Rabu, 23 Mei 2012

Tema : Ulu Kegeluhen (Johanes 7:37-39).

BAHAN PJJ GEREJA GBKP
TANGGAL 27 MEI – 2 JUNI 2012.
=============================
Johanes 7 : 37-39.

Tema : Ulu Kegeluhen.

LATAR BELAKANG
1. Salah sada wari raya kalak Jahudi eme wari raya sapo-sapo. Ibas wari raya enda seh kal teremna kalak Jahudi i Jerusalem, sebab merupaken sada kewajiban man bangsa Jahudi guna ngerayakenca, janah kerina kalak Jahudi si lit i darat Jerusalem reh ku Jerusalem guna ngerayaken wari raya e. Makna perayaan wari raya sapo-sapo enda eme guna mperingeti uga Dibata nemani ras nampati bangsa Israel sedekah bangsa Israel erdalan ibas taneh simesawang. Ibas perdalanen ku taneh Kanaan bangsa Israel tading ibas kemah ras sapo-sapo. Jadi lit makna historis teologis. Tapi lit ka makna aplikasina eme ibas perdalanen anak-anak Dibata ibas doni enda, Dibata kap sinampati ras jadi ingan kecion gedang-gedang wari. Janah perayaan sapo-sapo irayaken kalak Jahudi sedekah pitu wari.
2. Ibas suasana perayaan sapo-sapo, khususna ibas wari pengkeri-kerin kerja e (wari pepituken) simerupaken puncak perayaan e, Jesus tedis janah ngerana Ia i lebe-lebe jelma sinterem, nina Ise muas rehlah ku Aku gelah ia minem. Bagi si tersurat i bas Pustaka Si Badia, 'Kalak si tek man bangKu, erburak i bas ia nari lau si mereken kegeluhen.' Ikataken enda kenca dung upacara lau. Sebab ibas tradisi upacara lau nterem kalak ku kolam Siloam, ikut pe imam-imam alu ngembus terompet. Kenca seh i kolam Siloam sekalak imam ngisi buli-buli emas alu laukolam Siloam nari, kenca sie lawes mulihken rombongan e ku rumah pertoton, jenari lau siibuat imam ndai ituangken ku mezbah. Kenca sie iogeken kai siikataken Jesaya eme Bagi lau mereken keriahen man kalak si muas, bage pe bangsa Dibata ermeriah ukur tupung Dibata ngkelini ia (Jesaya 12:3).
3. Makna ibas perayaan Upacara lau enda eme mperingeti perdalanen bangsa Israel i taneh mesawang, khususna kerna lau sindarat ibas deleng batu. Bagepe upacara lau e merupaken sada pertoton guna mindo udan. Perlu lebe siteh kolam Siloam eme reh ibas Gihon nari. Ibas pemerintahen raja Hizkia ibahanna saluran lau ibas lau Gihon nari ku Yerusalem. I Jerusalem lit sada kolam kitik guna menampung lau Gihon e. Kolam eme siigelari kolam siloam si ertina siiutus. Emaka amin gia kota e ikepung musuh, masyarakat Yerusalem tetap ndatken lau guna keperlunna.
4. Ate Jesus ngerana gelah jelma sinterem meteh ise Ia. Sebab memang jelma sinterem ertoto mindo udan tapi ibalik sie situhuna siipindona eme kemalemen ate (kebahagiaan) ras kemakmuran. Kerina e banci ibereken Jesus. Ibas Jesus lit lau si banci maler ras mereken kegeluhen, emaka rehlah ku Jesus. Sebab sia-sia kap puji-pujin siiendeken ibas perayaan e adi la ndarat ibas pusuh nari ras la nggeluh ibas persadan ras Tuhan.
5. Ise singaloken Jesus pasti ndatken kegeluhen. Alu bage terjadi me kegeluhen simbaru man kalak e, janah kalak e ngaloken pasu-pasu ibas Dibata nari. Pasu-pasu Tuhan siberhubungen ras “hidup berkelimpahan” e berkaitan ras Kesah Si badia. Sebab Jesus lenga imuliaken. Jesus lenga nangkih ku Sorga. Kesah Si Badia reh kenca Jesus nangkih ku Sorga. Tapi amin bage gia makna Kesah Si Badia eme sipertama lebe ngaloken Jesus, jenari sipeduaken eme pernyertaan ras pengelayasi ibas Kesah Si badia maka kalak sitek man jesus banci nggeluh ibas kemalemen ate.

APLIKASI
Adi sinen kerna turi-turin Dibata njadiken manusia, maka i je kita manusia banci nggeluh erkiteken lit Kesah Dibata siiembuskenNa man banta (nen = Kej.2:7). Kenca sie secara fisik ras rohani manusia nggeluh. Tapi erkiteken dosa (nen = Kej. 3) kegeluhen manusia mate. Tuhu secara fisik nggeluh, tapi secara rohani manusia enggo mate.
Kita nai enggo mate erkiteken dosa, tapi genduari erkiteken tek kita man Jesus Kristus maka kita banci nggeluh. Jadi kegeluhen situhuna lit bas Jesus Kristus. Ibas erti kata kegeluhenta labo terjeng nggeluh bage-bage saja, tapi kegeluhen si lit maknana. Harus lit perbahanen simehuli singena ate Tuhan, ras Kesah Si Badia nggeluh bas kita. Sebab Kesah Si Badia enda me simpengasuk kita nggeluh. Kesah Si Badia Si Negu-negu kita gelah kita banci erbahan kai singena ate Tuhan, sebab adi sebalikna perbahanenta maka mate me kita (nen = Roma 6:23). Jadi ulu kegeluhenta lit bas Jesus Kristus, sebab ise sitek man Jesus nggeluh me (nen = Johanes 7:38).
Pentakosta eme nusurna Kesah si Badia, janah harus siinget Kesah Si Badia eme pribadi sideban Dibata. Enda situhuna jadi erkiteken Dibata tetap erdiate man banta, janah ate Dibata gelah kita tetap nggeluh ibas keselamaten sienggo iberekenNa man banta arah Jesus Kristus. Kesah Si badia e nggo nggeluh ras kita. Janah Fungsi Kesah Si Badia la saja mereken pengapul man banta tapi pe negu-negu kita gelah kita banci erdalan ibas kebenaren, ras tetap ngakuken Jesus eme Tuhan. Emaka harus sitalangi pusuh ras peratenta gelah ipinpin Kesah si badia kita, alu bage nggeluh me kita. Jadi adi kita ngerana kerna kegeluhen, berarti kita harus nggeluh ibas persadan ras jesus Kristus, janah Kesah Si Badia mpengasup kita guna sie.

Pdt. Steven Kumenit, STh, M.Min.

Selasa, 15 Mei 2012

Malem Ate Kalak Simegiken Ras Ndalanken KataNa (Mazmur 1:1-6).

KHOTBAH MINGGU TANGGAL 20 MEI 2012.
===================================
Introitus : I bas Pustaka Si Badia lit tersurat, "Adi ibegindu sora Dibata sendah, ola pemersik ukurndu bagi nini-ninindu nai asum ia berontak ngelawan Dibata."(Heber 3:15).
Ogen : Perbahanen Rasul-Rasul 1:15-26.
Khotbah : Mazmur 1:1-6.
Tema : Malem Ate Kalak Simegiken Ras Ndalanken KataNa.

LATAR BELAKANG.
1. Secara jelas pemazmur menggolongkan moral ntah pe perbahanen manusia ibas dua hal, tapi ulihna tuhu berbeda, manusia sipatuh ibas ndalanken undang-undang Tuhan (taurat) ndatken kemalemen ate, kegeluhen kalak benar itegu-tegu dingen ikawali Tuhan, tapi manusia si la patuh ndalanken undang-undang Tuhan, kegeluhenna kempak kebenen. Erkiteken sie Mazmur enda pe itandai alu mazmur kepentaren.
2. Memang teridah ibas bahan khotbahnta pemazmur ncidahken kerna dua dalan manusia siberbeda, tapi situhuna, ate pemazmur gelah manusia ngangkai kerna eksistensi Tuhan. Ise kin Tuhan e. Kepeken Tuhan e Dibata sierkuasa ras perkeleng, Dibata sinjadiken langit ras doni, ras singkuasai kegeluhen manusia, erkiteken sie Tuhan la pernah nutup mata ngenen kegeluhen manusia, bagepe, Tuhan tetap erbahan sada tindaken sue ras perbahanen kegeluhen manusia.
3. Ipihak sideban, kenca pemazmur ncidahken moral manusia ras ulih siidatna, ate pemazmur gelah manusia banci ngikuti dalan kebenaren, eme ndalanken undang-undang Tuhan, janah mpedauh dirina ibas dalan kalak simegombang man Dibata, sebab dosa merugiken kegeluhen manusia e sendiri. Bagepe kegeluhen kalak perdosa e la lit ertina, kegeluhena bali ras segal i embus angin. Tapi kasa kai kalak singgeluh ibas kebenaren berarti ia enggo erbahan sada karakter siberbeda ras la nggit seri ras kegeluhen kalak perdosa.
4. Karakter siberbeda ras kalak jahat siicidahken kalak benar, erkiteken gegeh undang-undang Tuhan (taurat). Kalak benar ngasup ndalanken kebenaren erkiteken kalak benar ngkelengi Undang-undang Tuhan, sebab undang-undang merupaken sada hal siharus idalanken manusia tinepana, bagepe tanda maka manusiae patuh man Tuhan. Ipihak sideban undang-undang Tuhan ngasup ngajari manusia guna erdalan ibas perbahanen simehuli singena ate Tuhan, erkiteken sie me kalak benar la nggit sirang ras undang-undang Tuhan. Bagepe guna ndatken perbahanen-perbahanen simehuli singena ate Tuhan, undang-undang Tuhan harus jadi bagin ibas kegeluhen manusia, emaka manusia harus ngukurisa suari ras berngi. Jadi alu nggit ngukurisa suari ras berngi kerna undang-undang Tuhan, maka alu sendirina manusia enggo iajarken kerna kebenaren, ras nirangi kejahatan ras dosa, sebab dosa erbahanca manusia la iperhitungken Tuhan, bagepe la iperhitungken ibas kegeluhen kalak benar ras dat penghakiman ibas Dibata nari.
5. Kegeluhen kalak sipatuh nandangi undang-undang Tuhan ndatken kegeluhen, janah kegeluhenna labo kentisik ngenca, tapi nggelub seh rasa lalap, sebab kalak benar nggeluh ibas ketergantungan man Tuhan, janah kegeluhenna pe lalap ipasu-pasu Tuhan, erkiteken sie lalap ia erbuah (nggeluh ibas perbahanen singena ate Tuhan). Enda erkiteken pengajaren ras penegu-negu undang-undang Tuhan (band.= ayat 3).

APLIKASI
Kemalemen ate eme sada hal si paling idarami kerina manusia, bagepe melala kal bentuk-bentuk kemalemen ate siitawarkan doni enda, bagepe lit sada pengangkan erpalaskan pengangkan manusia kerna kemalemen ate. Man manusia ras doni enda sukat-sukat kemalemen ate e adi enggo terpenuhi kern keperlun “pangan ras inemen”. Erkiteken sie me sadar ntah la sadar dalan kalak jahat/perdosa sirusur idalani guna ndatken kemalemen ate. Padahal e kerina salah. Kemalemen ate menyangkut hubungenta ras Dibata, jadi la saja terjeng terpenuhina kegeluhen jasmani, tapi sebalikna kegeluhen spiritualitasta tuhu-tuhu nggeluh. Ibas erti kata guna ndatken kemalemen ate berarti kita harus ngkelengi undang-undang Tuhan. Sebab ibas kita ngkelengi ras ndalnken undang-undang Tuhan berarti kita enggo ngukurisa suari ras berngi. Janah harus siteh undang-undang Tuhan lit ibas pustaka si badia. Emaka kita si rusur ngoge pustaka si badia, pasti ndatken petunjuk kerna kebenaren, janah Kesah Si badia singgeluh bas pusuh ras peratenta ngajarisa ras negu-negu kita guna ndalanken kebenaren e. Memang ibas kita erdalan ibas dalan benar ras adil, jujur, banci saja kita ikucilkan doni enda. Enda jadi erkiteken doni enda la erngena ate nandangi kebenar ras keadilen. Janah harus siinget ibas kita ndalanken nggeluh sibenar ras adil berarti kita enggo matuhi undang-undang Tuhan, sebab Ibas undang-undang Tuhan ntah pe nggeluh ras Tuhan lit kemalemen ate. Sebab ibas kita nggeluh ras Tuhan maka kita pasti nggeluh (band= ayat 3). Emaka gelah kita nggeluh ibas kemalemen ate Tuhan (band= pasu-pasu Tuhan), maka siharus silakoken eme ula siusih perbahanen kalak jahat.
Harus siteh kegeluhenta la lepas ibas pengenehen Dibata nari, emaka kita kerina singgeluh ibas keselamaten tetaplah ngkelengi Dibata, alu bage katawari paksa pe nggit kita megiken kata Dibata ras nggit kita ndalankenca, alu bage kita nggeluh ibas kemalemen ate ras ndauh ibas penghukumen Dibata nari.

Pdt. Steven Kumenit, STh, Min.

Jesus Kristus Eme Sumbul Kiniteken (Heber 12:1-11).

BAHAN PJJ GEREJA GBKP
TANGGAL 20-26 MEI 2012.
============================
Heber 12 : 1- 11.

Tema : Jesus Kristus Eme Sumbul Kiniteken.

LATAR BELAKANG
1. Secara umum banci sikataken kalak kristen sitading i taneh perlajangen (ndatken tantangen sicukup mberat (nggeluh ibas perbeben) simesangat. Tantangen e reh ibas pemerintah nari ras kalak Yahudi, emaka kalak kristen enggo mulai kecewa nandangi kekristenan, janah enggo mulai rukur guna mulihken ku agama ndube ( Yahudi), sebab tupung ia ragama Yahudi labo ia pernah isak-isaken kalak. Alu kata sideban kalak kristen asal Yahudi paksa sie lit ibas bahaya kebenen pengarapen man Yesus Kristus, emaka mulih atena ku kiniteken Yudaisme.
2. Ibas situasi sibagenda me reh surat Heber, guna mpegegehi kalak kristen si lit ibas perlajangen gelah tetap nggeluh ibas erpengarapen, sebab labo kap sia-sia nggeluh ibas pengarapen, janah kegeluhen sibage tempa sangana nggeluh ibas perlumbaan, janah mata harus tertuju tetap man Yesus Kristus, sebab ibas mata si tertuju man Yesus Kristus maka kalak kristen la putus asa, sebab kai ? sebab Yesus simerupaken ulu pengarapen kalak Kristen enggo leben ngenanami kiniseran, janah menang Ia ibas kiniseran e nari. Tujun penulis ncidahken kerna pengurbanan Yesus, gelah kalak kristen tetap megenggeng, ras megegeh ibas ngenanami perbeben ras kiniseran, sebab ibas megenggeng ras megegeh ibas ngenanami perbeben ras kiniseran berarti perpulungen enggo ngelawan dosa.
3. Penulis ncidahken maka kerina e merupaken sada pendidiken “rohani” gelah perpulungen banci berhasil. Kiniteken perpulungen reh gegehna sebab perpulungen banci meteh kerna kai siharus iban adi reh ujin bas kegeluhenna. Enda ibahan sebab perpulungen merupaken anak-anak Dibata. Penulis sengaja ngelayasi perpulungen gelah perpulungen meteh, maka ia kerina anak-anak Dibata, erkiteken sie, ibuatna kai siisuratken ibas Jop 5:17; Kuan-kuanen 3:11-12. Enda iangkat sebab perpulungen reh ibas latar belakang agama Yahudi, emaka enda isingetken mulihi man bana, kerna karya keselamatan sierdahin ibas perbeben ras kiniseran. Jadi man kalak kristen, kiniseran eme bagin ibas pendidiken.
4. Sada kewajaren adi sekalak anak ididik ras iajarken bapa kerna erti ras makna nggeluh. Enda itekanken sebab tanggung jawab pendidiken man kalak Yahudi lit ibas sekalak bapa. Emaka enda harus min iteh perpulungen, alu bage perpulungen lanai jungut-jungut ras tetap erpengarapen man Tuhan.
5. Nasehat siibereken penulis enda, gelah perpulungen (kalak kristen) singgeluh ibas perbeben banci menyadari maka perbeben ras kiniseran banci mendewasakan kalak kristen, emaka kegeluhen kalak kristen banci megegeh, janah la gampang putus asa.

APLIKASI
Erkiniteken la saja tek nandangi “Tuhan”, tapi lit sada pengarapen ras ketergantungen geluhta man siiteki kita.
Adi sinen i tengah-tengah kegeluhenta i doni enda, melala tuhan sibanci i teki kita, janah tuhan e banci mereken “kegeluhen” ras “kesenangen” man banta, tapi siiberekenna eme terjeng kesenangen doni enda saja, kuasana terbatas. Tapi kita selaku kalak kristen patut kita ngataken bujur man Tuhan sebab erkiteken Yesus Kristus sienggo keke maka kita banci nggeluh ibas erkiniteken. Sebab ibas Yesus Kristus, teridah kerna kuasa Dibata. Janah erkiteken kita tek man Yesus selaku Tuhan ras Juru selamatta maka kita banci nggeluh ibas keselamaten.
Inti kinitekenta man Yesus Kristus eme nggeluh ibas pertobatan, sierbahanca kita lanai nggit nggeluh ibas kejahaten, sebab kita enggo nggeluh ibas perkuah ate Tuhan. Janah erkiteken kiniteken kita banci erbahan simehuli singena ate Tuhan. Emaka patut nge sikataken bujur man Tuhan, sebab erkiteken perkuah ateNa maka iberekenNa man banta nggeluh erkiniteken man Jesus Kristus.
Jesus Kristus labo saja Dibata, tapi Ia me dalan kempak kegeluhen e, janah erkiteken Jesus me kita banci nggeluh ibas sada pengarapen man Tuhan. Amin gia Tuhan la iidah, tapi erkiteken Jesus Kristus, tek kita maka kinitekenta man Tuhan la sia-sia. Emaka ibas kegeluhenta enda, bicara jumpa gia perbeben ras kiniseran ula min sempat kita ndabuh ku bas dosa, ntah pe talu iban doni enda sebab ibas Jesus Kristus, kita enggo ipengasup guna naluken kuasa-kuasa doni enda, janah Dibata pe nampati kita gelah kita tetap nggeluh ibas keselamaten. Bagepe kita banci ngenen kubas kegeluhen Jesus Kristus, gia nggeluh ibas perbeben ras kiniseran tapi Ia menang, emaka ialokenNa kemulian ibas Dibata nari. Bagepe kita erkiteken Yesus Kristus kita enggo ipengasup guna megegeh ras menang ibas kuasa doni enda. Alu bage kita pe pagi ikut ngaloken rudang-rudang kegeluhen sienggo isikapkenNa man banta.

JAWABAN DISKUSI
1. Yesus eme pengarapen geluhta. Erkiteken Jesus kita banci selamat. Janah man Jesus saja siharus isembah.
2. Perlu lebe siteh isekelewetta lit perbeben ras kiniseran, janah sada paksa kita jumpa perbeben ras kiniseran. Tapi kerina e enggo italuken Jesus. Emaka ibas kita tek man Jesus, kita pasti naluken kerina perbeben ras kiniseran.
3. Kenangkihen Yesus eme nikapken ingan man banta. Janah ibas kita menang berarti kita bali ras Jesus kundul ibas kemuhen Dibata, sebab kita eme anak Dibata.

Pdt. Steven Kumenit, STh, M.Min.

Selasa, 08 Mei 2012

Tema : Dibata Mpengasup Kita Nggeluh Ras Ersaksi (Roma 8:14-16)

BAHAN PJJ GEREJA GBKP
TANGGAL13-19 MEI 2012.
======================
Roma 8:14-16.

Tema : Dibata Mpengasup Kita Nggeluh Ras Ersaksi.

LATAR BELAKANG
1. Adi siperdiateken kerna oratenta, Paulus ngerana kerna eksistensi ras makna Kesah Si Badia ibas kegeluhen kalak si tek man Jesus Kristus. Kesah Si badia eme salah sada ibas telu pribadi Dibata Tri tunggal, janah njadiken kalak sitek selaku anak Dibata ras mbebasken kalak si tek ibas budak dosa nari.
2. Enda itekanken Paulus man perpulungen Roma, sebab perpulungen Roma banci sikataken mayoritas kalak kristen asal Jahudi nari, emaka cara rukur, khususna kerna keselamaten tetap denga make cara rukur kalak Jahudi. Ija kalak Jahudi jadi anak erkiteken pengangkatan Dibata, emaka kenca kalak Israel tubuh, minter ia jadi anak Dibata. Bagepe keselamata sisempurnah adi ndalanken hukum Taurat, ntah pe isunat, sebab sunat merupaken perpadanan antara manusia ras Dibata (band. Kej. 17). Bagepe enda ikataken ras itekanken Paulus gelah ula sempat kalak kristen siasalna labo kalak Jahudi jadi bingung ras mpengaruhi kinitekenna sierbahanca jadi bingung ras lanai idalankenna status kalak sienggo nggeluh selaku anak Dibata.
3. Paulus menekanken kerna status anak ras Bapa, tentuna labo berarti Paulus ngerana kerna hubungan secara biologis, tapi paulus ngerana kerna makna kiniteken, bagepe sipat ras karakter kalak sitek harus seri ras sipat ras karakter Bapa. Hubungen anak ras Bapa harus nggeluh akrab, perukurenna harus seri ras Bapa e, emaka kai siidahiken Bapa harus e ka siidahiken anak. (band. Yohanes 5:17-27).
4. Nina Paulus kerina kalak siipinpin Kesah Dibata eme anak Dibata. Tentuna siimaksudken Paulus eme kalak si enggo tek man Jesus Kristus, sebab kalak si enggo tek man Jesus tentuna ia enggo iperidiken, emaka kegeluhenna ikuasai ntah pe ipinpin oleh Kesah Si Badia. Ipinpin Kesah Si Badia labo berarti meneken aktivitas manusia e sendiri. Manusia tetap beraktivitas, saja ia ipinpin Kesah Si Badia gelah kai siibahan kalak si tek e tetap ngena ate Dibata. Emaka kalak si tek si ipinpin Kesah Si Badia, nggeluh ibas kemerdekaan. Kalak sitek lanai nggeluh ibas kebiasaan kalak Jahudi, eme ndalanken hukum taurat, ntah pe sunat, sebab kalak sindalanken hukum taurat berarti tetap denga ia nggeluh ibas perbudaken. Lebih asangken sie kalak sitek lanai nggit nggeluh ibas perbudaken dosa.
5. Harus siteh penggelaren Kesah Dibata ibas oratenta, e bali ras penggelaren Kesah Si Badia. Sebab Kesah Dibata eme Kesah Si Badia kap. Emaka Kesah Sibadia singgeluh bas kalak sitek mpengasup guna erlebuh man Dibata eme Bapa, ya Bapa. Maksudna kalak si tek banci berkomunikasi secara langsung ras Dibata. Bagepe ibas kita banci ngerana ras Dibata maka kalak sitek banci ngakuken Yesus Kristus eme Tuhan, ibas kematen ras kekekenNa, Jesus enggo nasapken kerina dosa-dosa kalak sitek, ras enggo iperdamekenna kita ras Dibata. Ibas perbahenen Dibata man doni enda me, dungna ibas penegu-negu Kesah Si Badia, kalak sitek ngasup ersaksi kerna sie. Ersaksi kerna kalak si tek eme anak-anak Dibata.

APLIKASI
Kita selaku kalak sitek ngaku maka kita kegeluhenta i tengah-tengah doni enda erkiteken perkuah ate Tuhan, janah harus siinget konsep kegeluhenta ras Dibata erbeda. Ibas konsep manusia, kegeluhen e lit adi kita banci banci erkesah ras terpenuhi pangan ras inementa. Tapi konsep Dibata, kegeluhen manusia lit adi manusia ndalanken kai siisurakenNa, janah kegeluhenna e la saja terjeng nggeluh ibas doni enda ngenca, tapi nggeluh seh rasa lalap. Emaka banci sikataken adi kita nggeluh berarti kita harus ndahiken kai singena ate Tuhan, gelah ipasu-pasu Tuhan kita. Emaka banci sikataken kegeluhen manusia tergantung relasinta ras Dibata. Adi mehuli relasinta ras Dibata maka kita banci nggeluh, tapi adi lang berarti kita enggo mate. Tentuna harus siinget relasinta ras Dibata mehuli sebab kita enda anakNa. Tapi harus ka siteh, kenca statusta jadi anak Dibata maka kita harus ndalanken kai simehuli ras kai singena ateNa. Kai siibahan Bapa, e ka siharus idalanken anak.
Memang ibas kita nggeluh i tengah-tengah doni enda, iblis lalaprusaha mabai kita gelah kita mate, tapi ula kita mbiar sebab Dibata arah Kesah Si Badia mpengasup kita guna ndalanken kegeluhenta. Emaka ibas penemani ras penegu-negu Tuhan man banta, kita harus ersaksi ibas doni enda kerna kita enda anak Dibata. Bentuk kesaksin eme arah kata ras perbahanen. Adi arah kata, kita harus ngataken Jesus eme Tuhan ras Juruselamatta, janah arah perbahanen, kita harus ncidahken kekelengen, kedamen, kai simehuli singena ate Tuhan. Kesaksin enda tanda kita merespon kegeluhen sienggo ibereken Dibata man banta.

JAWABAN DISKUSI
1. Harus siinget erkiteken Perkuah ate Tuhan janah ibas kita erkiniteken man Jesus Kristus, maka kita ijadiken anak Dibata. Ibas sie ibas kita ndalanken simehuli singena ate Tuhan, maka kita tetap jadi anak Dibata. Jadi Erkiteken penegu-negu Kesah Dibata maka kita banci ndalanken kai simehuli singena ate Tuhan.
2. Sipaling penting bas kita eme ndalanken kekelengen, bagepe muat baginlah kita ibas pelayanen diakonia. Bagepe nggeluhlah kita ibas persadan.

Pdt. Steven Kumenit, STh,M.Min.

Rabu, 02 Mei 2012

Endekenlah Ende-Enden Kekelengen (Jakup 2:8-13)

BAHAN KHOTBAH GEREJA GBKP
TANGGAL 6 MEI 2012
==============================
Introitus : Bage me pe kerna kiniteken. Adi kiniteken sue labo rikut ras perbahanen, kiniteken si bage mate kap (Jakup 2:17).
Ogen : Masmur 22:23-32.
Khotbah : Jakup 2:8-13.
Tema : Endekenlah Ende-Enden Kekelengen.

LATAR BELAKANG
1. Secara umum banci sikataken surat Jakup enda lebih menakanken kerna perbahanen. Alu kata sideban merupaken sada “petunjuk ” guna mperbaiki kegeluhen rohani ras ngajuk man kalak sitek guna ncidahken perbahanen simehuli. Kegeluhen selaku kalak kristen harus icidahken. Sebab selaku kalak kristen melala pasu-pasu Tuhan man kalak si tek, emaka kewajibanna eme nggeluh alu mehuli. Alu kata sideban kalak si tek harus jadi pelaku-pelaku kata Dibata.
2. Dasar pemikiran Jakup eme ketutusen ibas jera man Tuhan janah harus icidahken ibas perbahanen-perbahanen simehuli (moral). Jakup ngenen kiniteken man Tuhan harus icidahken alu kekelengen man sapih-sapih manusia. Jadi kekelengen eme buah ibas kiniteken man Tuhan.
3. Jakup mpersingeti kalak si tek singgeluh ibas diaspora gelah ula rayo-ayo, sebab nggeluh alu rayo-ayo merupaken dosa kap. Enda ikataken dosa erkiteken kalak sitek lanai ngergai Dibata. Sebab : 1). I lebe-lebe Dibata kerina manusia seri, la lit si erdobahan. 2). Perbahanen si rayo-ayo berarti ije kalak sitek enggo membeda-bedaken tinepa Dibata, padahal Tuhan sendiri ngergai tinepaNa. Alu bage berarti kalak si tek lanai ngergai kai siiergai Dibata. Bagepe ibas kalak si tek nggeluh alu rayo-ayo berarti enggo erbahan kinilaadilen.
4. Enda ikataken Jakup sebab idahna enggo lit ibas persadan kalak si tek (gereja) nggeluh rayo-ayo. Adi kalak bayak mehuli perbahanenna, bagepe sikap pengalo-ngalona, tapi adi kalak musil lang. Padahal selaku gereja simerupaken kula ni Kristus la banci nggeluh kegeluhen rayo-ayo e. Sebab paksa sie lit sada kebiasaan piga-piga kalak kristen eme alu ncidahken kinilitenna alu cara make uis simejile bagepe cincin simejile ras melala, ija banci sada jari dua cincin. Enda kerina gelah ipuji kalak, bagepe gelah kalak nghamati ia. Ibas keadaan sibage me pernah sekalak bapa gereja eme Clement i Aleksandria, Mesir, melarang kalak kristen guna make cincin.
5. Emaka gelah kegeluhen kalak sitek la rayo-ayo, siharus ibahan kalak sitek eme ndalanken undang-undang kinirajaan Dibata, bagi si lit ibas Pustaka Si Badia eme"Kelengilah temanndu manusia bagi kam ngkelengi dirindu”. Enda itekanken gelah 1). Kalak si tek harus mentaati hukum Tuhan. 2). Kekelengen harus menjadi karakter man kalak sitek. 3). Melanggar hukum Tuhan amin gia sada ngenca berarti menolak pemerintahan Dibata ras menyangkal kewarganegaraan ibas kerajaan Dibata.

APLIKASI
Kita selaku kalak kristen la banci nggeluh rayo-ayo sebab adi bage kegeluhenta berarti kita enggo erdosa, sebab kita enggo ngelanggar undang-undang Tuhan kerna kekelengen ras pe kerna eksistensi Tuhan si la rayo-ayo. Bagepe lanai kita patuh man Jesus Kristus selaku takal perpulungen. Emaka selaku kalak kristen harus tetap nggeluh ibas persadan simehuli (nen = harmonis). Memang ibas kita nggeluh i tengah-tengah doni lit terjadi perbedaan status sosial, tapi enda kerina labo Dibata sierbahanca, tapi doni enda. Janah doni enda pe lebih mementingkan status sosial. Ise si status sosialna lebih meganjang ia siharus ihormati ras iergai. Tapi harus siinget pengenen ras penilaian doni berbeda ras pengenehenen bagepe penilaian Tuhan, janah kita enda anak-anak Dibata. Dibata la pernah menilai kita arah status sosialta, tapi justru arah penerapen kekelengen.
Ibas kita ndalanken kekelengen alu la rayo-ayo, labo berarti kita “anti” kebayaken, lang. Tapi ateta gelah kita banci nggeluh alu harmonis sada ras sidebanna, janah kalak si “musil” pe banci nggeluh alu meriah ukur. Alu bage kita selaku gereja banci ergegehna nggeluh ibas persadan. Jadi bas kita nggeluh alu la menganjang ukur ras la rayo-ayo maka kita enggo ngendeken ende-enden kekelengen. Jadi ende-enden teridah arah perbahanen simehuli man sapih-sapihta manusia.

Pdt. Steven Kumenit, STh.,M.Min.

Tema : Nginget Dibata Ibas Persadan (Josua 4:2-7)

BAHAN PJJ GEREJA GBKP
TANGGAL 6 – 12 MEI 2012.
===========================
Josua 4 : 2-7

Tema : Nginget Dibata Ibas Persadan

LATAR BELAKANG
1. Josua eme sekalak pemimpin siiangkat Tuhan guna gantiken Musa, janah salah sada tanggungjawab Josua eme minpin bangsa Israel bengket ku taneh Kanaan simerupaken tanah siipadanken Tuhan man bangsa Israel.
2. Salah sada tantangan (tantangan si pemena) siharus ihadapi Josua labo jelma (kalak Kanaan), tapi lau Jordan. Sebab paksa sie Lau Jordan sangana banjir, janah biasana ibas keadaan bagenda, lau Jordan la banci terkepari, sebab launa banci seh 1 KM belangna, janah arus launa cukup “deras”.. Lau jadi banjir erkite-kiteken paksa sie sangana musim semi, emaka kerina salju simenutupi kerina deleng-deleng enggo mulai mencair, janah salju e jadi lau ras mengalir ku lau Jordan.
3. Ngepari Lau Jordan eme dalan siharus idalani bangsa Israel gelah seh ku tanah Kanaan, khususna kota Jerikho dua jam ngenca perdalanen bangsa Israel kenca bangsa Israel ngepari lau Jordan. Erkiteken sie me Dibata mereken sada tanda sengget man bangsa Israel arah pengadi Lau Jordan. Lau Jordan ngadi erkiteken peti perpadanan siilanja para imam enggo seh i lau Jordan, ntah pe para imam nggo ndehdehken nahena i lau e, maka lau e ngadi. Emaka sijadi eme lau si reh arah utara nagkih ku das jadi bendungen, tapi lau sisebelah selatan nari terus mengalir seh ku laut mati, emaka terjadi me dataran simbelang si enggo kerah sibanci idalani bangsa Israel. Kehadiren Dibata lit ibas peti perpadanan siilanja para imam. Perbahanen Dibata (nen = tanda sengget) bali ras sanga Dibata pengadi laut Teberau paksa bangsa Israel ndarat i taneh Mesir nari. Bagepe kepemimpinen Dibata man bangsa Israel ibas lau Jordan enggo berbeda ras paksa Dibata minpin bangsa Israel sanga bangsa Israel erdalan i taneh mesawang. I je Dibata minpin bangsa Israel arah binangun embun paksa suari ras binangun api paksa berngi, tapi tupung ngepari lau Jordan kepimpinen Dibata icidahken arah peti perpadanen. Enda ngatakenca suasana ras dalan enggo berbeda. Erkiteken tanda sengget siibahan Dibata enda me maka bangsa Israel banci ngepari lau Jordan.
4. Ibas bangsa Israel enggo banci ngepari lau Jordan e, maka Yosua arah persuruhen Dibata merentah man bangsa Israel, siiwakili sada kalak tep-tep terpuk bangsa Israel (nen = 12 suku Israel) gelah muat batu i lau Jordan (ingan tedis para imam si ngelanja peti perpadanan), guna majekken sada tanda peringet-ingeten kerna tanda sengget siibahan Dibata ije. Ingan majekken tanda peringet-ingeten eme ibas ingan bangsa Israel erberngi ope nerusken perdalanen ku taneh Kanaan. Tujun enda eme gelah bangsa Israel nggejapken maka ia banci ngepari i lau Jordan erkiteken Dibata. Bagepe tanda peringet-ingeten enda merupakan sada perbahanen adikodrati (nen = sada peristiwa siluar biasa). Perlu siteh lebe tanda peringet-ingeten enda ipajekken alu 12 batu simerupaken tanda 12 suku Israel.
5. Ipihak sideban tanda peringet-ingeten e merupaken sada momentum guna ngajari anak-anak bangsa Israel paksa idahna batu peringet-ingeten e. Sebab paksa idahna tanda peringet-ingeten e banci saja isungkunna kerna etina, emaka harus ijabab alu nuriken maka Lau Jordan ngadi maler asum Peti Perpadanen Tuhan ngepari lau e. Alu bage anak-anak bangsa Israel ngenen man Tuhan saja. Tuhan saja isembahna.

APLIKASI
Harus siinget erkiteken perkuah ate Tuhan nge maka kita banci nggeluh ibas persadan ras Tuhan. Sebab arah kita erkiniteken man Jesus Kristus kegeluhenta ras Dibata ipehuli mulihi. Sebab siinget erkiteken dosa me, maka kita banci sirang ibas persadan ras Tuhan. Emaka kalak singinget perbahanen Dibata enda, tentuna ngataken bujur tetap man Tuhan.
Ipihak sideban harus ka siinget perdalanen geluhta i tengah-tengah doni enda bagi kita sangana erdalan menuju kempak keselamaten sienggo ibereken man banta, simawen kita jumpa perbeben ras kiniseran, bagepe keriahen ukur. Tapi adi siukuri erkiteken penemani ras penampat Tuhan me man banta maka perbeben ras kiniseran banci terbentasi kita. Janah kita selaku kalak sierkiniteken ngenen kerina e erkiteken tanda sengget siibahan Tuhan man banta. Emaka selaku kalak sierkiniteken kita ngataken bujur man Dibata. Tanda kita ngataken bujur eme arah nehken persembahen ntah pe erbahan acara pengataken bujur man Tuhan i rumah alu nenahken perpulungen, keluarga ras kade-kadenta. Bagepe ibas perbahanen Tuhan i tengah-tengah keluarga, la kita lupa erbahan acara pengataken bujur. Tujunna eme gelah Dibata tetap siterpuji.
Bagepe kita selaku kalak sierkiniteken man Tuhan, kita banci nggeluh ibas persadan selaku gereja, e erkiteken Tuhan sindilo kita, emaka seharusna tanda kita merespon perbahanen Dibata ibas persadanta eme tutus kita pulung ibas gereja ras PJJ bagepe PA. Jadi ibas persadanta harus kap siinget kerna Tuhan. Sebab adi Tuhan la masu-masu kegeluhenta, tentuna sia-sia me kegeluhenta.

JAWABAN DISKUSI
1. - Tuhan hadir ras bangsa Israel paksa ngepari Lau Jordan.
- Anak-anak bangsa Israel banci meteh kerna Kuasa Dibata
- Gelah Dibata saja siisembah.

2. - Pernah malem ibas sakit nari. Celaka, tapi la kai-kai pe. Hari Ulang Tahun ketubuhen ras perjabun.

3. - Ngataken bujur man Tuhan.
- Ertoto
- Reh ku kebaktin
- Nggeluh alu harmonis.

Pdt. Steven Kumenit, STh,M.Min