Selasa, 28 Januari 2014

Ndahiken Si Mehuli (Efesus 2:4-10)



BAHAN PERPULUNGEN JABU-JABU
GEREJA GBKP
TANGGAL 2 – 8 FEBRUARI 2014.
Epesus 2:4-10

Tema : Ndahiken SiMehuli.

LATAR BELAKANG
1.      Perpulungen Efesus eme ulih pelayanen Rasul Paulus. Janah mayoritas anggota perpulungen eme la kalak Yahudi. Ibas erti kata ope denga anggota perpulungen si la kalak Yahudi enda tek man Yesus Kristus, kalak enda ersembah man dibata-dibata sideban denga. Bagepe adi sinen latar belakang kegeluhen kota Efesus, ije merupaken salah sada pusat keagamaan, emaka la heran adi i kota Efesus lit sada kuil simejile guna ersembah man dewi Diana.
2.      Bahan oratenta sendah eme sada surat siikirimken Rasul Paulus ibas penjara nari siberbentuk pengelayasi man anggota perpulungen, gelah anggota perpulungen banci ngenen kerna kecibalna genduari. Paulus ncidahken maka kegeluhen perpulungen sigenduari nggeluh ibas Kristus, e erkiteken lias ate Tuhan Yesus Kristus. Enda ikataken Paulus sebab nai ope denga perpulungen tek man Yesus, perpulungen mate denga ibas pertendin, sebab perpulungen ersembah man dewi Diana. Kegeluhen ibas Kristus erbahanca perpulungen ipekeke Dibata ras mbaba  anggota perpulungen kundul ras Ia ibas ingan simeganjangna. Erkiteken kematen ras kekeken Yesus nge maka kegeluhen perpulungen si ndekah nggo ikut itanemken ibas kematen Yesus Kristus, janah ibas kekeken Yesus, perpulungen ikut ipekeke ibas Yesus Kristus e (band. Roma 6:4-5).
3.       Siimaksudken Paulus kerna mate pertendin eme nggeluh iteruh kuasa iblis. Manusia iperbudak dosa. Alu bage manusia ndauh ibas keselamaten siisikapken Tuhan. Emaka gelah manusia nggeluh ibas keselamaten maka, manusia harus ialemi dosana, ipegeluhken secara pertendin. Adi nggo nggeluh secara pertindin, berarti manusia nggo bebas ibas budak dosa/iblis nari, alu bage manusia nggo nggeluh ibas tinepa simbaru.
4.      Mate pertendin enda erkiteken salah manusia sendiri, sebab manusia nggit nggeluh ibas perbudaken iblis.  Janah gegeh ras kepentaren manusia la ngasup mulahi ibas perbudaken iblis nari.  Tapi erkiteken lias ras erkuah ate Tuhan nge maka manusia nggeluh ibas keselamaten. Alu kata sideban erkiteken tek man Yesus Kristus me maka perpulungen Efesus nggeluh ibas tinepa simbaru. Erkiteken sie me keselamaten singgo ibereken Tuhan man perpulungen Efesus erbahanca kegeluhen Perpulungen Efesus nggeluh ibas persadan ras Yesus Kristus. Keselamaten enda eme pemere Tuhan simbelin man perpulungen Efesus, emaka perpulungen Efesus la banci meganjang ukur i lebe-lebe Dibata.
5.      Nggeluh ibas persadan ras Yesus Kristus lit tujunna eme ndahiken dahin Tuhan singgo irencanakenNa. Jadi penungkunen kai kin dahin-dahin Tuhan e. Perpulungen Efesus harus ngelakoken simehuli singena ate Tuhan. Perpulungen Efesus harus nadingken praktek-prakten kegeluhen ope ia tek man Yesus Kristus. Alu bage perpulungen nggo jadi pancur pasu-pasu man kalak sideban. Kalak sideban banci tek man Yesus Kristus, janah nggeluh ia ibas keselamaten siisikapken Tuhan nandangi kerina jelma. Enda ikataken Paulus sebage sada motivasi man perpulungen gelah perpulungen tetap tek man Yesus ras ndahiken dahin Tuhan ibas kegeluhenna tep-tep wari.

APLIKASI
            Kita harus ngataken bujur man Tuhan erkiteken lias ras perkuah ateNa maka kita nggeluh ibas keselamaten. Tuhan enggo ndilo kita ibas gelap nari guna bengket ku bas terang lako naksiken perbahanen Tuhan simbelin (band. 1 Petrus 2:9). Emaka situhuna kita selaku kalak si tek la banci kita kem ntah pe sinik saja ibas kegeluhenta, sebab kita iselamatken erkiteken lit rencana Tuhan man banta. Rencana Tuhan eme kita harus jadi pancurNa guna keselamaten kerina manusia/doni enda. Emaka harus sigejapken kata ras perbahanenta harus ncidahken kegeluhen singgo iselamatken. Alu kata sideban kita harus ngkelengi dirinta sendiri bagepe harus kita nggeluh sikeleng-kelengen ras sapih-sapih kita manusia. Kegeluhenta harus nggeluh bermakna. Enda me tanggungjawabta selaku manusia singgo iselamatken.

Pdt. Steven Kumenit, STh.M.Min.

Sabtu, 25 Januari 2014

Seri Kin Manusia Ras Tinepa Dibata Si Deban (Mazmur 8:1-10)



BAHAN PERPULUNGEN JABU-JABU
GEREJA GBKP
TANGGAL 26 JANUARI – 1 FEBRUARI 2014.
Mazmur 8:1-10.

Tema : Seri Kin Manusia Ras Tinepa Dibata Si Deban.

LATAR BELAKANG.
1.      Sijadi oratenta sendah eme sada puji-pujin man Tuhan kerna kuasa Tuhan simejin ras uga Tuhan mereken sada tanggungjawab man manusia simelebihi tinepa Tuhan sideban. Puji-pujin enda ndarat arah kiniteken pemazmur (Daud) kenca inenna bulan ras bintang singgo itamakan Tuhan i langit. Pemazmur ngenen, situhuna manusia la lit kai pe adi ibandingken ras Tuhan. Manusia la ngasup erbahan bali ras singgo ibahan Tuhan. I ja itamakan Tuhan bulan ras bintang ibas inganna alu mehuli.
2.      Puji-pujin Pemazmur enda, sada pengataken kehamatan janah banci pe pengataken bujur man Tuhan erkiteken Tuhan nggo mereken sada kehamatan simbelin man manusia. Manusia tuhu-tuhu ipake Tuhan jadi alatna i tengah-tengah doni enda.
3.      Tuhu manusia lit kuasa, tapi situhuna kuasa si lit man manusia e Tuhan nge  simerekenca, janah kuasa e ibas rangka ngkuasai ras njagai tinepa Tuhan sideban (band. Kejadin 1:26-28). Emaka situhuna manusia la banci meganjang ukur i lebe-lebe Dibata, tapi sebalikna manusia harus nggeluh alu meteruk ukur, sebab kuasa jadi raja guna merentah tinepa Tuhan sideban e.
4.      Ibas puji-pujin pemazmur enda, la saja sada perenungen kerna ise kin manusia e i lebe-lebe Dibata, tapi pe ngataken kerna kuasa Tuhan ngelebihi kuasa siapai pe ibas doni enda, emaka  Tuhan saja nge sipatut ndatken pujin ras isembah. Tuhan ngenca sipatut ipuji ras isembah, sebab kuasa Tuhan e teridah ibas kerina singgo itepaNa, termasuk bulan ras bintang, jadi sada kemulian tersendiri man Tuhan,  kemulian si la lit bas dibata-dibata sideban. Bagepe iidah pemazmur, kuasa apai pe si lit ibas doni enda la ngasup naluken Tuhan. Erkiteken sie me Kinirajaan Tuhan nteguh la teruhdu, imbang-imbang siatena ngelawan Tuhan, isompel Tuhan me babahna. Ibas erti kata imbang-imbang Tuhan ngerana pe la banci, sebab la lit kai pe siibahanna i tengah-tengah doni enda. Kerina isi doni enda Tuhan ngenca sinjadikenca
5.       Puji-pujin enda iendeken bangsa Israel ibas kebaktin alu tujun gelah bangsa Israel banci ngenen kerna kuasa Tuhan ras tanggungjawab manusia i tengah-tengah doni enda.

APLIKASI
            Manusia ijadiken Tuhan sentudu ras tempasna (band. Kejadin 1:26), bagepe manusia ijadiken Tuhan ibas sada rencanaNa simbelin, eme guna njagai ras ngusahai tinepa Tuhan sideban, erkiteken sie me manusia eme tinepa Tuhan sisempurna. Tapi jadi penungkunen man banta, apakah manusia e seri ras tinepa Tuhan sideban ? Sada aspek, manusia seri ras tinepa Tuhan sideban. Perserina eme manusia ras tinepaNa sideban,  Tuhan kap sinjadikenca ras patuh man Tuhan. Khususna manusia ras rubia-rubia bagepe asuh-asuhen ijadiken Tuhan arah taneh. Tapi ipihak sideban manusia ras tinepa Tuhan sideban la seri. La bo seri eme erkiteken manusia ijadiken Tuhan sentudu ras tempasNa. Bagepe lit sada mandat sikhusus siibereken Tuhan nandangi manusia eme njagai ras ngusahai. Alu bage manusia eme mahkluk sitermulia asangkan makhluk sideban. Erkiteken sie me kecibal manusia berbeda kal ras tinepa Tuhan sideban, khususna ibas cara rukur, bagepe nggeluh i tengah-tengah doni enda. Emaka sada persinget man banta manusia, kegeluhenta ula min bagi tinepa Tuhan sideban (rubia-rubia) eme sikaraten, rsd. Kegeluhen manusia harus nggeluh ibas puji-pujin man Tuhan siteridah ibas kerina aktivitasta.

Pdt. Steven Kumenit, STh.M.Min.

Jumat, 17 Januari 2014

Nggeluh Alu Bujur (Kejadian 41:44-57)



PEKAN PENATALAYANAN
WARI VII, SABTU 25 JANUARI 2014
GEREJA GBKP
Introitus    :     La lit si banci erbahanca ukurku teriahen asangken megi anak-anakku nggeluh i bas kebujuren (3 Yohanes 1:4)
Ogen         :     Mazmur 37:23-26
Khotbah    :     Kejadin 41:44-57
Tema         :     Nggeluh Alu Bujur

LATAR BELAKANG
1.      Yusup labo kalak Mesir, tapi erkiteken kepentaren si lit bas ia, khususna ngasup ngoge nipi raja maka Yusup iangkat jadi wakil raja. Bagepe, amin gia wakil raja ngenca, tapi ise pe la banci erban kai pe adi la nungkun lebe man Yusup.
2.      Pengangkatan Yusup jadi wakil raja Mesir ertujun guna ngaturken bangsa Mesir nggeluh adil ras makmur, apai ka ibas menghadapi sada kiniseran ibas 7 tahun si reh, eme kelihen si mesangat. Sebab ibas nipi raja Mesir, singgo ioge ntah pe iantusi Yusup ngataken maka bangsa Mesir 7 tahun nggeluh alu riba-iba pangan, janah pitu tahun kenca sie, bangsa Mesir nggeluh ibas kiniseran.
3.      Selain Yusup iangkat jadi wakil raja ras nggo ibereken raja otoritas penuh (kuasa) guna merentah, bagepe gelar Yusup isambari alu gelar kalak Mesir  eme Sapnat Panea, siartina Dibata ngerana, Ia nggeluh, bagepe ibereken raja sekalak diberu guna jadi ndehara Yusup eme Asenat, siertina Milik Neit (Dewi kalak Mesir).
4.      Ibas umur telu puluh tahun Yusup nadingken istana raja guna erdahin mpesikap gelah rakyat Mesir la kelihen kenca bangsa Mesir bengket ku bas pitu tahun kiniseran (nggeluh ibas kelihen). Cara kerja ntah pe teknik siilakoken Yusup e me bagi siikatakenna man raja eme mpepulung seperlima ibas ulih peraninna guna jadi persediaan pagi. Ipepulung yusup kerina pangan e, janah isimpan ibas lumbung si lit ibas tep-tep kuta. Emaka kenca reh bencana kilehen singkenai bangsa Mesir ras bangsa-bangsa sideban, bangsa Mesir nari ngenca sitetap lit persedianna, bangsa Mesir la nggeluh ibas kelihen sebab lebih persediaan pangan.  Erkiteken tersedia kerina bahan pangan ibas bangsa Mesir, maka situasi enda terberita seh ku bangsa – bangsa sideban, emaka reh  kerina bangsa-bangsa sideban pe guna nukur nakan man Yusup.
5.      Ngenen kai siilakoken Yusup nandangi bangsa Mesir, situhuna pengrealisasian ibas sura-sura Dibata nandangi bangsa Mesir, khususna man Yusup. Sebab alu la igejap raja Mesir, peraten Tuhan nggo erdalan. Tuhan make bangsa Mesir guna mengrealisasikan rencana Tuhan sigalang eme pemeliharaan man anak-anakNa (nen 45:5-8; 50:19-20).

APLIKASI
            Adi siperdiateken ibas kegeluhenta, maka siidah lit sada perbedaan antara kalak bujur ras si la bujur. Memang banci saja teridah tempa perekonomian kalak si la bujur jore, tapi situhuna arah e ia kena hukum, bagepe la ia nggeluh ibas kemalamen ate. Tapi kegeluhen kalak bujur, nggeluh ibas kemalemen ate, sebab ngena ate kalak man banta, terlebih ngena ate Tuhan.  Emaka ibas kegeluhen kalak bujur dem ibas pemasu-masun Tuhan. La aru atena sebab tehna, Dibata pasti nampati ia, amin giajumpa perbeben ras kiniseran. Enda lit erkiteken itehna/tandaina Tuhan alu mehuli. Ibas kerina kegeluhen itehna rencana Tuhan erdahin bas ia. Emaka ibas kegeluhenna idalankenna kai singena ate Tuhan. Patuh ia ibas pinpinan Kesah Si Badia.
            Ercurmin ku bas keberhasilan Yusup, maka adi ateta nggeluh ibas keberhasilan, leben kita harus nggeluh ras Tuhan, nggeluh bujur, sebab ibas kita nggeluh bujur lit i je kepentaran, emaka siteh kerna peraten Tuhan ibas kegeluhenta. Bagi Yusup ngasup ia ngantusi nipi raja Firaun erkiteken lit bas ia kepentaran, emaka nina man raja Firaun kerina nipi e erkiteken Tuhan (band. Kejadin 41:28). Emaka arah e termulia Tuhan. Kita pe harus bage, eme ibas kita nggeluh bujur maka termulia Tuhan.

Pdt. Steven Kumenit, STh.M.Min.   

Ngenanami Ulih Latih (Amsal 9:7-9)



PEKAN PENATALAYANAN
WARI VI, JUMAT 24 JANUARI 2014
GEREJA GBKP
Introitus    :     Kalak si me duit la pernah bias akapna; kalak si erngena ate man erta la pernah idatca kai si isurana. Kerina sia-sia (Pengerana 5:10)
Ogen         :     Yesaya 65:21-23
Khotbah    :     Kuan-Kuanen 9:7-9
Tema         :     Ngenanami Ulih Latih

LATAR BELAKANG
1.      Ibas bahan khotbahnta sekali teridah maka pengamsal ncidahken dua karakter siberbeda eme kalak pentar ras la pentar. Bagepe ibalik sie pengamsal ngataken maka kegeluhen manusia mekatep sadar ntah la sadar erbahan salah, ntah pe banci erbahan salah. Emaka ibas keleng ate kalak sideban atena ncidahken salah kalak, ntah pe mpersingeti gelah selaku manusia harus nggeluh bujur. Tapi siidah ijenda kepeken tegoran ntah pe ncidahken salah man kalak si la pentar banci sidat ate mesui ras irawaina kita. Enda jadi erkiteken kalak jahat, megombang ras menganjang ukur (band. Kalak si la pentar), akapna kai siibahanna tuhu, emaka kalak si la pentar la terajarkan, emaka padin ula sipandang ia. Tapi lain ka nandangi kalak pentar. Adi siiajarken kalak pentar meriah ukurna, sebab reh pentarna akapna ia. Sebab itehna kepentaren enda banci sidat arah erbage-bage bentuk, termasuk arah kalak sideban singajarken ia. Termasuk pe man kalak  benar, adi siajarken kalak benar meriah ukurna, sebab ertambah-tambah pemetehna.
2.      Siimaksudken kepentaren ras  benar i jenda eme adi kepentaren secara sederhana eme pemeteh ras pengertin kerna kai sibenar, adil, jujur. Janah kepentaren enda rehna ibas Tuhan nari. Bagepe kepentaren harus iajarken man kalak sideban gelah manusia banci nggeluh selaku manusia tinepaNa. Biasana man kalak Israel kepentaren sidat erpalasken pengajaran eme kepentaren erpalasken hukum taurat. Emaka man kalak Israel Hukum Taurat e harus iajarken “terus menerus” (Ulangan 5:16; 6:4-9). Adi benar berarti benar menurut Tuhan, labo benar menurut manusia. Emaka kalak benar berarti nggeluh ibas peraten Tuhan. Emaka kegeluhen kalak sibenar eme ngelakoken  kerna si adil ras benar. Emaka kalak benar, kegeluhenna berhubungan ras Tuhan bagepe ras sapih-sapihna manusia.
3.      Pengamsal ibas hal enda sekalak guru mpersingeti anak didikna gelah ula “mengkritik kalak megombang ras kalak jahat, sebab nembeh atena kerna sibage. Amin gia situhuna kerna dalan simehuli itehna, tapi tetap atena erdalan ibas dalan sila mehuli.Bagepe kalak si bodoh e pe la nggit mbuka dirina guna ikoreksi, enda erkiteken kiniganjangan ukurna. Emaka percuma nge ngajarken kerna simehuli ras sibenar  (kepentaren) man bana. Padin min sihindari.
4.      Erbeda kal ras kalak pentar, adi kalak pentar terbuka kal Ia nandangi kritikan kalak, sebab keleng kal atena nandangi kebenaren ras keadilan. Kalak pentar ngaloken sada kata ajar, sebab tehna kerina e ibas rangka mbangun ia, ntah pe guna kepentarenna sendiri. Arah kalak sideban tehna kerna kebenaren e.
5.      Ibas pengamsal ncidahken  ntah pe mpertentangkan dua karakter si berbeda e, ate pengamsal, ibas hal enda guru gelah anak didikna selain mbereken kepentaren e man kalak situhu-tuhu memerlukenca, tapi gelah anak didikna nggit nggeluh ibas kepentaran ras nggit mbuka diri guna iajarken kalak sideban pe gelah ertambah-tambah me kepentarenna.

APLIKASI
      Salah sada tujun kita erdahin eme gelah banci memenuhi keperlunta, subuk genduari bagepe wari sipepagi. Alu kata sideban arah kita erdahin janah adi nggo sidat ulihna, banci min terpenuhi ntah pe ternikmati ulih latihta e, apakah secara pribadi ntah pe ras keluarga. Tapi siidah nterem denga kalak kristen ntah pe keluarga-keluarga kristen sila nggit menikmati ulih latihna. Madin akapna ipake lalap guna modal usaha, guna anak ras kempu pagi, rsd. Enda memang banci, tapi menikmati ulih latih pe perlu nge misalna berwisata ntah pe gawah-gawah ku sada-sada  ingan, man-man ras keluarga, rsd. Sebab banci saja kari lit paksana kita la ternikmati ulih latihta e erkiteken sakit, emaka tupung sehat denga kita, janah lit ka senta nikmatilah ulih latihta e alu mehuli. Tapi tetap kita ipersingeti selaku kalak pentar, tetap harus lit tabungenta guna wari sipepagi, gelah anak-anak ras kempu banci menikmati ulih latihta pe. Jadi la saja kita simenikmatisa, tapi kesusurenta pe.

Pdt. Steven Kumenit, STh.M.Min.