Senin, 29 Juli 2013

Begiken Perentah Tuhan (Yosua 4: 15-24).



BAHAN PJJ GEREJA GBKP
TANGGAL 4 – 10 AGUSTUS 2013.
Yosua 4:15-24.

Tema : Begiken Perentah Tuhan.

LATAR BELAKANG
1.      Salah sada tantangan (tantangan si pemena) siharus ihadapi Josua labo jelma (kalak Kanaan), tapi lau Jordan. Sebab paksa sie Lau Jordan sangana banjir, janah biasana ibas keadaan bagenda,  lau Jordan la banci terkepari, sebab launa banci seh 1 KM belangna, janah arus launa cukup  “deras”. Lau jadi banjir erkite-kiteken paksa sie sangana musim semi, emaka kerina salju simenutupi kerina deleng-deleng enggo mulai mencair, janah salju e jadi lau ras mengalir ku lau Jordan.
2.      Ngepari Lau Jordan eme dalan siharus idalani bangsa Israel gelah seh ku tanah Kanaan, khususna kota Jerikho dua jam ngenca perdalanen bangsa Israel kenca bangsa Israel ngepari lau Jordan. Erkiteken sie me Dibata mereken sada tanda sengget man bangsa Israel arah pengadi Lau Jordan. Lau Jordan ngadi erkiteken peti perpadanan siilanja para imam enggo seh i lau Jordan, ntah pe para imam nggo ndedehken nahena i lau e, maka lau e ngadi. Emaka sijadi eme lau si reh arah utara nangkih ku das jadi bendungen, tapi lau sisebelah selatan nari terus mengalir seh ku laut mati, emaka terjadi me dataran simbelang si enggo kerah sibanci idalani bangsa Israel. Kehadiren Dibata lit ibas  peti perpadanan siilanja para imam. Perbahanen Dibata (nen = tanda sengget) bali ras sanga Dibata pengadi laut Teberau paksa bangsa Israel ndarat  i taneh Mesir nari. Bagepe kepemimpinen Dibata man bangsa Israel ibas lau Jordan enggo berbeda ras paksa Dibata minpin bangsa Israel tupung bangsa Israel erdalan i taneh mesawang. I je Dibata minpin bangsa Israel arah binangun embun paksa suari ras binangun api paksa berngi, tapi tupung  ngepari lau Jordan kepemimpinen Dibata icidahken arah peti perpadanen. Enda ngatakenca suasana ras dalan enggo berbeda. Erkiteken tanda sengget siibahan Dibata enda me maka bangsa Israel banci ngepari lau Jordan.
3.      Ibas bangsa Israel enggo banci ngepari lau Jordan e, maka Yosua arah persuruhen Dibata merentah man bangsa Israel, siiwakili sada kalak tep-tep terpuk  bangsa Israel (nen = 12 suku Israel) gelah muat batu  i lau Jordan (ingan tedis para imam si ngelanja peti perpadanan), guna majekken sada tanda peringet-ingeten kerna tanda sengget siibahan Dibata ije. Ingan majekken tanda peringet-ingeten eme ibas ingan bangsa Israel  erberngi ope nerusken perdalanen ku taneh Kanaan. Tujun enda eme gelah bangsa Israel nggejapken maka ia banci ngepari i lau Jordan erkiteken Dibata. Bagepe tanda peringet-ingeten enda merupakan sada perbahanen adikodrati (nen = sada peristiwa siluar biasa si la banci ibahan manusia). Perlu siteh lebe tanda peringet-ingeten enda ipajekken alu 12 batu simerupaken tanda 12 suku Israel.
4.      Ipihak sideban tanda peringet-ingeten e merupaken sada momentum guna ngajari anak-anak bangsa Israel paksa idahna batu peringet-ingeten e. Sebab paksa idahna tanda peringet-ingeten e banci saja isungkunna kerna kai etina e, emaka harus ijabab alu nuriken maka Lau Jordan ngadi maler asum Peti Perpadanen Tuhan ngepari lau e. Alu bage anak-anak bangsa Israel ngenen man Tuhan saja. Tuhan saja isembahna.
5.      Tanda peringet-ingeten siipajekken bangsa Israel i Gilgal, ingan erkemah kenca bangsa Israel ngepari lau Yordan, sada tanda Dibata tetap nemani ras mulahi  bangsa Israel ibas erbage-bage tantangan-tantangan gelah bangsa Israel bengket ku tanah Kanaan. Bagepe ngataken maka Dibata bangsa Israel eme Dibata sierkuasa man kerina tinepaNa. Alu bage kerina kesusuran bangsa Israel mbiar man Tuhan saja.

APLIKASI
            Perentah Tuhan mereken kesangapen man banta. Perentah Tuhan banci siteh arah khotbah, ngoge Pustaka Si Badia, bagepe ibas pengajaren orang tuasimehuli man anak. Tapi mekatep la sibegi ras sidalanken perentah Tuhan ibas kegeluhenta tep-tep wari. Emaka la perlu mamang ateta adi lit senina turangta erbahan si la mehuli si la ngena ate Tuhan.
            Perentah Tuhan enda la saja ngataken maka kita banci ndatken kesangapen, tapi pe ituntut gelah man Tuhan saja kita mbiar ras harus isembah. Sebab siteh ras-ras ibas perkembangen zaman sigenduari melala dibata-dibata sideban sibanci mpengaruhi perukurenta nggeluh ernalem man Tuhan. Tapi adi lalap sibegi kerna perentah Tuhan maka sijadi eme ipasu-pasu Tuhan me kita. Enda banci jadi adi tuhu-tuhu sitandai alu payo kerna kuasa ras perkeleng ate Tuhan man kita kerina manusia.
            Ipihak sideban peranan orang tua guna mpeseh kerna perentah Tuhan eme mbiar ras erkemalangan man Tuhan, bagepe ndalanken simehuli ibas kerina kegeluhenta cukup penting, emaka fungsi orang tua harus tuhu-tuhu idalanken, gelah anak-anak la terikut ibas arus doni enda, anak-anak la terlibat ibas pinakit masyarakat, tapi si jadi eme anak-anak jadi anak sierkemalangan ras mbiar man Tuhan.

Pdt. Steven Kumenit, STh, M.Min.

Rabu, 24 Juli 2013

Pasu-Pasu Tuhan Si Maba Indonesia Merdeka (Yosua 3:5-17)



BAHAN PJJ GEREJA GBKP
TANGGAL 28 JULI – 3 AGUSTUS 2013.
Josua 3:5-17

Tema : Pasu-Pasu Tuhan Si Maba Indonesia Merdeka.

LATAR BELAKANG
1.      Josua eme sekalak pemimpin bangsa Israel singantiken Musa, erkite-kiteken Musa la ibere Tuhan guna bengket ku tanah Perpadanan, tanah Kanaan. Emaka salah sada dahin Josua eme naruhken bangsa Israel i taneh Kanaan. Guna sie me Josua ibas oratenta sendah sangana mpersiapken bangsa Israel bengket ku taneh Kanaan. Tapi ope denga bangsa Israel erdalan ibas ingan erkemah nari lit piga-piga hal siipersingeti Josua man bangsa Israel eme : 1). Bangsa Israel harus badia rikutken aturen agama. Ibas aturen agama, bangsa Israel katawari pe harus bersih.  Enda itekanken sebab Dibata e me Dibata si Badia (band. Imamat 19:2).  Sebab adi bersih bangsa Israel maka lit tanda kuasa siibahan Tuhan nandangi bangsa Israel. 2).  Josua mereken ketatapen ukur man bangsa Israel gelah ula mbiar, sebab Dibata ikut ras bangsa Israel, emaka musuh-musuh bangsa Israel eme kalak Kanaan, Heti, Hewi, Peris, Girgasi, Amori ras Jebusi ipelawesNa. 3). Pilih sepuluh dua kalak ibas tep-tep suku bangsa Israel. 4). Imam-imam ngelanja peti perpadanan, janah kenca nahe imam-imam ndedehi lau Jordan, maka lau Jordan e ngadi maler, emaka bangsa Israel banci ngepari lau Yordan e.
2.       Peti perpadanan eme tanda kehadiran Tuhan i tengah-tengah bangsa Israel. Janah sibanci ngelanja peti perpadanan eme imam-imam ngenca, la banci kerina kalak Israel. Sebab imam-imam e ngenca ibas suku lewi nari. Peti perpadanen arah lebe, ertina nuduhken dalan ras ngataken maka bangsa Israel lit iteruh pimpinen Tuhan. Bagepe Tuhan simimpin bangsa Israel ngelawan musuh-musuh bangsa Israel.
3.      Yosua eme bekas pilihen Tuhan guna nggantiken Musa, emaka uga Tuhan nemani Musa bage ka me Tuhan nemani Yosua. Ate Tuhan gelah bangsa Israel mpermuliaken Yosua,   maka ibahan Tuhan me tanda-tanda kuasa i tengah-tengah bangsa Israel, gelah tek bangsa Israel maka Tuhan tetap ras Yosua.
4.       Tanda-tanda kuasa siibahan Tuhan man bangsa Israel gelah bangsa Israel mpermuliaken Yosua eme ibas lau Yordan ngadi (catatan : Paksa sie lau Yordan eme lau sigalang, janah adi musim peranin banci ka banjir lau e, emaka la nai banci terbentasi. Tapi adi genduari lau Yordan e nggo kitik kal, tapi ingan tupung Yesus iperidiken Yohanes peridin galangan sitik asangken ingan lau Yordan sideban) . Enda bali sangana Tuhan pengadi laut merah paksa bangsa Israel ipinpin Musa (band. Kel. 14:21-22).
5.      Adi sinen secara umum enda turi-turin bangsa Israel ku taneh perpadanen, tapi secara khusus, enda nuriken kerna bangsa Israel ngepari lau Yordan. Ibas turi-turin enda ngatakenca Dibata Israel eme Dibata singgeluh ras erkuasa nandangi kerina tinepaNa.

APLIKASI
            Ibas tahun enda, tepatna tanggal 17 Agustus 2013, bangsa Indonesia ngerayaken wari kemerdekaan pe 68 tahunken.  Selaku kalak sierkiniteken harus mengamini bangsa Indonesia banci merdeka erkiteken penampat Tuhan. Tapi kenca Indonesia nggo merdeka, melala denga siman pekenan, termasuk moral, etika (KKN), sebab erkiteken sie maka pembangunan Indonesia teridah lambat, adi bandingken ras bangsa sideban.
            Ibas kondisi sibage gereja (institusi ras pribadi) terpanggil guna menyuarakan suara kenabian, gelah anak bangsa banci sadar kerna kondisi sigenduari, janah kalak siikut terlibat ibas KKN, kinilaadilan, penindasan, ilegal loging, rsd, banci ngadi ras jera. Gereja la banci terkontaminasi ibas perbahanen-perbahanen si la mehuli si la ngena ate Tuhan. Anak bangsa enda ncidahken geluh erkemalangan man Tuhan alu mengisi pembangunan alu mehuli.  Ibas gereja ndalanken sie maka gereja ipermuliakan.

Pdt. Steven Kumenit, STh.M.Min.

Rabu, 17 Juli 2013

Kutatap Dingen Kukawali Rumah E Katawari Pe (1 Raja - Raja 9 : 1-9)



BAHAN PJJ GEREJA GBKP
TANGGAL 21 – 27 JULI 2013.
1 Raja-Raja 9:1-9.

Tema : Kutatap Dingen Kukawali Rumah E Katawari Pe.

LATAR BELAKANG
1.      Sijadi bahan oratenta sendah eme kerna Dibata ncidahken diriNa man Salomo bagi i Gibeon. I Gibeon eme sada ingan ersembah siterberita paksa sie, janah i je me Tuhan mereken kepentaren man Salomo. Bagepe i Gibeon lit sada kata persinget siibereken Tuhan man Salomo eme harus patuh man Tuhan saja (Band. 1 Raja-Raja 3: 9-14).  Jadi enda peduakaliken Tuhan ncidahken diriNa man Salomo.
2.      Ingan Dibata ncidahken diriNa man Salomo eme i Yerusalem, janah kenca dung ipajekken Salomo istana ras Rumah Pertoton Tuhan simerupaken tanggungjawab siibereken Tuhan man bana, sebab bapana Daud la ibere Tuhan guna mbangun Rumah Pertoton.
3.       Ibas Dibata ncidahken diriNa man Salomo, situhuna enda erkiteken respon Tuhan kerna pertoton Salomo, sebab kenca dung rumah pertoton e, janah ope denga ibengket Rumah pertoton e, raja Salomo ertoto man Tuhan gelah Dibata mperdiateken Rumah Pertoton e simerupaken ingan ersembah bangsa Israel, bagepe iperdiateken Tuhan min pertoton bangsa Israel tupung ia ngala ku Rumah Pertoton, alu bage la saja pasu-pasu sialoken bangsa Israel tapi pe pengalemi dosa. Bagepe ipindo Salomo gelah kai siipadanken Tuhan man bapana ndube kern ngerajai bangsa Israel, harus ibas kesusuren Daud nari gelah e tetap icikep Tuhan.  Ibas pemindon Salomo enda nina Tuhan . Kutatap dingen Kukawali Rumah e katawari pe. Adi kam nggeluh i bas adep-adepenKu alu bujur dingen pinter ukur, bagi si ibahan bapandu Daud, janah adi ikutkenndu Undang-undangKu ras ilakokenndu si enggo Kupedahken man bandu, la banci lang Kusehken padan si enggo Kubahan man bapandu Daud asum Kukataken man bana maka Israel la banci la tetap iperentah kesusurenna (ayat 4-5).
4.      Kata persinget Tuhan man raja Salomo, la saja lit dampak positif tapi pe lit dampak  negatif. Dampak negatif eme adi Salomo ras kesusurenna la patuh ras la ersembah man Tuhan, tapi ersembah man dibata-dibata sideban maka siterjadi eme la saja ngkenai Salomo ras kesusurenna, ibas hal enda lanai ngerajai bangsa Israel, tapi bangsa Israel pe ipelawes Dibata ibas taneh singgo iberekenna, taneh sisangana iiani bangsa Israel. Bagepe itadingken Tuhan  rumah pertoton e nari. Rumah pertoton e pagi runtuh. Jenari mamang ate kalak ngidah kejadin enda, sebab Dibata lanai ras bangsa Israel. Pasu-pasu Tuhan pe lanai ras bangsa Israel.
5.      Ate Dibata nandangi raja Salomo, bagepe bangsa Israel tetap ersembah man Tuhan saja. Tuhan singgo mbaba bangsa Israel ibas taneh Mesir nari.

APLIKASI
            Fungsi gereja eme ingan ersembah man Tuhan. Ibas rangka sie maka silitken alat-alat guna menunjang kebaktin, gelah kita si ku gereja tuhu-tuhu ersembah man Tuhan alu mehuli. Emaka alat-alat penunjang, mulai ibas gedung gereja, mimbar, bangku,  alat musik rsd merupaken sada hal siharus ijaga ras irawat. Tapi ibas kinatana, lit denga kita sikurang merawat iventaris gereja, sidungna mengganggu “kenyamanan” ibas ersembah man Tuhan. Ateta min ilitken kerina iventaris gelah kita selaku  ngawan niperpulungen ertutusna ersembah man Tuhan. Emaka mari sinen kerina barang-barang iventarista simerupaken sada hal si cukup penting ibas kita ersembah man Tuhan, emaka mari sirawat kerina iventaris si nggo lit, adi lit si nggo ceda harus sipekena/ganti. Jadi tanggungjawab guna ngerawat iventaris gereja la saja tanggungjawab serayan Tuhan, tapi kita kerina anggota ngawan. Adi enda sibahan kita, maka meriah ukur Tuhan sebab ingan kita ersembah tuhu-tuhu sirawat, emaka itatap ras ikawali Tuhan gereja e katawari pe.

Pdt. Steven Kumenit, STh. M.Min.
             

Selasa, 09 Juli 2013

"Kam Me Bangsa Sikerajangen Dibata" (1 Petrus 2:9-10).



BAHAN PJJ GEREJA GBKP
TANGGAL 14-20 JULI 2013.
1 PETRUS 2: 9 – 10.

Tema : “Kam Me Bangsa Sikerajangen Dibata”.

LATAR BELAKANG
1.      Secara umum banci sikataken maka surat Petrus enda ikirimkan khusus man kalak kristen si lit ibas taneh perlajangen i Pontus, Galatia, Kapadokia, Asia Kecil ras Bitinia. Janah tujun surat enda ibas rangka mpegegehi kiniteken perpulungen, sebab paksa sie kalak kristen sangana ndatken percuban sicukup mberat. Bagepe ibas rangka mereken motivasi selaku kalak kristen simbaru.
2.      Ibas bahan oratenta sekali enda, Petrus mereken sada pengangkan kerna hubungen perpulungen/kalak si tek ras Yesus, i ja kenca perpulungen nggo tek man Yesus berarti perpulungen lanai seri ras kalak Yahudi sinai nulak Yesus, tapi perpulungen nggo nggeluh ibas keselamaten, bagepe erkiteken tek man Yesus maka kalak si tek  enggo jadi bangsaNa. 
3.      Bangsa pilihen ras bangsa sibadia siimaksudken Petrus berbeda maknana ras bangsa pilihen si “isandang” bangsa Israel ndube. Memang nai bangsa Israel ipilih ras ipebadiaken  Tuhan  gelah bangsa Israel berbeda ras bangsa-bangsa sideban, janah tetap ngelakoken kai singena ate Tuhan. Tapi sienda la teridah bas bangsa Israel, bagepe ibas zaman Yesus, bangsa Israel (Yahudi), khususna imam-imam simbelin ras tua-tua agama Yahudi la ngaloken Yesus Kristus simerupaken Raja ibas kinirajaan Surga e. Erkiteken sie me ibuat Yesus KinirajaanNa ibas bangsa Israel (Yahudi) nari janah iberekenNa man ise saja si tek man baNa (band. Matius 21:43). Emaka makna bangsa pilihen,  imam-imam raja ras bangsa sikerajangen Dibata eme mbuka sada pengangkan kerna eksistensi simbaru nandangi kalak sitek man Yesus Kristus. Ija kalak si tek nggo iserapken ibas doni enda nari, emaka kalak sitek nggo nggeluh badia.  Kalak si tek nggo jadi sikerajangen Dibata, emaka salah sada fungsi kalak si tek eme harus jadi imam-imam nandangi Yesus sendiri, selaku Raja. Memang nai ibas bangsa Israel/Yahudi dahin imam harus ibas kesusuren suku Lewi nari, janah tugas imam eme selaku perantara antara umat ras Dibata. Imam me sinehken kurban persembahen man Dibata. Tapi ibas status kalak sitek selaku bangsa pilihen ras imam-imam raja, lanai bagi status si nai siharus mpersembahken asuh-asuhen selaku persembahen, tapi kalak sitek harus nehken persembahen puji-pujin man Dibata ras ndalanken kekelengen nandangi sapih-sapihna manusia. Enda ilakoken sebab Yesus Kristus nggo mpersembahken diriNa selaku persembahen simehuli guna keselamaten kerina manusia. Alu kata sideban, perpulungen njadiken Yesus Kristus selaku palas kiniteken emaka perpulungen jadi imam-imam si khusus si erdahin guna Tuhan. Maksudna arah lagu langkah simehuli siipimpin Kesah Si Badia, perpulungen ngasup ngelakoken simehuli singena ate Tuhan, janah enda me persembahen simehuli man Tuhan.
4.      Kalak si tek si lit ibas taneh perlajangen erkiteken Yesus  nggo jadi anak-anak Dibata. Emaka selaku anak tentuna dat bagin ibas kinirajan Dibata. Janah erkiteken nggo jadi anak-anak Dibata ras nggeluh ibas kinirajaan Dibata maka alu sendirina kalak sitek terhindar ibas penghukumen Dibata nari. Sebab nai ope denga Yesus mate ras nelamatken manusia, maka kegeluhen kalak si tek ndube ndauh ibas keselamaten sebab perbahanen-perbahanenna eme bodoh ras jahat.
5.      Perpulungen enggo ijadiken Dibata selaku bangsa pilihenNa, emaka tanggung jawab perpulungen eme naksiken kerna perkuah ate Dibata si mbelin e man kerina jelma.

APLIKASI
            Kita enda eme bagin si la terpisahken ibas gereja GBKP. GBKP eme gereja siidilo Tuhan guna ngelai i tengah-tengah doni enda gelah doni enda nggeluh ibas keselamaten.
            Kenca 51 tahun GBKP hadir ibas doni enda, maka pajek me gereja GBKP secara mandiri (GBKP njayo tahun 23 juli 1941), GBKP lanai tergantung man ise pe, termasuk organisasi pekabaran injil i luar negeri bagepe i bas negara Indonesia sendiri (mandiri/njayo secara dana, telogia ras daya). Ibas perdalanen GBKP seh genduari banci sikataken cukup sulit, tapi e banci iatasi gereja GBKP alu penemani Kesah Si Badia. Emaka gereja GBKP nggo cukup ikenal i luar negeri ras ibas negeri erkiteken keterlibaten gereja GBKP.
            Pelayanen gereja la banci ngadi, emaka kita selaku pelaku-pelaku Kata Dibata harus nehken pelayanen ibas doni enda. Sebab harus siteh maka kita enda bangsaNa guna mberitaken perbahanen-perbahanen Dibata si mbelin. Sinimaksudkenken perbahanen Dibata simbelin eme uga Dibata njadiken doni enda ras kerina isina alu kataNa, janah itamaken ku bas inganna alu mehuli. Bagepe erkiteken manusia nggo erdosa, emaka la erngadi-ngadi ipersingeti Tuhan kita gelah reh ku Ia mulihken, seh pe Ia nusur ku doni enda, Janah puncak keleng ate Tuhan eme Yesus Kristus mate I kayu persilang.  
            Uga penemani Kesah Si Badia man gereja GBKP, bage me penemaniNa man banta, emaka marilah kita tetap erdahin nehken pelayanen gelah reh teremna bangsaNa.


Pdt. Steven Kumenit, STh.M.Min.