Politik Emekap Pelayanan (Yeremia 29:7)

BAHAN PJJ GEREJA GBKP

TANGGAL 30 MARET – 5 APRIL 2014

Yeremia 29:7

Tema : Politik Emekap Pelayanan

LATAR BELAKANG

1.      Kinilapatuhen bangsa Israel erbahanca bangsa Israel itaban i Babel. Janah i Babel bangsa Israel enggo mulai nggejapken uga serana nggeluh i teruh kuasa bangsa si deban. Bagepe bangsa Israel enggo mulai nggejapken maka Dibata tuhu-tuhu enggo nadingken ia.

2.      Kininggiten bebas ras pulah ibas bangsa Babel nari, erbahanca bangsa Israel mulai erbahan pemberontaken. Reh gegehna pemberontaken siibahan bangsa Israel erkiteken lit nabi-nabi palsu singataken maka lanai ndekah kita bebas. Bagepe lit ka nabi-nabi si menghasut bangsa Israel guna tetap erbahan pemberontaken gelah pembebasen. Akibat pemberontaken siibahan bangsa Israel maka enggo enterem pemimpin-pemimpin bangsa Israel ibunuh ras itaban.

3.      Ngenen sie Nabi Yeremia mpersingeti man  pemimpin, imam-imam, nabi-nabi si tading denga gelah mperdiateken ras ndalani saja “hukuman” e.

4.      Ibas rangka menjaga kestabilan ras keselamatan bangsa Israel, maka padin bangsa Israel tetap nggeluh bagi semalna bangsa Israel nggeluh i tanah Israel. Bangsa Israel, amin gia bangsa tabanan tapi harus nggeluh bagi bangsa Babel, eme erdahin, muat bagin ibas pekena-kena kota ras tetap nggeluh selaku keluarga, sebab adi sikap kota Babel, maka bangsa Israel pe ikut  sikap. Alu kata sideban guna kai bangsa Israel nggeluh ibas pemberontaken, padahal pembebasen ndekah denga. Bangsa Israel harus nggeluh i Babel 70 tahun dekahna (ayat 10). Jadi ope denga 70 tahun ula min bangsa Israel erbahan pemberontaken si banci merugiken diri sendiri. Sebab adi enggo seh paksana maka Dibata sendiri simbebasken bangsa Israel. Emaka penting man imam-imam, nabi-nabi ras pemimpin-pemimpin guna meteh enda, janah ngajuk man bangsa Israel guna menjaga kestabilan kota.

5.      Ipersingeti Yeremia man bangsa Yehuda, maka ia iambengken ia Babel erkite-kiteken peraten Tuhan, emaka kegeluhen ntah pe kesejahteraan bangsa Yehuda guna sementara waktu tergantung ibas kemakmuran bangsa Babel, erkiteken sie me maka bangsa Yehuda harus notoken bangsa Babel, gelah bangsa Yehuda banci nggecakpken kesejahteraan e.

APLIKASI

         Adi kita ngerana kerna politik ibas lingkungan gereja GBKP, maka lit dua pandangan si berkembang seh genduari eme lit sisetuju ras lit si kurang setuju, alu erbage-bage pertimbangen. Padahal sadar ntah la sadar gereja GBKP nggeluh ibas doni enda ibas rangka keselamatan doni enda. Bagepe harus kita sadari maka enggo melala anggota GBKP, subuk serayan bagepe anggota perpulungen si enggo bengket ibas politik praktis i Indonesia enda.

          Politik labo jahat, politik eme sada alat guna mensejahterahkan masyarakat, emaka adi kita muat bagin ibas politik, berarti enda sada pelayanan man banta nandangi masyarakat.

            Ibas bulan enda, tepatna tanggal 9 April lit pemilihan legislatif (DPR, DPD). Tentuna enda momentum man banta guna pehuli bangsanta. Emaka peran sertanta ibas ikut ibas pemilihan enda sangat kal iharapken. Harus siinget secara kiniteken kita ipake Tuhan guna milih anggota legislatif, emaka siayuken pendilo Tuhan e man dirinta guna milih perwakilenta sibanci kundul ibas legislatif. Ibas rangka ndatken simehuli ertoto lebe kita man Tuhan, gelah iajarina kita milih ise sipantas jadi wakilta ibas legislatif e.

Pdt. Steven Kumenit, STh,M.Min.. 

Tutuslah Erdahin (Nehemia 4:14-15, 210

BAHAN PJJ GEREJA GBKP

TANGGAL 23 – 29 MARET 2014.

Nehemia 4 : 14 – 15, 21.

Tema : Tutuslah Erdahin

LATAR BELAKANG

1.      Sijadi bahan oratenta sendah eme sada motivasi siibereken Nehemia man rakyat Israel kerna mpersiapken diri guna erperang ngelwan musuh siatena nerang bangsa Israel erkite-kiteken pembangunan tembok Yerusalem erdalan alu mehuli. Bagepe sada turi-turin uga bangsa Israel mbagun tembok Yerusalem alu erjaga-jaga make tombak.

2.      Kejadin enda kenca bangsa Yehuda mulih ibas taneh pembuangen i Babel nari. Bangsa Yehuda iambengken ku Babel erkite-kiteken bangsa Yehuda nggo nggeluh alu erbana-bana. Kepeken paksa bangsa Yehuda seh i Yerusalem, idapetina kota Yerusalem la bagi simarenda, sebab kota ras tembok Yerusalem nggo ceda, emaka bangsa Yehuda iteruh pimpinan Nehemia mbangun mulihi kota tembok Yerusalem ras pintu – pintu gerbang singgo ceda. Ibas situasi mbangun pintu gerbang ras tembok Yerusalem enda me, musuh-musuh Yehuda, khususna Sanbalat, Tobia, kalak arab, kalak Amon ras kalak Asdod merawa, emaka sepakat kalak enda guna nerang Yehuda. Ibas situasi enda me Nehemia mereken motifasi man masyarakat uga cara mpertahanken diri.

3.      Ibas  motivasi siibereken Nehemia, iajukna bangsa Yehuda gelah tetap nginget Tuhan ras mengandalkan Tuhan, sebab Tuhan e mbelin ras megegeh, emaka la perlu mbiar. Enda ikataken Nehemia sebab bangsa Yehuda nggo nggeluh ibas kebiaren.  Bagepe ipersingeti Nehemia gelah bangsa Yehuda erperang guna seninana, keluargana ras rumahna. Kai sibahan bangsa Yehuda terbegi seh ku musuh-musuhna emaka lanai surung ia reh guna nerang bangsa Yehuda, sebab nina Tuhan sinampati bangsa Yehuda.

4.      Nehemia reh ku Yerusalem labo saja sekedar mbangun tembok Yerusalem tapi gelah bangsa Yehuda nggeluh ibas mengandalkan Tuhan. Sebab nai bangsa Yehuda lanai mengandalkan Tuhan erkiteken sie me kegeluhen bangsa Yehuda nggeluh ibas kebiaren. Enda me sijadi paksa bangsa Yehuda nggo ikepung musuh, emaka mindo penampat ia man bangsa Mesir. I jenda Nehemia mulihi mbuka perukuren bangsa Yehuda gelah tetap mengandalkan Tuhan, apai ka ibas situasi  lit perbeben. Tapi amin gia musuh lanai nerang bangsa Yehuda, tapi tetap denga, bangsa Yehuda erjaga-jaga gelah adi reh musuh nerang ia, nggo lit persiapenna.

5.      Man bangsa Yehuda tembok Yerusalem eme sada hal penting kal, la saja guna pertahanan kota Yerusalem, tapi pe guna jadi benteng pertahanan rumah pertoton. Sebab Rumah Pertoton harus aman.

APLIKASI   

            Salah sada tantangang simberat kal ibas kita erdahin eme mekisat. Mekisat erbanca kita lanai serius erdahin, urak semangat erdahin mabai bana ndahinta banci terbengkalai. Adi bage kai siniharapken la banci seh.

            Perlu lebe siteh erdahin eme sada perintah Tuhan man banta (band. Kejadin 1:28). Bagepe erdahin eme karekter Tuhan, emaka seh genduari Ia erdahin, emaka erkiteken kita enda Imago-Dei (seri ras tempas Dibata) maka kita pe harus erdahin.

            Tutus erdahin pasti ipasu-pasu Tuhan, sebab ibas kita erdahin alu tutus kita nggo mpermuliakan Tuhan, bagepe guna kalak sideban.  Emaka tutuslah kita erdahin gelah kai siisura-suraken kita banci ipasu-pasu Tuhan.

Pdt. Steven Kumenit, STh.M.Min.

Pakekenlah Gegeh Ras Talentandu (2 Samuel 20:23-26)

BAHAN PJJ GEREJA GBKP

TANGGAL 16 – 22 MARET 2014.

II Samuel 20 : 23 – 26.

Tema : Pakekenlah Gegeh  Ras Talentandu.

LATAR BELAKANG

1.      Sijadi oratenta sendah eme nuriken kerna pegawai-pegawai ras tanggungjawabna i Kerajaan Daud (Israel).

2.      Bangsa Israel eme bangsa simbelin, janah selaku alat Tuhan guna nelamatkan doni enda, emaka ibas rangka sie, Daud selaku raja ngaturken bangsa enda alu mpegegehi pertahanan keamanan, politik pemerintahan, ekonomi ras keagamaan. Erkiteken sie me iangkat Daud siertugas jadi kepala tentera eme Yoab, bagepe Benaya bin Yoyada iangkat guna ngaturken pengawal pribadi Daud, Bagepe Adoniram ertugas ngaturken kalak sikerja paksa ras Josapat anak Ahilur jadi berndahara istana, bagepe sepa jadi sekretaris istana, Bagepe Sadok  ras Abiatar jadi imam, bagepe Ira i kuta Jair nari jadi imam Daud. Jabatan-jabatan enda ibereken Daud man pegawaina kerina sue ras kengasupenna sekalak-sekalak.

3.       Pengangkatan pegawai-pegawai Daud terjadi kenca kerajaan Israel ipulihkan, sebab ope sienda kerajaan Israel lit ibas masalah, ija anak raja Daud eme Absalom erbahan pemberontakan man raja Daud, emaka sempat raja Daud melarikan diri.

4.       Pembaharuan ibas bidang agama gelah bangsa israel tetap jadi bangsa Tuhan ilakoken Daud, bagepe mperluas ntah pe gelah ergegehna kekuatan militer, bagepe reorganisasi i bidang politik ras sosial ilakoken Daud. Janah kerina pemimpin-pemimpin e ertanggungjawab langsung man Daud. Jadi pemimpin-pemimpin (pegawai-pegawai) siiangkat Daud la lit kekuasaanna, sebab kerina ibas pengawasan ntah pe ibas sada komando eme raja Daud. Enda ilakoken Daud gelah lanai lit pemberontakan ibas kerajaan Israel, bagi siilakoken anakna Absalom.

5.      Ibas pembaharuan pegawai siilakoken Daud, maka bangsa Israel nggeluh alu tenang, bangsa si deban mbiar man raja Daud.    

APLIKASI

            Sekali enda kita ngerana kerna Musyawarah Ngawan. Sue ras kalender gereja GBKP Musyawarah Ngawan ilakoken ibas tgl 23 Maret 2013. Musyawarah Ngawan eme salah sada sarana siipake gereja guna ngelibatken kerina anggota ngawan guna ngukuri perdalanen pelayanan gereja, gelah gereja Tuhan ermajuna.

            Gelah gereja Tuhan (GBKP) ermajuna, tentuna la lepas ibas keikutsertaan anggota ngawan ibas pelayanan gereja sitep-tep wari. Tapi kinatana mekatep kurang teridah denga pelayanan anggota gereja, sebab lit anggota gereja erpengakap labo lit gegeh/pemeteh ntah pe talentana guna ikut muat bagin ibas ndahiken dahin-dahin gereja. Padahal adi siperdiateken kerna kecibalta selaku manusia tinepa Tuhan, kita enda nggo ibereken Tuhan kengasupen (talenta). Sebab ate Tuhan arah gegeh ras kengasupenta, gereja Tuhan banci tergejap ras ernanam man kalak sideban. Emaka marilah sipakeken gegeh ras talenta si lit bas kita guna kemulian Tuhan.

Pdt. Steven Kumenit, STh.M.Min.

Dibata Erdahin, Aku Pe Erdahin (Yohanes 5:17)

BAHAN PJJ GEREJA GBKP

TANGGAL 9 – 15 MARET 2014.

Yohanes 5 : 17.

Tema : Dibata Erdahin, Aku Pe Erdahin.

LATAR BELAKANG

1.      Guna ngangkai bahan oratenta , harus lebe sioge ibas ayat 1 nari, sebab I je nari me turi-turin engkai maka Yesus ngerana "BapangKu erdahin kap lalap; e maka Aku pe arus erdahin." Ibas kita ngoge ayat 1 nari maka i je sidapeti, Yesus mpepalem kalak sakit singgo telu puluh tahun dekahna sakit. Kalak sisakit enda situhuna nggo frustrasi, sebab nggo erbage-bage cara nambari pinakitna, tapi la malem. Situhuna siharapkenna banci min ia leben bengket ku kolam Bethesda, paksa kolam e erburak. Sebab ibas kiniteken jelma sinterem paksa sie, ise leben bengket ku bas kolam e banci malem pinakitna, kai pe jenis penakit si lit bas ia. Tapi erkiteken la ia banci erdalan, maka tetap ia ilebei kalak sideban.

2.      Ibas situasi silanai lit arapen malem, ideheri Yesus kalak sakit e, janah isungkun Yesus ia, alu penungkunen :  "Atendu kin gelah malem penakitndu?. Kalak sakit enda la ngataken ue, tapi ibas nada pesimis iturikenna sura-surana ras upayana, tapi kerina e “gagal”. Tapi alu la isangkana, nina Yesus "Kekekenlah, angkat amakndu jenari dalanken!" Iikutkenna kai siikataken Yesus, tuhu kalak sisakit e banci malem.

3.      Mujizat siicidahken Yesus man kalak sakit e, kepeken mpeturah persoalan, khususna man kalak Yahudi sierkuasa. Sebab ibas hukum agama kalak Yahudi, adi bas wari sabat, kalak Yahudi la banci erdahin, termasuk ngangkat amak. Sebab wari sabat ikhususken kalak Yahudi guna ersembah man Dibata. Bagepe perintah Tuhan gelah bangsa Israel pebadiaken wari pepituken (ari sabat). Emaka irawai penguasa kalak Yahudi kalak singgo malem ndai. Tapi nina kalak singgo malem e, Yesus kap sinuruhsa. Emaka idarami penguasa Kalak Yahudi dalan guna pesega-sega Yesus, gelah Yesus dat hukuman.

4.      Kalak Yahudi ngenen Yesus selaku manusia saja, emaka kai siilakoken Yesus, eme mpepalem kalak sakit merupaken sada kesalahan ras nggo melanggar undang-undang keagamaan kalak Yahudi. Memang iteh kalak Yahudi nge, Dibata seh genduari tetap denga erdahin, amin gia situhuna secara penciptaan dahin Tuhan nggo dung, tapi tetap denga nge Tuhan erdahin seh genduari. Yesus la seri ras Dibata. Emaka Yesus la banci erdahin.

5.      Yesus mereken sada pemahaman kerna hubungan Yesus ras Dibata. Hubungan Yesus ras Tuhan eme hubungan Bapa ras Anak (band. Yohanes 1:34). Emaka ibas Yesus pepalem kalak sakit paksa ari sabat, situhuna bagin ibas pendahin Dibata. Sebab ibas pendahin Dibata, mereken sada kemalemen ate man manusia, termasuk pepalem kalak sakit. Emaka pendahin Dibata si lit bas Yesus la banci iambati. 

APLIKASI

            Erdahin eme sipat ras karakterta selaku manusia tinepa Dibata, sebab kenca kita ijadiken Tuhan, minter isuruhna njagai ras ngusahai tinepaNa sideban (Kejadin) 1:28).

            Tujun kita erdahin eme gelah kita banci ndatken kai siiperluken kita. Emaka la banci kita mekisat, ntah pe la nggit erdahin. Sebaba adi la kita nggit erdahin berarti kita menyangkal eksistensinta selaku tinepa Dibata. Bagepe ibas kita erdahin berarti kita nggo memuliakan Tuhan, sebab kita mpergunakan waktu ras kesempatan guna ngelakoken kai simehuli singena ate Tuhan, khususna ibas pendahinta. Bagepe ibas kita erdahin alu mehuli, kalak sideban banci pe dungna meteh kerna karakterta selaku kalak kristen. Jadi ibas kita erdahin berarti i je lit bentuk kesaksin.

            Kita la banci mekisat ntah pe ngadi erdahin, sebab Tuhan seh genduari pe tetap erdahin guna nelamatken kita ras doni enda. Emaka marilah kita tetap erdahin gelah ipasu-pasu Tuhan kita.

Pdt. Steven Kumenit, STh.M.Min.