Liturgi Natal Umum.

LITURGI NATAL UMUM

KLASIS MEDAN KUTA JURUNG TAHUN 2014.

Tema         : IBas Keleng AteNa Reh Yesus Ku Doni Enda (Band. 1 Yohanes 4:9).

Sub Tema : Arah Natal Enda Encidahken Biak Kalak Kristen Eme sikeleng-kelengen. Bagepe                       IBas Semangat Natal sibengketi tahun 2015 ibas Terang Peningkatan Sosial,                                 Budaya Ras Ekonomi Jemaat.

PERSIKAPEN

PENDILO KU BAS KEBAKTIN

Lit   :    Ersuraklah man Tuhan oPertibi kerina. Nembahlah man Tuhan alu ukur meriah, dahilah ku adep-adepenNa janah rende meriah. Sebab Tuhan simada kuasa la pernah ngelupaken kita. Emaka ibas  keleng ateNa maka reh Ia ku doni enda jadi seri ras manusia, gelah kita kerina nggeluh ibas keselamaten. Yesus me ulu kekelengen, emaka nggeluh lah kita ibas keleng ate Kristus gelah nggeluhta teridah biak Kristus.   Emaka  ibas kerina kesibukenta, nggo ndilona kita gelah reh kita ku bas kebaktin enda. Emaka marilah siikuti kebaktin enda alu dem pengataken bujur.

Rende KEE 139:1,3,5. I BETLEHEM NGGO TUBUH

1).   I Betlehem nggo tubuh Tuhanta Yesus e

        Lah jumpa ras merincuh Ukurku pe ku je

        Ukurku pe ku je.

3).   Ateku me ersembah  man si tubuh i je

        Ban si mekuah man si perdosa nge

        Man si perdosa nge

5).   Ota dage sidahi ras kita radu pe

        Lah Ia pegegehi, kinitekenta e,

        Kinitekenta e.

(Prosesi bengket ku bas kebaktin)

VOTUM RAS SALAM

Lit      :    Kebaktin Natal enda ibenaken ibasgelar Dibata Bapa sinjadiken langit, doni ras kerina isina. Ibas gelar Yesus Kristus, Tuhan singgo jadi manusia. Ibas gelar Kesah Si Badia sitetap nemani ras minpin kerina kalak sitekman baNa.

               Mejuah-juah man kam kerina sierkeleng ate man Tuhan. Tuhan  tetap masu-masu  ras mereken kejuah-juahen ras kemalemen ate man kam kerina. Amin.

Perp.  :    Amin ……. Amin ……. Amin …….

INTROITUS

Lit      : Adi ikutkenndu pedah-pedahKu, tetap nge kam Kukelengi, bali ras Aku ngikutken pedah-pedah BapangKu, janah tetap Aku ikelengiNa (Yohanes 15: 10).

Rende PEE 27:1-4. SI ENDEKEN ‘NDE-‘NDEN SI

                                  MERIAH

1).   Si endeken ‘nde-‘nden si meriah

        Man Tuhannta si ‘nggo tubuh bas pelangkah

        Sabab patut nge k’rina kita nembah

        Ban babaNa terang ngaruh ras petuah

              Ref    :     Dage mari kita kerina

                             ‘Lah si puji gelar Dibata

                             Ula nai iukur erbera

                             Tuhan Yesus me kap Rajanta

2).   Tuhan Yesus metunggung dat pujin

        Perban Ia si ngajari kita kin

        Kek’lengenNa la erkeri-erkerin

        Adi pakelah pedahNa seh pagin

              Ref    :     Dage mari kita .......

3).   Gelgel nari suratken nabi-nabi

        Reh me S’kalak si nampati pertibi

        Em pemere idur Dibata nari

        Enggo tubuh i Betlehem tengah berngi

              Ref    :     Dage mari kita .......

       

4).   Tuhan Yesus kuinget min Kam rusur

        ’Lah babaiNdu pergeluhku ku si bujur

        ’Di bage kiniteken la erkusur

        Enggo paguh gia lit rusur si ngugur

              Ref    :     Dage mari kita .......

KOOR

PENGATAKEN BUJUR IBAS KELENG ATE TUHAN

Lit       :    Ku kataken bujur man baNdu o Tuhan, alu bulat ukurku

Perp.    :    I lebe-lebe dibata-dibata si deban, rende aku muji Kam.

Lit       : Janah muji gelarNdu, erjimpuh aku ngadap ku RumahNdu si badia, erkiteken Kam setia dingen tetap kekelengenNdu.

Perp.    :  Enggo icidahkenNdu maka gelarNdu ras perentah-perentahNdu belinen asangken kai pe.

Lit       :    Tupung kulebuh Kam, ialoiNdu aku, alu gegehNdu, ipegegehiNdu aku.

Perp.    :    Kerina raja-raja i doni ipujina Kam, o TUHAN , erkiteken enggo ibegina padan-padanNdu.

Lit       :    Kerna kemulianNdu si mbelin dingen kai si enggo ibahanNdu, rende me ia kerina.

Perp.    :    Aminna pe Kam si meganjangna, ipekena-kenaNdu nge kalak si meteruk. Kalak megombang la banci cebuni i bas Kam nari.

Lit       :    Tupung aku ikeleweti kiniseran, iampang-ampangiNdu aku maka la aku bene. IlawanNdu imbang-imbangku si sangana ngamuk, alu gegehNdu ikeliniNdu aku.

Perp.    :    IlakokenNdu kai si enggo ipadankenNdu. O TUHAN , keleng ateNdu tetap rasa lalap, bahanlah serta dahin si enggo ibenakenNdu.

Rende KEE N0 178. PUJILAH MIN

Pujilah min, pujilah min !

Dibatanta, Dibatanta si ni datas

Dame ni surga nusur ku doni ngena ate man manusia

Pujilah min Dibatanta, Pujilah min Dibatanta

Dame ni surga nusur ku doni

Dame ni surga nusur ku doni

Ngena ate, ngena ate man manusia

Ngena ate man manusia, man manusia

Pujilah min, pujilah min !

Dibatanta, Dibatanta si ni datas

Dame ni surga nusur ku doni

Ngena ate man manusia

Amin, Amin, Amin

LITANI/PERTOTON NATAL

Lit      :    Ikataken kami bujur man baNdu  o Tuhan sebab reh Kam  i Surga nari ku doni enda, jadi seri ras manusia.

Perp. :    Ibas Kam jadi seri ras manusia, ateNdu gelah kami terkelin.

Lit      :    Kam  Tuhan nusur ku doni enda, ncidahken mbelin kal kekelengenNdu man kami.

Perp. :    La ateNdu kami bene ibas dosa.

Lit      :    Kam Tuhan sierkuasa, bagepe perkeleng arah Natal enda, ipehuliNdu kami tinepaNdu singgo ceda.

Perp. :    Bujur Tuhan Natal mbagai kami nggeluh ersada ras Kam.

Lit      :    Natal mpersingeti kita maka kita enda seri ras tempasNa.

Perp. :    Temani kami Tuhan gelah kai siibahan kami nuduhken kami enda nggeluh ibas Natal.

Rende KEE N0 115:1-3. KERIAHEN SIMBELINNA

1).   Keriahen simbelinna,  sikuberitaken e

Enggo tubuh si permakan. Eme Tuhan Yesus e

        Pujilah min Dibatanta : Ras dame dame dame man banta

        Dibatanta si erkuah ate,  Man kita jelma e

2).   Ibas berngi enda terang bintang si mehelhel e

T’rangna seh ku perukuren si lanai erlayas pe

Pujilah min Dibatanta : Ras dame dame dame man banta

        Dibatanta si erkuah ate,  man kita jelma e

3).   Tuhan Yesus persadanta,  em isuruh Bapa e

Si nasapken k’rina dosa e, ibas Golgota kepe

Pujilah min Dibatanta : Ras dame dame dame man banta

        Dibatanta si erkuah ate,  man kita jelma e

KOOR

NAGANI LILIN

Rende KEE N0.135:1-3. BERNGI E NGGO KEPE

1).   Berngi e, nggo kepe Yesus reh ku doni e

Nusurlah ngangkut dosanta me kin

Jadi kap musillah sangap pagin

Asa si tek Tuhan e. Asa si tek Tuhan e.

2).   Anak e bujur pe singena me aku e

KiniulinNdu tadingken Kam kap

Bengket ku doni lah t’rang si gelap

Aku daramenNdu e. Aku daramenNdu e

3).   Berngi e, nggo kepe Tuhan reh ku doni e

Padan Dibata teridah tetap

KinikelengenNa banta me kap

Tuhan sipuji gelah. Tuhan sipuji gelah

KHOTBAH

PENGAKUN KINITEKEN

PERSEMBAHEN

Lit    :    Meriah ukurta sebab Natal eme Tuhan si reh ku doni enda. Bagepe ibas Natal reh guru-guru i Timur nari ipersembahkenna man Yesus emas, kumenen ras umur. Emaka marilah kita mpersembahken persembahenta tanda kita ngataken bujur man Tuhan.

Rende KEE N0. 114:1-3. SENDAH JUMPA KITA WARI

                                           RAYA E.

1).   Sendah jumpa kita wari raya e,

Peringeten tubuh Tuhan Yesus e

Nusur ndahi kita manusia e,

Keriahen kap e

        Ermulia me Tuhanta,  E sipuji me GelarNa

        Perdamen ib’re Dibata, Tuhan Yesus kap e

2).   Mari kita ku kuta Betlehem e

Muji nembah man Tuhanta Yesus e

E tinenges Tuhan si perkuah e

Dibata Bapa e

Ermulia me Tuhanta, e sipuji me GelarNa

Perdamen ib’re Dibata, Tuhan Yesus kap e

3).   Sembah kami man bandu situbuh e,

Kam simaba dame ku pertibi e

Bengket min ku tendi ukur kami e,

DameNdu o Yesus

Ermulia me Tuhanta, e sipuji me GelarNa

        Perdamen ib’re Dibata, Tuhan Yesus kap e.

PERTOTON PERSEMBAHEN

KOOR

PERTOTON SYAFAAT

TEKAD NATAL

Lit      :    Natal eme keleng ate Tuhan man manusia. Kai dage sibanci sibahan ibas kegeluhenta ?

Perp. :    Ate Kami nggeluh sikeleng-kelengen, subuk ibas jabu, bagepe ibas perpulungen.

Lit      :    Natal ncidahken, Tuhan nadingken kerina si lit bas Ia, nggeluh bagi sekalak juak-juak, janah meteruk ukurNa.

Perp. :    Ate kami nggeluh ibas meteruk ukur ras ate nggeluh ibas persadan.

Lit      :    Natal mereken man banta kegeluhen simbaru,gelah kita banci nggeluh selaku tinepaNa simbaru. Kai dage sibanci ilakoken ibas kegeluhenta ?

Perp.  : Ate Kami, ndalanken kai singena ateNdu ibas kegeluhen kami tep-tep wari. Bagepe ate Kami mpersiapken diri kami bengket ibas tahun peningkatan sosial, budaya ras ekonomi jemaat.

======= Perpulungen Tedis =======

ENDE-ENDEN PENDUNGI

Rende KEE N0 193:1-3. ‘BAS SI NASA TINEPANA

1).   ‘Bas si nasa tinepaNa. Tetap k’rina rende t’rus

‘Nde-enden pujin badia. Muji gelar Penebus

Glooooooooooria Muliaken Tuhan!

Glooooooooooria Muliaken Tuhan

2).   ‘Bas ingan si meganjangna, bala Tuhan i surga

Rende m’riah ia k’rina man Tuhan Penebusta

Glooooooooooria Muliaken Tuhan!

Glooooooooooria Muliaken Tuhan

3).   K’rina ginemgem Dibata, pehaga si tubuh e,

Surga doni rende iaK’rina alokenNa pe

Glooooooooooria Muliaken Tuhan!

Glooooooooooria Muliaken Tuhan.

PERTOTON TUHAN

PEMASU-MASUN

Lit      :    Mulihlah alu mejuah-juah, ras alokenlah pasu-pasu idur Tuhan nari :

               IPASU-PASU JANAH IKAWALI DIBATA KAM SIANG AYO DIBATA ERSINALSAL IBABONDU. JANAH MELIAS ATENA NGENEHEN KAM. ITATAP DIBATA KU KAM. JANAH MALEM ATENDU IBAHANNA. AMIN.

Perp.  :    Amin ……. Amin ……. Amin …….

0000000@@@@@@@0000000

 

Tetaplah Mpermuliaken Ia (Epesus 4:24-29)

BAHAN PJJ GEREJA GBKP

TANGGAL 23 – 29 NOPEMBER 2014.

Epesus 4:24-29.

Tema : Tetaplah Mpermuliaken Ia

LATAR BELAKANG

1.      Kota Epesus eme sada kota sicukup meriah, janah terkenal ibas zamanna. Sebab merupaken salah sada pusat penembahen. Emaka melala kal ijumpai ingan-ingan penembahen man Dewi Diana. Tapi kenca reh Rasul Paulus ngajarken kerna keselamaten si tuhu-tuhu, nterem jelma si tek man Jesus Kristus, termasuk piga-piga guru sibaso. Janah erkiteken tek ia man Jesus Kristus, maka itutungna itutungna buku-buku mantrana.

2.      Surat Epesus enda ikirim Paulus ibas penjara nari, ibas rangka mereken nasehat ras motivasi man perpulungen i Epesus  gelah tetap nggeluh selaku manusia simbaru, nggeluh sue ras tempas Dibata. Kerina enda berarti harus nggeluh sue ras singena ate Tuhan.

3.      Ibas oratenta sendah, penekanen Paulus eme makna nggeluh  ibas persadan. Nggeluh ibas persadan e tuhu-tuhu mabai perpulungen menghindari piga-piga hal si la mehuli, sincedai persadan eme erbual, merawa, ula bere kesempaten man si iblis, ula nangko, ula belasken cakap si la erturi-turin. Enda kerina bentuk manusia simale. Tapi siharus ilakoken eme simehuli singena ate Tuhan eme ula erbual, harus nuriken kerna situhu-tuhu, adi merawa ula seh erdosa, ula buniken rawandu she ben wari, ulanai nangko, tapi erdahinlah alu mehuli guna ncariken keperlunna, gelah banci nampati kalak sikepiceten, cakap si ergunalah sibelasken gelah erguna bagi simegisa. Ibas perpulungen Epesus ngelakoken enda kerina maka perpulungen nggo ncidahken telu hal eme 1). Sebage manusia tempas Dibata. 2). Nggeluh ibas keadilan. 3). Nggeluh ibas kebadiaan.

4.       Amin gia iblis nggo italuken Tuhan, tapi iblis tetap denga erdahin guna ngagalken pendahin Tuhan, termasuk kerna persadan kalak kristen. Sebab persadan kalak kristen ncidahken keleng ate Tuhan simegegeh ras nggeluh selaku gereja. Emaka iblis sipentar e muat kesempaten gelah persadan perpulungen e sontar.

5.      Perpulungen Epesus, tuhu-tuhu harus ncidahken kegeluhenna selaku manusia simbaru man sekelewetna. Kegeluhen simale, siperna ilakoken anggota perpulungen (band. Ope denga perpulungen nandai Kristus) ula nari ipraktekken ibas perpulungen. Sebab kegeluhen manusia simbaru nggeluh ibas dua hal eme 1). Keterhubungen ras Tuhan. I ja perpulungen harus ngataken bujur ibas keselamaten singgo ibereken Tuhan, bagepe ibas penemani Kesah Si badia man perpulungen. Erkiteken sie me maka perpulungen harus menghindari kerna si la mehuli. 2). Perpulungen nggeluh ibas ikaten siharmonis sada ras sideban. Bagepe harus nggeluh sikeleng-kelengen ras sisampat-sampaten. Ibas erti kata saling ngelai ras bertanggungjawab.

APLIKASI

            Kita pe selaku kalak kristen harus meteh maka kita enda pe nggo nggeluh ibas kegeluhen simbaru (manusia simbaru). Selaku manusia simbaru siharus ngelakoken kai singena ate Tuhan. Selalu manusia simbaru harus pala-palai menghindari dosa bagi erbual, merawa, nangko, rsd, sebab enda banci meneken karakterta selaku manusia tempas Dibata. Memang mekatep la terkuasai kita dirinta, emaka mekatep ka kita ngelakoken dosa, khususna erbual (dusta) ras merawa. Erbual berhubungen ras emosi, sebab adi lit anggota perpulungen erbual emaka banci merawa kalak man banta. Janah adi kita nggo merawa, maka seh la terkendaliken kita emosinta sierbahanca kita erdosa. Tapi amin bage gia, adi kita merawa ula seh min erdosa. Maksudna adi kita lalap merawa ras lanai terkendaliken kita rawanta, je me nggo ikuasai/ ipake iblis  kita, sidungna lit dosa siibahan kita erkite-kiteken rawanta e. Jadi kegeluhenta harus min ikuasai Kesah Si Badia, alu bage kita ngasup ngelakoken simehuli singena ate Tuhan. Perbahanen sibage me tentuna kita nggo mpermuliaken Tuhan.

Pdt. Steven Kumenit, STh.M.Min.