Rencana Dibata Pasti Seh Ibabo Kerina Sura-Sura Manusia (Kejadian 27:5-10)

BAHAN PJJ GEREJA GBKP TANGGAL 30 SEPTEMBER – 6 OKTOBER 2012. ====================================================================== Kejadin 27:5-10. Tema : Rencana Dibata Pasti Seh Ibabo Kerina Sura-Sura Manusia. LATAR BELAKANG. 1. Ibas bahan oratenta sekali enda eme sada bagin simbelin ibas pemilihen “bapa leluhur (Abraham Isak ras Jakup)” bangsa Israel. Bicara ibas ogenta teridah maka Jakup sijadi bagin ibas salah sada “bapa leluhur” bangsa Israel enda idatkenna arah nipu. Janah enda berbeda ras Abraham simerupakan bapa leluhur bangsa Israel. Tapi adi sinen terbagesen maka enda merupaken sada hak preogatif Dibata guna milih ise sibanci jadi alatNa guna njadiken mulihi doni enda jadi mehuli. 2. Perlu siteh ibas “dunia kuno” (band. Masa Abraham – Jakup), kerna pemasu-masun sekalak bapa sinandangi mate ipercaya masyarakat paksa sie “tuhu-tuhu manjur”, bagepe guna mendukung terlaksana pemasu-masun sekalak bapa man anakna, salah sada cara siipake eme alu mbaba pangan. Pangan ijenda merupakan sada kebadiaan. Isamping sie ibas masyarakat simenganut patria hart simenonjolkan garis keturunan man sekalak anak dilaki, terutama anak sintua siharus nggantiken posisi sekalak bapa, adi bapana enggo mate. Pemasu-masun sekalak bapa ertujun gelah anak nggantiken posisi bapa ngaloken ras nerusken padan Dibata. 3. Ibas oratenta ituriken uga Isak sienggo metua janah matana pe enggo seleng ersura-sura gelah posisina igantiken anakna sintua eme Esau, sebab bage kin tradisi tupung sie. Emaka ibas tradisi dunia kuno adi lit pengalihen sada keduduken ibas rumah maka lit ka sada tradisi upacara pengalihan siharus ibahan alu man ras nehken pasu-pasu. Tapi siidah arah turi-turin enda i ja Isak selaku kepala keluarga siatena masu-masu Esau anakna sintua la isetujui Ribka ndeharana. Emaka kenca ibegina lit sura-sura perbulangenna nandangi anakna si Esau, minter Ribka ndahi anakna si Jakup ras nurikenna sura-sura bapana e man si Jakup. Tapi erkiteken ate Ribka gelah si Jakup nge sigantiken posisi si Esau emaka isuruhna gelah Jakup muat dua kambing gelah itasakkan, jenari ibereken man bapana gelah arah sie Isak masu-masu Jakup. Harus ka pe siteh kerna pasu-pasu ntah pe kutuk/sumpah sekalak bapa man anakna hanya banci ilakoken sekali ngenca. Jadi adi sekalak bapa enggo masu-masu anakna maka la bo nari banci iulihi, amin gia situhuna alamat pasu-pasu salah. 4. Hak anak sintua siharus ngaloken pasu-pasu bapa selaku kepala keluarga, ate Ribka ialihken ku Jakup. Palas enda eme erkiteken 1). Hak kesulungen enggo berpindah ku Jakup (band. Kejadin 25: 30-34). Jadi bicara Esau anak sintua, tapi situhuna hakna enggo pindah ku Jakup. Emaka pasu-pasu Isak harus ku Jakup la bo man Esau. 2). Keberpihakan Ribka man Jakup. 3). Keberpihakan Tuhan man Jakup. 5. Kai siilakoken Jakup kerna pasu-pasu man anak sintua gelah litna sada kesinambungan guna jadi sada bangsa simbelin (band. Kejadin 21: 18). APLIKASI Tema kita sekali enda ngingetken kita ku kata Dibata ibas Yesaya 55 : 8 eme Nina TUHAN , "PerukurenKu la bali ras perukurenndu, dalanKu labo seri ras dalanndu. Adi siangkai enda maka situhuna kita enggo banci sadar maka dalan Tuhan silebih mehuli asangken dalan ras rencananta. Emaka sijadi penungkunen man banta engkai maka perukuren ntah pe sura-sura manusia si lebih meninjol asangken sura-sura Tuhan ? sebabna banci erkiteken sura-sura manusia pada umumna lebih bersipat jasmani/doni, tapi sura-sura Tuhan lebih bersipat rohani. Emaka kalak si nggeluh ibas sura-sura daging mesera kal akapna ngikuti sura-sura Tuhan. Rusur ibas kegeluhenta enda, tempa mehuli ras mejile siakap adi sidalanken sura-sura ukurta, tapi situhuna ibalik sie lit sada siding sibanci mbaba kita ku bas dosa. Memang la bo kap salah adi lit pe sura-suranta, tapi sisungkunlah man Tuhan lebe gelah sura-suranta e bali ras sura-suraNa. Bagepe gelah kai silakoken ras si sura-sura kita e erpalasken kai singena ate Tuhan. Harus siteh maka kerina geluhta lit ibas rancangan Tuhan. Sura-sura Tuhan nggeluh bas kita, eme guna njadiken doni enda nggeluh ibas kedamen ras kebadiaan, emaka kita enda ipakeNa jadi alatna. Jadi marilah sipelebeken sura-sura Tuhan, asangken sura-suranta. Pdt. Steven Kumenit, STh,M.Min.

Kam Kap Si Mada Kuasa (Matius 6:13b).

BAHAN PEKAN DOA GEREJA GBKP WARI VII. SABTU 29 SEPTEMBER 2012. ================================== Introitus : Jenari nina Dibata man bana, "Aku kap Dibata Si Erkuasa (Kejadin 35:11a.) Ogen : Mazmur 150:1-6. Khotbah : Matius 6: 13b. Tema : Kam Kap Si Mada Kuasa. LATAR BELAKANG 1. Adi sinen alu manjar-ajar kerna pertoton Tuhan siiajarken Yesus man ajar-ajarNa maka situhuna “Kam kap simada kuasa” eme kalimat pendungi ibas pertoton Tuhan e, janah sipatna eme pengakun. Ija Bapa sinisurga e erkuasa ibas kerinana, subuk i surga bagepe i doni. 2. Yesus ngajarken gelah jelma sinterem ngasup ngenen maka situhuna bicara melala gia kuasa-kuasa ibas doni enda, termasuk pe kuasa manusia, tapi adi ibandingken ras kuasa Dibata la bo lit bandingna. Kuasa-kuasa silit ibas doni enda termasuk kuasa manusia talu ibahan Dibata, sebab kerina e lit batasna. 3. Ibas pihak sideban kuasa-kuasa si lit ibas doni enda merupaken penjelmaan ibas siiblis nari, la bo kita ngasup nalukenca, adi la kin ras kuasa Dibata. Guna sie me adi sinen ku bas kitab Yohanes kerna pertoton, i je Yesus ertoto gelah kalak sitek ula ipedarat ibas doni enda nari tapi gelah ikawali ras i tegu-tegu Bapa (band. Yohanes 17:15). Sebab enda enggo idah Yesus kerna gegeh si lit bas manusia. Pengalamen si lit, manusia sipemena ndabuh ku bas tipu muslihat si iblis. Guna njaga si eme Yesus mindoken man BapaNa sinisurga gelah njaga ras ngkawali kerina kalak sitek. Sebab erkiteken kuasa Dibata nge maka kalak sitek banci megegeh ras naluken erbage-bage perbeben ras kiniseran. 4. Kuasa Bapa sinisurga teridah ibas diri Yesus Kristus. Ibas pelayanenNa i tengah-tengah doni enda guna majekken kinirajan surga ncidahken kuasaNa arah mujizat-mujizat, ipepalem Yesus kalak sakit, ipekekeNa kalak sienggo mate, ipelawes Yesus kerina setan-setan siatena ngkuasai manusia, bagepe uga Yesus berpihak man kalak sitertindas ras silatih dingen beraten, rsd. Ibas diri Yesus, kuasa iblis talu ibahan Bapa sinisurga. 5. Situhuna ibas naskah asli pertoton Tuhan, kalimat enda la lit, saja ibas perbeben gereja mula-mula maka kalimat enda itambahkan. Sebab gereja mula-mula ngenen kuasa Bapa si lit ibas Yesus Kristus ngasup naluken kerina kuasa-kuasa si lit ibas doni enda (iblis), khususna ibas kematen Yesus i je iakap iblis menang, janah enggo talu Yesus, tapi ibas wari sipeteluken Yesus keke. Enda mbuktiken Kuasa Dibata lebih erkuasa. Bagepe igejapkenna uga kalak sitek ibas gereja mula-mula amin gia ndatken perbeben ras kiniseran tapi erkiteken kuasa Bapa maka gereja mula-mula ngasup ndahiken dahin singana ate Tuhan, megegeh ras megenggeng ia kerina ibas ngenanami perbeben ras kiniseran. Emaka situhuna kalimat Kam kap si mada kuasa tujunna eme guna muji Tuhan, sebab la lit kuasa si lit ibas doni enda siseri ras kuasa Bapa e. APLIKASI. Ibas pertoton Tuhan enda ngajarken man banta guna banci ngenen kerna kuasa Tuhan si melebihi kuasa-kuasa si lit ibas doni enda, termasuk kuasa iblis. Emaka si harus lit bas kita eme nggeluh ibas keriahen ras muji Tuhan la saja arah alat-alat musik tapi pe ibas perbahanenta sitep-tep wari. Ibas litna perbeben ras kiniseran, kita tetap nggeluh erkiniteken man Yesus Kristus selaku Tuhan, sebab adi kinitekenta megegeh, sijadi eme kita tetap nggeluh ibas pengarapen. Sebab adi ndabuh kita ku bas dosa, berarti sia-sia kap sedekah enda kita nggeluh erkiniteken man Tuhan. Kuasa Bapa si enggo lit bas diri Yesus Kristus, banci pe iberekenNa man banta selaku anak-anakNa guna naluken kerina kuasa iblis. Alu bage kita tetap nggeluh ibas keselamaten sienggo ibereken Tuhan man banta. Pdt. Steven Kumenit, STh,M.Min.

Ola Min Kami Ibaba Kam Kubas Percuban. Tapi Olangilah Kami Idur Si Ilat Nari (Matius 6:13a).

BAHAN PEKAN DOA GEREJA GBKP WARI VI. JUMAT 28 SEPTEMBERB 2012. ====================================== Introitus : Nina, "Kadeku pe la lit asum aku tubuh nai, mate pe aku la pedah lit kadeku pe. TUHAN nai si merekenca, genduari enggo ka ibuatNa. Terpujilah gelarNa." (Jop 1:21). Ogen : Jop 2:1-10. Khotbah : Matius 6:13a. Tema : Ola Min Kami Ibaba Kam Kubas Percuban. Tapi Olangilah Kami Idur Si Ilat Nari. LATAR BELAKANG. 1. Ibas pertoton Tuhan, i je iajarken Yesus uga ertina nggeluh bergantung man Tuhan saja. Bagepe gelah ajar-ajar meteh maka Bapa/Dibata ngenca singasup njagai kegeluhen anak-anakNa. Erkiteken sie me ajar-ajar harus mindo man Bapana sinisurga gelah ula ibaba kubas percuban dingen ipulahi ibas sijahat nari. 2. Pertoton Tuhan sibersipat pengajaren enda, la bo saja terjeng paksa “genduari”, maksudna paksa ajar-ajar ras Yesus Nggeluh denga, tapi kenca Yesus lanai ras ajar-ajar pe. Sebab iblis terus gawah-gawah ndarami ise siman jerngemenna. Janah kerina kalak sitek merupaken “sasaran empuk”. Ngkai ? sebab 1). Kalak sitek secara pisik lanai ras Yesus. Adi ras Yesus, maka Yesus me sinjaga ras singkawali ajar-ajar. 2). La ate iblis ajar-ajar nggeluh ibas persadan ras Yesus, bagepe ndalanken kai singena ate Dibata. 3. Pertoton enda mpersingeti ajar-ajar kerna litna sada bahaya ibas kegeluhen ajar-ajar, ija ajar-ajar banci “isesatken” iblis seh maka banci lanai setia man Tuhan. Sebab adi ajar-ajar lanai setia man Tuhan maka siterjadi eme ajar-ajar nggeluh ibas dosa emaka kegeluhen ajar-ajar lanai nggeluh ibas keselamaten. Guna sie me ate Yesus gelah ajar-ajar la ndabuh ku bas dosa. Emaka sada ngenca dalanna eme tetap mindo penampat man Tuhan, gelah isampatiNa. 4. Memang percuban banci mpegegehi kiniteken kalak si tek man Yesus Kristus, tapi adi ajar-ajar la megenggeng ras la megegeh kinitekenna maka siterjadi percuban e banci meneken ntah pe nirangken ia Yesus. Guna sie me ajar-ajar harus mindo gegeh ras kepentaren ibas Dibata nari. 5. Yesus ngajarken man ajar-ajarNa gelah katawari paksa pe ajar-ajar mindo man BapaNa sinisurga gelah ipedauh idur siilat nari. Sebab iteh Yesus melala kal godaan sibanci erbahanca ajar-ajarNa jadi “murtad” emaka adi ikuasai Bapa banci ajar-ajar terhindar ibas sijahat nari. Enda erkite-kiteken inen Yesus sijahat enggo nggeluh ibas erbage-bage dampar kegeluhen, enda me sibanci ngkuasai kegeluhen ajar-ajar. Bali ras kalak Parisi singgeluh alu pekulah-kulah, erkiteken tergoda ia ku bas hal-hal doni, emaka kegeluhenna dem alu dosa. Ajar-ajar la banci bage, emaka perlu kal pusuh ras peraten ajar-ajar harus ikuasai Dibata. APLIKASI. Litnas percuban ibas doni enda, sada pihak banci nge jadi sarana guna mpegegehi kinitekenta, tapi isada pihak banci ka meneken kita. Erkiteken sie me kita selaku kalak kristen sitek man Yesus Kristus harus tetap nggeluh ibas kepentaren ras tetap mindo gegeh ibas Dibata nari gelah ipengasup ras iajariNa kita uga seharusna nggeluh ngalaken pencuban. Bagepe kita harus tetap mindo man Tuhan gelah kita ipedauh ibas sijahat nari. Tuhu manusia sindube si nggeluh ibas dosa ras kejahaten enggo ndatken perkuah ate, emaka pulah ibas dosa ras kejahaten e. Emaka kita genduari nggeluh ibas keselamaten. Tapi harus lah sisadari labo berarti la nai lit percuban ras kejahaten sibanci silakoken ibas kegeluhenta enda, sebab iblis katawari pe erdahin gelah kita ndabu ku bas dosa. Tentuna la ateta bage, janah tedeh ateta ndalanken sibenar singena ate Tuhan, sebab kita la nai nggeluh ibas kuk perhambaan dosa. Pdt. Steven Kumenit, STh, M.Min.

Alemi Min Salah Kami Bagi Nialemi Kami Salah kalak Kempak Kami (Matius 6:12).

BAHAN PEKAN DOA GEREJA GBKP WARI V. KAMIS 27 SEPTEMBER 2012. ================================== Introitus : Tapi i bas Kam lit pengalemi dosa gelah kami malang man baNdu (Mazmur 130:4). Ogen : Mazmur 130:1-8. Khotbah : Matius 6:12. Tema : Alemi Min Salah Kami Bagi Nialemi Kami Salah kalak Kempak Kami. LATAR BELAKANG 1. Ibas bahan khotbahnta sekali enda, simerupaken sada bagin ibas pertoton Tuhan iajarken Yesus man ajar-ajarNa kerna ise sipatut ngalemi salah manusia. Memang harus siteh lebe, ibas Matius ngataken salah e berarti dosa. Jadi ibas konteks Matius, khususna ibas pertoton Tuhan, salah bali ras dosa. Emaka salah manusia simerupaken dosa e Dibata ngenca sibanci ngalemisa, la lit sideban. 2. Dosa eme kegagalan ngelakoken kern simehuli ras benar siiperintahken Tuhan. Bagepe dosa eme sada pemberontaken nandangi pemerintahen Tuhan. Erkiteken sie kalak sierbahan dosa berarti ia lanai patuh man Tuhan, alu bage ia harus ihukum. Penghukuman enda patut ialoken manusia erkite-kiteken manusia merupaken tinepaNa, manusia eme sikerajangenNa. Bagepe dosa mpedauh kita ibas pasu-pasu Tuhan nari. Enda me si ola seh man banta manusia. 3. Isamping sie erkiteken Dibata badia, maka anak-anakNa pe harus badia, emaka kebadiaan e Dibata kap simerekenca. Alu bage ajar-ajar isingetken gelah harus tetap nggeluh ibas kebadiaan. Ipihak sideban iajarken Yesus ka man ajar-ajarNa kerna kiniteruken ukur ras pang ngakuken salah man Bapa (Dibata). Alu bage ajar-ajar nggejapken kepeken ia enggo erdosa ras la kap metunggung i lebe-lebe Dibata. 4. Siimaksudken Yesus gelah ajar-ajar badia i lebe-lebe Tuhan, labo berarti terjeng ngelitken relasi ras Tuhan saja, tapi harus pe teridah ibas relasi ras sapih-sapih manusia. Erkiteken sie me ibas pemindon gelah Dibata ngalemi salah/dosa ajar-ajar, maka sipaling pentingna kal ajar-ajar harus lebe nggit ngalemi salah kalak siibahan kala kempak dirina. 5. Ibas ajar-ajar nggit ngalemi salah kalak berarti enggo kap nggeluh perkuah ate ibas pusuh ajar-ajar. Emaka relasi antar manusia tetap terjaga. Lebih asangken sie, ajar-ajar Yesus enggo terhindar ibas biak egois ras nggit ngukum kalak, sebab penghukuman hanya hak Tuhan. APLIKASI Secara emosi banci sikataken paksa manusia sipemena (Adam ras Hawa) ndabuh ku bas dosa seharusna min Dibata nasapken ia duana, jenari njadiken manusia simbaru. Tapi perukuren manusia berbeda ras Tuhan. Ate Dibata manusia singgo ndabuh ku bas dosa e nggejapken kerna keberdosaanna, janah ngakuken dosa man Tuhan, kenca sie ngadi ibas perbahanen dosa-dosa nari, emaka teridah manusia e tinepa Dibata simehuli. Perkuah ate Dibata sinelamatken kita ibas dosa nari teridah ibas diri Yesus Kristus. Yesus Kristus nggit ngasamken kesahNa guna nebusi dosa-dosanta. Alu bage seharusna kita nggeluh ibas keriahen ukur ras tetap ngayuken perkuah ate Tuhan e arah ndalanken kai singena ateNa. Tapi siterjadi la bage. Nterem denga kita sitetap ndalanken kai sila ngena ate Tuhan. Padahal perbahanen sibage peturah penghukuman man banta. Dosa tetap ngelangketi pusuh ras peratenta. Kesah Si badia siseharusna nggeluh ras ngerajai pusuh ras peratenta, tempa la nai lit inganna. Erkiteken sie me biak egois ras nggit subuki sijahat alu sijahat jadi bagin kegeluhenta. Ibas kegeluhenta tempa la nai lit perkuah ate, emaka la kita ngasup ngalemi salah kalak, bagepe siambil alih dahin Tuhan guna ngukum kalak sierbahan salah kempak kita. Sekali enda kita isingetken maka jadilah anak-anak Dibata simehuli ras tetap ndalanken kai sibenar i lebe-lebe Dibata. Memang sisadari ibas kita nggeluh i tengah-tengah doni enda banci saja sadar ntah pe la sadar kita enggo ngelakoken kai si la ngena ate Tuhan. Emaka penting man banta guna nggejapken kerna salah ntah pe dosanta e i lebe-lebe Tuhan. Bagepe sigejapkenlah adi la isampati Tuhan kegeluhenta maka sia-sia me kegeluhenta i bas doni enda. Emaka alu meteruk ukur ras pang, mari siakuken dosa ras kesalahenta man Tuhan. Janah pindolah gegeh man Tuhan gelah iberekenNa man banta kengasupen guna tetap nggeluh metunggung i lebe-lebeNa. Termasuk i je kita ngasup ngalemi salah kalak kempak kita. Ula kita sangsi adi kita ngakukenca alu meteruk ukur maka Dibata si perkuah ate e nggit ngalemi salah ras dosanta. Emaka alu bageme kita tetap bersih ras badia i lebe-lebeNa. Pdt. Steven Kumenit, STh, M.Min.

Bereken Min Man Kami Nakan Cukup Ibas Wari Si Sendah Enda (Matius 6:11).

BAHAN PEKAN DOA GEREJA GBKP WARI IV. RABU 26 SEPTEMBER 2012. ================================= Introitus : Enggo iperentahken TUHAN maka sekalak-sekalak kam pepulungca asa iperlukenndu, dua liter man tep-tep anggota keluargandu (Keluaren 16:16). Ogen : Keluaren 16: 9-26. Khotbah : Matius 6:11. Tema : Bereken Min Man Kami Nakan Cukup Ibas Wari Si Sendah Enda. LATAR BELAKANG 1. Pengajaren Yesus man ajar-ajarNa bage man jelma sinterem i datas uruk salah sada eme uga ertoto alu payo, janah enda merupaken sada kritik man kalak Parisi silanai mperdiateken kuga situhuna ertoto alu payo, sebab adi kalak Parisi ertoto tujunna uga gelah iidah kalak ia sekalak sibeluh ertoto ras patuh ndalanken jam-jam ertoto. Bagi siteh ibas ibadah kalak Yahudi, lit jam-jam ertoto eme jam 9 pagi, jam 12 ciger ras jam 15 karaben. Ibas jam-jam ertoto enda me, kalak Parisi la mperdiateken kerna paksa i ja ia ntah pe sangana i ja ia, sipenting bas ia adi nggo seh jamna, i je me ia ertoto, tapi motivasina pekulah-kulah nge ngenca. 2. Ibas pengajaren Yesus kerna ertoto, la saja penekanenna kerna Dibata ras Kinirajaan Surga/Dibata, tapi si la kalah pentingna ibas kegeluhen manusia eme kern keperlun nakan. Penekanenna i jenda, ate Yesus gelah kalak sitek pelin-pelin nggeluh ibas ketergantungen man Tuhan saja, ras meteh maka Dibata e eme Dibata siperdiateken kegeluhen manusia. Enda banci siidah ibas sejarah bangsa Israel uga Dibata mereken manna man bangsa Israel sangana bangsa Israel sangana erdalan ibas taneh simesawang (band. Kel. 16:15-18). Bagepe ibas keleng ateNa e, Dibata pe mereken nakan man perik (band. Lukas 12:24 ). 3. Nterem kalak Parisi sindabuh ku bas dosa erkiteken pangan ras inemen. Kalak Parisi e teridah nge tempa tutus beragama, tapi kegeluhenna tep-tep wari ndalanken penindasan erkite-kiteken pangan ras inemen. Pengajaren kerna pertoton Tuhan enda, ate gelah kalak sitek/ajar-ajar Yesus ula bage, tapi nggeluhlah ibas pemindon man Tuhan, sebab kalak simindo pasti ibereken Dibata. 4. Pengajaren ibas pertoton enda, khususna kerna keperlun nakan cukup ibas wari si sendah enda, labo berarti ate Yesus gelah kalak sitek nggeluh ibas “pas-pasan” ngenca, tapi justru ate Yesus gelah ajar-ajar Yesus banci tetap nggeluh ibas ketergantungen man Yesus tep-tep wari. 5. Isamping sie iidah Yesus maka nggeluh ibas “berkelebihan” lit bahayana adi la ernalem man Tuhan. Kerna sienda kalak Yahudi enggo metehsa, sebab lit pengajaren ibas bangsa Israel kerna nggeluh ibas “berkecukupen” (band. Kuan-kuanen 30:8-9). Kalak Yahudi tetap nge banci jadi kalak bayak. Sebab Dibata la pernah ngelarang kalak Jahudi jadi kalak bayak. Siilarang Tuhan ula kal erkiteken enggo sidat kern kai siateta sipan, bagepe kebayaken enggo ertambah-tambah, ula kal lupaken man Tuhan (band. Kel.8:12-14). APLIKASI Adi kita ngerana soal pangan, berarti kita ngerana soal kebutuhen primer, berarti sada hal sipenting ibas kegeluhenta. Tapi siidah erkiteken ndatken si man pangan nterem kalak kristen ndabuh kubas dosa. Memang sedekah kita nggeluh ibas doni enda, pangan merupaken sada kebutuhen sila terhindarken kita. Tapi labo berarti kegeluhenta pelin-pelin itentuken pangan saja, sidungna alu erbage cara, termasuk cara silamehuli sihalalken, tentu enda si la banci. Tapi marilah sinen kerna eksistensinta selaku anak-anak Dibata. Tentuna la lit sekalak Bapa pe simereken nipe man anakna, adi ipindona nurung (band. Matius 7:10), bagepe Bapa sinisurga, iberekenna man banta kai siipindo kita, sebab la bo ate Dibata kita mate erkite-kiteken nakan ngenca. Cuba sinen kerna bangsa Israel ibas perdalanenna i taneh mesawang, ibereken Dibata manna man bangsa Israel gelah tetap nggeluh, bagepe kita. Emaka sipaling penting bas kita nggeluhlah ibas ketergantungen man Tuhan saja, gelah iberekenna man banta kai siiperluken kita. Bagepe ibas pertoton enda kita iajari gelah ula kita merangap, sebab adi kita meranggap banci nirangken kita ras Tuhan. Pindolah kecukupen ibas wari sisendah enda gelah pasu-pasu Tuhan tetap nggeluh bas kita, emaka tep-tep wari kegeluhenta icukupkenNa. Pdt. Steven Kumenit, STh,M.Min.

Reh Min KinirajaanNdu, Sehlah Min PeratenNdu Bas Doni Enda Bagi ni Surga (Matius 6:10)

BAHAN PEKAN DOA GEREJA GBKP WARI III. SELASA 25 SEPTEMBER 2012. ===================================== Introitus : Genduari adi iikutkenndu Aku janah ipatuhindu perpadanenKu e maka kam jadi bangsangKu. Kerina doni enda Aku empuna, tapi kam me jadi bangsa pilihenKu (Keluaren 19:5). Ogen : Keluaren 19:1-25. Khotbah : Matius 6:10. Tema : Reh Min KinirajaanNdu, Sehlah Min PeratenNdu Bas Doni Enda Bagi ni Surga. LATAR BELAKANG. 1. Kerajaan Surga/Dibata eme kerajaan i ja Dibata sijadi peminpinna, ras kerina “masyarakatna” harus patuh man Raja Surga e. Sipat ras kepemimpinan Dibata berbeda kal ras sipat kerajaan ibas doni enda. Adi Kerajaan Sorga/Allah bersipat pembebasan totalitas geluh manusia, la saja “jiwa ras Roh” manusia tapi pembebasan ibas kuk perhambaan dosa/iblis, kesembuhan ibas pinakit nari, rsd. Erkiteken sie Kerajaan Surga/Dibata berbeda ras kerajaan si lit ibas doni enda. 2. Ibas pertoton siiajarken Yesus man ajar-ajarNa, salah sada isina eme kerna kerajaan Sorga/Allah. Enda iajarken gelah ajar-ajar meteh kerna Kerajaan Surga/Dibata e merupaken inti pemberitaan Yesus. Ibas pertoton Tuhan enda penekanan kerna Kerajaan Surga/Dibata menyangkut ku bas keselamatan manusia ras doni enda, isamping sie Kerajaan Surga/Dibata sipatna maba pembebasan ras sada kerajaan si la ermasap-masap. 3. Kerajaan Sorga banci seh ibas doni enda adi ajar-ajar, termasuk kalak sitek lanai nggeluh ibas sura-sura daging, ntah pe nggeluh erbana-bana. Erkiteken sie me hal sipenting ibas kinirajaan Surga/Dibata eme uga peraten Tuhan banci ipatuhi. Ajar-ajar isuruh gelah ngikuti peraten Tuhan. Adi enda terjadi maka Kinirajaan Sorga/Allah enggo seh. Kinirajaan Surga/Dibata banci gejapken ras teridah adi kegeluhen ibas doni enda nggeluh ibas kedamen, kebenaren, keriahen, kemalemen ate, ras lit kekelengen, rsd. 4. Pengajaran kerna kinirajaan Surga/Dibata, menyangkut kegeluhen situhu-tuhu si lit bas diri Yesus, emaka ise siatena nggeluh ibas kinirajaan Surga/Dibata e siutamana kal eme ngaloken Yesus selaku Mesias. I je me situhuna uga pentingna ngikutken peraten Tuhan. Sebab adi la kita ngasup ras la siangkai kerna kinirajaan Surga/Dibata si lit bas diri Yesus Kristus maka ajar-ajar Yesus la banci bengket ku bas kinirajaan Surga/Dibata e. Sebab ibas Yesus Kristus lit kap kegeluhen, kedamen, keriahen ukur ras kemalemen ate, rsd. 5. Ibas pengajaren Yesus enda simerupaken sada pemindon gelah Kinirajan Surga/Dibata e tuhu-tuhu seh dingen nggeluh ibas doni enda. Bagepe iajarken Yesus kerna Kinirajaan Surga/Dibata siberbeda ras kinirajaan doni enda, emaka pengajaren ibas pertoton enda sekaligus meneken anggapan ibas masyarakat sinterem, termasuk ajar-ajar Yesus sierpengakap kinirajaan siibaba ras sibakal ipanteki Yesus e bali ras kinirajaan ibas doni enda. APLIKASI Ibas pertoton Tuhan, singgo jadi bagin ibas pemindonta e, berarti idatken sada kesimpulan maka Kinirajaan Surga/Dibata e sangana ibas proses pembentukan. Kinirajaan Surga/Dibata banci seh ku bas doni enda adi kita selaku anak-anakNa nggit ndahikenca. Memang nai Kinirajaan Surga/Dibata e tuhu-tuhu enggo lit ras nggeluh ibas doni enda, tapi erkiteken manusia ndabuh ku bas dosa maka kinirajan Surga/Dibata e lanai teridah man manusia. Seh genduari iblis tetap erdahin ibas doni enda guna naluken Kinirajan Surga/Dibata. Kita sijadi pelaku Kinirajaan Surga/Dibata h harus tetap rusaha gelah Kinirajan Surga/Dibata e seh ibas doni enda, emaka sipaling penting man banta uga maka peraten Tuhan banci sidalanken, la bo peratenta sidalanken. Kepatuhan ndalanken peraten Tuhan ibas kegeluhenta berarti ngasup kita naluken kerina tipu muslihat iblis. Ibas kita ndalanken enda berarti la lit nari kuasa siblis singkuasai dirinta ras doni enda. Memang labo nukah ndalanken sienda, tapi adi patuhlah kita ibas peraten Tuhan, maka Tuhan pasti mpengasup kita guna ndalanken kai singena ateNa. Kita enda genduari bagi Musa eme jadi alat Tuhan bas doni enda, emaka kita enda la banci sinik saja, sebab tanggung jawab kegeluhen ibas dame ras kemalemen ate enggo ibereken Tuhan man banta selaku anak-anakNa . Emaka pesehlah berita keselamaten enda man doni e gelah Kinirajaan Sorga banci nggeluh ibas doni enda. Pdt. Steven Kumenit, STh, M.Min.

GelarNdu Ipebadia Min (Matius 6:9b).

BAHAN PEKAN DOA GEREJA GBKP WARI II, SENIN 24 SEPTEMBER 2012. ===================================== Introitus : Silebuh-lebuhen ia nina, "Badia, badia, badia! TUHAN si Mada Kuasa badia kap! Doni enda dem alu kemulianNa (Jesaya 6:3). Ogen : Keluaren 29:42b-46. Khotbah : Matius 6:9b. Tema : GelarNdu Ipebadia Min. LATAR BELAKANG 1. Salah sada bagin siiajarken Yesus ibas pertotonNa eme GelarNdu Ipebadia Min. Penekanen siutama eme labo sekedar gelah ajar-ajarNa mpebadiaken gelar Dibata, tapi memang Dibata e sendiri Badia. Emaka la banci nggelari Dibata alu “sembarangen”, ntah pe la sepatutna, sebab kalak singgelari alu sembarangan erdosa kap ia (band. Kel. 20:7; Imamat 24:16). 2. Man bangsa Israel gelar eme sada hal sipenting sincidahken ise kin ia. Jadi gelar la terjeng “panggilan” tapi ncidahken karakter ras eksistensi gelar e sendiri. Gelar Dibata Badia kap, erkiteken sie me bangsa Israel la melantang adi nggelari gelar Dibata, emaka rusur igantiken alu melasken kata adonai. 3. Amin gia ibas pertoton Dibata igelari Bapa, labo berarti ajar-ajar Jesus banci rate-ate, Tapi harus tetap njaga kebadiaan Dibata. Dibata harus ipebadiaken. Maksudna ibas kegeluhen ajar-ajar Dibata e harus ihamati ras imuliaken alu cara nggeluh alu badia ka. Enda itekanken sebab ajar-ajar enggo nggeluh ibas sada ikaten keluarga ras Dibata. Jadi ibas kerina dampar kegeluhen ajar-ajar kebadiaan Dibata harus tetap terjaga. 4. Ibas njaga kebadiaan Dibata selaku Bapa la banci lit keegoisan, sebab adi ajar-ajar nggeluh ibas keegoisan maka terkontaminasi me kebadiaan Dibata e. Sebab ajar-ajar lanai mpermuliaken Dibata ras nghamati Dibata, tapi siihamatina eme dirina sendiri. 5. Alu mpebadiaken gelar Dibata maka terjadi me kepatuhan ras penembahen si tuhu-tuhu, la saja ibas kebaktin formal tapi pe ibas kegeluhen tep-tep wari. Sebab paksa sie kalak Yahudi ntah pe Farisi ncidahken kerna kepatuhan si la tuhu-tuhu, enda teridah ibas ia patuh ersembah, tapi kegeluhenna dem alu “kemunafikan”. Ibas pertoton Yesus enda kerina kemunafikan harus iagui, sebab ajar-ajar harus pebadiaken gelar Yesus subuk arah kata bagepe perbahanan. APLIKASI Pertoton siiajarken Yesus la terjeng ihafalken ntah pe sekedar jadi tanda maka ajar-ajar e eme ajar-ajar Yesus, tapi harus icidahken ibas kegeluhen ajar-ajar termasuk kita genduari. Janah hal sipaling penting siperlu iperdiateken ibas pertoton ras kegeluhen eme kebadiaan gelar Dibata. Kebadiaan Dibata harus teridah arah kita nghamati ras mpermuliaken Ia ibas kerina eksistensi geluhta (band. Maz.34:4). Ibas erti kata ibas pertoton ras ibas kegeluhenta tep-tep wari kita harus mperdiateken “nama baik” Dibata. Sebab adi enda la sidalanken maka kita erdosa man Tuhan. Ibas kita mpebadiaken Tuhan, berarti pe kita nggeluh ibas kebadiaan. Jadi penungkunen man banta uga carana kita mpebadiaken Dibata e. 1). Ula terjeng siteh maka Dibata e Badia, tapi harus teridah ibas karakterta. 2). Tutus ersembah man Tuhan ras dalanken kai singena ateNa. Tutus ersembah man Tuhan eme uga kita banci njagai kepribadiaanta bagepe njaga kebadiaan ibas rumah pertoton (gereja), sebab tek kita maka ibas rumah pertoton Dibata ringan i je, emaka la banci kita rate-ate dingen sombrona ibas rumah pertoton (gereja) e. 3). Jaga kebadiaan sienggo ibereken Tuhan man banta arah Yesus Kristus i kayu persilang. Ibas kegeluhenta sibage me maka Dibata sibadia e enggo sipebadiaken ibas kegeluhenta tep-tep wari, alu bage Dibata e tetap nggeluh ras kita. Pdt. Steven Kumenit, STh, M.Min.

Ku Ise Nge Kita Ertoto (Alamat Doa) - Matius 6:9a.

BAHAN PEKAN DOA GEREJA GBKP WARI 1, MINGGU 23 SEPTEMBER 2012. ===================================== Introitus : Pertoton kalak bujur ergegeh kal (Jakup 5:16b). Ogen : Jakup 5:13-20. Khotbah : Matius 6:9a. Tema : Ku Ise Nge Kita Ertoto (Alamat Doa). LATAR BELAKANG 1. Ibas zaman Tuhan Yesus kalak Yahudi erpengakap hal ertoto merupaken sada kewajiban agama. Erkiteken pemahaman sibage me, khusus kalak Parisi ibas ia ertoto icidahkenna kiniganjangen ukurna. Ija ertoto ia alu nggedang gelah iidah kalak ia sekalak sibeluh ertoto. Bagepe ibas budaya agama Yahudi lit kap jam-jam ertoto eme jam 9, jam 12 ciger ras jam 15 karaben, itambah ka pertoton ope man. 2. Ibas pertoton e lit rumusen-rumusenna (rumusan pertoton sienggo baku), Tapi lit ka pertoton permohonan sibebas. Ibas pertoton sibebas enda me, kalak Yahudi meteh maka banci ia nambahken kalimat-kalimat toto e. Jam-jam ertoto e bertepaten ka ras kalak Yahudi (Parisi) beraktivitas, Tapi adi nggo seh paksana jam ertoto, tupung ijapape ia, apakah sangana ia lit isimpang-simpang dalan, sangana i ipajak rsd, ije ka me ia ertoto. Kepeken enda kerina idalanken terjeng nehi kewajiban jam ertoto ngenca, janah guna ncidahken maka ia kalak si “badia”. 3. Perbahanen sibage me si la ngena ate Yesus emaka iajarkenNa me uga seharusna ertoto man ajar-ajarNa. Pengajaren Yesus enda sekaligus mengkritik pertoton siibahan kalak Yahudi e. 4. Ibas ertoto siharusna ihindari eme turahna kiniganjangen ukur (sombong), ntah pe motivasi guna memamerkan diri ibas ertoto. Sebab pertoton siisehken guna ndarami pujian manusiawi, e labo ertoto gelarna. 5. Tapi ibas sipentingna ibas ertoto eme lit kiniteruken ukur ras lit ibas ketenangen (keheningen). Bagepe adi ertoto harus min jelas tujunna. Maksudna man ise kin kita ertoto. Sebab ibas doni enda melala kal dibata. Tapi adi kalak si tek ertoto siitujuken eme man Dibata sitading ibas Surga. Emaka man baNa me tujun pertoton e isehken. Sebab Bapa Sini Surga e me sinjadiken langit ras doni enda ras isina kerina, bagepe sinjadiken manusia. Bagepe Dibata sinisurga eme kap Dibata simada kuasa, simelebihi kuasa-kuasa Dibata siapai pe si lit ibas doni enda. Guna banci ertoto alu mehuli maka iajarken Yesus adi ertoto harus lit kosentrasi gelah la lit sigangguisa, emaka ertotolah ku bas kamar. Bagepe haruslah siteh pertoton siiajarken Jesus enda erkiteken litna pemindon ajar-ajarNa (band. Lukas 11:1). Sebab lit sada trend tupung sie, sekalak guru harus ngajarken sada rumusan pertoton siberbeda ras guru-guru sidebanna. Janah enda pe jadi “pengenalan” tersendiri. Jadi arah pertoton enda kalak banci meteh maka ia ibas kelompok enda nari ntah pe sienda kap guruna. APLIKASI Ibas Pertoton siijarken Jesus man ajar-ajarNa, kita pe iajarken ntah pe ipersingeti maka adi kita ertoto harus jelas tujunna, ntah pe ku ise kita ertoto. Sebab pertoton e merupaken sada hubungan pribadi ras siisembah kita. Isamping sie pertoton merupaken sada bentuk pengataken bujur ras sarana/alat guna kita banci mindo kai siibutuhken kita. Bagepe ibas pertoton enda ate Dibata gelah kita ersembah man sada Dibata saja, eme Dibata siigelari kita Bapa. Kita nggelari Bapa man Dibata erkiteken Yesus Kristus. Erkiteken Yesus Kristus me kita nggo jadi keluarga Dibata, si nai kita enggo sirang erkiteken dosanta. Tentuna selaku Bapa, kai sitotoken ntah pe sipindoken anak-anakNa (kita) ibegikenNa kap, janah iberekenNa sue ras peratenNa. Emaka situhuna merupaken sada keriahen nge man banta erkiteken lit Bapanta sitetap mperdiateken kita. La saja kern sie, kita selaku kalak sibenar erkiteken ndalanken sura-suraNa ndatken sada jaminen eme kerna penampat Tuhan. Emaka amin gia kita ndatkenken perbeben ras kiniseran tapi adi kita erlebuh man Tuhan selaku Bapanta, pastilah ialoniNa ras isampatiNa. Isamping sie adi kita ertoto guna kalak sideban, e pe banci iperdiatekn Tuhan, sebab pertoton kalak benar tuhu-tuhu ergegeh kal. Pdt. Steven Kumenit, STh,M.Min.

Palas Persadan Eme Keleng Ate Tuhan (Johanes 17:22-23)

BAHAN PJJ GEREJA GBKP
TANGGAL 16-22 SEPTEMBER 2012.
=================================
JOHANES 17:22-23.

Tema : Palas Persadan Eme Keleng Ate Tuhan.

LATAR BELAKANG
1. Sijadi oratenta eme bagin sila terpisahken ibas pasal 17, janah enda merupaken pertoton Jesus man BapaNa sinisurga ope denga Jesus mate. Bagepe pertoton enda banci ibagi jadi telu bagin simbelin eme 1). Ayat 1-5, pertoton Yesus guna dirina sendiri. 2). Ayat 2-19, Pertoton Yesus guna ajar-ajarNa. 3). Ayat 20-26, Pertoton Yesus guna kerina kalak sitek (gereja).
2. Jesus ertoto man BapaNa si nisurga sebab enggo iidah Yesus kerna kematen ras kekekenNa, bagepe kenangkihenNa ku Surga, maka tantangen man kalak si tek erberatna, amin gia iblis enggo italuken Jesus, tapi tetap denga iblis gawah-gawah guna ncubai ras naluken kalak si tek, gelah kalak sitek lanai ersembah man Yesus Kristus.
3. Kuasa iblis banci italuken, adi kalak sitek nggeluh ibas persadan kekelengen. Sebab ibas persadan kekelengen ije nggeluh kuasa Kesah si Badia. Gegeh Kesah si Badia banci mereken serpang pulah ras nehken berita si Meriah nandangi doni enda. Emaka persadan kalak si tek cukup penting.
4. Ulih kematen Jesus labo saja guna bangsa Jahudi, tapi guna kerina bangsa ras guna kerina kalak si tek, bagepe guna ndilo ras mpersadaken anak-anak Dibata simerap i belang-belang doni. Janah nggeluh persadan enda, la saja terjadi secara horisontal, tapi pe secara vertikal, janah persadan enda mencerminken persadan Jesus ras Bapa. Ibas persadan erpalasken kekelengen, sincidahken nggeluh sikeleng-kelengen, sibanci iidah doni, enda kerina erkiteken Tuhan simpersadakenca. Ibas kuasa kekeken Jesus Kristus. Alu bage tek doni enda maka Jesus Kristus eme persuruhen Dibata. Gagasan enda icidahken Yohanes, sebab lit kelompok (gnostik) si la tek man Jesus Kristus selaku persuruhen Dibata, ntah pe Dibata si enggo jadi manusia (band. Yohanes 1:1-18). Kelompok gnostik silebih menekankan kerna pemeteh, emaka man kalak enda labo banci Dibata jadi manusia, ntah Yesus Kristus isuruh Dibata guna nelamatken doni enda.
5. Yesus Kristus la saja notoken kerna persadan kalak si tek, tapi pe kemulian sienggo ibereken Tuhan man kalak si tek e tetap nggeluh amin gia lit perbeben ras percuban erkiteken iblis, emaka kerina kalak si tek pagin banci nggeluh ras Yesus ibas Surga.

APLIKASI
Lit sada perbedaan sicukup prinsipil antara persadan ibas gereja ras persadan i darat gereja. Persadan ibas gereja lit erkiteken keleng ate Kristus. Maksudna erkiteken kematen ras kekeken Kristus, bagepe erkiteken pendilo Tuhan nge maka terbentuk me persadan. Erkiteken sie me salah sada tugas gereja eme ncidahken persadan. Persadan si enggo lit bas kita, la saja persadan antara sapih-sapih kita manusia tapi pe kita ras Tuhan. Erkiteken persadan e erpalaskan ibas keleng ate Tuhan maka siharus lit bas kita eme kekelengen. Kekelengen enda harus tuhu-tuhu murni, emaka terjadi me ibas persadan e nggeluh sisikeleng-kelengen ras sisampat-sampaten. Enda me simbedaken persadan si lit i darat gereja. Persadan i darat gereja terjadi erpalaskan kebutuhen ras sura-sura manusia, erkiteken sie me rusur terjadi la siangkan, perubaten ras perpecahan ibas persadan e.
Kegeluhen persadan i darat gereja e, justru nggo ka nggeluh ibas persadan i tengah-tengahta selaku gereja singgeluh. Sijadi penungkunen engkai maka banci bage ? Enda jadi erkiteken 1). Kurang paguh persadanta e. 2). Terpengaruh kita ibas ajaran persadan si idarat gereja. 3). Lenga paguhsa persadanta ras Jesus Kristus. 4). Merampek denga kinitekenta. 5). Sura-suranta saja siiukuri. 6). Lenga siangkan ibas erti persadan situhu-tuhu e.
Adi ateta nggeluh ibas persadan simehuli janah erpalasken keleng ate Kristus maka kita harus paguh erkiniteken man Jesus Kristus, ras siangka min kai erti persadan e. Erti persadan situhu-tuhu eme kita banci nggeluh selaku sada kula, emaka la ateta ncedai ras erbahanca dagingta enda mesui. Janah sipahami min persadanta e erpalasken keleng ate. Alu bage geluh persadanta e guna kemulian Tuhan.

Pdt. Steven Kumenit, STh,M.Min.

Jadilah Kam Bayak I lebe-Lebe Dibata (Lukas 12:13-21).

BAHAN PJJ GEREJA GBKP
TANGGAL 9 – 15 SEPTEMBER 2012.
================================
Lukas 12:13-21.

Tema : Jadilah Kam Bayak I lebe-Lebe Dibata.

LATAR BELAKANG.
1. Tupung Yesus ngerana man jelma sinterem, sekalak ibas jelma sinterem ngenarana man Jesus gelah Jesus banci ndungi/ngerunggui perkarana eme kerna erta tading-tadingen bapana, tapi Yesus la nggit. Situhuna mbelin kal pengarapenna man Yesus guna ndungi perkarana e, sebab enggo lit piga-piga dalan siitempuhna, tapi kerina e la berhasil. Tapi erkiteken idahna lit wibawa Jesus kerna sie, maka ipindona man Yesus guna ndungisa.
2. Ibas kalangan Jahudi peraturan-peraturen ntah pe kerna hukum warisan jelas iatur ibas hukum agama sierpalasken pustaka si badia (Ul.21:15-17; Bil. 27:8-11). Emaka adi lit perubaten ntah kai gia, biasana kalak Jahudi ndilo sekalak guru agama/ahli taurat (rabi) guna ndungi perkara e.
3. Persoalenna labo Yesus la nggit ndungi perkara e, tapi lit iidah Yesus kerna perkara si lebih mbelin asangken soal erta eme kerna keselamaten guna doni enda ras isina kerina. Emaka ilanjutken Yesus pengajarenna man jelma sinterem alu makeken perumpamaan si khusus ngerana kerna kalak bayak.
4. Ibas perumpamaan enda penekanen Yesus eme erta la bo lit gegehna guna mereken keselamaten man diri manusia, sebab kegeluhen manusia Dibata singaturkenca. Ibas erti kata erta si melala labo mereken kuasa kai pe man manusia ibas kegeluhenna ras labo banci menjamin manusia guna ndatken rasa aman ibas geluhna.
5. Perumpamaan enda, merupakan sada kesimpulan singataken erta labo milik pribadi manusia. Emaka ipersingeti Yesus jelma sinterem. Ibas erti kata erta labo merupaken sikerajangen manusia sibanci ikuasaina, tapi harus siangka erta e “milik” Tuhan, siititipkenna man manusia. Jadi kai siidatken manusia eme sebage pinjamen ngenca (hak pakai) ibas Dibata nari. Janah ise singangkai kerna palas sibage me maka tetap ia ngataken bujur man Tuhan dungna makekenca bagi singena ate Tuhan. Kalak sibage me siikataken bayak i lebe-lebe Tuhan.

APLIKASI
Erta ibas kegeluhenta cukup penting. Tapi selaku kalak kristen harus sinen erta e la mbaba kita ku bas keselamaten, sebab erta e sendiri la bersipat kekal. Bagepe banci saja erkiteken erta kegeluhenta i lebe-lebe Dibata la nai berarti, kita banci sirang ras Tuhan. Memang secara doni, erta doni banci nampati kita guna ndatken kai siisura-suraken kita. Tapi pe erkiteken erta banci ka kita imusuhi kalak sideban, sirang perkade-kadenta. Erkiteken sie me Tuhan Jesus mengkritik ise saja sierpengakap maka erta e banci “melindungi ras mereken kegeluhen situhu-tuhu” man bana (nen = oratenta). Adi bage salah kin adi sipepulung ertanta ibas doni enda ras jadi kalak bayak. Lang. Sisalah eme adi kita tuhu-tuhu enggo ernalem man erta e pelin-pelin ibas kegeluhenta si tep-tep wari. Sebab perlu siteh erta e pemere Dibata kap. Adi erta jadi penalemta, maka erta e nggo jadi “Mamon”(nen = dewa).
Erta doni cukup penting bas kegeluhenta, tapi sipaling penting bas kegeluhenta enda eme erta Surga. Ertkiteken sie me nina Jesus : pepulunglah ertandu i Surga, sebab erta surga la banci ipan ngetnget ras tembesi (nen = kekal). Bagepe sijadi penungkunen man banta uga caranta pepulung erta surga ras uga bentukna erta surga e ? Jesus mereken sada masukkan man banta eme ndaramilah kinirajaan surga maka sidebanna itambahkenna man banta (band = Lukas 12:31). Bagepe nina Paulus : kalak kristen eme ahli waris Kerajaan Surga (Roma 8:17). Situhuna I jenda me palasna kita banci meteh maka kita harus nggeluh ibas Kinirajaan Surga. Alu bage sipaling penting man banta ndarami lebe erta-erta Surga. Adi lit pengangkan sibage maka la perlu aru ateta nggeluh ibas doni enda, sebab ibas mpepulung erta-erta surga e maka pasu-pasu Tuhan maler man banta. IjayamNa kegeluhenta, emaka kita banci nggeluh. Bagepe la perna ibereken Tuhan kemalun man banta, sedekah kita nggeluh ras Ia. Uga carana gelah sidat erta surga e. Sipemena eme siteh lebe ras siangkai min maka Tuhanta e dem alu kebayaken ras ibas Tuhan ngenca lit kegeluhen situhu-tuhu. Sipeduaken : Geluhta harus tetap ernalem man baNa. Sipeteluken : Dalanken kai singena ate Tuhan eme kekelengen, kedamen, sisampat-sampaten, pedauh biak merangap bas kita nari, rsd. Sebab ibas kita ngelakoken sibage maka kita nggo bayak i lebe-lebe Tuhan.

Pdt. Steven Kumenit, STh,M.Min.

Kerina Kalak Si Tek Bali I Lebe-Lebe Dibata (Perbahanen Rasul-Rasul 10:27-35)

BAHAN PJJ GEREJA GBKP
TANGGAL 2 – 8 SEPTEMBER 2012.
===============================
Perbahanen Rasul-Rasul 10:27-35.

Tema : Kerina Kalak Si Tek Bali I Lebe-Lebe Dibata

LATAR BELAKANG.
1. Sijadi oratenta sendah, harus sipahami ibas ayat sada nari, sebab arah Kornelius si pendahinna tentera, sekalak kapten ibas tentera Romawi, sekalak si labo kalak Jahudi dat pengenehenen sorgawi (ilahi).
2. Kornelius ndatken pengenehenen erkiteken tek ia man Tuhan, amin gia ia labo kalak Jahudi, janah perbahanenna mehuli, isampatina kalak siperlu man sampaten (ayat 2).
3. Petrus selaku kalak Jahudi, lit denga bas ia konsep maka sekalak kalak Jahudi la banci bengket kubas rumah si labo kalak Jahudi, tapi erkiteken persuruhen Dibata arah pengenehenna, maka iikutkenna. Seh i rumah Kornelius, maka ikataken Kornelius me kerna kejadin si lit, maka minter iteh Petrus kerna sura-sura Tuhan nandangi kalak si labo kalak Jahudi.
4. Pemahaman sedekah enda, kalak Jahudi ngenca siialoken Tuhan. Kalak Jahudi saja nge siiprioritaskan Tuhan. Tapi kenca idahna kerna Kornelius ras perbahanenna, maka minter Petrus ersaksi sekaligus ngataken man Kornelius kerna kecibal manusia i lebe-lebe Tuhan. Kerina manusia seri ilebe-lebe Tuhan, janah ise saja sierbahan simehuli singena ate Tuhan ialoken Dibata me ia.
5. La bo kap erdobahen manusia i lebe-lebe Dibata. Bagepe ipertegas mulihi kerna Yesus Kristus selaku Tuhan simperdameken kerina jelma, janah Yesus Kristus eme Tuhan sierkuasa ibas sinasa lit, termasuk situhuna dibata sisedekah enda isembah Kornelius. Enda ikataken Petrus gelah Kornelius tek secara totalitas.

APLIKASI
Lit dua hal sibanci jadi palas man banta guna meteh maka kita enda seri kerina i lebe-lebe Tuhan. Sipemena : Kita ijadiken Tuhan ibas sada bahan eme ibas abu taneh nari, janah mehuli kerina, ietepaNa seri ras tempas Dibata/Imago Dei (band. Kej. 1:26; 2:7). Sipeduaken : Tuhan mereken keselamaten man kerina kalak si tek man baNa (band. Joh.3:16). Tapi ibas kinatana kegeluhenta teridah lit diskriminasi kegeluhen. Diskriminasi enda jadi erkiteken kita ngenen arah bentuk jasmani ngenca (SARA). Ibas palas enda me maka siterjadi manusia lanai siangkan ras rubat. Situhuna diskriminasi enda rusur sijumpai i doni enda, tapi genduari enggo bengket ku bas kegeluhen bergereja, sierbahanca pelayanan gereja pe terganggu.
Adi ngenen kerna pendilo kita selaku gereja, maka i je sidapeti kita kerina idilo Tuhan guna banci ngelai ras-ras, kita enda jadi pancur Tuhan guna nehken keselamaten man manusia ras doni enda. Emaka sipaling penting bas kita gelah kita banci nggeluh berdampingan ntah pe nggeluh harmonis sada ras sidebanna, kita harus ngangkai kerna tanggungjawab ras-ras. Ibas kita meteh kerna keterpanggilan ras tanggungjawab maka tentuna kita nggo meneken keegoisan ras perasaan curiga nandangi kalak sideban.
Memang sisadari ibas kegeluhenta teridah kerna status sosial, lit si bayak, li si musil, lit si mbiring, lit sibentar, rsd. Tapi i labe-lebe Tuhan kerina kita seri. Emaka ula kal bas gereja lit penindasan, cian ate, cekurak, la lit kedamen, rsd. Tapi nggeluhlah kita ibas persadan. Sebab adi kita nggeluh ibas persadan, kita banci nggeluh ngelai alu ras-ras, sebab Tuhan mereken talenta labo erpalasken status sosial, warna kulit, bentuk kulanta, rsd.

Pdt. Steven Kumenit, STh,M.Min.