Selasa, 25 Februari 2014

Sehkenlah Persepuluhenndu Man Dibata (Ulangan 14:22-29)



BAHAN PJJ GEREJA GBKP
TANGGAL 2 – 8 MARET 2014
Ulangan 14 : 22 – 29.

Tema : Sehkenlah Persepuluhenndu Man Dibata

LATAR BELAKANG
1.      Sijadi bahan oratenta sendah eme Pidato Musa siisehkenna man bangsa Israel, paksa bangsa Israel ngadi-ngadi i dataran Moab. Isi Pidanona eme undang-undang kerna persepuluhen siharus idalanken bangsa Israel, khususna angkaten simbaru ras kesusurenna kenca ia bengket i taneh Kanaan, sebab ibas taneh Kanaan sidem dadih ras tengguli, I je me bangsa Israel erjuma guna ndatken kebutuhan pangan tep-tep wari ras ibas rangka kelangsungan nggeluh bangsa Israel. Siimaksudken angkatan simbaru eme angkatan sibakal bengket ku taneh Kanaan, sebab angkatan sidarat i taneh Mesir nari lanai lit, termasuk Musa, emaka erkiteken enda angkatan simbaru sitentuna la tehna kerna undang-undang singgo pernah ibereken Tuhan man orang tuana ndube paksa i Gunung Sinai, maka ipebetehken Musa mulihi kerna undang-undang, khususna kerna persepuluhen. Jadi selain Musa mpebetehken Undang-undang Persepuluhen, tapi pe enda merupaken sada perintah siharus idalanken bangsa Israel kenca bangsa Israel nggeluh i taneh Kanaan.
2.      Bangsa Israel harus nehken persesepuluhen ibas ulih jumana nari tep-tep tahun. Persepuluhen singgo iserapken bangsa Israel harus ibaba man Tuhan ibas  ingan si itetapken Tuhan. Ingan siitetapken Tuhan eme rumah pertoton. I je bangsa israel harus mbaba persepuluhen janah ersembah man Tuhan.
3.      Ibas bangsa Israel nehken persepuluhan man Tuhan ibas ingan siitetapken Tuhan, berarti bangsa Israel lit sada pengakun man Tuhan maka Tuhan saja siisembahna, ras ngaku maka ulih sidatna eme pemere Tuhan. Tuhan simasu-masu juma e maka juma e ndatken ulihna. Emaka tanda keriahen ukur, bangsa Israel nehken persepuluhen ibas hasil juma e nari. Jadi amin gia Tuhan nggo mereken taneh sijadi milik pusaka bangsa Israel, tapi tetap denga bangsa Israel tek maka taneh e milik Tuhan, janah adi tetap bangsa Israel erkemalangan man Tuhan, maka Tuhan tetap masu-masu bangsa Israel. Alu kata sideban bangsa Israel harus tetap nggeluh ibas ketergantungan man Tuhan saja.
4.       Ibas ingan ersembah, paksa bangsa Israel mbaba persepuluhen, i je bangsa Israel harus man ras-ras (perjamuan suci). Ibas bangsa Israel man I lbe-lebe Tuhan berarti bangsa Israel tetap nginget maka kerina e bekas pemere Dibata, alu bage bangsa Israel mehamat man Tuhan. Jadi situhuna lit bentuk pengajaren man bangsa Israel.
5.      Bangsa Israel  iajarken pe gelah nginget kalak sideban, khususna man kalak Lewi, sebab kalak Lewi la lit jumana, emaka la lit ka ulih jumana sibanci ipanna. Kalak Lewi la lit juma/taneh, sebab kalak Lewi ikhususken Tuhan guna erdahin ibas rumah pertoton. Emaka bangsa Israel harus inget enda, bagepe nandangi anak melumang, kalak pertandang ras diberu balu-balu. Bangsa Israel  harus nginget lit tanggungjawabna eme mperdiateken ntah pe melindungi anak melumang, kalak pertandang ras diberu balu-balu. Bangsa  Israel harus nginget maka anak melumang ras diberu balu – balu la lit kai pe. Bagepe kalak pertandang ilidungi sebab bangsa Israel harus nginget sejarah, sebab nai bangsa Israel pertandang i taneh Mesir. Erkiteken perkuah ate Tuhan nge maka bangsa Israel lit taneh i Kanaan (band. Kel. 22:21-23; Ul. 24:17-21). Ibas perbahanen sibage, asa kai siidahiken bangsa Israel ipasu-pasu Tuhan.

APLIKASI
            Nehken Persepuluhen eme tanggungjawabta selaku kalak sierkiniteken man Tuhan. Nehken persepuluhen berarti mehamat man Tuhan, janah tek kita maka kerina silit bas kita eme bekas pemere Tuhan. Adi kita nehken persepuluhan alu teratur maka kita ipasu-pasu Tuhan.
            Memang lit denga kalak si salah mengartiken persepuluhen. Sebab lit dengan kalak, serapkenna sepersepuluh ibas ulih latihna nari, janah i je nari ibuatna ras ialokasiken sue ras keperlun (pembangunan gereja, kerja rani, rsd). Enda pemahaman sisalah. Persepuluhan harus murni, emaka adi ateta nehken sumbangan, harus ibuat i luar persepuluhan. Bagepe lit denga kita si lenga murni nehken persepuluhan.
            Persepuluhan siibereken kita tujunna eme guna kemulian Tuhan, janah ipake ibas pelayanan gereja. Emaka sehkenlah persembahan persepuluhenta alu dem keriahen ras pengataken bujur man Tuhan ibas gereja, gelah kita ipasu-pasu Tuhan.

Pdt. Steven Kumenit, STh.M.Min.

Selasa, 18 Februari 2014

Kerja Rani Naksiken Ulih Kesangapen Man Kalak Si Tek (Bilangan 28:26-31)



BahaN PJJ GEREJA GBKP
TANGGAL 23 FEBRUARI – 1 MARET 2014.
Bilangan 28 : 26-31.

Tema : Kerja Rani Naksiken Ulih Kesangapen Man Kalak Si Tek.                         

LATAR BELAKANG
1.      Sijadi oratenta sendah eme bagin si la terpisahkan ibas perintah Tuhan. Ibas perintah Tuhan je itetapken gelah bangsa Israel ngerayaken wari raya, janah ibas ngerayaken wari raya lit ketentunna, khususna mpersembahken persembahen. Janah enda harus ijaga ras tetap irayaken bangsa Israel kenca ia bengket i taneh Kanaan. Bagepe segedang-gedang geluhna.
2.      Khusus wari raya rani (kerja rani), isuruh Tuhan gelah bangsa Israel mbaba gandum simbaru iperani ku bas rumah persembahen/pertoton, janah I je ibahan kebaktin. Tujun erbahan kebaktin ras mpersembahken gandum enda eme ngataken bujur, sebab  bangsa Israel tek maka Tuhan tetap ncukupi kerina kebutuhen-kebutuhen bangsa Israel alu  masu-masu jumana.
3.      Ibas kebaktin kerja rani enda bangsa Israel la banci erdahin. La banci erdahin erkite-kiteken wari raya e badia. Emaka bangsa Israel harus tuhu-tuhu mpebadiaken wari raya e alu ngerayakenca.  Perlu siteh wari raya enda, irayaken sada wari saja.
4.      Ibas perayaan wari raya enda, bangsa Israel la saja terjeng mereken persembahan pengataken bujur, tapi mpersembahken persembahen tutungen ras pengalemi dosa. Fungsi persembahen tutungen eme ibas rangka mindo pengalemi dosa ibas dosa-dosa umum sila isengaja, emaka persembahenna berupa biri-biri si la ercacat ntah dua ekor nderapati. Persembahen enda harus itutung she keri. Adi persembahen pengalemi dosa ertujun guna mindo pengalemi dosa erkiteken dosa khusus si la isengaja. Bentuk persembahen eme adi perpulungen harus ibabana lembu jantan muda, tapi adi sekalak pemimpin  eme kambing jantang. Isamping persembahen enda lit ka persembahen sideban siitetapken Tuhan siharus ipersembahken bangsa Israel paksa pesta kerja Rani e eme buah gandum sipayo ibas tepung nari icampur ras minak Zaitun, bagepe telu kilo ras tep-tep jenggi lembu, dua kilo ras bajar biri-biri. Janah sada kilo ras tep-tep anak biri-biri. Sipat persembahen enda eme sebage tambahan ibas persembahen tutungen, janah harus ilakoken tep-tep wari.
5.      Enda ibahan Tuhan gelah bangsa Israel patuh man Tuhan saja ras nggeluh ibas kebadiaan. Ibas kegeluhen sibage maka bangsa israel ndatken kejuah-juahen sedekah ia tading I tanah Kanaan, sebab lalap kegeluhenna ipasu-pasu Tuhan.

APLIKASI
            Kerja Rani ibas gerejanta nggo merupaken sada kalender tahunan si harus ilakoken perpulungen tep-tep tahun. Kerja Rani enda labo terjeng memenuhi kalender kerja GBKP, tapi arah gereja kita ipersingeti ula lupa nandangi pemere ntah pe pasu-pasu Tuhan singgo she man banta. Janah harus sirespon arah kiniteken ibas bentuk kebaktin. Emaka kebaktin kerja rani la banci ilakoken alu  meros. Bagepe adi siidah ibas bahan oratenta, makna kerja rani eme selain ngataken bujur man Tuhan, tapi pe gelah dosa-dosanta ialemi Tuhan.
            Kita banci erbahan kerja Rani erkiteken simpar pasu-pasu Tuhan man banta, subuk kita siperjuma, bagepe kita sierdahin I kantor ras ibas profesi sideban. Emaka situhuna ibas kita ngelakoken Kerja Rani, I je lit sada kesaksin kerna kesangapen, sebab sibaba alu ukur meriah.  
            Melala bentuk banci kita ngelakoken kerja rani, sipenting siarihkan ibas runggun gelah kai siibahan kita tama pujin man Tuhan.

Pdt. Steven Kumenit, STh.M.Min

Rabu, 12 Februari 2014

Warga GBKP Si Erkwalitas (2 Tesalonika 2:13-17)



BAHAN PJJ GEREJA GBKP
TANGGAL 16 – 22 FEBRUARI 2014
2 Tesalonika 2:13-17.

Tema : Warga GBKP Si Erkwalitas.

LATAR BELAKANG
1.      Sijadi oratenta sendah eme sada kata motivasi rasul Paulus man perpulungen i Tesalonika, gelah perpulungen Tesalonika nggejapken maka keselamaten singgo ialokenna genduari eme erkiteken rencana Tuhan, labo sada kebutulen, tapi tangtangna nari Tuhan nggo milih perpulungen Tesalonika guna nggeluh ibas keselamaten. Erkiteken sie me pendilo Tuhan man perpulungen Tesalonika arah Berita SiMeriah siibaba paulus ibas penginjilenna. Ibas erti kata ibas penginjilan Paulus maka perpulungen Tesalonika nggo tek man Yesus Kristus. Jadi memang labo secara kebutulan, tapi kenca Paulus itangkap Tuhan jadi serayanNa, maka isuruh Tuhan Paulus guna Mberitaken Berita Si Meriah man kalak si labo kalak Yahudi (band. Perbahanen 9:15).
2.      Erkiteken perpulungen ipilih ras iselamatken guna nggeluh ibas pinpinen Kesah Si badia ras nggeluh ibas kebenaren, maka iajuk Paulus gelah perpulungen Tesalonika tetap njemak ajaran – ajaran singgo iajarkenna man perpulungen subuk arah lisan bagepe arah tulisan (surat) gelah kebenaren situhu-tuhu tetap nggeluh man perpulungen. Enda ikataken Paulus sebab paksa sie nggo berkembang ajaran si papak, sierbahanca piga-piga anggota perpulungen nggo terpengaruh. Ajaran papak e ngataken maka wari Tuhan nggo reh, erkiteken sie me pia-piga anggota perpulungen lanai nggit erdahin.
3.      Pengajuk sideban siibereken Paulus man Perpulungen Tesalonika eme perpulungen harus tetap tek ras ernalem ibas pengajaren situhu-tuhu. Ajaren siiberitaken Paulus mbaba perpulungen nggeluh megegeh ras tetap erpengarapen man Yesus Kristus ibas kerina kegeluhenna. Emaka ibas tetap tek ras jemak ajaran situhu-tuhu, maka perpulungen la gampang terpengaruh  ku bas ajaran-ajaran sipapak, sierbahanca anggota perpulungen sirang ras Tuhan, ntah pe lanai nggeluh ibas keselamaten singgo ibereken man anggota perpulungen.
4.      Memang ibas ajaran Paulus lit kerna kerehen wari Tuhan, tapi labo berarti wari Tuhan e nggo reh, tapi wari Tuhan e nandangi reh,  janah tanda-tanda kerehen wari Tuhan e nggo lit, sebab kalak singgeluh ibas nimai wari Tuhan “isiksa”, maksudna ndatken perbeben ibas rangka mpertahanken kiniteken (band. 1 Tesalonika 3:4). Tapi erkiteken kebenaren si lit ibas Yesus Kristus maka la perlu perpulungen mbiar ibas kerina e.
5.       Kenca Paulus mereken sada pengangkan kerna kecibal kalak kristen ras mereken sada motivasi man perpulungen Tesalonika, maka iumputi Paulus alu notoken perpulungen gelah perpulungen nggeluh ibas ketetapen ukur ras tetap nggeluh ibas pengarapen gelah anggota perpulungen tetap erdahin ras tetap nuriken kerna simehuli singena ate Tuhan.

APLIKASI
            Tahun enda tahun peningkaten kualitas SDM si berkualitas. Sada harapen gelah ibas tahun enda la saja terjeng ertambahna SDM GBKP tapi tambah ka min kualitas anggota GBKP. Sebab kegeluhen gereja sigenduari adi la ertambah ibas kualitas, khususna erkiniteken man Tuhan, gampang kal kita ijolah-joleken pengajaren doni enda, emaka ndabuh kita ku bas dosa.
            Adi ateta reh ertambahna kualitasta maka sipaling penting man banta harus kita nggit erlajar ras megiken kata Tuhan. Emaka adi tambah kualitasta, ugapa pe teridah nge ibas kegeluhenta tep-tep wari, janah ernanam man kalak sideban. Maksudna gelah pengaruh gereja i tengah-tengah doni enda semakin tergejap. Lit peranen gereja i tengah-tengah doni enda. Bagepe kerina anggota gereja banci bertahan mengahadapi perubahan-perubahan saman si semakin kompleks. Jadi alu anggota GBKP berkualitas maka gereja GBKP semakin berkualitas ka. Emaka mari kita jadi anggota gereja siberkualitas, emaka mari kita kerina membenahi dirinta ras tetap erlajar guna peningkaten kualitasta, isamping sie ula lupa kita ertoto man Tuhan.

Pdt. Steven Kumenit, STh.M.Min.











Selasa, 04 Februari 2014

Identitas Kalak Kristen (Titus 2:11-15)



BAHAN PJJ GEREJA GBKP
TANGGAL 9 – 15 FEBRUARI 2014.
Titus 2 : 11-15.

Tema : Identitas Kalak Kristen

LATAR BELAKANG
1.      Surat man Titus enda eme sada bagin ibas surat pastoral siikirimken Paulus. Tujunna eme gelah Titus sierdahin i Pulau Kreta tetap megegeh ibas pelayanenna tep-tep wari amin gia melala ndatken perbeben khususna kerna kiniteken kalak sitek. Bagepe gelah Titus tetap ndahiken dahin guna ngajari perpulungen bagepe serayan Tuhan si lit i je gelah tetap dahiken dahin Tuhan alu erpalasken pengajaren singgo iajarken Paulus. Bagepe gelah Titus tetap ibas motivasi  melayani, gelah la lit simapas man Titus. 
2.      Ibas pengelayasi Paulus man Titus enda, iajarken Paulus kerna inti kiniteken kalak kristen eme lias ate Tuhan sinelamatken kerina manusia. Janah enda kerina nggo tangkas ibas diri Yesus Kristus. Sebab Dibata sierkeleng ate man manusia reh i tengah-tengah doni enda ibas rupa manusia eme Yesus Kristus, janah mate ras keke ibas simate nari guna keselamaten kerina manusia. Intina, ibas keselamaten siibereken Tuhan man manusia berarti Tuhan mbebasken manusia ibas kuasa dosa ras kuasa sijahat nari.
3.      Perbahanen lias ate Dibata e man manusia ngajari manusia guna nadingken kegeluhen si la ngena ate Tuhan. Sebab ibas perenungan manusia kerna keselamaten singgo ibereken Dibata, manusia harus merespon alu nggeluhken kegeluhen singena ate Tuhan. Bagepe ibas persadan ras Yesus Kristus manusia ndatken sada kepentaren guna tetap nggeluh selaku manusia singgo iselamatken. Alu bage la sisia-siaken kegeluhen  singgo iselamatken ibas kegeluhen sitep-tep wari.
4.      Bagepe isingetken Paulus kenca manusia iselamatken arah lias ras perkuah ate Tuhan, maka kegeluhen manusia sigenduari eme sangana nggeluh ibas pengarapen nimai wari kemalemen ate. Siimaksudken Paulus sangana nimai wari kemalemen ate eme kerehen Yesus Kristus sipedua kaliken ku bas doni enda. Ibas kerehen Yesus peduakaliken ibas doni enda eme guna ngelegi kalak situtus ras tetap nggeluh alu badia gelah bengket ku ingan singgo isikapken Tuhan (band. Yohanes 14:1-3). Emaka enda situhuna sada kata persinget nandangi kerina kalak sitek man Yesus gelah tetap nggeluh selaku kalak singgo ngaloken perkuah ate Tuhan.
5.      Titus gia nguda denga, tapi selaku serayan Tuhan, Titus harus pang ngajarken kerna nggeluh singena ate Tuhan. Kegeluhen selaku kalak sitek harus bermoral. Bagepe la saja terjeng ngajarisa, tapi pe harus pang mandang anggota perpulungen singelakoken kai si langena ate Tuhan.  Enda harus ilakoken  Titus gelah kalak kristen i Pulau Kreta nggeluh alu moral simehuli, sebab paksa sie kegeluhen kalak kristen i Pulau Kreta la ncerminken selaku kalak kristen singgo iselamatken.   

APLIKASI
            Mekatep kalak kristen (kita) lupa kerna lias ate Tuhan sinelamatken kita kerina. I ja lias ate Tuhan mereken sada kegeluhen simbaru man banta. Kegeluhen simale eme nggeluh ibas dosa nggo ikuburken ibas kematen Yesus Kristus, emaka kegeluhenta sigenduari eme kegeluhen selaku manusia simbaru. Tapi siidah lit denga kalak kristen sitetap mpraktekken kegeluhen selaku manusia simale. Tentuna enda jadi erkiteken la ia nggit nggeluh ibas pengajaren keselamaten arah lias ate Tuhan, bagepe pengajaren keselamaten singgo isehken gereja Tuhan. Adi bagenda me kegeluhen kalak kristen, tentuna la kap teridah identitas kalak kristen situhu-tuhu. Sebab identitas kalak kristen, ntah pe ia ikataken kalak kristen adi idalankenna simehuli singena ate Tuhan ibas kegeluhenna tep-tep wari. Moral kristiani harus teridah. Alu bage iteh kalak maka kita enda eme sikerajangen Tuhan.

Pdt. Steven Kumenit, STh.M.Min.