Rabu, 27 Maret 2013

Permakanilah Biri-BiriKu (Yohanes 21:15-18)



BAHAN PJJ GEREJA GBKP
TANGGAL 31 MARET – 6 APRIL 2013.
YOHANES 21: 15-18.

Tema : Permakanilah Biri-BiriKu

LATAR BELAKANG
1.      Kenca Yesus Kristus keke ibas simate nari, maka lit piga-piga kali Yesus ncidahken diriNa man          
      ajar-ajarNa. Janah ibas oratenta enda eme sipetelukaliken Yesus ncidahken diriNa man ajar-ajarNa.   
      Ingan Yesus ncidahken diriNa man ajar-ajarNa eme i dano Tiberias.
2.      Ibas Yesus ncidahken diriNa man ajar-ajarNa, mereken penegasan kerna : sipemena  kematen la     
      ngasup naluken Yesus, tapi sebalikNa Yesus nge sinaluken doni kematen. Sipeduaken mereken 
      motivasi   mulihi man ajar-ajarNa si enggo sempat “bene” semangatna erdahin erkiteken kematen Yesus 
      Kristus.  Enda teridah ibas ajar-ajar Yesus mulihken mulihi ku profesi asalna ndube eme nelayan 
     (Yohanes 21:1-3).
3.      Ibas bahan oratenta, je ikataken Kenca elah man ngerana ras nungkun Yesus man Petrus guna mindo 
     penegasan kerna keleng ate ras tugas selaku permakan. Telu kali isungkun Yesus kerna sie, seh getem pe 
     pusuh Petrus.  Enda penting man Yesus sebab sekalak siermakan harus lit bas ia pusuh sierkeleng ate 
     nandangi biri-biri Yesus. Bagepe penugasan siibereken Yesus man Petrus guna mpermakani biri-biriNa, 
     la saja tupung Yesus ngerana “paksa sie”, tapi Yesus ngerana kerna tanggungjawab selaku ajar-ajar 
     kenca Yesus lanai i doni enda. Sebab kenca Yesus lanai i doni enda maka tanggung jawab mpermakani 
     biri-biriNa lit man ajar-ajar (Petrus), emaka pusuh sierkeleng ate ras nggit jadi permakan situhu-tuhu ras 
      mehuli harus jadi bagin si la terpisahken ibas diri Petrus. Jadi, penungkunen Yesus si seh telu kali enda, 
      njadiken Petrus sekalak permakan simehuli, labo sekalak permakan upahan. Sekalak permakan singusi 
     Yesus selaku permakan situhu-tuhu.
4.    Ipihak sideban, penungkunen si seh telu kali e, erbahanca getem kal pusuh Petrus, emaka enda   
    ncidahken maka keegoisan Petrus enggo bene. Sebab ope sienda rusur  Petrus ngikuti sura-sura ukurna 
    saja, janah hal sicukup terkenal eme uga Petrus mersoken Yesus seh telu kali (Matius 26:34-35; 70-75). 
    Nina Yesus mpermakanilah biri-biringku, berarti nggo terjadi rekonsiliasi (pemulihan hubungan), Amin gia 
    situhuna rekonsiliasi enda, terjadi Tupung Yesus ras ajar-ajarNa man ras-ras. Emaka e me erbahanca 
    Petrus tetap jadi ajar-ajar Yesus.
5.  Pusuh sigetem nandakan maka nggo lit penyesalan ras nggit nggeluh ibas keleng ate. Sebab kalak 
    sierkeleng ate man Yesus Kristus berarti ia tunduk ibas rencana ras rancangan Tuhan. Palas enda me 
    sierbahanca Petrus erdahin selaku siermakan, seh mate sahit (martir).

APLIKASI
            Sijadi penungkunen man banta tanggungjawab ise kin mpermakani biri-biri Tuhan e. Secara umum tanggungjawab mpermakani biri-biri Tuhan eme tanggungjawab kerina anggota perpulungen (band. 1 Petrus 2:9). Tapi secara khusus eme kerina serayan Tuhan. Alu ngenen sienda maka kita selaku kalak sitek lit tugas ras tanggungjawabta siharus idalanken i tengah-tengah gereja. Kita harus ikut ngelai i tengah-tengah gereja enda sue ras talenta si lit. Bagepe engkai maka kita harus ngelai. Erkite-kiteken kita idilo Tuhan jadi gereja guna ncidahken Kerajaan Dibata ibas doni enda. Salah sada siharus icidahken eme arah perbahanen singgit ngelai. Guna mpertegas kerna fungsi sie, Gereja GBKP selaku gereja Tuhan “menuangkannya” ibas tata gereja BAB II Pasal 8 ayat 1a,b, g.
            Mpermakani biri-biri Tuhan la bo saja arah kata, tapi pe arah perbahanen. Kita selaku kalak sitek arus mediate ras erdiate nandangi temanta manusia. Adi lit ia ibas perbeben maka perlu isampati, adi lit temanta ibas ceda ate, maka kita harus ngapuli ia, adi lit temanta si aru atena erkiteken kegeluhen ibas doni enda, maka kita harus mpetetap ukurna gelah malem atena, rsd.

Pdt. Steven Kumenit, STh.M.Min.

Rabu, 20 Maret 2013

Keleng Ate Dibata Mpegegehi Perpulungen Guna Sikeleng-kelengen (Matius 26:36-46).



BAHAN PJJ GEREJA GBKP
TANGGAL 24 – 30 MARET 2013.
Matius 26: 36-46.

Tema :      Keleng Ate Dibata Mpegegehi Perpulungen Guna Sikeleng-kelengen.

LATAR BELAKANG
1.      Salah sada kebiasaan siilakoken Yesus eme ertoto Ia ibas ingan-ingan simelenget guna berkomunikasi ras BapaNa sini Surga. Tapi sekali enda penggejapenNa tuhu-tuhu beda ras biasana. Lit sada perasaan ceda ate ras pusuh sigetem erkiteken igejapkenna maka Ia nandangi mate. Ibas perasaan sibageda me Yesus ertoto man BapaNa sinisurga. Janah gelah lebih fokus Ia ertoto, Yesus nuruh ajar-ajarNa tading ras erjaga-jaga.
2.      I Peken Getsemane enda lit telu kali Yesus ertoto man BapaNa Sinisurga, janah  isi pertotonNa kerina menam seri eme sada pemindon man BapaNa gelah la iinem Yesus calung kiniseran e. Maksudna eme adi banci ula min kiniseran ngkenai Yesus. Tapi igejapken Yesus ka maka dalan kegeluhenNa harus arah kematen (nen. Matius 26:12). Emaka amin gia lit pemidonNa, tapi tehNa ka nge  maka kehadiranNa ibas doni enda eme guna maba keselamaten man  doni enda. E me sierbahanca maka Yesus harus patuh ibas dahin enda, emaka nina dungna peratenNdulah jadi.
3.      Nina Yesus, adi banci min cawan kiniseran enda la ku inem. Enda situhuna ipake Yesus ibas kebiasaan kalak Israel paksa man. Ija biasana  paksa man, kepala keluarga eme bapa bereken pangan ras inemen man anak-anakna ras si lit i je sue ras baginna, maka kerina harus muat kai siibereken bapa e. Jadi bapa sinentukenca, labo anak ntah pe si hadir ije. Termasuk me i peken Getsemane enda maka cawan e itentuken BapaNa sinisurga, emaka alu sada pemindon Yesus ngerana man BapaNa  adi banci cawan enda ula iinemNa.
4.      Nggo iteh Yesus, maka kegeluhenNa nandangi seh me (KematenNa), emaka kenca Yesus ertoto, idahiNa ajar-ajarNa, tapi idapetiNa ajar-ajarNa sitelu kalak e nggo tunduh, emaka ipersingeti Yesus ia teluna. Nina Yesus sada jam pe la kam tahan erjaga-jaga. Padahal ibas paksa-paksa si bageme Yesus tuhu-tuhu membutuhken teman si banci menopang Ia, sibanci nggejapken kai siigejabken Yesus ibas ngalaken kematen. Seh telu kali Yesus ngadi ertoto, emaka dungna sisada me Ia ngalaken perbebenNa e.
5.       Ngenen perdalanen kegeluhen Yesus seh ku peken Getsemane enda, maka i peken Getsemane enda me ibenai kiniseran Yesus. Janah ibenaina arah perasaan ras pusuh..

APLIKASI
            Adi sadar kita, erkiteken dosanta me maka Yesus nggeluh ibas kiniseran. Erkiteken guna nelamatken kita nge maka Yesus nggeluh ibas kiniseran. Kerina dosa-dosanta itanggungken man Yesus Kristus. Erkiteken pengurbanan Yesus nge maka kita nggeluh ibas keselamaten, maka la ateta nggit ncedai pemere Tuhan/perkuah ate simbelin e man banta. Emaka sikatakenlah bujur man Tuhan.
            Nggeluh ibas keselamaten eme nggeluh ibas keriahen, subuk pribadi bagepe ibas persadan  (komunitas). Emaka la banci kita nggeluh alu egois, nggeluh alu mementingken diri sendiri. Cuba sinen kerna Yesus. Uga jadina adi diriNa saja ngenca siiukurina, tentuna la kita nggeluh ibas keselamaten, tapi erkiteken keleng kal atena banta, emaka nggit Ia ngkurbanken diriNa gelah kita terkelin. Emaka seharusna ras sepatutna lah kita nggeluh i tengah-tengah persadan gereja alu la mementingken diri sendiri. Kita harus nggeluh ibas sikeleng-kelengen. Sebab nggeluh alu sikeleng-kelengen nge sierbahanca melala sibanci siban, termasuk nggeluh sisampat-sampaten.

Pdt. Steven Kumenit, STh.M.Min. 

Rabu, 13 Maret 2013

Erdame Ras Ersada Arih Ibas Ngelai Tuhan (Filipi 4:1-3).



BAHAN PJJ GEREJA GBKP
TANGGAL 17 – 23 MARET 2013.
Filipi 4:1-3.

Tema : Erdame Ras Ersada Arih Ibas Ngelai Tuhan.

LATAR BELAKANG
1.      Perpulungen Pilipi merupaken salah sada hasil pelayanen Paulus, janah mayoritas perpulungen Pilipi eme kalak kristen non Yahudi. Perpulungen Pilipi si lit ibas kita e terletak i daerah Makedoni. Janah perlu siteh hubungen Paulus ras perpulungen Pilipi cukup ndeher, erkiteken deherna hubungen e maka Paulus nggit ngaloken penampat sibereken perpulungen Pilipi man bana (band. Pilipi 4:15; 2 Korinti 12:9).
2.      Surat man man perpulungen Pilipi enda isuratkenna ibas penjara nari. Ate Paulus gelah mpegegehi kiniteken ras mereken motivasi man perpulungen sisangana ngenanami perbeben ras kiniseran, gelah tetap nggeluh selaku kalak kristen situtus si terpengaruh ku bas ajaran-ajaran sipapak. Memang paksa sie perpulungen harus berjuang guna ngalaken pengajaran-pengajaran sipapak. Ajaran singajarken kerna keselamaten situhu-tuhu idatken arah ndalanken taurat ntah pe harus isunatken (nen = Yudaisme). Man Paulus sendiri perbahanen sibagenda eme kegeluhen singgo berlawanan ras salib Kristus (band. Pilipi 3:18).
3.      Tujun Paulus sideban eme guna mpersingeti perpulungen gelah tetap nggeluh ibas persadan. Emaka adi lit nggeluh la siangkan i tengah-tengah perpulungen, e kerina harus ibeneken. La terkecuali pe man dua diberu si Eiodia ras Sintike simerupaken teman erdahin Paulus ibas meritaken Berita Si Meriah. I ja Eiodia ras Sintike harus min ia nggeluh ibas persadan, ersada arihna, ula sirubat-rubat[1] . Enda itekanken Paulus sebab la banci hal sibage nggeluh  ibas persadan gereja. Gereja simerupaken alat Tuhan guna meritaken Berita Si Meriah, bagepe selaku kula ni Kristus harus ncidahken biak nggeluh sikeleng-kelengen. Emaka ibas rangka ndameken Eiodia ras Sintike nge isuruh Paulus si Sunsugos jadi juru dame. Ate Paulus gelah kalak enda duana Eiodia ras Sintike nggeluh bagi siersenina ibas Tuhan. Maksudna nggeluh alu meteruk ukur, nggit ipinpin Kesah Si Badia, nggeluh erkeleng ate, sada ukur ras sada tujun. Emaka lanai lit sindarami kepentingen man dirina ngenca.
4.      Nggeluh la siangkan,  bagi Paulus sada hal sibanci ncedai persadan  ras ncedai makna kehadiran gereja siersaksi.  Apai ka  peranan dua tokoh enda eme si Eiodia ras Sintike cukup penting kal tupung sie ibas perpulungen sibanci mpengaruhi persadan perpulungen e. Emaka ate Paulus gelah Eiodia ras Sintike tetap nggeluh ibas ersada arih ras nadingken biak si pebelin perbedaan si lit bas ia duana, seh maka perkembangen gereja pe banci erpedasna teridah. Adi sibandingken ras perkembangen gereja ope lit perpulungen Pilipi maka i je siidah perkembangen gereja tuhu-tuhu mehuli, anggota gereja nggeluh ersada arih sierbanca ngena ate Tuhan, bagepe ngena ate kalak, sidungna ertambah-tambah jumlah perpulungen e.
5.      Perubaten Eiodia ras Sintike la saja merugiken gereja tapi pe merugiken man dirina sendiri, sebab keselamaten singgo jadi sekerajangenna bene me. Sebab kalak singgeluh ibas ketutusen ras ndalanken singena ate Tuhan ngenca sitercatat ibas kitab kegeluhen (nen. Ayat 3).

APLIKASI
            Nggeluh la siangkan ras nggit rubat  la bo merupaken sipat gereja. Emaka bagi gereja adi lit anggota si la siangkan, situhuna enda nggo merupaken sada bahaya man gereja, sebab nggo terjadi perpecahan ibas persadan e. Ibas gereja singgo lit perpecahan maka la saja kehadiran gereja selaku alat Tuhan guna mpeseh Berita Si Meriah banci “terhambat” bagepe dungna mesukah gereja iserang ajaran-ajaran sipapak, sierbahanca gereja banci sontar, emaka penting kal nggeluh ibas persadan (band. Matius 12:25).
            Adi lit anggota perpulungen, subuk dua kalak ntah pe lebih si rubat ntah pe la siangkan maka i je me gereja subuk secara institusi ntah pe pribadi harus banci ndamekenca (band. Sunsugos ibas ogenta, ayat 3), sebab adi lang maka banci terjadi kemunduran pelayanan ras keaktivan ibas pelayanan gereja. Bagepe banci saja anggota perpulungen pindah  sektor, pindah keanggotaan gereja ku gereja sideban, i jenda me gereja harus jadi alat mediasi gelah adi lit sirubat lanai ia rubat, tapi nggeluh ia bagi siersenina ibas Tuhan. Guna mengantisipasi perubaten ibas gereja, emaka pelayanan ibas gereja harus itingkatken. Guna sie me penting kal gereja, khususna runggun ngelitken musyawarah ngawan (band. Musyawarah sidi jemaat) gelah runggun banci meteh perkembangen perpulungen. Bagepe adi lit kin anggota perpulungen si la siangkan ije pe banci icakapken guna mpehuliken situasi. Gereja harus berupaya adi lit anggota perpulungen si rubat maka penyelesaianna ula min sempat i baba ku ranah hukum, ntah pe mindo penyelesaian ku kalak sideban (hakim si la nandai Tuhan) tapi banci min i dungi ibas gereja saja (nen. 1 Korinti 6:1-7).
            Sada kesimpulan eme adi nggeluh ibas perubaten maka siterjadi la saja gereja si rugi tapi pe kita si rubat, sebab kita lanai icatat ibas kitab kegeluhen. Emaka marilah kita nggeluh ibas kedamen ras ersada arih ibas ngelai Tuhan. Uga cara ras bentuk ngelai Tuhan, khususna ibas tahun Solidaritas enda, mari sicakapken ibas Musyawarah ngawan[2] .   

Pdt. Steven Kumenit, STH.M.Min.



[1] Kai sijadi penyebab Eiodia ras Sintike rubat la kal jelas.
[2] Agenda gereja GBKP, Musyawarah ngawan ilaksanakan ibas tanggal 24 Maret 2013.

Rabu, 06 Maret 2013

Pusuh Si Engkelengi (2 Samuel 9:1-13)



BAHAN PJJ GBKP GEREJA GBKP
TANGGAL 10-16 MARET 2013.
2 Samuel 9:1-13.

Tema : Pusuh Si Engkelengi

LATAR BELAKANG
1.      Kenca “kekuasaan” Saul (raja Israel sipemena) lanai lit, maka ibas sada wari nungkun Daud, lit denga nge tading keluarga Saul ? adi lit kucidahken ateku keleng ateku man bana erkiteken Jonathan. Sura-sura Daud enda tuhu-tuhu berlawanan ras hukum perang, bagepe kebiasaan siterjadi ibas dunia kuno. Sebab biasana kenca lit penguasa baru siberhasil “menduduki” jabatan selaku raja, maka anggota keluarga penguasa sitalu ibunuh kerina, alu tujun gelah la lit pagi singelawan penguasa simbaru e. Tapi Daud lang. Enda jadi erkiteken Daud ras Jonathan erteman, janah nggo lit sada ikaten perpadanen (band. 1 Samuel 20:1- 43).
2.      Keleng ate Daud nandangi kesusuran Saul, bagepe rasa hormatna nandangi Jonathan teridah, uga Daud ndilo Mepiboset anak Jonathan ku istana, janah Mepiboset ndatken “pelayanen” siistimewa i istana, jadi bagin keluarga istana, bagepe ibere Daud  mulihi kerina taneh sikerajangen Saul ndube man Mepiboset. Keleng ate Daud nandangi Mepiboset  enda ibas rangka nepati perpadanenna man Jonathan. Alu bage maka Daud nggo njaga ras tetap mereken kegeluhen man kesusuren Jonathan, sebab e me perpadanen Jonathan ras Daud ndube (band. 1 Samuel 20:14-17).
3.      Amin gia Mepiboset sekalak sicempang, tapi keleng ate Daud,  ras tetap ngikat perpadanenna ras temanna Jonathan ndube isehkenna. Sebab lit pengangkan kalak sicempang erkite-kiteken penghukuman Tuhan (band. Yohanes 9:1-2). Emaka kalak si bage harus ihindari. Enda me siterungkap ibas perkataan Mepiboset man Daud, nina :  la kap aku ulin asangken biang mate (ayat 8).
4.      Keleng ate Daud man Mepiboset la saja terjeng njadiken ia bagian ibas keluarga istana, banci man ras minem i istana radu ras raja Daud, bagepe mereken tanah sikerajangen bulang Mepiboset, tapi pe ibere Daud pelayanna eme si Siba ras keluargana guna ngurusi tanah e.
5.      Situhuna kai siicidahken Daud kerna keleng ate man Mepiboset la saja erkiteken  nggo terjadi ikaten perpadanen Daud  ras Jonathan, tapi lebih asangken sie eme lit sada perpadanen siipadanken Daud man Tuhan (ayat 3).

APLIKASI
            Lit sada pengajaren siibereken Yesus man banta selaku kalak sitek man baNa, eme pengajaren  cukup radikal eme guna ngkelengi imbang. Kita isuruh gelah lit bas kita keleng ate, bagepe biak singgit ngalemi salah imbangta.  (nen. Lukas 6:27-38). Ibas pengajaren sicukup radikal enda kita iingetken maka lit Tuhanta eme Yesus Kristus siperkeleng, singgit ngkurbanken diriNa guna nebusi dosa-dosanta.
            Ibas kita ngkelengi  ibangta bagepe temanta manusia, situhuna lit tujunna eme gelah kalak sideban banci ngenen keleng ate Tuhan e. Kalak sideban banci ngenen ras meteh  maka kita enda anak-anak Dibata kap. Jadi man banta biak ngkelengi la banci alu pekulah-kulah tapi harus ibas pusuh nari. Persoalenna uga gelah pusuhta e pusuh si engkelengi ! Gelah lit pusuh si ngkelengi maka Kesah Si Badia siharus ngkuasai pusuhta. Bagepe kegeluhenta harus tetap nggeluh ibas persadan ras Tuhan. Kita harus patuh man Tuhan, gelah tuhu-tuhu kita enda ikuasaiNa.
            Adi nggeluh lah pusuh singkelengi bas dirinta, maka pengkelenginta man kalak sideban, la saja terjeng man kalak simehuli man banta, tapi pe man kerina kalak, termasuk sidekah enda ndatken perlakuan sila mehuli ibas doni enda nari (ketidak adilan, penindasan, rsd), bagepe nandangi kalak siimarginalkan (iasingkan).
            Perlu siteh ibas kita ngkelengi temanta manusia maka kita nggo ngkelengi Dibata (Matius 25:341-46).

Pdt. Steven Kumenit, STh.M.Min.