai Kesah Si Badia.
Harus sisadari doni enda inganta erlajar, ingan pembentuken karakter. Jadi kita harus ngenen ras sadar maka sapih-sapih manusia eme teman guna banci nampati kita gelah kita banci jadi kalak pentar (berhikmat), bage ka kita nandangi kalak sideban. Emaka kegeluhenta i tengah-tengah doni enda harus nggeluh ibas positif thingking, gelah kita tetap nggeluh ibas persadan, la saja ibas masyarakat tapi pe i tengah-tengah kita bergereja.

JAWABAN DISKUSI
1. Kita harus saling membantu dan saling belajar satu dengan yang lain.
2. - nggit. sebab pengalaman yang ada dalam kita erlajar kita jadi pentar. Bagepe kalak si la nggit erlajar pedas pikun.
- Harus menghilangkan rasa bosan membaca. Berdiskusilah ras temanta ibas hal-hal simehuli.

Pdt. Steven Kumenit, STh, M.Min.

Geluh Ibas Kebujuren (1 Johanes 1:5-9).

BAHAN PJJ GEREJA GBKP
TANGGAL 22-28 APRIL 2012.
==========================
1 Johanes 1:5-9.

Tema : Geluh Ibas Kebujuren.

LATAR BELAKANG
1. Lit sada persoalen i tengah-tengah kalak si tek man Jesus Kristus, khususna kerna penyangkalan Jesus Kristus selaku Mesias, ntah pe Dibata si enggo jadi manusia. Pengajaren enda ibaba sada golongan Gnostik. Janah terdauhen nina, kula Kristus e, ntah pe Jesus Kristus e merupaken “hayalen” ngenca, labo tuhu-tuhu kongkrit. Ibas pengajaren si bage, Johanes arah suratna ngataken man kalak si tek kerna Jesus Kristus situhu-tuhu.
2. Guna mengkritik aliran Gnostik enda, Johanes mereken kesaksin kerna Jesus Kristus. Janah sipemena ikatakenna eme Jesus Kristus eme Anak (band. Anak Dibata – Matius 3:17). Anak e “ergaul” ras ia, janah ibas Anak e (Jesus) ras Johanes, ngerana Anak e kerna”kodrat” Dibata eme Terang. Ertina ibas Dibata la lit si gelap. Bagepe Terang e simbol kebenaren, ras gelap eme simbol dosa.
3. Tuhu kalak si tek enggo nggeluh ibas keselamaten, tapi labo berarti enggo bebas ibas dosa, sebab ibas sada paksa banci saja kalak si tek ndabuh ku bas dosa. Tapi adi sisadari, kita enggo erdosa janah siakuken dosanta man Tuhan, maka ialemiNa kita. Alu bage keselamaten sienggo ibereken Jesus arah kayu persilang tetap nggeluh bas kalak si tek. Sebab ibas paksa kita lenga tek man Jesus Kristus, dosa erbahanca kegeluhenta jadi melket. Tapi kenca Jesus Kristus mate i kayu persilang, i uruk Golgota, maka iurasina dosanta kerina. Alu kata sideban kalak si tek enggo bersih ibas dosa nari.
4. Erkiteken kalak sitek enggo ibersihken ibas dosa-dosa nari, maka sipaling penting eme moral kalak sitek harus ijaga. Kalak sitek la nai banci nggeluh ibas dosa, apaika mersoken Jesus Kristus selaku Tuhan.
5. Enda itekanken Johanes gelah kalak sitek tetap nggeluh ibas persadan ras Jesus Kristus, ras lanai “sangsi” nandangi Jesus eme Tuhan. Sebab makna nggeluh ibas persadan ras Jesus eme nggeluh ibas kebenaren. Sebab kalak sienggo jera seharusna lanai nggeluh ibas dosa. Penekanen enda la saja “menyerang” aliran Gnostik, tapi anggota perpulungen sienggo terikut ibas ajaren enda banci sadar ras jera, alu bage nggeluh mulihi ibas persadan ras Jesus Kristus. Jadi kalak si tek harus nilah geluhna ibas dosa nari.

APLIKASI
Kekeken Jesus Kristus merupaken sada kebenaren bas kita selaku kalak si tek man Jesus Kristus. Kekeken Jesus Kristus mereken kegeluhen simbaru man banta. Ertina kita lanai nggeluh ibas dosa, sebab dosa-dosanta enggo itanemken radu ras kematen Jesus Kristus. Emaka ibas kekeken Jesus Kristus, kita nggeluh ibas keselamaten erkiteken dosa-dosanta enggo bersih. Persoalen siterjadi kita singgeluh ibas keselamaten tetap denga erbahan dosa. Janah banci kin siusur-usur erbahan dosa ? tentuna lang. Sebab erkiteken dosa me maka kita lanai banci nggeluh ibas kemulian Tuhan, ntah pe la nai nggeluh ibas persadan ras Tuhan. Tapi sebalikna kita nggeluh ibas pernembeh ate Tuhan, janah bujur nge kita nggeluh ibas penghukuman Tuhan. Tapi la ate Tuhan kita nggeluh ibas penghukumenNa. Ate Dibata gelah kita nggeluh ras Ia. Emaka adi ateta nggeluh ras Tuhan maka siharus silakoken eme nggeluh ibas kebujuren. Sebab kebujuren eme tanda kita ndalanken peraten Tuhan.
Kita enda la bo saja igelari kalak si tek, tapi pe kita enda eme gereja (GBKP). Selaku gereja kita harus ersaksi kerna kebenaren Tuhan. Apai ka kita enda enggo dewasa (GBKP enggo 71 tahun njayo), ibas erti kata kita lanai ijolah-joleken erbage-bage pengajaren i doni enda sierbahanca kita lanai nggeluh ibas kebujuren. Erkiteken sie me sipaling penting ibas kita selaku gereja eme kita harus tetap nggeluh ibas persadan ras tetap ersaksi kerna Jesus Kristus selaku Tuhan. Isamping sie kita harus tetap nggeluh sikeleng-kelengen. Sebab ibas kita nggeluh ibas persadan ras nggeluh sikeleng-kelengen maka iajari Kesah Si Badia me kita guna erbahan simehuli singena ate Tuhan.
Njayo berarti lanai kita tergantung man kalak sideban, erkiteken sie gereja sienggo njayo berarti ngasup ndalanken kai singena ate Tuhan. Gereja si njayo harus teridah ibas kemandirian anggota perpulungen. Ibas erti kata keterlibaten anggota perpulungen harus lit, subuk ibas daya ras dana. Alu bage kita pe banci nampati gereja sideban si lenga njayo.

JAWABAN DISKUSI
1. a. Kita harus nimbak peraten daging.
b. Kita harus ndalanken kai singena ate Tuhan eme nggeluh ibas persadan,
kekelengen, sisampat-sampaten, la nggit ber-KKN. Alu kata sideban buah-buah
Roh harus sidalanken, sebab enda tandana kita anak-anak Terang.
2. Ulihna eme kita nggeluh alu harmonis ras nggeluh ibas kemalamen ate. Janah adi
lit masalah, lit dalan keluarna. Bagepe selaku gereja ras bangsa terjadi me
perkembangen ras kesejahteraan.

Pdt. Steven Kumenit, STh,M.Min.

Kiniersadan Ibas Persadan (Perbahanen Rasul-Rasul 2:42-47).

BAHAN PJJ GEREJA gbkp
TANGGAL 15 – 21 APRIL 2012.
===========================
Perbahanen Rasul-Rasul 2:42-47.

Tema : Kiniersadan Ibas Persadan.

LATAR BELAKANG
1. Ibas bahan oratenta icidahken kerna cara nggeluh perpulungen sipemena. Ija Lukas ersaksi kerna kalak si enggo tek man Jesus Kristus selaku Tuhan, terjadi perubahan ibas kegeluhenna enda erkiteken Kesah Si Badia singgeluh bas perpulungen e. Perubahen kegeluhen eme nggeluh ibas persadan ras pelayanen. Kegeluhenna nggeluh ibas keharmonisan ras dem alu kekelengen.
2. Amin gia perpulungen enda mbaru tek man Jesus Kristus tapi nggit ia megiken pengajaren rasul-rasul, khususna kai sienggo ialokenna ibas Jesus nari, paksa Jesus nggeluh i tengah-tengahna, bagepe pengajaren enda ibas rangka nambahi pengangkanna kerna Jesus Kristus. Janah melala tanda-tanda sengget siicidahken rasul-rasul man perpulungen e. Bagepe perpulungen tetap pulung ras-ras. Emaka teridah tuhu geluh perpulungen e nggeluh ibas erkemalangen ras sepenggejapen sebab kai si lit bas ia eme sekerajangen ras-ras. Emaka lit nge sindayaken taneh ras ertana janah duit ibagi-bagiken sue ras keperlun sekalak-sekalak. Alu bage kerina anggota perpulungen icukupi kebutuhenna, janah la lit sekalak pe si egois.
3. Ibas perpulungen e pulung ras-ras ia ncepik-cepik roti bagepe ras-ras pe ia ertoto man Dibata. Kerina enda ilakokenna alu meriah ukur sebab ncepik-ncepik roti ihubungken ras peristiwa ope denga Jesus nggeluh ibas kiniseran ras mate. Emaka situhuna ncepik-ncepik roti jadi tanda peringet-ingeten nandangi Jesus, ras ibas ncepik-ncepik roti e tersimpan pengajaren kern karya keselamaten Tuhan . Ipihak sideban ncepik-ncepik roti merupaken tanda spiritualitas perpulungen nggeluh, sebab ije perpulungen saling ngelai sada ras sidebanna. Bagepe perpulungen ras-ras ertoto, janah enda la saja ia ertoto ibas rumahna tapi pe ertoto ia ibas rumah pertoton.
4. Spritualitas sienggo terbentuk ibas perpulungen e erbahanca perpulungen e la bo nggeluh alu fanatisme, tapi tetap nggeluh ibas bersosialisasi. Adi selaku kalak Jahudi ia tetap nggeluh selaku kalak Jahudi. Erkiteken sie me ngena ate kalak sideban man perpulungen e, emaka itambah-tambahken Tuhan kuantitas perpulungen e.
5. Amin gia terjadi pertumbuhen/pertambahan man perpulungen tapi pertumbuhen enda labo erkiteken gegeh perpulungen e, tapi pelin-pelin pendahin Tuhan . Sebab Kesah Si Badia singgeluh ibas perpulungen sierbahanca perpulungen ngasup ngaloken kai simehuli singena ate Tuhan. Janah enda me inti ibas kegeluhen manusia. Bagepe kerehen kalak sideban ku persadan e erkiteken Kesah Si Badia sindilo ia kerina.

APLIKASI
Tuhu kiniersadan penting kal, sebab adi la lit kiniersadan ibas persadan e maka kegeluhen persadan e la bo banci megegeh, emaka kiniersadan e perlu ilitken i tengah-tengah persadan e. Adi kiniersadan e nggeluh maka si terjadi eme anggota-anggota ibas persadan e lanai ngukurken dirina sendiri, tapi enggo ngukurken kegeluhen ras-ras. Sienda me bentuk gereja. Erkiteken sie me persadan ibas gereja lain ras berbeda ras persadan i darat gereja. Persadan ibas gereja ibentuk ntah pe jadi erkiteken buah ibas kita erkiniteken man Jesus Kristus, bagepe erkiteken Kesah Si Badia erdahin ibas kita. Piga-piga bentuk kita nggeluh ibas kiniersadan eme nggit kita pulung ibas PJJ ras PA, bagepe nggit nggeluh ibas berdiakonia.
Kiniersdaan banci nggeluh adi kerina anggota persadan rukur ras nggejapken kerina ia sada kula, janah Kristus eme Takalna. Ibas pengangkan sibagenda lanai kita nggeluh ibas egois ntah pe rukur kerna diri sendiri, tapi nggo ngukurken kepentingan persadan.
Perlu siteh ibas kita mbahas kern Kiniersadan ibas Persadan erkiteken-kiteken sekali enda HUT KA-KR si pe 122 tahunken. Emaka harus siinget KA-KR enda eme bagin ibas persadan gereja GBKP, bagepe anak-anak KA-KR eme masa depan pemimpin gereja ras bangsa. Emaka seharusna kategorial KA-KR enda ipeseri ras kategorial si lit i tengah-tengah persadan gerejanta, janah adi banci pe harus dat perhatin si lebih. Persoalenna siterjadi lit piga-piga runggun, KA-KR-na sikurang kal dat perhatin, subuk kurangna pembimbing/pengajar bagepe fasilitasna, padahal kita kerina nggejapken pentingna kal perkembangen spiritualitas anak-anak sigenduari. Emaka marilah siperdiateken kategorial KA-KR.


JAWABAN PENUNGKUNEN
1. Secara hakikila lit perbedaanna sebab perpulungen sipemena ras sigenduari jadi ntah pe terbentuk erkiteken tek man Jesus Kristus. Tapi secara implementasi ntah penerapen/aplikasi kiniteken selaku buah-buah roh enggo berbeda. Perbedaanna perpulungen sipemena nggejapken kai si lit bas ia eme sikerajangen ras-ras. Tapi perpulungen genduari kurang ngasup ndalanken sie. Enda erkiteken nggo lit perubahen makna nampati ibas pelayanen khususna erti diakonia.
2. Perlu lebe siangka ras-ras KA-KR labo gereja masa depan, sebab ia nggeluh genduari. Adi pemimpin masa depan banci. Emaka ibas ndalanken program runggun gereja harus berkordinasi ras pengurus KA-KR. Janah runggun gereja harus ikut terlibat secara aktif ibas program-program e, emaka dana harus isikapken, bagepe alat peraga ras pe selaku orang tua ikut nampati program e.

Pdt. Steven Kumenit, STh,M.Min.

Keleng Ate Dibata Njemba Ras Ngarak-Ngarak Pelayanen GBKP (1 Johanes 4:7-12)

BAHAN PJJ GEREJA GBKP
TANGGAL 8 – 14 APRIL 2012.
===========================
1 JOHANES 4 : 7-12.

Tema : Keleng Ate Dibata Njemba Ras Ngarak-Ngarak Pelayanen GBKP.

LATAR BELAKANG
1. Enda merupaken sada pengajaren ntah pe kata persinget Yohanes man perpulungen gelah perpulungen tetap nggeluh ibas persadan. Sebab paksa sie kalak sitek nggeluh ibas percuban erkiteken litna ajaran sipapak. Ajaren papak e ngajarken : 1). La mungkin Dibata njadi manusia. 2). Lagu langkah simehuli e la perlu. Palas kalak sitek harus nggeluh sikeleng-kelengen erkite-kiteken : 1). Keleng ate e eme sipat Dibata. Enda teridah arah iberekenNa AnakNa si tonggal man banta, gelah kita terkelin. 2). Erkiteken leben Dibata ngkelengi kita maka kita pe harus ngkelengi kalak sideban. 3). Adi kita nggeluh sikeleng-kelengen maka Tuhan tetap ras kita, janah kekelengenNa e sempurna ibas kita. Jadi arah enda banci sikataken kekelengen jadi karakter anak-anak Dibata.
2. Ibas oratenta teridah tuhu uga kekelengen simerupaken karakter Dibata harus iaplikasiken anak-anak Dibata (kalak sitek) ibas kegeluhenna tep-tep wari, maka jadilah kekelengen e ibas dua dampar eme keleng ate secara vertikal ras keleng ate secara horisontal. Jadi keleng ate Tuhan mpeturah keleng ate bas kita.
3. Penulis surat enda menekanken kerna keleng ate Tuhan e silabo abstrak, tapi e nyata, janah enda teridah ibas diri Jesus Kristus. Ija erkiteken keleng ate Tuhan, Jesus Kristus mate. Jesus Kristus jadi kahul nandangi dosa-dosa manusia. Alu bage memotivasi man kalak si tek guna ndalanken kekelengen (nen = kekelengen Tuhan jadi teladan).
4. Ibas sejarah kegeluhen manusia, la lit sada jelma pe si pernah ngenen Dibata (ayat 12). Tapi amin bage gia erkiteken keleng ate si lit bas kalak si tek, maka kalak si tek ngaku maka lit Dibata, janah erkiteken keleng ate Tuhan, turah credo kern Tuhan e jine, ija Tuhan e nai transendental (nen = ndauh), tapi erkiteken keleng ateNa nggit Ia reh ku doni enda guna nelamatken manusia. Janah keleng ate Tuhan teridah ibas diri Jesus Kristus.
5. Ipihak sideban Yohanes ngataken maka manusia e la sempurna, termasuk ibas nerapken keleng ate. Tapi adi Tuhan ibas kita, maka keleng ate si lit bas kita banci sempurna. Enda banci jadi erkiteken arah Kesah Si Badia ngajari kita uga seharusna ndalanken kekelengen e ibas kegeluhenta tep-tep wari. Jadi keleng ate Tuhan merupakan syarat mutlak man kalak sitek guna nggeluh ersada ras Tuhan. Emaka kalak singgeluh ndauh ras Dibata janah tetap mengandalken gegeh ras kepentarenna, maka la ia ngasup ngangkai keleng ate Tuhan e, termasuk kern ise kin Jesus Kristus e. Emaka la ia nggeluh ibas kesempurnaan.

APLIKASI
Ibas sejarah gereja, teridah alu jelas maka penemani ras pengarak-ngarak Tuhan erbahanca gereja-gereja nggeluh. Bagepe litna Gereja GBKP erkite-kiteken pengarak-ngarak Tuhan. Janah ibas sejarah perkembangen gereja GBKP, tangtangna gereja GBKP pantek i Buluh Awar tanggal 18 April 1890, enggo terjadi perkembangen si cukup pesat. Gereja GBKP hadir ras ndalanken dahinna sue ras pendilo ras persuruhen Dibata eme ersaksi kerna Jesus Kristus ras nehken kekelengen i tengah-tengah doni enda, gelah doni enda ibaluti alu kekelengen. Jadi penungkunen man banta, engkai maka pelayanen gereja GBKP iarak-arakNa janah lit perkembangenna. Enda erkiteken gereja GBKP eme kula ni Kristus, janah ate Dibata erteremna kalak si tek man baNa.
Pelayanen ras keterlibaten gereja GBKP la saja ibas tingkat lokal, tapi i tingkat nasional ras internasional. Bagepe litna keterlibaten pelayanen i tingkat Oikumene. Erkiteken sie me gereja GBKP iakui ras ihamati oleh gereja-gereja si lit i tengah-tengah-tengah doni enda. Guna sie maka siniharapken i tengah-tengah gereja gelah anggota gereja tetap nggeluh ibas kekelengen, gelah semakin megegeh pelayanen gereja GBKP i tengah-tengah doni enda. Sebab adi anggota gereja GBKP nggeluh ibas sikeleng-kelengen maka teridah me gereja GBKP tuhu-tuhu kula ni Kristus, janah ibas penemani Kesah Si Badia, gereja GBKP erwarina ermampuna nggeluh ibas keharmonisan, bagepe erngasupna gereja GBKP menolak pengajaren-pengajaren si papak sibanci nirangken persadanta ras Tuhan Dibata. Alu bage banci isimpulken gereja GBKP banci berkembang adi keleng ate Tuhan nggeluh i tengah-tengah gereja GBKP.

Pdt. Steven Kumenit, STh,M.Min.