Pindolah Kepentaren Dibata Ibas Perencanaan Kegeluhen (Amsal 20:18; Yakobus 4:13-17).

                                                      BAHAN PJJ GEREJA GBKP

                                                 TANGGAL 3 – 9 FEBRUARI 2013.

                                                 Kuan-Kuanen 20:18; Yakup 4:13-17.

Tema : Pindolah Kepentaren Dibata Ibas Perencanaan Kegeluhen.

LATAR BELAKANG.

A.    Kuan-Kuanen 20:18.

1. Sijadi bahan oratenta sendah eme salah sada bagin siisuratken raja Salomo nari. Raja Salomo eme raja si dem alu kepentaren, janah kepentarenna rehna ibas Dibata nari. Salomo erpenggejapen sia-sia me kegeluhen enda adi kepentaren ibas Dibata nari la ngerajai pusuhna. Erkiteken sie me ipindo raja Salomo kepentaren man Tuhan (band. 1 Raja-Raja 3:9).
2. Raja Salomo mereken kepentaren uga maka sekalak jelma banci berhasil ibas kegeluhenna. Keberhasilan i jenda itentukan arah perencanaan simehuli. Erkiteken sie me nina raja Salomo, ope denga erbahan sada keputusen pindo lebe  pedah, ola lebe lawes erperang adi lenga ibahanndu rencana. Man raja Salomo pedah ras rancangen merupaken sada kunci ibas manusia ngelakoken aktivitasna. Pindolah pedah, siimaksudken Salomo i jenda eme  sekalak harus mindo pedah man sesekalak guru ntah pe kalak si lebih dewasa ntah pe si lebih erpengalaman ibas kegeluhen enda, sebab kalak si bage nggo tehna kai siharus idalankenna. Kegagalan ibas kegeluhen jadi erkiteken la litna perencanaan. Jadi rencana e banci terlaksana alu mehuli adi lit pertimbangen si mehuli (matang).

B.     Jakup 4:13-17.

1. Ibas bahan oratenta sendah merupaken sada petuah ntah pe nasehat, memang petuah enda tempa-tempa guna kalak siperbinaga saja, tapi situhuna itujuken nge man kerina kalak sitek, sebab enda merupaken salah sada prinsip kegeluhen kalak si tek.
2. Kegeluhen ibas doni enda (kalak kristen), la bo manusia sinentukenca, tapi Tuhan, emaka manusia harus min nggeluh ibas kiniteruken ukur. Emaka seharusna min kegeluhen manusia (kalak si tek) harus nggeluh ibas ketergantungen man Tuhan. Kegeluhen kalak si tek harus tetap melibatkan Tuhan, sebab wari-wari enda Tuhan kap siempuna, janah man manusia wari sipepagi e, kerina rahasia denga. La bo iteh manusia kai si jadi ibas wari sipepagi, banci nge berhasil, tapi banci saja gagal, tapi kerina enda la bo manusia sinentukenca.
3. Manusia la banci ngaturken kai si banci terjadi ibas kegeluhenna. Memang kepercayaan diri e perlu dingen mehuli, tapi adi nggo mengandalkan keegoisan ras kininganjangen ukur,  i ja tempa-tempa manusia me sinentukan wari-wari kegeluhenna, termasuk pe keberhasilanna maka keberdosaan me siilakoken manusia e. Emaka Jakup mereken sada nasehat gelah ibas kerina rencana manusia, manusia harus mereken ingan man Tuhan gelah Tuhan singerajai pusuh peratenna, alu bage subuk ibas perencanaan bagepe muat keptusen kerina e haruslah erpalasken Tuhan.

APLIKASI

            Ibas kegeluhenta, subuk secara pribadi, keluarga bagepe ibas organisasi lit nge sura-suranta ntah pe rencana-rencananta. Memang harus siteh kesuksesan ras keberhasilan berawal alu litna sura-sura. Kenca lit sura-sura, langkah sipeduaken eme nusun rencana. Tapi ibas pengalaman nggeluh manusia, uga pa pe hebatna rencana e, kita la bo ngasup mengendalikenca, sebab wari-wari si lit i lebe-lebenta e labo kita sinentukenca, sebab banci saja lit si la bagi ukurta siijumpai kita.

            Rencana sienggo isusun, apakah ibas jangka pendek ntah pe jangka panjang, la ateta la berhasil, emaka selaku kita kalak si tek man Tuhan, harus min silibatken Tuhan ibas kerina perencanaanta, jenari pindolah kepentaren ibas Dibata nari ibas ndalanken kerina pendahinta. Biasana adi pentar kita, maka siilakoken kita eme pindo “masukan-masukan” ibas temanta nari sienggo erpengalaman ibas sada-sada dahin.

Pdt. Steven Kumenit. STh.M.Min.

Dahikenlah Dahin Tuhan (Yeremia 1:4-10).

KHOTBAH TANGGAL 3 FEBRUARI 2013.

GEREJA GBKP

Introitus   :    Tapi tupung kukataken, "Kulupakenlah TUHAN , lanai aku ngerana i bas gelar TUHAN ," e maka kataNdu desken api, si gurlah i bas pusuhku. Ngutkut i bas tulanku. Kucubaken sinik, tapi la tersinikken aku (Jeremia 20:9).

Ogen        :    Matius 10:5-15.

Khotbah   :    Jeremia 1:4-10.

Tema        :    Dahikenlah Dahin Tuhan.

LATAR BELAKANG.

1.    Paksa Yeremia tubuh, bangsa Yehuda lanai erkemalangan man Tuhan, lanai ia mbiar man Tuhan. Bagepe paksa sie bangsa Yehuda siipinpin raja Manasye ersekutu ras bangsa Asyur, akibatna dibata-dibata bangsa Asyur nggo bengket ku rumah pertoton bangsa Yehuda, janah kalak Yehuda pe nggo ersembah man dibata-dibata e, emaka terjadi me perbahanen-perbahanen si la mehuli eme kinilaadilen, penindasan, korupsi, rsd. Tapi kenca raja Yosia jadi raja bangsa Yehuda terjadi me “pembaharuan” ibas bidang keagamaan.Ibas situasi enda me Tuhan ndilo Yeremia jadi nabiNa.

2.    Ibas bahan khotbahnta, jelas kal uga nabi Yeremia ngerana kerna ia ipilih Tuhan jadi nabi. Yeremia ipilih Tuhan ope Yeremia nggeluh. Penekanan ntah pe ate Yeremia gelah siteh min maka ia jadi nabi labo erkiteken sura-surana sendiri, tapi ibas “prakarsa” Tuhan sendiri. Ipilih Tuhan Yeremia ope Yeremia nggeluh janah mpersiapken Yeremia ras ibimbing Tuhan ia guna jadi sekalak nabi. Janah kenabianna la saja guna bangsa Yehuda tapi guna kerina bangsa. Sebab paksa sie bangsa-bangsa isekelewet bangsa Yehuda sangana bergejolak.

3.    Tangtangna Yeremia protes man Tuhan, sebab igejapkenna ia nguda denga, lenga ngasup sebab paksa sie umur Yeremia 18 tahun. Padahal ibas budaya kalak Yehuda, kalak sibanci mereken perentah ntah pe nasehat umurna sienggo dewasa (metua). Kalak sibagenda me siihormati. Protes ntah pe penolaken Yeremia enda erpalasken kemanusiaan, Yeremia terlalu sensitif, sebab mbiar ia adi la ibegiken kalak kari kai siikatakenna, bagepe itawai kalak me pagi ia ras imusuhi. Tapi kearun ate ras kebiaren Yeremia enda minter ipeteguhi Dibata. Nina Tuhan : Ula katakenndu kam ngudasa, tapi laweslah ku bangsa-bangsa ku ja kam Ku suruh. Kataken kai sikuperentahken man bandu. Tentu saja  ibas pelayanen Yeremia selaku nabi ndatken perlawanen-perlawanen, tapi Yeremia la perlu mbiar sebab Tuhan ras ia.

4.    Kenca dung Tuhan ngerana man Yeremia, minter ikuit Tuhan biber Yeremia, janah nina  "Begiken, Kubereken man bandu perkatan-perkatan si la banci la ibelaskenndu. Sendah Kubereken man bandu kuasa nandangi bangsa-bangsa ras kerajan-kerajan lako mbungkarken dingen ngeruntuhken, lako ngkernepken dingen ngeradasken, lako manteki dingen nuan." Yeremia nuriken enda gelah kalak meteh kerna kai siikatakenna tuhu-tuhu ibas Tuhan nari, labo ibas imajinasi ntah pe sura-surana sendiri.

5.  Pendahin Yeremia selaku nabi “menyangkut” dua hal, eme: 1).  Penghukuman man bangsa Yehuda ( mbungkarken, ngeruntuhken, ngkernepken, ras ngeradasken).  2). Litna pemulihan man bangsa Yehuda selaku bangsa Dibata (Manteki dingen nuan).

APLIKASI

            Temanta sendah eme ndahiken dahin Tuhan. Jadi penungkunen man banta kai kin dahin Tuhan ibas doni enda. Secara sederhana banci sikataken eme keselamaten. Erkiteken keselamaten e me Tuhan reh ku doni enda ibas rupa manusia eme Yesus Kristus. Janah erkiteken kesemalaten manusia ras kerina tinepana me maka Yesus Kristus nggit kurbanken diriNa i kayu persilang i uruk Golgota. Tapi amin gia kita nggo iselamatken, tapi lit denga si lenga tek man Yesus, padahal keselamaten e arah Yesus (band. Yohanes 14:6). Bagepe nterem denga kinitekenna simonce-once, emaka nukah terpengaruh ku bas arus doni enda. Nterem si la ngelakoken kai singena ate Tuhan.

            Kita selaku kalak si tek man Yesus Kristus ndatken  tugas guna ndahiken dahin Tuhan e (la erdobahen). Jadi pelayanen ndahiken dahin Tuhan la terjeng dahin serayan Tuhan (pendeta, pertua, diaken, ntah pe pengurus kategorial, bagepe kalak siterpanggil secara khusus), tapi kita kerina. Ndahiken dahin Tuhan cukup mberat, tapi adi sidahiken alu meriah ukur maka dahin e pasti menahang. Ibas kita ndahiken dahin Tuhan, tentuna ibas profesi ras talentanta pribadi lepas pribadi. Kita harus ncidahken kebenaren ibas Tuhan nari. Ula kita mbiar ibas kita ndahiken dahin   Tuhan sebab Tuhan ras kita.

Pdt. Steven Kumenit, STh. M.Min.

                

Nggeluhlah Bagi Singena Ate Dibata (Mazmur 1:1-6)

BAHAN PJJ GEREJA GBKP

TANGGAL 27 JANUARI -3 FEBRUARI 2013.

MAZMUR 1:1-6.

Tema : Nggeluhlah Bagi Singena Ate Dibata.

LATAR BELAKANG

1.      Mazmur enda banci sigolongkan mazmur kepentaren, erkiteken mazmur enda ncidahken kerna perbahanen ras ulihna. Janah enda situhuna singgeluh ibas kegeluhen manusia. Pemazmur alu terang ncidahken kerna mbagiken manusia ibas dua kelompok eme kelompok situtus ras erkemalangen man Tuhan, janah kelompok enda ndatken kemalemen ate, tapi kelompok sisada nari eme kelompok si la patuh ibas ndalanken peraten Tuhan, emaka datkenna penghukumen ibas Tuhan nari. Enda merupaken gaya ngerana kalak Ibrani. Kalak Ibrani (Isreal) rusur ngerana kerna kegeluhen moral ras perbahanen, janah standart moral kalak Ibrani eme taurat.

2.       Pemazmur ncidahken kemalemen ate ras keriahen man kalak Israel la itentuken erta ras materi, tapi itentuken arah ngikutken/ndalanken peraten Dibata. Sebab ibas ngikutken/ndalanken peraten Dibata manusia ngaloken pasu-pasu idur Dibata nari, termasuk erta ras materi. Jadi erta ras materi merupaken sada akibat ibas ndalanken peraten Tuhan. Erkiteken sie me sada kata persinget pemazmur nandangi bangsa Israel eme ula megiken pedah kalak jahat ras ula ngusih perbahanen kalak perdosa ras ula erteman ras kalak simegombang man Dibata. . Tapi siharus idalanken  eme matuhi undang-undang Tuhan ras ngukurisa suari ras berngi. Kalak jahat, kalak perdosa ras simegombang man Dibata eme seri i lebe-lebe Dibata eme kalak sipatut datken hukkumen ibas Dibata nari, sebab kalak sibagenda jadi imbang Tuhan, janah la lit kemalemen ate ras keriahen man kalak jahat ras  perdosa.    

3.      Undang-undang Tuhan merupaken sada palas man bangsa Israel simerupaken bangsa Tuhan. Ate Pemazmur gelah bangsa Israel la terkontaminasi ibas perbahanen-perbahanen si la mehuli si la merupaken karakter bangsa Tuhan. Erkiteken sie undang-undang sajalah siharus jadi bagin ibas kegeluhen bangsa Israel. Emaka ise si matuhi undang-undang Tuhan ras ngukurisa suari ras berngi man bana isehken pasu-pasu Tuhan.

4.      Ibas litna kepatuhan nandangi undang-undang Tuhan janah ngukurisa suari ras berngi, maka bangsa israel terhindar ibas penghukuman Tuhan nari.  Bagepe ate pemazmur gelah bangsa Israel nggeluh ibas kepatuhen man Dibata. Pengajaren uga patuh man Dibata lit ibas undang-undang Tuhan (taurat). Undang-undang Tuhan ngajarken uga seharus jadi bangsaNa. Emaka penting man bangsa Israel la saja maatuhi  undang-undang Tuhan tapi pe ngukurisa suari ras berngi. Ibas kata sideban lit min “perenungen siterus menerus” ibas kegeluhen bangsa israel emaka itehna kai sura-sura Tuhan ibas kegeluhenna tep-tep wari. Jadi kalak si banci ndatken kemalemen ate adi lit bas ia keriahen ibas matuhi ras ngukurisa suari ras berngi.

5.      Pemazmur “nggambarken” kemalemen ate ntah pe  ulih ibas kalak simatuhi undang-undang Tuhan ras ngukurisa suari ras berngi eme  : “Ia seri ras batang kayu si turah i tepi lau anak erbuah i bas paksana, dingen bulungna pe la melus. Sangap ia i bas kerina pendahinna”. Guna meteh enda kita harus meteh kerna latar belakang ntah pe situasi i Palestina. Iklim Palestina eme melas ras kerah. Janah lit memang ingan tertentu si lit launa. Emaka adi lit tanaman i deher lau e tetap ia erbuah janah la mate, sebab akar tanaman e ersada ras lau e. Lau e me simereken kegeluhen man tanaman e. Emaka erbuah ia ibas paksana. Jadi ise simatuhi undang-undang Tuhan ras ngukurisa suari ras berngi ndatken kegeluhen. Tapi ise sindauh ras kegeluhen e eme Tuhan maka  siidatkenna eme penghukumen ntah pe kematen.

APLIKASI

            Selaku kalak sitek maka kegeluhenta harus min bagi singena ate Dibata. Kai singena ate Dibata e berhubungen ras perbahanenta sitep-tep wari. Emaka selaku kalak si tek, harus min kita ndalanken kai singena ate Tuhan ibas kegeluhenta sitep-tep wari. Perbahanenta la saja terjeng ku sapih-sapih kita manusia, tapi man kerina tinepa Dibata. Apai ka kita ibas tahun enda eme nggeluh ibas tema solidaritas eksternal. Ibas tahun solidaritas eksternal enda kita isuruh gelah nggeluh mehuli nandangi kerina tinepa Tuhan, apa kah alam sekitar kita ras temanta manusia si la sada kiniteken. Tapi labo berarti ibas kita ndalanken solidaritas eksternal enda, enggo sitadingken solidaritas internal. Solidaritas internal terus ka sidalanken. Gelah banci sidalanken perbahanen simehuli e maka kita harus nggeluh ibas keriahen ukur guna ngoge pustaka si badia ras ngukurisa suari ras berngi, emaka siteh me kerna simehuli siharus silakoken.  Kegeluhen sibageme sierbahanca kita nggeluh ibas kemalemen ate.

Pdt. Steven Kumenit. STh. M.Min.

Pekan Penatalayanan GBKP, Wari 7 : Kesah Si Badia Mpengasup GBKP Jadi “Sira” Ras “Terang” Doni ( Matius 28:19-20).

SERMON PEKAN PENATALAYANEN

GBKP RUNGGUN KAMPUNG SUSUK

WARI VII. SABTU 26 JANUARI 2013.

Introitus :    Man ise pe mehuli Ia, janah keleng ateNa man kerina tinepaNa (Mazmur 145:9).

Ogen      :    Matius 5: 13-16.

Khotbah     :    Matius 28: 19-20.

Tema      :    Kesah Si Badia Mpengasup GBKP Jadi “Sira” Ras “Terang” Doni.

LATAR BELAKANG

1.      Si jadi bahan oratenta sendah eme sada perjumpan Yesus ras ajar-ajar i salah sada uruk i Galilea. Janah perjumpan enda memang irencanaken Yesus. Yesus me sinuruhsa gelah ajar-ajar reh ku Galilea (band. Matius 28:10). Jadi ibas turi-turin kitab Matius enda, ajar-ajar Yesus pertama kali jumpa/sitatapen ayo ras Yesus kenca Yesus keke ibas simate nari. Perjumpan e terjadi ibas salah sada uruk i Galilea.

2.      Ibas perjumpan Yesus ras ajar-ajarNa, lit piga-piga hal siikataken Yesus eme 1. Pengutusen, ntah pe kata perintah Yesus man ajar-ajar gelah ajar-ajar lawes ku kerina bangsa manusia. Jadi perintah enda la ikhususken man kalak Yahudi saja, tapi man kerina bangsa. Sada perintah secara universal (menyeluruh).  Tujunna jelas eme man kerina bangsa manusia, jadi man kerina manusia. 2).  Njadikenlah kerina bangsa jadi ajar-ajar Yesus. Enda merupaken sada tanggungjawab ajar-ajar Yesus njadiken kerina bangsa jadi ajar-ajar Yesus. Alu bage kepentaren harus lit bas ajar-ajar. 3). Peridiken ia ibas gelar Bapa, Anak ras Kesah Si Badia. Biasana, ntah pe budaya paksa sie, kalak iperidiken harus igedapken bas kolam ntah lau simeler (nen = peridiken siilakoken Yohanes peridiken nandangi kalak Yahudi ras man Yesus i lau Yordan, Lukas 3:21). Tapi ibas perintah enda nina Yesus kalak e harus iperidiken ibas gelar Bapa, Anak ras Kesah Si Badia. 4).  Kenca bangsa-bangsa e jadi ajar-ajar Yesus. Ajar-ajar Yesus (nen = 11 ajar-ajar Yesus) harus ngajarken kerna uga seharusna ndalanken, ntah pe ndahiken kai si sedekah enda iajarken Yesus man ajar-ajarNa. 5). Sada ketetapen ukur siibereken Yesus man ajar-ajarNa eme   Aku tetap kap ras kam seh ku kedungen jaman. Yesus ber-Imanuel ras ajar-ajar, emaka ajar-ajar la perlu aru ate ras mbiar ndahiken perentah Yesus enda. Perentah Yesus enda dungna itandai alu gelar “Amanat Agung”.

3.      Ibas perentah Yesus enda, ate Yesus ngataken man ajar-ajarNa eme, genduari kenca Ku ajarken kerna dahin pelayanen ras keselamaten man kam (ajar-ajar Yesus), maka nggo paksana dahin keselamaten ibas doni enda idahiken ajar-ajar. Tuhu mberat dahin e, tapi erkiteken Yesus tetap ras ajar-ajar, maka amin gia mberat pasti jadi menahang. Bagepe adi lit tantangan-tantangen simenghalangi pelayanen keselamatan ajar-ajar e, pasti ajar-ajar ngasup nalukenca ras dat serpang pulah, sebab Yesus tetap ras ajar-ajar. Kuasa Yesus ngasup naluken kerina kuasa si lit ibas doni enda.

4.      Padan penenami Yesus man ajar-ajar labo saja terjeng paksa sie, tapi padan Yesus seh ku kedungen jaman. Enda ngatakenca, Yesus e nggeluh ras tetap mperdiateken kegeluhen ajar-ajarNa.

5.      Ate Yesus ngutus ajar-ajarNa ku kerina bangsa, labo saja terjeng njadiken kerina bangsa jadi ajar-ajarNa, tapi lebih asangken sie eme gelah kerina bangsa nggeluh ibas keselamaten, nggeluh ras Yesus ras tetap mengandalken Yesus. Sebab kerina kuasa i surga ras i doni lit bas Yesus. Alu bage keselamaten manusia lit man Yesus ngenca.

APLIKASI

            “Amanat Agung” ntah pe perintah Yesus, la saja man ajar-ajar  Yesus si sepuluh sada e, tapi pe man gereja GBKP. Gereja GBKP harus ndalanken kai siiamanatken Yesus, eme njadiken kerina bangsa ajar-ajarku. Ibas erti kata keselamaten ibas doni enda harus icidahken gereja GBKP. Gereja GBKP harus jadi Sira ras Terang doni.

            Memang adi siikuti kai siikataken bahan khotbahnta, pasti kita rubat ras agama sideban. Sebab banci sikataken kerina manusia nggo lit agamana, janah agama siianutna mengajarken kerna keselamaten. Tapi labo berarti kalak sideban ntah pe agama sideban la banci sitarik, banci. Tentuna enda harus make metode pelayanen tepat guna ras sasaran. Ibas erti kata gereja GBKP harus ncidahken kepedulianna nandangi kerina manusia, sikhususna kena musibah ras singgeluh ibas kemiskinan ras kinilaadilen. Bagepe gereja GBKP harus ngkelengi tinepa Dibata sideban, jadi pelopor ngkelengi lingkungen, rsd. Jadi gereja GBKP harus tuhu-tuhu erdiate ras ngkelengi tinepa Dibata. Ibas perbahanen sibagenda tentuna selain gereja GBKP nggo jadi sira ras Terang doni, erkiteken kalak sideban nggo banci ngenanami kiniulin Tuhan arah gereja GBKP, ras nggo banci ngidah kerna simehuli, maka ngena ate kalak man gereja GBKP. Jadi gereja GBKP nggo jadi pancur pasu-pasu Tuhan man doni enda. Alu bage doni enda nggeluh ibas keselamaten. Doni enda banci jadi ajar-ajar Yesus. Enda kerina tentu labo gegeh gereja secara institusi, tapi pelin-pelin pendahin Kesah Si Badia nge.

Pdt. Steven Kumenit, STh.M.Min.