Megahlah Atendu Ibas Tuhan (Yeremia 9:22-26)

KHOTBAH TANGGAL 2 JUNI 2013.

GEREJA GBKP

Introitus   :    Adi lit kalak atena ermegah ate, megahlah iakapna perban itandaina Aku. Sabap keleng ateKu tetap kap, dingen Kubahan kai si bujur ras benar. E me perkara si erbahanca meriah ukurKu, Aku TUHAN si enggo ngerana (Yeremia 9:24).

Ogen        :    2 Korinti 10:12-18 (Tunggal)

Khotbah   :    Yeremia 9:22-26 (Responsoria).

Tema        :    Megahlah Atendu Ibas Tuhan.

LATAR BELAKANG

1.      Nabi Yeremia erdahin i kerajaan Israel Selatan eme Yehuda, nabi Yeremia ngenen kerna kegeluhen bangsa Yehuda simerupaken bangsa Tuhan nggo lanai mbiar man Tuhan, kegeluhenna nggo nggeluh alu erbana-bana, emaka ate Tuhan ngukum bangsa enda, janah sura-sura penghukumen enda ipeseh nabi Yeremia man bangsa Yehuda. Salah sada gambaran siterjadi ibas penghukumen Tuhan pagi eme Bangke manusia merap i japa pe; bali ras pupuk si ergun-gun i juma, desken buah gandum si isabi jenari tading ibahan si rani, la lit sekalak pe si pepulungsa.

2.      Ibas pihak sideban arah nabi Yeremia, Dibata mpersingeti bangsa Yehuda gelah megah min akapna ernalem man Dibata saja asangken man gegeh, kepentaren manusia, bagepe kebayaken.Enda ikataken Tuhan sebab pemimpin-pemimpin bangsa Yehuda nggo lit kiniganjangen ukur erkiteken lit piga-piga keberhasilan, janah akapna e kerina erkiteken gegeh ras kepentarenna sendiri,  umpamana 1).  Erkiteken kekalahan Sanherib (bangsa Asyur) ibas zaman Hizkia, maka Yoyakim mendesak gelah bangsana tek man Rumah pertoton sebab i je ringan Dibata, bagepe tetap mereken persembahen-persembahen, enda kerina ibahanna guna pertahanan terakhir. Emaka terjadi me rasa puas diri. 2). Mbangun istana si mewah. 3). Yoyakim bersekutu ras bangsa Mesir guna ngelawan bangsa Babel. Janah akapna enda nggo tuhu.

3.      Sada palas engkai maka isuruh Dibata gelah bangsa Yehuda ermegah erkiteken bangsa Yehuda nandai Tuhan, sebab keleng ate Tuhan tetap ibahanNa kai sibujur ras benar man bangsa Yehuda.

4.      Yeremia la saja ncidahken kerna kinilasetiaan bangsa Yehuda man Tuhan, tapi pe Yeremia ngataken sada penghukuman secara universal man bangsa-bangsa eme sekutu bangsa Yehuda. Bangsa-bangsa enda tuhu nggo i sunat, tapi sunat siilakoken bangsa-bangsa enda secara lahiriah saja, la bo seh ku pusuh. Emaka amin gia bangsa-bangsa enda menerapken sunat tapi perbahanenna tep-tep wari tetap ngelakoken kai si lamehuli, kai si la ngena ate Tuhan. Janah perlu lebe siteh bangsa-bangsa e nai eme bangsa-bangsa i si lit i padang gurun ngelakoken sunat. Bagepe penghukuman Tuhan ilakoken erkite-kiteken bangsa-bangsa termasuk bangsa Yehuda nggo gunting bukna jadi gendek, padahal enda nggo ngelanggar perintah Tuhan (nen= Imamat 19:27). Bagepe ngguntik buk seh gendek merupaken kebiasaan dunia kafir si lit isekelewet bangsa Yehuda. Sebab nggunting buk seh gendek merupaken ritus keagamaan dunia kafir.

5.      Enda ikataken nabi Yeremia gelah bangsa Yehuda sadar ras mindo pengalemi dosa man Tuhan, alu bage penghukumen Tuhan la surung ipeseh man bangsa Yehuda.

APLIKASI

            Ibas pustaka si badia, je si teh maka Tuhan ngelarang kita guna meganjang ukur ntah pe ermegah diri erkiteken erta, pemeteh, jabatan, rsd. sebab ibas ermegah diri,  lupa kita ise kin kita situhuna. Kita enda biak siermasap-masap kap. Enda ilarang Tuhan sebab e merupaken biak dosa.

            Ibas bahan khotbahnta, kita isingetken maka megah min siakap ibas Tuhan. Bermegah ibas Tuhan sidatken kepentaren ras nggeluh ibas kebujuren, keadilan ras kekelengen, janah ngasup kita ngalaken erbage-bage percuban ras kiniseran, termasuk pe tawaran-tawaran doni enda.

            Kalak si la nggit ermegah ibas Tuhan berarti imbang Dibata kap. Sebab dirina ngenca siiukurkenna janah bersekutu ia ras doni enda.

Pdt. Steven Kumenit, STh.M.Min.

Pekan Keluarga Wari 7 : Jabu Si Erberita Si Meriah (Kisah Para Rasul 17:16-28)

PEKAN KELUARGA

GEREJA GBKP

WARI VII. SABTU 8 JUNI 2013.

Introitus    :    La aku mela kerna Berita Si Meriah e; sabap Berita Si Meriah e kap Kuasa Dibata guna nelamatken kerina kalak si tek man Jesus Kristus, perlebe man kalak Jahudi, jenari man kalak si deban si labo kalak Jahudi (Roma 1:16).

Ogena        :    Yohanes 21:15-19.

Khotbah    :    Perbahanen Rasul-Rasul 17:16-28

Tema         :    Jabu Si Erberita Si Meriah.

LATAR BELAKANG

1.      Asum Paulus nimai kerehen Silas ras Timotius i Aten, gawah-gawah Paulus i Aten janah nembeh kal atena sebab i Aten melala kal patung-patung penembahan, emaka ngerana (erkhotbah) Paulus ibas rumah pertoton man kalak Jahudi ras i tiga-tiga jumpaina kalak singgit megiken khotbahna guna petandaken Jesus ras kekekenNa.

2.      Kalak Aten, khususna filsuf-filsuf ngidah enda merupakan sada hal simbaru. Bagi kalak Aten nggit ia ngkeriken wari-warina guna nuriken ras megiken hal simbaru. Janah lit ka sada hal menarik akapna, emaka ibaba kalak enda Paulus ku sidang Areopagus, janah je isungkunna kerna pengajaren Paulus, sebab akapna Paulus ngajarken dua dewa,  eme Yesus Kristus ras Anastasia (kekeken). Khususna Anastasia, akapna dewa.

3.      Ibas sidang Areopagus enda, ije me Paulus ngerana. Lit piga-piga hal siikataken Paulus eme : 1). Kalak Aten eme kalak situtus ersembah. Enda teridah arah ingan ersembah si lit i kuta e. 2). Arah sada tulisen silit ibas ingan ersembah, sitertulis man Dibata  si la itandai. Ibas palas enda Paulus petandaken Dibata ras Jesus Kristus. Nina Paulus Dibata si la itandaindu e eme Dibata si ate kami ipetandaken man bandu. Dibata e Dibata sienggo njadiken langit ras doni, Dibata si la ringan ibas ingan-ingan tertentu, ras Dibata si dem kebayaken, emaka labo erkiteken kurang maka ialokenna persembahen e, tapi justru Dibata e kap simereken kegeluhen man banta. Janah arah sekalak jelma ijadikenna sada bangsa . Sienda kerina gelah manusia nembah man Tuhan sebab Tuhan e la bo ndauh ibas manusia. 3).  Lit kap penyair si lit i tengah-tengahndu singataken kita pe kesusurenNa kap. Enda ngataken kalak Aten pe kesusuren Tuhan.

4.      Paulus menekanken keselamatan lit bas Tuhan. Memang kenca manusia ndabuh kubas dosa, idarami manusia Tuhan e. Ibas erbage-bage bentuk idarami manusia Tuhan e, tapi mekatep salah, emaka erdauhna me manusia e ras Tuhan. Padahal Tuhan e ndeher nge, janah manusia banci jumpa ras Tuhan. Ibas manusia jumpa ras Tuhan, i je me manusia e nggeluh.

5.      Erkiteken Paulus i lebe-lebe ahli-ahli filsafat kalak Aten, maka guna njelasken Dibata stuhu-tuhu ras Dibata simereken keselamatan ras kegeluhen, ipake Paulus me bahasa- bahasa filsafat. Emaka adi sioge terdauhen lit piga-piga ia sienggo tek.

APLIKASI

            Eksistensi keluarga kristen eme nehken Berita si Meriah, Emaka ibas rangka nehken berita si meriah, maka keluarga kristen harus nggeluh ibas kiniteruken ukur ras keterpanggilan tuhu-tuhu selaku kalak kristen. Sebab siidah genduari nterem denga keluarga-keluarga kristen simonce-once kinitekenna ras la bo tutus  pulung ku gereja ras kebaktin-kebaktin sideban. Bagepe nterem denga simuas melihe kerna kata Dibata. Keluarga-keluarga sibage me si harus silayani, sebab adi la silayani maka erdauhna keluarga e ras keselamaten. Bagepe keluarga kristen harus ncidahken eksistensina i tengah-tengah masyarakat, i ja ia tading, eme keluarga kristen harus ncidahken uga kin nggeluh ibas persuruhen Dibata. Keluarga kristen harus nggeluh badia ras ngkelengi Tuhan. Janah tanda kita nggeluh badia ras ngkelengi Tuhan harus teridah ibas kegeluhenta tep-tep wari, eme nggit nggeluh berdampingan ras keluarga sideban si la sada kiniteken ras kita. Bagepe nggit terlibat guna pekena-kena doni enda, alu njaga kebersihen ras lingkungen hidup, rsd (band. Mazmur 145:9). Ibas perbahanenta sibage maka kita nggo nehken Berita Si Meriah.

Pdt. Steven Kumenit, STh.M.Min.

Pekan Keluarga Wari 6 : Jabu Ngelai Desken Juma La Erbaleng (Rut 1:1-22)

PEKAN KELUARGA

GEREJA GBKP

WARI VI. JUMAT 7 JUNI 2013.

Introitus   :    Dage lanai bo erndobah kalak Jahudi tah kalak Junani, budak tah kalak bebas, dilaki ras diberu. Sabap kerina nge kam sada i bas Kristus Jesus (Galati 3:28).

Ogen        :    Yohanes 4:1-10

Khotbah   :    Rut 1:1-22.

Tema        :    Jabu Ngelai Desken Juma La erbaleng.

LATER BELAKANG

1.      Erkiteken Terjadi kelihen simesangat i taneh Israel maka nterem keluarga kalak Israel mengungsi ku taneh Moab, termasuk keluarga Elimelekh. Kenca piga-piga tahun dekahna Keluarga Elimelekh ije,  mate me Elimelekh. Tading me Naomi ras dua anak dilaki, eme Mahlon ras Kilyon. Kenca sie  Mahlon ras Kilyon muat diberu kalak Moab jadi ndeharana eme Orpa ras Rut, tapi kenca sepuluh tahun dekahna kalak enda duana erjabu, mate ka Mahlon ras Kilyon, emaka tading  me Naomi ras dua permenna.

2.      Terbegi me man Naomi  maka paksa Kelihen i taneh Israel enggo mentas emaka ersura-sura Naomi guna mulih ku kutana eme Betlehem, emaka isuruh Naomi me gelah si Orpa ras Rut mulih mulihi ku rumah orang tuana i Moab, sebab la nai bo mungkin Naomi mupus sekalak anak dilaki guna gancih Mahlon ras Kilyon, adi pe banci umurna tentu lanai cocok ras umur Orpa ras Rut. Tapi dungna  Orpa ngenca simulih ku rumah orang tuana tapi si Rut tetap ngikutken bibina.  Enda ikataken Naomi sebab ibas budaya patriarkat (garis keturunan dilaki) sekalak diberu sierjabu ras sekalak dilaki maka ia jadi tanggungjawab perbulangenna, tapi kenca perbulangenna mate, maka ndehara e banci mulihken ku keluarga bapana, emaka kegeluhenna terjamin (nen : Kejadin 38:11; Imamat 22:13).

3.      Kencah seh Naomi ras Rut i Betlehem minter mbar kerna berita kerehenna i kuta Betlehem, janah nina diberu-diberu kuta Betlemen nungkun, payo kin enda si Naomi ? Tapi nina si Naomi ulanai igelarindu aku Naomi. Maralah  bahan gelarku, sebab Dibata sierkuasa enggo mahanca pagit kegeluhenku. Ibas perspektif ntah pe pengangkan Naomi kai siinanamina eme erkite-kiteken Tuhan. Tuhan me si erbahanca bage erkite-kiteken salahna. Gelar Naomi berarti menyenangkan/manis. Emaka kenca nina diberu-diberu Betlehem simewakili kerina masyarakat Beltelehem payo kin enda Naomi, minter ikataken Naomi ulanai ikatakenndu aku Naomi tapi Mara siertiken pagit, sebab kejadin siinanami Naomi e la sue ras gelar siibabana e. Sebab seharusna gelarna e menyenangkan dirina/keluargana bagepe masyarakat pada umumna. Tapi bagi Naomi gelar Mara cocok itamaken ku dirina, alu ngenen kejadin siinanamina.

4.      Rut la nggit nadingken simetuana eme Naomi erkiteken kegeluhen Rut nggo ersada ras kegeluhen simetuana e, termasuk sada kinitekenna. Rut nggo erdibataken Dibata bangsa Israel, lanai ia mulihken ku dibata bangsa Moab eme Kamos (band. Bilangan 21:29; 1 Raja-raja 11:33). Emaka lanai lit batas-batas i je. Erkiteken sie me pang Rut erpadan adi itadingkenna simetuana e, Dibatalah singukum ia seberat-beratna.

5.      I Betlehem Naomi ras Rut memulai kegeluhen simbaru selaku keluarga diberu balu-balu simusil. Janah selaku keluarga diberu mbalu simusil berarti keluarga-keluarga sikuh i Betlehem berkewajiban mereken penampat man keluarga Naomi ras Rut, khususna ibas paksa rani. Emaka ibas paksa rani gandum, merupaken sada keriahen tersendiri kal man Naomi ras Rut, sebab aturen bangsa Israel kerna nampati  diberu balu-balu, salah sadana icidahken tupung bangsa Israel rani gandum janah sitading ntah pe ndabuh  la banci ibuat simada juma, sebab e enggo jadi sikerajangen diberu balu-balu.

APLIKASI

            Pelayanen ibas gereja bagepe i tengah-tengah masyarakat la saja jadi tanggungjawab gereja secara institusi tapi pe tanggungjawab keluarga-keluarga kristen, amin gia situhuna pelayanen keluarga kristen la seri ras pelayanen gereja secara institusi.

            Pelayanen ibas jabu harus min teridah lebe i tengah-tengah jabu e, eme jabu e harus nggeluh sikeleng-kelengen ras nggeluh ibas sada penggejaben. Jenari selaku keluarga kristen harus ka nggejapken maka ia tading i tengah-tengah perpulungen ras masyarakat. Janah selaku keluarga kristen harus ngangkai lit tanggungjawabna eme ncidahken eksistensina i tengah-tengah perpulungen ras masyarakat. Keluarga kristen harus erdiate ras mediate nadangi keluarga silit isekelewetna. Ibas erti kata keluarga kristen harus lit min sada penggejapen ras keluarga-keluarga silit i sekelewetna, gelah adi lit keluarga simembutuhken penampat maka keluarga kristen nggit mereken penampat man keluarga e amin gia berbeda latar belakang kegeluhen, termasuk SARA. Sebab pelayanen keluarga kristen harus menembus batas-batas SARA. Enda me sinikataken pelayanen desken juma la erbaleng.

Pdt. Steven Kumenit, STh.M.Min.

           

Pekan Keluarga Wari 5 : Jabu Si Ngelai (1 Petrus 2:9-10).

PEKAN KELUARGA

GEREJA GBKP

WARI V. KAMIS 6 JUNI 2013.

Introitus :    Labo lit keleng ate si belinen asangken keleng ate kalak si nggit ngasamken kesahna guna teman-temanna (Yohanes 15:13).

Ogen       :    Yohanes 10:1-5.

Khotbah      : 1 Petrus 2:9-10.

Tema       :    Jabu Si Ngelai

LATAR BELAKANG.

1.      Secara umum banci sikataken maka surat Petrus enda ikirimkan khusus man kalak kristen si lit ibas taneh perlajangen i Pontus, Galatia, Kapadokia, Asia Kecil ras Bitinia. Janah tujun surat enda ibas rangka mpegegehi kiniteken perpulungen, sebab paksa sie kalak kristen sangana ndatken percuban sicukup mberat. Bagepe ibas rangka mereken motivasi selaku kalak kristen simbaru.

2.      Ibas bahan khotbahnta, Petrus mereken sada pengangkan kerna hubungen perpulungen/kalak si tek ras Yesus, i ja kenca perpulungen nggo tek man Yesus berarti perpulungen lanai seri ras kalak Yahudi sinai nulak Yesus, tapi perpulungen nggo nggeluh ibas keselamaten, bagepe erkiteken tek man Yesus maka kalak si tek  enggo jadi bangsaNa. 

3.      Bangsa pilihen ras bangsa sibadia siimaksudken Petrus berbeda maknana ras bangsa pilihen si “isandang” bangsa Israel ndube. Memang nai bangsa Israel ipilih ras ipebadiaken  Tuhan gelah gelah bangsa Israel berbeda ras bangsa-bangsa sideban, janah tetap ngelakoken kai singena ate Tuhan. Tapi sienda la teridah bas bangsa Israel, bagepe ibas zaman Yesus, bangsa Israel (Yahudi), khususna imam-imam simbelin ras tua-tua agama Yahudi la ngaloken Yesus Kristus simerupaken Raja ibas kinirajaan Surga e. Erkiteken sie me ibuat Yesus KinirajaanNa ibas bangsa Israel (Yahudi) nari janah iberekenNa man ise saja si tek man baNa (band. Matius 21:43). Emaka makna bangsa pilihen,  imam-imam raja ras bangsa sikerajangen Dibata eme mbuka sada pengangkan kerna eksistensi simbaru kalak sitek man Yesus Kristus. Ija kalak si tek nggo iserapken ibas doni enda nari, emaka kalak sitek nggo nggeluh badia.  Kalak si tek nggo jadi sikerajangen Dibata, emaka salah sada fungsi kalak si tek eme harus jadi imam-imam nandangi Yesus sendiri, selaku Raja. Memang nai ibas bangsa Israel/Yahudi dahin imam harus ibas kesusuren suku Lewi nari, janah tugas imam eme selaku perantara antara umat ras Dibata. Imam me sinehken kurban persembahen man Dibata. Tapi ibas status kalak sitek selaku bangsa pilihen ras imam-imam raja, lanai bagi status si nai siharus mpersembahken asuh-asuhen selaku persembahen, tapi kalak sitek harus nehken persembahen puji-pujin man Dibata ras ndalanken kekelengen nandangi sapih-sapihna manusia. Enda ilakoken sebab Yesus Kristus nggo mpersembahken diriNa selaku persembahen simehuli guna keselamaten kerina manusia. Alu kata sideban, perpulungen njadiken Yesus Kristus selaku palas kiniteken maka, perpulungen jadi imam-imam si khusus si erdahin guna Tuhan. Maksudna arah lagu langkah simehuli siipimpin Yesus Kristus, perpulungen ngasup ngelakoken simehuli singena ate Tuhan, janah enda me persembahen simehuli man Tuhan.

4.      Kalak si tek si lit ibas taneh perlajangen erkiteken Yesus  nggo jadi anak-anak Dibata. Emaka selaku anak tentuna dat bagin ibas kinirajan Dibata. Janah erkiteken nggo jadi anak-anak Dibata ras nggeluh ibas kinirajaan Dibata maka alu sendirina kalak sitek terhindar ibas penghukumen Dibata nari. Sebab nai ope denga Yesus mate ras nelamatken manusia, maka kegeluhen kalak si tek ndube ndauh ibas keselamaten sebab perbahanen-perbahanenna eme bodoh ras jahat.

5.      Perpulungen enggo ijadiken Dibata selaku bangsa pilihenNa, emaka tanggung jawab perpulungen eme naksiken kerna perkuah ate Dibata si mbelin e man kerina jelma. Perpulungen harus ersaksi kerna perbahanen-perbahanen Tuhan simbelin.

APLIKASI

            Jabu kalak kristen la banci berdiam diri saja tapi harus ikut terlibat ibas pelayanen gereja. Ibas pelayanen siicidahken jabu kalak kristen, maka situhuna jabu keluarga kristen nggo ncidahken perwujudan kiniteken ibas kegeluhena tep-tep wari.

            Pelayanen ibas perpulungen ngatakenca maka jabu kalak kristen tuhu-tuhu mediate nandangi perkembangen ras situasi jabu-jabu isekelewetta. Bagepe kerna persoalen siihadapi temanta sisada kiniteken. Alu bage maka situhuna jabu kalak kristen harus jadi permakan nandangi temanna, emaka saling menjaga ras melindungi jabu kalak kristen. Alu bage ibas pelayanen sidalanken jabu kalak kristen maka jabu kalak kristen banci terhindar ibas “permakan-permakan” si la tuhu, si hanya ndarami keuntungen sesaat ngenca. Bagepe jabu kalak kristen banci ndatken serpang pulah, adi jumpa perbeben ras kiniseran. Emaka selaku jabu kalak kristen singelai, harus min jabu kalak kristen e nggeluh ibas kiniteruken ukur ras nggit ngelai.

Pdt. Steven Kumenit, STh.M.Min.