Minggu, 29 September 2013

Bagi Tua-Tua Ridap, Reh Tuana Reh Gersingna (Lukas 2:25-29)


BAHAN PJJ GEREJA GBKP
TANGGAL 29 SEPTEMBER – 5 OKTOBER 2013.
Lukas 2: 25-29.

Tema : Bagi Tua-tua Ridap, Reh Tuana Reh Gersingna.

LATAR BELAKANG
1.      Ibas kegeluhen bangsa Yahudi lit sada peraturan agama siharus iikutina eme tep-tep anak dilaki siberumur walu wari harus isunatken (Kej.17: 11-12). Bagepe tep-tep anak sintua dilaki harus ipersembahken man Tuhan. Makna mpersembahken tep-tep anak sintua dilaki eme gelah anak sintua dilaki e nggo jadi sikerajangen Tuhan. Makna sideban eme sada ikaten perpadanen antara bangsa Israel ras Tuhan (band. Keluaran 34:10-19). Gelah bangsa Israel tetap jadi bangsa Dibata, janah Tuhan tetap jadi Tuhan bangsa Israel.
2.      Ibas rangka sie me maka Yusuf ras Maria selaku keluarga Yahudi sipatuh mbaba Yesus singgo berumur walu wari,  janah Yesus pe eme anak sintua dilaki ibas keluarga Yusuf ras Maria ku rumah pertoton guna mpersembahken Yesus man Tuhan. Ingan rumah pertoton enda i Yerusalem, sebab i je ringan Dibata.
3.      I Yerusalem lit sekalak bapa sibujur dingen sierkemalangen man Dibata eme Simeon. Ibas kegeluhenna ertima-tima ia kerna kerehen sekalak Mesias. Sebab memang ibas padan Dibata man bangsa Israel (Yahudi) reh me pagi sekalak penampat eme Mesias. Mesias enda me simereken keselamaten man bangsa Israel (band. Yesaya 40:1; 49:13; Miha 5:2-5).
4.      Erkiteken sie ipindokenna man Tuhan eme banci idahna Mesias gelah  malem atena  adi mate ia. Janah erpadan Tuhan man bana eme la ia mate ope denga iidahna Mesias. Emaka ibaba Kesah Dibata me si Simeon ku rumah pertoton janah erjumpa ia ras Yesus. Emaka minter ialo-alona Yesus janah ikataken bujur man Tuhan,  nina : genduari o Tuhan enggo isehkenNdu padanNdu, malem ateku aminna mate pe aku, sebab nggo kuidah alu matangku jine penampat sirehna ibas Kam nari. Enda me sada respon kiniteken Simeon man Tuhan. Sebab la kap mungkin itandaina Yesus selaku Mesias adi la ituduhken Kesah Dibata man bana.
5.      Adi siidah ibas ayat seterusna, kemalemen ate siicidahken Simeon kenca idahna Yesus ngataken maka kerehen Yesus labo saja guna keselamaten bangsa Israel (Yahudi), tapi pe man kerina bangsa. Emaka enda merupaken keleng ate Tuhan man kerina bangsa. Jadi lit keselamaten secara universal.

APLIKASI
            Salah sada tanggungjawab anak nandangi orang tua eme menghormati ras menghargai orang tua. Tanggungjawab enda la terbatas, tapi terus menerus seh orangtuanta idilo Dibata. Ibas kita menghhormati ras mengharagai orang tuanta, maka malem me ate orang tuanta e. Dampak ibas kita menghormati ras menghargai orang tuanta, eme kalak sideban menaruh hormat man banta. Situhuna ibas kita menghormati ras menghargai orang tuanta merupaken sada aplikasi ibas kekelengen silit bas kita. Alu bage ipasu-pasu Tuhan me kita.
            Memang salah sada kendala man banta ibas kita ngkelengi orang tuanta, tempa-tempa komunikasinta agak sulit (la nyambung), emaka mekatep orang tua ndarami kelompokna sendiri gelah ia banci ia ngerana-ngerana ras kelompokna e. Enda me sijadi pe i tengah-tengah gerejanta, emaka ibentuk sada kelompok PA lansia. Emaka kita selaku anak, adi nggo siteh lit PA lansia, maka simotivasiken orang tuanta gelah iikutkenna PA lansia. Alu bage ibas umurna singgo lansia erbagesna pengangkanna kerna kata Dibata, janah erdewasana nggeluh i tengah-tengah doni enda.

Pdt. Steven Kumenit, STh.M.Min.  

Kamis, 26 September 2013

Tetap Nggeluh Badia (Matius 25: 34-40)


BAHAN KHOTBAH GEREJA GBKP
TANGGAL 29 SEPTEMBER 2013.
 =========================================================================

Introitus    :    Ikutkenlah pedah-pedah e dingen jagalah gelah tetap bersih dingen la ceda, seh ku warina Tuhanta Jesus Kristus reh peduakaliken (1 Timotius 6:14).
Ogen         :    1 Timotius 6:11-19 (Anthiponal)
Khotbah    :    Matius 25 : 34-40 (Tunggal).
Tema         :    Tetap Nggeluh Badia.

LATAR BELAKANG
1.       Ibas kerehen Yesus Kristus peduakaliken ku doni enda radu ras penghakiman alu universal. La lit sitading ibas penghukumen e. Ibas penghakiman e, Yesus Kristus mpeserap kalak si setia ras kalak si la setia man Yesus, bagi sekalak permakan sinerapken biri-biri ras kambing ope denga bengket kubas karang. Biri-biri merupaken lambang nandangi kalak sitek man Yesus Kristus, sebab biri-biri e biakna patuh  man tuanna, janah biakna melemuk. Sedangken kambing merupaken lambang nandangi kalak si la tek man Yesus Kristus. Sebab kambing e mekeng (keras kepala), janah mesera man aturken, la nggit patuh man tuanna.
2.      Sijadi oratenta merupaken klimaks ibas pengajaren Yesus man ajar-ajarNa, janah penekanenna eme sedekah Yesus lanai ras ajar-ajar ibas doni enda maka ajar-ajar harus ndalanken perbahanen simehuli singena ate Dibata, sebab enda mpereh pasu-pasu Tuhan man bana. Tanggungjawab pelayanen ibas doni enda, khususna kerna keleng ate harus idalanken ajar-ajar.
3.      Yesus nuriken man ajar-ajarNa kerna siterjadi ibas wari pendungi, eme Ia sendiri sireh guna mengadili doni enda (manusia). Janah perbahanen simehuli mpereh keselamaten. Perbahanen simehuli e erkiteken buah ibas kinitekenna nari, labo erkiteken keterpaksaan. Sijadi perhatin eme kalak marginal (yang dipinggirken, sirusur la iperdiateken kalak). Ise simperdiateken kalak sibage, eme mere man simelihe, mereken ingan kesilang man kalak pertandang, mere uis man si la ruis,nandangi kalak sakit iadep-adep bagepe man kalak siipenjara, idahi. Enda merupaken perbahanen-perbahanen nandangi Yesus Kristus. Tapi sebalikna kalak sila ngelakoken sibage e me si la setia man Tuhan.
4.      Yesus menggambarkan, situhuna ibas kalak simenderita ije Ia hadir. Ntah pe Yesus nggeluh ersada ras kalak si nggeluh ibas perbeben ras kiniseran. Emaka perbahanen simehuli la banci pekulah-kulah, ntah pe ngenen status sosial, tapi harus ngenen perbahanen e tempa-tempa ngelai Yesus.
5.      Pemisahan biri-biri ku kemuhen, ngataken maka kalak si benar i lebe-lebe Yesus iperkenanken Yesus guna bengket kubas kinirajaan Surga, tapi kalak si la patuh ras la ndalanken perbahanen simehuli erpalasken keleng ate ibas Kristus nari, iambengken ku bas ingan penghukumen sila erkeri-kerin (kambing).

APLIKASI
            Nggeluh badia eme sada syarat kita banci nggeluh ras Tuhan, sebab Tuhan e badia (band. Imamat 19:2; 1 Petrus 1:16). Ibas rangka sie me maka ipebadiaken Tuhan kita arah Yesus i kayu persilang. Tapi amin gia kita nggo nggeluh badia, lit denga kuasa-kuasa doni enda siatena nirangken kita ras Yesus, siatena gelah kita lanai nggeluh ibas kebadiaan. Situhuna masalah sienda nggo iteh Yesus, emaka ope denga Ia sirang ras ajar-ajarNa, ertoto Yesus gelah BapaNa sinisurga ngkawali ajar-ajarNa ibas sijahat nari (band. Yoh.17:15). Erkiteken sie me Kesah Si Badia nampati kita gelah kita tetap nggeluh badia. Tentuna penampat Tuhan ibutuhkenken, tapi peranan kita pe harus lit. Ibas erti kata lit min “upayanta” guna ngelawan kuasa jahat. Sebab adi lang, kita tetap nggeluh ibas dosa, sebab sibaba dirinta ikut sura-sura daging. Emaka gelah  sura-sura-sura daging, ntah pe kuasa jahat banci sisimbaki eme egois, la lit kekelengen, cian ate, cekurak, merangap nandangi duit, rsd maka siharus lit bas kita eme 1). Berusaha ndalanken kai singena ate Tuhan. 2).  Tutus ersembah man baNa. 3). Tetap ernalem man baNa. 4). Erlumbahlah asa gegehta ibas kiniteken gelah sidat kegeluhen situhu-tuhu e. 5). Ikutkenlah pedah-pedah Tuhan. 6). Jagalah gelah kita tetap bersih. 7). Akuilah kuasa Tuhan (band. Ogenta). Alu bage maka ibas wari kerehen Yesus Kristus pagi, kita tetap ngeluh ibas kebadiaan, emaka ingan kemuhen me inganta eme sada ingan sisenang, sada ingan siterang.

Pdt. Steven Kumenit, STh.M.Min.
           

Kamis, 19 September 2013

Kesah Si Badia Nampati Kita Ibas Ertoto (Roma 8:26-30)


SERMON PEKAN DOA
GEREJA GBKP
WARI VII, SABTU 28 SEPTEMBER 2013
Introitus   : Erpagi-pagi si lampas idengkehkenndu sorangku; sanga pultak matawari ertoto aku man baNdu jenari o TUHAN , kutimai jabapNdu (Mazmur 5:4).
Ogen        :    2 Samuel 23:1-5.
Khotbah   :    Roma 8:26-30.
Tema        :    Kesah Si Badia Nampati Kita Ibas Ertoto.

LATAR BELAKANG
1.   Secara umum bahan khotbahta sekali enda eme sada bagin sila terpisahken ibas ayat 18 nari singerana kerna makna pengarapen anak-anak Dibata. Anak-anak Dibata amin gia nggeluh ibas perbeben ras kiniseran tetap denga erpengarapen man Yesus Kristus. Janah amin gia anak-anak Dibata nggeluh ibas kiniseran, tapi la banci putus asa, sebab Kesah Si Badia nampati kalak si tek guna ertoto man Tuhan, emaka kalak si tek nggeluh megegeh ras tetap ibas pengarapen man Tuhan. Jadi amin gia mberat siakap geluhta, seh pe lanai ngasup kita ertoto man Tuhan, tapi erkiteken Kesah Si Badia isampatina kita she kita ngasup ertoto man Tuhan. Arah sienda ikataken Kesah Si Badia ertoto guna kita. Jadi Kesah Si Badia erdahin man kalak si la ngasup “menemukan” kata-kata sipayo guna ertoto.
2.   Enda ikataken Paulus sebab guna njawab persoalen siberkembang paksa sie, khususna “ejekan” kalak Yahudi nari man kalak si tek man Yesus Kristus. Nina : adi Mesias nggo reh, bagepe adi hukumen Dibata lanai lit man kalak si tek janah kalak sitek nggo nggeluh ibas kegeluhen simbaru, ngkai lit denga kiniseran man kalak kristen ? Nina Paulus kiniseran lit nge, tapi kiniseran e la sebanding ras kemalemen ate siipetangkas pagi Dibata man kalak si tek. Emaka man kalak kristen harus tetap nggeluh ibas pengarapen amin gia lit kiniseran.
3.   Ibas Kesah Si Badia ertoto, ate Kesah Si Badia gelah kita banci pulah ibas kiniseran nari, janah e Tuhan ngenca si banci mulahisa. Emaka pertoton e ialamatken ku Tuhan saja. Alu bage Kesah Si Badia mbentengi kita, gelah kalak sitek la ndabuh ku bas dosa. Sebab banci saja erkiteken berat siakap erkiteken kiniseran, maka kalak si tek la nai ernalem man Tuhan, kalak si tek nggo nggeluh ibas dosa.
4.  Erkiteken Kesah Si Badia ertoto guna kita, maka reh Dibata ngenen pusuh kalak sitek, emaka isampatiNa kalak si tek guna mbebasken kita ibas kiniseran nari. Janah enda sura-sura Paulus gelah perpulungen Roma meteh ise kin Dibata e. Janah enda pe sekaligus mereken pergegeh ras tetap termotivasi jadi anak-anak Dibata amin gia jumpa perbeben ras kiniseran e.  Siimaksudken Paulus eme Dibata erdahin man kalak si tek ibas kerina paksa, janah pendahinNa mpereh kiniulin man kalak sitek eme keselamatan, janah enda ikhususken man kalak siipilih Tuhan saja.
5.   Kalak sitek la perlu mbiar sebab Dibata tetap nemanisa arah Kesah Si Badia, alu bage kalak si tek jadi seri ras tempas Yesus Kristus. Alu bage kalak si tek pe pagi ipermuliaken Tuhan.

APLIKASI
            Salah sada bentuk kita nggeluh ibas persadan ras Yesus eme arah ertoto, sebab adi ertoto maka kita tetap nggeluh ibas komunikasi ras Tuhan. Janah ibas ertoto pe kita banci mpeseh sura-suranta ras mindo penampat man Tuhan. Tapi sisadari erkiteken kelemahan manusia maka mekatep kita la ngasup ertoto man Tuhan, janah biasana e jadi paksa kita nggeluh ibas perbeben. Sebab ibas kita nggeluh ibas perbeben mekatep lanai kita ngasup ertoto man Tuhan, si jadi eme kita mindo penampat man doni enda. Ibas khotbanta je ngerana maka Tuhan erdahin ibas kerina paksa, janah arah kesah Si Badia ateNa gelah kita nggeluh ibas persadan, emaka Kesah Si Badia nampati kita ertoto mindo penampat man Tuhan. Enda banci jadi adi memang kita tetap tutus ras erpengarapen man Tuhan. Kegeluhenta pe nggit ipinpin Kesah Si Badia.
 Bagepe gelah kita tetap nggeluh ibas persadan ras Tuhan marilah kita tetap ertoto man Tuhan.

Pdt. Steven Kumenit, STh.M.Min.
           

Kesah Si Badia Mereken Kuasa Ras Gegeh Naksiken Kebenaren Dibata (Yohanes 16:12-15)


PEKAN DOA
GEREJA GBKP
WARI VI, JUMAT 27 SEPTEMBER 2013.
Introitus   :    Tapi ialokenndu pagi gegeh asum Kesah Si Badia seh man bandu. Janah kam me pagi naksiken kerna Aku man kalak si deban, i Jerusalem, i daerah Judea ras Samaria seh ku belang-belang doni enda." (Perbahanen 1:8)
Ogen        :    Yesaya 11:1-5.
Khotbah   :    Yohanes 16:12-15.
Tema        :    Kesah Si Badia Mereken Kuasa Ras Gegeh Naksiken Kebenaren Dibata.

LATAR BELAKANG
1.   Sijadi bahan khotbahta sekali enda eme mpebetehken maka waktu Yesus ras ajar-ajarNa lanai ndekah ibas doni enda. Yesus harus nadingken ajar-ajar, tapi melala denga si lenga ngasup iangkai ajar-ajar, tapi kenca reh pagi Kesah Si badia iangkai ajar-ajar me kerna kai siikatakenNa, khususna kerna kebenaren Dibata. Ajar-ajar ngasup ngakaisa erkite-kiteken iajari ras ipetangkas Kesah Si Badia. Jadi gelah tangkas man ajar-ajar kerna kebenaren situhu-tuhu, Yesus Kristus ngerana arah Kesah Si Badia.
2.   Kesah Si Badia sinandangi reh ertujun nampati ajar-ajar guna ngangkai kerna kai sisedekah enda isalah ertiken doni enda, khususna kerna dosa ras kebenaren. Dosa nggeluh man manusia erkite-kiteken itulakna Yesus Kristus, sebab ibas pengangkan kalak Yahudi (pemimpin-pemimpin agama kalak Yahudi, imam-imam kepala ras kalak Farisi), Yesus labo Mesias. Ibas pengangkan sibage maka kalak Yahudi menolak kebenaren ibas Tuhan nari, emaka erdosa me ia.
3.   Ibas rangka sie, tugas ras tanggungjawab ajar-ajar eme mberitaken kerna kebenaren situhu-tuhu, janah Kesah Si Badia nampati ajar-ajar gelah doni enda jera ibas dosa nari. Sebab kai siikataken Kesah Si Badia tuhu-tuhu ibas Dibata nari. Jadi la ipesehna man ajar-ajar alu rate-ate. Bagepe pendahin Kesah Si Badia ngataken kai sinandangi reh eme kerna keselamatan ras penghakiman.
4.   Ajar-ajar iajari uga naksiken kerna kebenaren situhu-tuhu, khususna kerna Yesus eme Tuhan. Sebab Tuhan ras Yesus eme sada, erkiteken kai sikerajangen Dibata, e kang sikerajangen Yesus, emaka kai siikataken Kesah Si Badia ibas Yesus nari. Alu bage erkiteken pendahin ajar-ajar siipinpin Kesah Si Badia Yesus Kristus imuliaken. Jadi pendahin Kesah Si Badia man kalak si tek eme 1). Minpin ibas kebenaren situhu-tuhu. 2). La ngerana alu rate-ate. 3). Mberitaken kerna sinandangi reh.
5.   Ikateken Yesus enda gelah ajar-ajar nggeluh ibas ketetapen ukur ibas mberitaken kerna kebenaren situhu-tuhu eme Yesus Kristus eme Mesias siipadanken Tuhan.

APLIKASI
            Kita selaku kalak si tek man Yesus Kristus idilo ras itempatken ibas doni enda ibas rangka naksiken kerna Yesus Kristus eme Tuhan ras juru selamat manusia. Guna naksiken sie, tentuna melala tantangan sibanci ijumpai kita, sebab doni enda la bo ngasup ngaloken kita. Itulakna Yesus berarti itulakna kita.
            Tugasta selaku kalak si tek eme ncidahken kebenaren situhu-tuhu man doni enda gelah doni enda terkelin. Guna sie Kesah Si Badia mpengasup kita guna ndahiken dahin e. Sebab perlu siteh kebenaren doni la seri ras kebenaren Tuhan. Kebenaren doni bertentangen ras kebenaren Tuhan. Emaka ndalanken kebenaren doni berarti kita nggeluh ibas dosa. Adi nggeluh kita ibas dosa maka ibas kerehenNa pagi kita iserapken arah kawes, i je me penghukumen nandangi kalak sierdosa.  
              Tantangan lit man kalak si tek ras setia man Tuhan, tapi tantangan e la lit ertina man kalak sitek sebab Kesah Si Badia ras kita. Janah erkiteken Kesah Si Badia ras kita, maka la kita mbiar nehken kebenaren Tuhan man doni enda gelah talu kebenaren doni. Alu bage doni enda nggeluh ibas pemerentahen Yesus Kristus.

Pdt. Steven Kumenit, STh.M.Min.