Kerja Rani (Ulangan 16:9-12)

BAHAN PJJ GEREJA GBKP

TANGGAL 24 FEBRUARI – 2 MARET 2013.

Ulangan 16:9-12.

Tema : Kerja Rani.

LATAR BELAKANG.

1.      Kitab ulangen enda berisiken pidato Musa man bangsa Israel sisangana ngadi-ngadi i dataran Moab. Pidato enda ipeseh Musa erkiteken : 1). Bangsa Israel nandangi bengket ku taneh Perpadanen Dibata eme Kanaan. 2). Erkiteken bangsa Israel si lit paksa e eme tading angkatan si mbaru nari, janah angkatan enda la megiken kerna kai perpadanan bangsa Israel ras Tuhan, bagepe undang-undang siharus idalanken bangsa Israel kenca bangsa e bengket ras ngiani taneh Kanaan. Jadi situhuna isi kitab Ulangan enda eme “pengulangan” ibas padan ras undang-undang Tuhan.

2.      Ibas oratenta sekali enda ngerana kerna kerja rani. Kerja rani ilakoken ntah pe ikira ibas pitu minggu kenca rani gandum ntah pe 50 wari kenca Paskah. Ntah pe irayaken kenca panen gandum.  Janah tujun kerja rani eme guna mpehaga Tuhan. Erkiteken sie me kerja rani enda harus ilakoken alu meriah i adep-adepen Tuhan radu ras anak-anak ibas tep-tep jabu, bagepe suruh-suruhen si lit ibas jabu, ras kalak Lewi, kalak pertandang, anak melumang ras diberu balu-balu sitading i rumah bangsa Israel. Bagepe  ilakoken ibas rumah Pertoton. Kerja rani la banci ilakoken ibas rumah-rumah bangsa Israel, ntah pe ibas ingan ersembah si deban, tapi harus ibas rumah pertoton (ingan ersembah).

3.      Ibas bangsa Israel ngelakoken kerja rani ibas Rumah pertoton, kepeken la banci ia reh ngambe-ngambe tapi harus ia reh mbaba persembahen,  janah bentuk persembahenna eme persembahen ukur  meriah ras wajib. Memang ibas oratenta sendah tempa la iaturken kerna persembahen, tapi adi sioge ibas kitab Imamat 23 :15-21, maka ije iaturken alu jelas uga seharusna bangsa Israel mbaba persembahenna ku rumah Pertoton. Jadi ibas kerja rani enda bangsa Israel harus mbaba persembahen ukur meriah ras singgo iwajibken.

4.      Persembahen ukur meriah enda ertujun guna 1). ngataken bujur man Tuhan erkiteken enggo ipasu-pasu Tuhan jumana. 2). Mindo man Tuhan gelah ipasu-pasu Tuhan tole jumana gelah ibas tahun si reh, reh buehna hasil gandumna.

5.      Ibas ngerayaken kerja rani enda, bangsa Israel harus tetap ngiget maka budak kap ia nai i Mesir, tapi erkiteken keleng ate Tuhan, maka bangsa Israel nggeluh bebas ras banci “memiliki” juma sendiri. Emaka la banci lang bangsa israel harus patuh ras ersembah man Tuhan saja. Bagepe kerja rani enda memotivasiken bangsa Israel gelah tetap ersembah man Tuhan saja.

APLIKASI

            Sekali enda kita ngerana kern Kerja Rani. Ibas kalender gereja GBKP kerja Rani ilakoken ibas tanggal 3 Maret 2013. Inti Kerja Rani eme ngataken bujur man Tuhan.

            Sisadari nge tuhu maka latar belakang kegeluhen anggota perpulungen erbeda-beda, lit sierjuma, pegawai, perbinaga, rsd. Tapi amin gia berbeda-beda makna kerja rani harus ilakoken selaku kita kalak sierkniteken man Tuhan. Memang kita si la erdahin i juma (band. Pegawai swasta ras negeri), jumanta eme i kantor, janah hasil jumanta e sidat ibas perkantoran e. Bagepe sierdahin ibas profesi si debanna.

            Persembahen Kerja Rani berbeda nge ras persembahen persepuluhen. Persembahen Kerja Rani eme persembahen pengataken bujur erkiteken Tuhan simasu-masu pendahinta sedekah sada tahun. Amin gia persembahenta bentukna pengataken bujur, tapi sipatna eme ukur meriah. Emaka harus min sipersembahken simehulina. Sebab persembahen simehuli ras erpalasken ukur meriah ialoken Tuhan kap. Bagepe ipasu-pasu Tuhan nge pendahinta tole, emaka geluh kalak singgit nehken persembahen nggeluh ibas kejuah-juahen.

Pdt. Steven Kumenit, STh.M.Min.

Mpekeke Keleng Ate Man Kristus (Ketangkasen 2:1-7)

BAHAN PJJ GEREJA GBKP

TANGGAL 17 – 23 FEBRUARI 2013.

Ketangkasen 2:1-7.

Tema : Mpekeke Keleng Ate Man Kristus

LATAR BELAKANG

1.      Sijadi oratenta sendah eme sada bagin ibas pengenehenen Yohanes sangana ia i buang ku pulau Patmos. Yohanes siimaksudken i jenda labo Yohanes peridiken, tapi rasul Yohanes, salah sada ajar-ajar Yesus. Ibas pengenenen enda, ngerana Yesus kerna perpulungen Epesus.

2.   Epesus eme kota sigalangna i Asia kitik ras jadi pusat administrasi Romawi i wilayah e (ibu kota provinsi).  Paulus cukup ndekah tading i Epesus, janah ia sendiri simajekensa. Kota Epesus jadi salah sada pusat pelayanen Paulus, sebab ndeher ku ja pa pe. Bagepe jadi ingan tading rasul Yohanes. I je nari me Yohanes i buang ku Pulau Patmos.

3.   Ibas oratenta lit 3 hal siitekanken, 1). Tuhan meteh kecibal i perpulungen Epesus. I jenda gelah iteh perpulungen Epesus min maka  Tuhan tetap meteh kegeluhen perpululungen Epesus, bicara Ia ndauh ringan i Surga, iteh Tuhan nge kerna kegeluhen perpulungen Epesus. Siilakoken perpulungen Epesus eme : a. Iteh Tuhan uga latihna perpulungen e (band. Perpulungen Epesus nggo ncidahken kelatihenna ras ketutusenna ibas kegeluhenna tep-tep wari selaku kalak kristen). b. Iteh Tuhan kerna kesabaren perpulungen. Siimaksudken i jenda eme uga alu sabar ate Perpulungen Epesus la terpengaruh ku bas godaan-godaan sindilo ia, eme ibas kalak kristen asal Yahudi sindilo ia gelah ngikuti undang-undang (taurat), sebab nina alu ngikuti ras ndalanken undang-undang nge maka kalak kristen nggeluh ibas keselamaten si tuhu-tuhu.  Bagepe uga perpulungen la terpengaruh nandangi situasi isekelewetna eme ersembah man dibata-dibata sideban. Perlu pe siteh i Epesus lit sada kuil sitermegah i doni eme kuil Artemis.  c. Enggo iuji perpulungen Epesus kalak singakuken dirina rasul tapi situhuna labo ia rasul. Alu kata sideban perpulungen Epesus nulak kerina guru-guru palsu. Perlu siteh ibas abad-abad sipemena ras peduaken guru-guru palsu biasana mpetandaken dirina alu rasul-rasul ntah pe nabi.  Iteh Tuhan nge uga la ngenana ate perpulungen Epesus kerna perbahanen kalak Nikola. 2). Tuhan mandang  (band. Bah Ind = Tuhan mencela) perpulungen Epesus erkite-kiteken perpulungen Epesus enggo lanai ngkelengi Tuhan bagi tangtangna perpulungen Epesus jadi kristen, sebab perpulungen Epesus enggo erdosa, emaka ipersingeti Tuhan gelah perpulungen Epesus jera, janah nggeluhlah bagi uga tangtangna ia jadi kristen. 3). Lit penghukumen ibas Tuhan nari.  Penghukumen Tuhan man perpulungen Epesus jadi me adi perpulungen Epesus la nggit Jera. (band. Ibuat Tuhan nahe lampu ibas inganna nari, ayat 5).

4.      Si jadi penungkunen man banta kai kin perbahanen kalak Nikola. Memang cukup mesera ndarami ise kin situhuna kalak Nikola e. Lit singatakenca kalak Nikola enda eme pengikut ajaren Nikola eme salah sada ibas pitu “diaken” siipilih rasul-rasul guna nampati ia (Perbahanen 6:5), tapi pengikut enda enggo menyimpang ibas ajarenna. Lit ka singatakenca bagin ibas ajaren Gnostik, rsd. Tapi sipaling penting i jenda eme kalak Nikola eme kalak si la ngena ate Tuhan erkiteken perbahanen-perbahanenna. Khususna salah mengartiken kerna kebebasan. Nina erkiteken Kristus nggo mbebasken manusia ibas dosa nari, maka dosa lanai erkuasa man manusia, emaka manusia banci nggeluh rate-ate, dingen ngenanami geluh enda alu sepuas-puasna.

5.       Ibas oratenta enda pe Yohanes mpertegas kerna keselamaten, janah sienda reh  ibas Kesah Si Badia nari. Emaka kalak siercuping harus megikenca. Jadi enda me siharus iteh perpulungen. Keselamaten hanya ibereken man kalak si tuhu-tuhu jera. Janah kegeluhenna eme i Pardis. Ipardis lit buah batang kayu kegeluhen. Kalak singgeluh ibas keselamaten bebas ia man buah batang kayu kegeluhen. Perlu siteh paksa e Dibata njadiken manusia, ras namaken  manusia e i peken Eden, janah i tengah-tengah peken Eden lit dua batang kayu, eme batang kayu kegeluhen ras batang kayu  simereken pemeteh kern sibujur ras si jahat (band. Kej.3:9).

APLIKASI

            Temanta sendah eme mpekeke keleng ate man Kristus. Perlu siteh keleng ate Tuhan man banta jelas kal ras nggo terbukti. Tapi adi kita uga ? enda jadi penungkunen simbelin man banta selaku kalak kristen. Sebab gia kita nggo jadi kalak kristen, lenga tentu kita ngkelengi Kristus. Inget salah sada undang-undang/hukum eme ngkelengi Dibata asa ukurndu, asa tendindu ras asa gegehndu lit (Matius 22:37).

            Kita ngasup ngkelengi Dibata adi lalap kita ergaul intim ras Tuhan. Carana kita ergaul intim ras Tuhan eme kita harus nggeluh ibas kerembaken ras Ia, eme tutus ku gereja ras ngoge Pustaka Si Badia, bagepe tetap ertoto man Tuhan, sebab alu rusurna kita rembak ras berkomunikasi ras Tuhan, maka ngasup kita meteh ras ngangkai kern kiniulin Tuhan man banta. Alu bage turah bas kita tetap ukur singkelengi Tuhan. Tandana kita ngkelengi Kristus eme teridah ibas kata ras perbahanenta si mehuli.

Pdt. Steven Kumenit, STh.M.Min.

Pentar Ibas Ngaturken Perbeliten Jabu (Pilipi 4:10-13)

BAHAN PJJ GEREJA GBKP

TANGGAL 10-16 FEBRUARI 2013.

Pilipi 4:10-13.

Tema : Pentar Ibas Ngaturken Perbeliten Jabu.

LATAR BELAKANG

1.      Siman oratenta sendah eme surat kiriman rasul paulus man perpulungen i Pilipi paksa ia lit ibas penjara, janah ibas rangka merespon kerna perhatin perpulungen Pilipi nandangi Paulus.

2.      Perpulungen Pilipi eme salah sada perpulungen si tetap mperdiateken ras nampati Paulus ibas hal materi, amin gia situhuna banci sikataken secara materi perpulungen Pilipi lit ibas kekurangen (la bo perpulungen sibayak), adi sibandingken ras perpulungen Korinti, ntah pe perpulungen si lit i darat Makedonia.

3.      Adi siperdiateken kerna sejarah Paulus nehken Berita Si Meriah, rusur ijumpaina perbeben ras kiniseran, termasuk ia ipenjaraken, tapi li ka nge keriahen, termasuk uga perpulungen Pilipi si tetap mperdiateken kegeluhen Paulus ibas hal materi, Amin gia situhuna ibas oratenta sendah, Paulus ngerana man perpulungen Pilipi, kerna nggo cukup ndekah kal perpulungen Pilipi la reh ntah lanai mperdiateken Paulus. Enda jadi situhuna erkiteken kurangna kesempaten perpulungen, saja  Keriahen ukur enda erkiteken penggejapen Paulus maka perpulungen Pilipi la bo pernah ngelupaken hubungen simehuli sienggo tercipta antara Paulus ras perpulungen Pilipi, bagepe ibas perjuangenna mbela ras ndalanken Berita Si Meriah. Tuhan la erngadi-ngadi erdahin ibas pusuh perpulungen Pilipi.

4.      Amin gia Paulus ngataken bujur man perpulungen Pilipi erkiteken penampatna, tapi labo e sipelin-pelin siniharapken Paulus. Paulus sendiri,  materi eme salah sada penunjang ibas pelayanen, labo e sijadi tujuan utama. Emaka perpulungen Pilipi la perlu eraru ate kerna sie,  janah perpulungen Pilipi ula “merasa terbeban” nampati Paulus alu materi,  em sebabna nina Paulus : “aku enggo erlajar encukupken alu kai si lit i bas aku (ayat 11)”.

5.      Rahasia maka paulus tetap megegeh ras tetap nggeluh ibas berkecukupan, subuk ibas paksa kiniseran ras keriahen eme letakna ibas persadan ras Tuhan. Sebab Paulus nggejapken, Tuhan e, Tuhan sibayak, emaka melala sibanci iberekenNa man anak-anakNa. Sienda harus menjadi penekanan, sebab ibas paksa kekurangan  pe penampat Tuhan tetap reh, termasuk arah perpulungen Pilipi, ntah arah perpulungen sideban, bagepe iberekenNa nge serpang pulah ras tetap megegeh ibas paksa kekurangan. Tuhu lit kekurangan materi tapi la e erbahanca Paulus lemah, sebab lalap ipegegehi ras ipebesur Tuhan Paulus alu kataNa (band. Matius 4:4). Jadi letakna labo ibas materi maka Paulus megegeh ras banci ngataken bujur, tapi erkiteken  persadan ras Tuhan. Emaka amin gia lit ibas kekurangen ras kiniseran  Paulus tetap ngetaken bujur man Tuhan Dibata.

APLIKASI

            Ibas perkembangen doni sigenduari, kita kerina ibereken pilihen-pilihen sicukup “menggiurken”. Mulai kebutuhen rumah tangga (dapur, eloktronik), pendidiken, kebutuhen pribadi, rsd. Kerina enda banci sidat alu erga “simurah” ntah pe terjangkau. Piah dungna e mabai kita nukuri kai-kai pe amin situhuna labo kita perlusa. Si enda jadina erbahanca lanai cukup senta guna keperlunta siseharusna harus ilitken guna keperlun sitep-tep wari. Memang lit nge keluarga-keluarga situhu-tuhu melala kal  pasu-pasu Tuhan man bana, emaka banci sikataken lebih nge perbeliten jabuna. Tapi bage gia  adi la beluh ngaturken perbeliten jabu e, maka  banci saja tep-tep wari ntah pe tep-tep bulan lalap kekurangen. Harus siinget kegeluhenta la bo terjeng  guna “sigenduari” saja. Tapi pe guna kegeluhen paksa si reh (hidup untuk jangka panjang). Tapi la banci “sipungkiri” lit ka sada paksa erkiteken kebutuhen sicukup meningkat ibas jabunta, maka perbeliten jabunta banci keri. Ibas sienda me kita harus metenget, sebab adi la megegeh kinitekenta, maka kita banci ndabuh ku bas dosa. Emaka kegeluhen siintim ras Tuhan dingen kiniteken sipaguh mabai kita ngasup menguasai diri ras menyesuaiken gegehta (keuangenta) ras keperlunta. Bali ras Paulus ngasup ia nggeluh ibas kekurangen ras kelebihen, erkiteken ngeluh ia ibas persadan ras Tuhan. Jadi paksa berkelebihen ntah tupung kekurangen la kita ndabuh ku bas dosa.

 Pdt. Steven Kumenit, STh.M.Min.

Kita Enggo Ipermuliaken ( 2 Korinti 3:12-4:2).

KHOTBAH TANGGAL 10 FEBRUARI 2013.

GEREJA GBKP

Introitus     : E maka ijadiken Dibata manusia, si sentudu ras tempasNa; dilaki ras diberu ijadikenNa (Kejadin 1:27).

Ogen          :    Keluaren 34:29-35 (Tunggal).

Khotbah     :    2 Korinti 3:12-4:2 (Tunggal).

Tema          :    Kita Enggo Ipermuliaken.

LATAR BELAKANG

1.  Perpulungen Korinti ipajekken Paulus, ibas perdalanen peteluken  nehken Berita Si Meriah.  Ibas perkembangen perpulungen Korinti, khususna 2 Korinti enda, Paulus harus njelasken mulihi kerna eksistensina selaku rasul. Sebab paksa sie, lit kelompok si reh ibas Yerusalem nari, guna ngajuk perpulungen gelah musuhi Paulus, sebab pengakap kalak enda kerasulan Paulus la tuhu.

2.   Paulus jadi rasul erkiteken litna pengalaman pribadi, eme tupung Paulus ku Damaskus, guna ndarami kalak si tek man Yesus gelah itangkap ras ipenjarakenna, tapi sangana ibas perdalanen justru ia siitangkap Yesus guna jadi rasulNa. Janah erkiteken sie me Paulus jadi bagin ibas Dalam keselamaten. Sebab kenca sie me maka  ibenai Paulus nehken Berita Si Meriah nandangi kalak si labo kalak Yahudi. Tapi sie, labo merupaken sada palas man Paulus guna “menyombongkan diri”. Tapi sebalikna erkiteken Paulus ikuasai Kesah Si Badia me maka lit sada tanggungjawab simbelin ibas Paulus. Enda me simbedaken kerasulan Paulus ras “rasul-rasul” sideban. Jadi ibas perjumpan Paulus ras Yesus, maka Yesus sierbahanca ntah pe sipengasup Paulus  nggeluh ibas pelayanen padan simbaru, janah erkiteken sie maka pajek me perpulungen Korinti. Perpulungen Korinti nggo tek man Yesus Kristus, erkiteken sie me perpulungen Korinti nggeluh ibas kegeluhen ibas Yesus Kristus. Emaka kai siibelasken Paulus, e erpalasken kiniteken man Kristus.  Jadi enda me “alasenna” maka kerasulen Paulus e tuhu.

3.     Paulus mereken sada alasen simegegeh man perpulungen Korinti kerna harapenna. Harapen Paulus eme nggeluh ibas sinalsal si la ermasap-masap eme  nggeluh ibas kemulian Dibata.

4.   Ibas oratenta enda pe, pang Paulus mbedaken pelayanenna ras pelayanen Musa. Adi Musa itutupina ayona gelah terang kemulian Dibata la bene. Ibas erti kata kenca Musa jumpa ras Tuhan, maka terang kemulian Tuhan e  ersinalsal bas ayona, janah gelah kemulian Tuhan e la bene maka itutupina ayona. Tapi Paulus lang. Ibas pelayanen Paulus tetap kemulian Tuhan e lit bas Paulus, sebab Kesah Si Badia nggeluh bas Paulus. Janah enda me siiharapken Paulus man perpulungen Korinti, sebab perpulungen Korinti enggo nggeluh ibas persadan ras Kesah Sibadia, emaka perbincarken terang kemuliaan e alu ayo si la itutupi. Maksudna eme, adi kalak kristen tuhu-tuhu ngelai Dibata, maka kuasa Dibata harus teridah man kerina jelma. Janah erkiteken kemulian Kesah si Badia nggeluh man kalak si tek maka Kesah Si Badia ngobah kalak sitek reh dekahna reh muliana, seh maka kalak sitek “segambar ras Tuhan”. Perpulungen Korinti ula seri ras kalak Israel si ukurna nggo batu-batun. Maksudna, la iangka bangsa Israel kerna hukum taurat, padahal hukum taurat banci iangkai alu tek man Yesus Kristus.

5.      Tole, apologet Paulus eme pendahinna erpalasken perkuah ate Tuhan, emaka la erleja-leja ia erdahin, emaka nggo itulak Paulus kerina perbahanen-perbahanen erpalasken daging, janah labo ia nipu ras mutar balikken Kata Dibata. Jadi pelayanen Paulus  labo erkiteken jasa ntah pe pemindonna, tapi pelin-pelin erkiteken perkuah ate Tuhan. Emaka respon Paulus eme ngelai alu la erleja-leja. Enda pebetehkenna man perpulungen Korinti gelah perpulungen ngangkai kerna pelayanen situhu-tuhu (band. Murni).

APLIKASI

            Kita enda tinepa Dibata, tapi erkiteken kerangapen manusia, maka kita ndabuh ku bas dosa. Emaka mbenaken je nari me kemulian Tuhan bene bas kita nari. Tapi erkiteken perkuah ate Tuhan maka kita nggo ipermuliaken Dibata. Erkiteken Yesus kita nggeluh ibas kemuliaan. Jadi, banci sisimpulken, ulu kegeluhen lit man Dibata. Emaka ise singgeluh ras Yesus ntah pe nggeluh ibas kerembaken ras Yesus Kristus, man bana lit kemulian. Tapi kemuliaan sienggo ibereken Dibata man banta, “harus ipancarkan” man kalak sideban gelah kalak sideban pe dat kemuliaan ntah pe ipermuliaken Tuhan. Isamping sie, kita harus njaga gelah ula bene mulihi kemulian singgo ibereken Tuhan man banta.

Pdt. Steven Kumenit, STh.M.Min.