Selasa, 29 Oktober 2013

Ersenina Turang Ibas Gelar Yesus (Markus 3: 31-35).


BAHAN KHOTBAH TANGGAL 3 NOPEMBER 2013
GEREJA GBKP
Intoitus    :    Dame si ibereken Kristus i bas pusuhndu min si ngajari kam i bas erbahan keputusen-keputusenndu (Kolose 3:15a).
Ogen        :    Kolose 3:12-14 (Responsoria)
Khotbah   :    Markus 3:31-35 (Tunggal)
Tema        :    Ersenina Turang Ibas Gelar Yesus.

LATAR BELAKANG
1.      Adi sioge ope denga bahan oratenta, maka i je lit sada tuduhen siikataken guru-guru agama paksa Yesus pepalem ras pelawes setan, eme make kuasa Baalsebul. Ibas tuduhen e ngerana Yesus guna mereken sada pengangkan sekaligus ngajari jelma sinterem kerna kuasa kai siipakeNa ras perbahanen siilakoken Yesus labo erkiteken ia iseluki setan.
2.      Sangana Yesus mereken sada pengangkan man guru-guru agama reh me nande Yesus ras seninana guna ndilo Ia, tapi erkiteken ibas rumah e nterem jelma maka nande Yesus ras senina-seninaNa la jumpa ras Yesus, tapi lit singatakenca man Yesus, nandeNa ras senina-seninana sangana nimai i darat. Tapi kai jawab Yesus eme nandengku ras seninangku eme ise sinehken peraten Dibata. Jawaban ntah pe perkataken Yesus kerna nande ras seninaNa eme sinehken peraten Tuhan, labo berarti Yesus la nghamati nande ras seninaNa, tapi ate Yesus ncidahken pendahin keselamaten lebih penting asangken kewajiban sekalak anak nandangi nandena. Sebab adi iikutken Yesus sura-sura nandeNa ras senina-seninaNa, berarti pendahin keselamaten teralang/terhambat erkiteken salah pengangkan kerna kuasa si lit bas Ia, bagepe kearun ate ras kebiaren si lit bas nandeNa ras senina-seninaNa (nen = ayat 21).
3.       Ibas perkataan Yesus kerna relasi simbaru ibas ikataken keluarga ngatakenca maka relasi siterjadi erkiteken Tuhan gegehen asangken relasi bilogis ibas keluarga. Emaka ula erkiteken relasi bialogis mbeneken keselamaten sisangana idahiken Yesus ku doni enda. Bagepe Yesus mereken sada pengangkan man jelma sinterem eme pentingna hubungan rohani ras Ia.
4.       Nehken peraten Tuhan berarti nggeluh ibas persadan keluarga ras Yesus. Berati nggeluh ibas Kinirajaan Dibata, sebab sentral ibas kinirajaan Dibata eme ibas Yesus Kristus. Jadi nggeluh selaku keluarga Kristus la terjeng megi kai siikataken Yesus tapi ndalanken ibas kerina kegeluhen tep-tep wari, enda me siikataken nehken peraten Tuhan. Bagepe nehken peraten Tuhan berarti sada paksa harus jumpa masalah (tuduhen ras konspirasi, rsd) guna mengagalken pendahin keselamaten ibas doni enda.
5.      Ipihak sideban nehken peraten Tuhan berarti ngakui maka Yesus eme Mesias. Sebab paksa sie, khususna guru-guru agama la ngakui Yesus e Mesias. Emaka mujizat-mujizat siilakoken Yesus akapna labo ibas kuasa Dibata nari, tapi kuasa baalsebul. Bagepe idaramina kesalahan-kesalahan Yesus guna jadi alasan maka Yesus ihukum.

APLIKASI
            Adi siperdiateken kerna bahan khotbahnta, Yesus tetap ngakui lit ikaten keluarga secara biologis, saja ula min erkiteken ikataken keluarga secara biologis e erbahanca dahin keselamaten ibas doni enda teralang. Tapi justru ikataken keluarga secara biologis harus ikut muat bagin ibas pelayanen keselamaten i tengah-tengah doni enda.
            Ikaten keluarga simbaru siiciptaken Yesus lebih mpegegehi ikataken keluarga secara biologis, sebab i je harus mprakteken kekelengen simurni eme nggeluh sikeleng-kelengen, sisampat-sampaten, nggeluh ibas meteruk ukur, sialem-alemen salah ras la percian, rsd (band. Kolose 3:12-14). Bagepe la saja terjeng sada keluarga secara biologis, tapi pe ibas sada keluarga sitek man Yesus Kristus. Kalak sitek man Yesus Kristus alu sendirina nggeluh ibas ersenina ras turang, emaka selaku keluarga lanai lit perbedaan SARA tapi kerina kita idilo guna tetap nehken peraten Tuhan. Emaka adi endalah silakoken maka si jadi eme kita kerina nggeluh ibas kedamen ras keharmonisan. La lit perubaten ibas gereja. Adi lit maka ras-ras saling memaafken sada ras sidebanna.

Pdt. Steven Kumenit, STh.M.Min. 

Dibata Me Singasuhi Kita (1 Raja-Raja 17:8-24)


BAHAN PJJ GEREJA GBKP
TANGGAL 3 – 9 NOPEMBER 2013.
1 Raja-Raja 17:8-24.

Tema : Dibata Me Singasuhi Kita.

LATAR BELAKANG
1.      Salah sada larangan man bangsa Israel eme Kalak Israel (sidilaki) la banci muat diberu si la bo kalak Israel. Enda ilarang gelah la terjadi kawin campur sierbahanca kiniteken kalak Israel ternggangu bagepe ceda. Perentah enda berlaku man kerina jelma, termasuk pe man raja. Tapi perentah Tuhan  enda ilanggar raja Ahab.  Raja Ahab erjabu ras sekalak diberu kalak Kanaan, Izebel. Janah raja Ahab pe enggo ikuasai diberuna, emaka dibata siisembah ndeharana eme siikembangken i tengah-tengah bangsa Isreal, erkiteken sie me merawa Tuhan.
2.      Erkiteken sie ipake Tuhan si Elia jadi nabiNa guna mpeseh penghukuman man bangsa Israel. Penghukuman Tuhan eme terjadina kelegon sedekah  dua seh telu tahun, sierbahanca tanah jadi kerah ras la banci menghasilkan. Sinuan-sinuan la turah (mate). Erkiteken sie merawa raja Ahab, janah atena munuh Elia. Tapi Elia ilindungi Tuhan emaka isuruh Tuhan nabi Elia guna cebuni, seh ku kuta Sarpat (nen : daerah ndehara raja Ahab) . Kepeken ije enggo lit siisuruh Tuhan guna nampati Elia eme diberu balu-balu si lit i kuta Sarpat, janah ibas kekurangenna pe iberekenna nge kai siipindo Elia (roti). Tapi ibas kekurangen si lit e dungna ipebue Tuhan roti persediaan diberu balu-balu e.
3.      Ibas sada paksa sakit anak dilaki diberu balu-balu e, dungna mate. Ibas kematen anak e, diberu balu-balu enda erpengakap maka kerina enda erkiteken kerehen Elia. Ibas kerehen Elia e, iakapna Dibata nginget mulihi kerna dosa-dosana maka anakna mate. Tapi kenca ipindo Elia anak diberu balu-balu e, janah ertoto Elia man Tuhan, maka nggeluh me mulihi anak e.
4.      Dibata sipegeluhken anak diberu balu-balu e, janah ngatakenca maka Dibata siisembah Elia berbeda ras dibata kalak Sarpat. Adi dibata kalak Sarpat la bo ngasup pegeluhken kalak singgo mate, tapi Dibata siisembah Elia ngasup. Ibas mujizat siibahan Elia enda me mpeturah sada pengakun man diberu-balu-balu maka itehna Elia eme nabi mbelin siisuruh Tuhan, janah Tuhan ras Elia kap. 
5.      Ibas perjumpaan Elia ras diberu balu-balu enda lit terjadi dua mujizat eme erbanhanca cukup si lit bas diberu balu-balu e roti ras mpegeluhken anak singgo mate ngataken maka Dibata e Dibata sierkuasa. Dibata e, Dibata sinjaga kalak siipilihNa (nen = Elia, Diberu balu-balu ras anak e kalak  siipilih Tuhan).

APLIKASI
            Adi siperdiateken ibas penciptaan Tuhan maka siidah i je, kenca Tuhan njadiken manusia, maka itaruhken Tuhan manusia e ku peken Eden, janah i je iasuhi Tuhan ia alu erbage-bage pangan ras inemen.
            Pemeliharaan Tuhan man manusia tinepaNa la erpeltep-peltep. Seh geduari iasuhiNa nge kita kerina. Enda ilakoken Tuhan erkiteken keleng ateNa man banta.
            Memang ibas kegeluhenta mekatep nge kita jumpa perbeben ras kiniseran, tapi ula kita mbiar, adi kita ipilihNa maka tentuna iasuhiNa nge kita. Emaka sipaling penting man banta eme geluhta harus “bersandar ras bergantung” man Tuhan saja.
            Mekatep ibas penggejapen kurang siakap rusur persedian ibas rumahta maka la bo pang kita mere man kalak. Adi sinen ibas oratenta, persediaan keluarga diberu balu-balu e memang kurang, tapi erkiteken guna nampati maka iberekenna nge persediaan keluargana e, emaka sijadi eme ipasu-pasu Tuhan keluarga diberu balu-balu e alu ncukupi persediaan pangan. Emaka kita pe amin gia sangana “lego” perekonomianta, ula kita jadi kalak sipelit mere guna nampati kalak sideban, teklah Dibata pasti nampati kita. Perlu siteh nampati kalak sideban labo inen arah jumlah nominalna, tapi uga kita banci nampati kalak sideban, janah kita harus tek, enda kerina bekas pilihen Tuhan.
            Alfa Omega eme sada unit pelayanan diakonia GBKP, sada unit simelayani man anak-anak penyandang cacat. Tentuna anak-anakta enda terus membutuhken pelayanen simaksimal. Emaka kita selaku anak-anak Dibata, nggo itetapken Tuhan gelah kita harus ikut muat bagin nampati anak-anakta silit i Alfa Omega.

Pdt. Steven Kumenit, STh.M.Min.


Selasa, 22 Oktober 2013

Ergailah Diberu (Rut 3:1-18)


BAHAN PJJ GEREJA GBKP
TANGGAL 26 OKTOBER – 2 NOPEMBER 2013
Rut 3: 1-18.

Tema : Ergailah Diberu

LATAR BELAKANG
1.      Amin gia Rut tading i Betlehem, Yehuda (Israel), tapi situhuna ia labo penduduk asli i je. Situhuna Rut penduduk asli bangsa Moab, tapi erkiteken Rut erjabu ras Mahlon anak Elimelek ras Naomi, ijadikenna dirina “kalak Israel”, emaka kenca perbulangenna mate nggit ia ikut ras bibina, Naomi mulih ku Betlehem. i Betlehem Rut tetap ngikuti agama ras budaya Israel.
2.      I Betlehem gelar Rut nggo terberita, la sajakerna ngikutken agama ras budaya Israel tapi kesetiaanna nandangi bibina, Naomi, emaka ngena ate kalak Betlehem man Rut.
3.      Amin gia ibas budaya Israel sekalak diberu balu-balu ndatken perhatin guna isampati, tapi situhu secara umum labo mehuli kal nggeluh sekalak diberu balu-balu, sebab sekalak diberu balu-balu  mesera kal akapna ncukupi keperlun geluhna, hakna pe la lit, emaka adi lit erta siitadingken perbulangenna ndube, maka erta e pe nusur ku anak dilaki, emaka sekalak diberu balu-balu isaranken kal guna erjabu mulihi. Janah ibas budaya Israel banci nge senina ntah pe kade-kade perbulangenna sindeherna ngempoi ia. Em sebabna sanga ate Naomi mulih ku Betlehem ibas tanah Moab nari isuruhna Rut ras Orpa  mulihken ku kutana gelah banci ia erjabu mulihi sebab Naomi nggo metua ras labo nari mungkin ndatken sekalak anak dilaki, adi pe banci umurna pe nggo ndauh kal bedana, emaka labo mungkin erjabu ras orpa ntah pe Rut.
4.      Ibas pengangkan sibage me maka ersura-sura kal Naomi gelah Rut erjabu maka  meriah ukur Rut. Emaka isuruhna Rut ku Ingan Boas, sebab Boas eme keluarga Naomi janah ibas garis keluarga, Boas me salah sada sibanci ngempoi Rut. Isuruh Naomi si Rut gelah  Ridi, minaki daging salu minak wangi si merim, janah pakelah uis si mejilena. Kenca bage dahi Boas ku inganna ngerik, tapi jaga maka ola itandaina kam, seh ia enggo elah man. Pepayo i ja ia medem, janah kenca ia tertunduh, talangi cabinna, jenari pedemken arah nahena. Emaka ia kari ngatakenca kai si man bahanen tole. Engkai isuruh Naomi paksa ngerik, sebab i je paksana juma boasl rani dingen dat hasil, emaka i je paksana meriah ukur Boas. 
5.      Kai siikataken Bibina, Naomi ilakoken Rut, emaka paksa Boas medem ndeher ingan pengerikan gandum, manjar-anjar ideheri Rut ia, janah italangina cabin Boas janah medem Rut arah nahe Boas. Ibas tengah berngi medak Boas janah sengget ia ngidah lit sekalak diberu, emaka isungkun Boas ise kam. Erjabab Rut nina aku kalak sila metunnggung kap kade-kade kami sibanci jadi penebus kami. Memang secara garis keluarga Boas eme salah sada kalak sibanci jadi pelindung, tapi ibas budaya Israel harus siterdeherna lebe ngempoi sekalak diberu siitadingken seninana, emaka nina Boas ku sungkun lebe siterdeheren asangken aku, adi la ia nggit maka aku singempoi kam, emaka ula aru atendu kerna sie. Kai siikataken Boas man Rut, ikataken Rut ka man bibina, Naomi, emaka nina bibina, Naomi sitimailah, sebab pasti idungi Boas nge persoalen enda.

APLIKASI
            Adi sinen ibas berita-berita selain ncidahken maka sekalak diberu nggo banci bersaing ras dilaki ibas kerina profesi, tapi pe iberitaken ka nge kerna lit denga diberu sirusur ndatken perlakuan si lamehuli, maka siidah melala kekerasan siterjadi nandangi diberu, subuk ibas masyarakat terjadi pelecehan-pelecehan ras pe kekerasan, bagepe ibas keluarga terjadi kekerasan ibas rumah tangga. Emaka teridah tempa-tempa sekalak diberu la lit ertina man dilaki. Erkiteken sie me ibas rangka njaga martabat ras hak-hak azasi sekalak diberu, melala genduari ibahan perlindungen-perlindungen man diberu, misalna i kereta api nggo lit gerbong khusus diberu, bagepe nggo lit komisi Nasional (Komnas) Perempuan situhu-tuhu njaga martabat sekalak diberu. Bagepe ibas tingkat internasional nggo ibahan me deklarasi PBB : Segala bentuk kekerasan berbasis jender yang berakibat atau mungkin berakibat, menyakiti secara fisik, seksual, mental atau penderitaan terhadap perempuan ; termasuk ancaman dari tindakan tsb, pemaksaan atau perampasan semena-mena kebebasan, baik yang terjadi dilingkungan masyarakat maupun dalam kehidupan pribadi. (Deklarasi PBB tentang anti kekerasan terhadap perempuan pasal 1, 1983).
Kita selaku kalak kristen harus siinget sekalak diberu, ibuat ibas tulang rangrang sidilaki, jadi sekalak diberu eme bagin ibas dilaki nari, emaka adi lit dilaki la ngkelengi ras ngergai diberu berarti la bo ikelengina dirina sendiri, bagepe ia nggo ngelanggar hukum kekelengen ras la ngergai Tuhan. Sebab ate Tuhan subuk dilaki bagepe diberu harus nggeluh harmonis. Emaka marilah kaum sidilaki ngergai si diberu gelah kegeluhen sekalak dilaki pe iergai masyarakat, terlebih Tuhan.

Pdt. Steven Kumenit, STh.M.Min.


Selasa, 15 Oktober 2013

Jadi Pancur Kegeluhen Ibas Kristus (1 Korintus 9:14-19)


BAHAN PJJ GEREJA GBKP
TANGGAL 20 – 26 OKTOBER 2013
1 KORINTI 9 : 14 – 19.

Tema : Jadi Pancur Kegeluhen Ibas Kristus.

LATAR BELAKANG
1.      Kenca Paulus jadi rasul, maka Paulus lebih fokus ntah pe konsentrasi nehken Berita  keselamaten nandangi kalak si la bo kalak Yahudi, termasuk kota Korinti. Tapi kepeken dahin selaku rasul bagi Paulus la bo sada hal simesukah, sebab mbue kal tantanganna, labo saja kerna kai siiberitakenna, tapi pe kerina eksistensi kerasulenna jadi persoalan, khususna man kalak Yahudi, janah eme sijadi persoalen ibas oratenta sekali enda.
2.      Ibas persoalen siihadapi Rasul Paulus, lit kelompok simenghasut perpulungen alu ngataken maka Paulus labo rasul janah dahinna mberitaken Berita si Meriah ibas rangka ndarami upah. Jadi labo merupaken keterpanggilen simurni.
3.      Tuduhen-tuduhen sibage ilurusken Paulus alu apologetna, gelah perpulungen la salah  memahami kerna kerasulenna ras eksistensina selaku rasul Kristus. Ibas apologetna (pembelaan Paulus), nina Paulus, kerasulenna eme tuhu. Paulus idilo Tuhan sendiri paksa ia ngayaki pengikut Yesus Kristus ku Damaskus.  Sebab sijadi pertimbangen sebage rasul adi ia enggo jumpa ras Yesus Kristus. Bagepe situhuna wajar nge ia dat upah ibas pelayanenna e, janah enda labo merupaken sada alasen guna memegahken diri sendiri. Tapi hakna e pe la ibuatna. Tapi justru hakna e berbeda ras pemberita-pemberita sideban sikin ndarami upah arah pelayanenna e. Tapi upah Paulus eme, tetap meriah ukur nehken Berita si Meriah man kerina jelma, gelah manusia e terselamatken.
4.      Apologet Paulus enda sekaligus ngajari kelompok sinerang ia, alu menekankan uga pentingna nehken Berita si meriah alu pendilo simurni. Upah penting tapi i das kerina e eme nehken Berita si Meriah ibas rangka keselamaten kerina jelma.
5.      Adi ialoken Paulus upah arah ia nehken Berita Simeriah, situhuna e merupaken sada kewajaren, sebab wajar nge kalak dat upah arah sie, janah eme perintah Tuhan sendiri (band. Matius 10:10; Lukas 10:7).

APLIKASI
            Kita jadi kristen berarti kita harus nehken kekelengen Dibata nandangi kalak sideban. Perbahanen sibage alu sederhana ikataken, kita harus jadi pancur nandangi kalak sideban.
            Lit piga-piga bentuk kita jadi pancur nandangi kalak sideban : 1). Arah perbahanen siilakoken kita. Kalak sideban banci meteh erti perbahanen simehuli singena ate Tuhan arah lagu langkahta. Moralta simehuli ngataken maka kita enda ngangkai alu payo kerna undang-undang Tuhan. 2). Nehken kekelengen nandangi kalak sideban. Kalak sideban banci ngataken bujur man Tuhan erkiteken lit perbahanen keleng ate siibahan kita nandangi kalak sideban. 3). Mediate ras erdiate man kalak sideban. Adi lit keluarga sideban ibas masalah, kita selaku keluarga kristen harus nampati ia. Mereken serpang pulah gelah keluarga e banci pulah ibas perbebenna.
            Kita banci jadi pancur kegeluhen Kristus nandangi kalak sideban adi sitehlah kerna eksistensinta. Kita enda nggo iselamatken Tuhan arah pengorbanan Yesus i kayu persilang. Jadi idilo ras ipake Yesus kita guna nelamatken kalak sideban. Emaka sura-sura Yesus enda harus siterusken man kalak sideban.
            Ibas kita jadi pancur kegeluhen Kristus nandangi kalak sideban, kita harus ngataken bujur, sebab ise kin kita enda maka ipilih Tuhan kita jadi pancurNa. Emaka marilah kita selaku keluarga nggeluh selaku pancur kegeluhen Kristus, emaka selaku keluarga kristen siharus ilakoken i tengah-tengah keluarga eme nggeluh sada arih (harmonis) ras nggit nampati keluarga sideban.

Pdt. Steven Kumenit, STh.M.Min.