Selasa, 10 Desember 2013

Tendingku Muji Tuhan (Lukas 1:46-55)




BAHAN KHOTBAH TANGGAL 22 DESEMBER 2013
GEREJA GBKP
Introitus    :     Pujilah Tuhan , o tendingku, tendi, kula, ukurku pujilah gelarNa sibadia! (Mazmur 103:1b).
Ogen         :     Mikha 4:1-5 (Responsoria).
Khotbah    :     Lukas 1:46-55 (responsoria).
Tema         :     Tendingku Muji Tuhan.

LATAR BELAKANG
1.   Sijadi bahan khotbahta sekali enda eme sada puji-pujin Maria  kenca ia jumpa ras Elisabet seninana. Janah puji-pujin enda bersipat toto guna memuliaken Tuhan, erkiteken sie me enda rusur ikataken manificat (bahasa latin) siertina memuliakan.
2.    Puji-pujin manificat enda turah erkiteken keriahen ukur ras pengataken bujur Maria, sebab ia jadi nande penebus. Tapi lebih asangken sie erkiteken reh sekalak penebus ku doni enda sikin itimai kerina kalak Yahudi (Israel). Sebab enda ipadanken Tuhan ibas padan sindekah.
3.   Ibas manificat enda lit piga-piga hal siikataken Maria eme : 1). Dibata mperdiateken kegeluhen Maria. Sebab nggo ilakoken Tuhan sada perkara simbelin man dirina, ija Tuhan mperdiateken Ia, Tuhan make ia jadi sara keselamaten doni enda. Emaka situhuna kegeluhen Maria la iperdiateken kalak erkite-kiteken ia sekalak diberu simusil, tapi erkiteken ia ipake Tuhan jadi nande Tuhan, maka statusna ipeganjangken Tuhan, emaka kerina kalak ngataken Maria ndatken tuah. Enda sada respon uga Maria ngaloken sura-sura Dibata amin gia situhuna Maria harus ngelawan sada hal si la biasa siterjadi ibas doni enda, eme tempa bagi sada “aib” man Maria erkite-kiteken Maria natang tuah paksa ia lenga erjabu, tapi ertunangen denga ia ras Yusuf. Tapi kerina enda ialoken Maria erkiteken lit perbahanen Tuhan simbelin I tengah-tengah doni enda eme keselamaten, janah Maria jadi sarana kerehen Tuhan ibas doni enda. Ipake Tuhan ia erkite-kiteken ketutusen Maria ersembah man Tuhan. Bagepe sebalikna ipeteruk Tuhan kalak simeganjang ukur, ibas erti kata La ipake Tuhan kalak simeganjang ukurna guna jadi saraNa kerna keselamaten ibas doni enda. 2). Keberpihakan Tuhan man kalak musil (kalak musil situtus). 3). Tuhan tetap nampati bangsa Israel, janah mulahi bangsa Israel ibas perbeben nari. 4)  Tuhan tetap nginget padan siisehkenNa man Abraham eme njadiken kesusuren Abraham jadi sada bangsa simbelin. Enda nandangi seh erkite-kiteken Mesias nandangi reh, sebab ise si tek man Yesus pagi terkelin. Emaka kalak si tek man Yesus otomatis ia jadi kesusuren Abraham. Sebab Abraham eme bapa kalak sierkiniteken.
4.      Adi siperdiateken kerna manificat Maia enda, maka situhuna enda mirip ras puji-pujin Hana ibas padan sindekah, janah enda sipatna eskatologis.
5.      Manificat enda ncidahken kerna perbahanen Dibata sierbahanca kiniganjangan ukur manusia “iambengken” janah kalak simeteruk ukur ipeganjangken Dibata.

APLIKASI
            Puji-pujinta man Tuhan harus turah ibas tendinta nari, Bagepe ibas kerina totalitas geluhta. Sebab ibas puji-pujinta e ngataken kerna perbahanan ras perkuah ateNa man banta. Janah harus siinget puji-pujinta e berarti lit sada pengakun kerna perbahanen ras perkuah ate Tuhan. Alu bage maka pengakunta e mpeturah ukur guna ndalanken kai simehuli singena ate Tuhan. Sebab tek kita ibas kerina kecibalta Tuhan pasti nampati kita. La ipediatna kita ndatken kemalun.

Pdt. Steven Kumenit, STh.M.Min.
             

Senin, 09 Desember 2013

Malem Me Ate Kalak Si Ngaloken Yesus (Yesaya 35:1-10)



BAHAN KHOTBAH TANGGAL 15 DESEMBER 2013
GEREJA GBKP
Introitus   :    Seh rasa lalap malem me atena (Yesaya 35:10b).
Ogen        :    Matius 11:2-6 (Tunggal).
Khotbah   :    Yesaya 35:1-10 (Responsoria).
Tema        :    Malem Me Ate Kalak Si Ngaloken Yesus.

LATAR BELAKANG
1.      Lit piga-piga hal siinubuatken Yesaya selaku nabi eme 1).  Penghukuman Tuhan man bangsa Israel erkite-kiteken kebobrokan moral ntah pe nggeluh lanai bagi bangsa Tuhan. Enggo nggeluh rate-ate. Ibas hal enda nggo nterem kalak Israel lanai patuh/setia man Tuhan, sebab nggo ia ersembah man dibata-dibata sideban. Bagepe pemerintah siseharusna mabai masyarakatna gelah ernalem man Tuhan, e pe la ilakokenna, sebab ia pe nggo erbahan si langena ate Tuhan alu erbahan KKN. Bagepe lanai Tuhan jadi andalenna, enda teridah arah ia mindo penampat man bangsa asing (Asyur) guna nampati ia ibas perang, erkiteken sie me maka pemerintah harus nggalar upeti. Pemerintah lanai tek man Tuhan selaku Tuhan sibanci nelamatken ia  2). Pengharapen ntah pe pemulihan kegeluhen selaku bangsa Tuhan. Bangsa Israel jadi bangsa si dame ras makmur.
2.      Adi siperdiateken kerna bahan khotbahnta maka siidah i je sada nubuat nabi Yesaya kerna pemulihen bangsa Israel ibas pembuangen. Bangsa Israel nggeluh alu meriah ukur sebab nggo pulah ibas pembuangan nari, janah enda kerina erkite-kiteken Tuhan. Erkiteken sie me tanda keriahen ukur bangsa Israel icidahkenna alu mulih ras bengket ku Sion (Yerusalem) alu rende ras ersurak meriah, sebab akapna lanai lit ndele ate ras la lit ate ceda, sebab i Sion (Yurusalem)  bangsa Israel ikepkep Tuhan. Bagi siteh Sion (Yerusalem) I je lit rumah pertoton, ibas rumah pertoton e Dibata ringan. Emaka bangsa Israel ipinpin Tuhan ras banci megiken pengajaren Tuhan (band. Yesaya 2:3). Kegeluhen sibage igambarken Yesaya alu gurun pasir ras taneh kerah-kerah meriah pagi iakapna, taneh mesawang ersurak janah erbunga. Gurun pasir bungana mbue, ersurak meriah janahna rende. Gurun pasir e bali pagi jilena ras Deleng Libanon, bali mehumurna ras juma-juma Karmel ras Saron (Yesaya 35:1-2). Sada catatan : Pegunungan Libanon terkenal dengan pohon-pohon aras yang lurus dan tinggi, dan tumbuh dengan lebat. Pegunungan Karmel juga mempunyai tanah dataran yang subur untuk pertanian. Disebelah selatan Karmel di tepi laut tengah terbentanglah lembah Saron yang terkenal dengan bunga mawarnya.
3.      Ibas perbahanen Tuhan sibage, maka bangsa Israel harus megegeh ras ula mbiar, ula putus asa ibas pembuangan. Bangsa Israel harus mpeseh situasi enda man sapih-sapihna manusia gelah kerina bangsa Israel banci megegeh ras termotivasi mulihi guna tetap mengandalkan Tuhan, ras tetap tek man baNa. Bangsa Israel iselamatken Tuhan ibas taneh pembuangen nari, janah Tuhan ngukum musuh-musuhNa.
4.      Pembebasan Tuhan man bangsa Israel erbahanca terjadi sada pemulihan kesehatan man manusia sicacat fisik, bagepe litna sada pemulihan suasana i taneh simesawang, sebab biasana i je mbiar manusia erdalan erkite-kiteken melala ancaman-ancaman subuk binatang buas, bagepe pinangko ras kalak jahat. Jadi ibas suasana ingan kebiaren, salih jadi ingan badia. Ingan enda me dalan nandangi kalak siiselamatken Tuhan ku Yerusalem.
5.      Yesaya tuhu-tuhu ncidahken kerna kuasa ras keleng ate Tuhan man bangsa Israel. Erkiteken kuasa ras keleng ate Tuhan e maka bangsa Israel ngenanami sada keriahen ras kemalemen ate situhu-tuhu.

APLIKASI
            Nubuatan nabi Yesaya enda terealisasi ibas Yesus Kristus. Ibas kereheh Yesus Kristus melala tanda-tanda sengget siilakoken Yesus eme kalak pentang erpengidah, kalak pasek erpemegi, kalak si la beluh ngerana banci ersurak-surak alu meriah. Enda kerina erkiteken lit kuasa bas Yesus (band. Matius 28:18), janah Ia kin Dibata e. Emaka malem me ateta erkiteken Yesus e Tuhanta. Malem me ateta sebab kita tek man Yesus. Bagepe la saja iberekenNa pembebasan secara jasmani, tapi pe iberekenna keselamaten man banta. Emaka jadi kata persinget man banta ula erkiteken kiniseran sikentisik saja, sitadingken Yesus ibas kegeluhenta. Emaka adi tek kita, tek lah alu bulat ukur, sebab kemalemen ate situhu-tuhu hanya lit man Yesus saja la lit bas doni enda.

Pdt. Steven Kumenit, STh.M.Min.  
             

Rabu, 20 November 2013

Penanam-nanamlah Keleng Ate Tuhan (Efesus 3:14-20; Mazmur 34:9b)



BAHAN PJJ GEREJA GBKP
TANGGAL 24 – 30 NOPEMBER 2013
Epesus 3:14-20; Masmur 34:9b.

Tema : Penanam-nanamlah Keleng Ate Tuhan

LATAR BELAKANG
A.    Epesus 3:14-20.
  1. Sijadi oratenta sendah eme sada pertoton Paulus man perpulungen Epesus gelah perpulungen Epesus tetap megegeh ibas kiniteken. Alu sada tujun perpulungen Epesus ula surut kinitekenna ntah pe mbiar ngenen kiniseran siiinanami Paulus, tapi kiniseran siinanami Paulus jadi min sada kemegahan man perpulungen sebab erkiteken Dibata erdahin ibas Paulus maka kalak silabo kalak Yahudi, termasuk perpulungen Epesus nggo dat bagin ibas kai singgo isikapken Dibata.
  2. Paulus siiangkat Yesus guna erdahin man kalak si labo kalak Yahudi tuhu-tuhu ndatken sada perbeben sicukup mberat ibas nehken Berita SiMeriah, mulai ibas iragukenna kerasulan Paulus, sebab lit singatakenca Paulus labo rasul, bagepe motivasi Paulus erdahin  eme ndarami sen saja, bagepe teologi Paulus sendiri siitantang, sebab nina Paulus keselamaten e adi tek man Tuhan, tapi lit singatakenca e la bias, tapi harus denga ndalanken undang-undang Musa (taurat), bagepe Paulus ipenjaraken. Erkiteken sie me ibas rangka njaga kai singgo ialoken perpulungen eme keselamaten, maka Paulus ertoto man Tuhan gelah Dibata, arah Kesah Si Badia mereken kuasa mpertahanken kiniteken perpulungen, ras arah Kesah Si Badia mpegegehi pusuh ras peraten  perpulungen. Alu bage perpulungen Epesus tetap termotivasi nggeluh ibas kiniteken man Yesus Kristus amin gia jumpa perbeben ras kiniseran.
  3. Bagepe ertoto Paulus gelah Yesus Kristus ringan ibas pusuh perpulungen erkite-kiteken Perpulungen tek man baNa. Enda pemindon Paulus gelah perpulungen tuhu-tuhu rurat ras nggeluh ibas Yesus Kristus. Sebab nggeluh ibas Yesus Kristus mereken sada pengertin kerna makna kegeluhen selaku kalak kristen. Emaka perpulungen ngasup ngangkai keleng ate Tuhan singgo isehken man perpulungen, i ja erkiteken keleng ateNa man manusia maka guna nelamatken manusia e nggit Ia nusur ku doni enda ras mate guna nelamatken manusia, janah iarak-arakNa perpulungen gelah tetap nggeluh ibas keselamaten. Erkiteken sie me perpulungen harus nehken puji-pujin ras ngataken bujur man Tuhan, sebab enda la terukuri manusia.
B.     Mazmur 34:9b.
  1. Enda mazmur Daud simereken kesaksin kerna penampat Dibata me maka Daud banci pulah ibas Abimelek nari. Erkiteken sie me  Daud mereken sada kesaksin arah puji-pujinna. Salah sada isi puji-pujin eme penanam-nanamlah uga belinna kiniulin Tuhan. Ibas erti kata kalak singgeluh ras Tuhan ras sindalanken kai singena ateNa, maka ijagai ras ipulahi Tuhan ia ibas kerina mara bahaya nari. Ibas erbage-bage cara ipulahi Tuhan me anak-anakNa gelah la ndatken cilaka. Ibereken Tuhan sada kepentaren  gelah Daud banci pulah ibas Abimelek nari, termasuk uga Daud mpekulah-gulah dirina tempa-tempa ia kalak adon, emaka ipulahi abimelek me ia.
  2. Tujun puji-pujin enda gelah kalak sierkiniteken man Dibata tetap ernalem man bana ras ula sangsi kerna keleng ateNa. Emaka tetaplah mengandalken Tuhan ibas kerina kegeluhen.

APLIKASI
            Sekali enda kita ngerana kerna Natal. Inti natal eme keleng ate Tuhan. Erkiteken Natal maka kita banci nggeluh ibas keselamaten. Erkiteken Natal kita banci ngenen alu payo kerna kebenaren e, sebab ibas Yesus Kristus teridah kerna kebenaren la saja arah babah/ngerana tapi pe icidahkenNa arah perbahanen. Emaka erpalasken enda kita banci ndalanken kerna kebenaren situhu-tuhu.
            Keleng ate Tuhan tuhu-tuhu la terukuri kita, emaka marilah sipenanam-nanam kerina keleng ate Tuhan e ibas kerina kegeluhenta, janah mari sirespon arah ndalanken simehuli singena ate Tuhan. Sebab adi enda tetap sidalanken maka ijagai ras ikepkep Tuhan me kita, emaka kita tetap nggeluh ibas keselamaten. Marilah ibas Natal sekali enda sipenanam-nanam kerna keleng ate Tuhan, emaka sirayaken natal e la saja ibas perayan-perayaan seremonial, tapi pe ibas kerina kegeluhenta. Selamat Natal man banta kerina.

Pdt. Steven Kumenit, STh.M.Min.