Aku Me Sindilo Kam Guna Jadi Terang (Yesaya 42:6-9)

BAHAN PJJ GEREJA GBKP

TANGGGAL 10 – 16 AGUSTUS 2014.

Yesaya 42 : 6 – 9.

Tema : Aku Me Sindilo Kam Guna Jadi Terang

LATAR BELAKANG

1.      Sijadi bahan oratenta sendah eme nubuat nabi Yesaya man bangsa Israel, paksa bangsa Israel nggeluh ibas pembuangen i Babel.

2.      Yesaya alu terang ngataken kerna erti pemilihan bangsa Israel ndube. Pemilihan Tuhan man bangsa Israel eme hak preogatif Tuhan, janah pemilihan e ibas rangka keselamatan kerina bangsa.  Jadi bangsa Israel ipake Tuhan guna jadi alatNya.

3.      Bangsa Israel  i taneh pembuangen i Babel nggejapken Tuhan la erkuasa i je, erkiteken sie, Tuhan la banci nampati ia. Ibas pemikiran bangsa Israel, kuasa Tuhan terbatas ngenca i Israel. Kuasa Tuhan la seh ku Babel. Ibas situasi sibagenda me reh nabi Yesaya ngataken kerna kuasa ras keleng ate Tuhan man bangsa Israel ras man kerina bangsa. Yesaya mereken sada pengangkan mulihi kerna kehadiran bangsa Israel ibas doni enda. Alu ngataken maka Tuhan similih bangsa Israel, ras sinegu-negu bangsa Israel ibas kegeluhenna tep-tep wari. Penegu-negu Tuhan man bangsa Israel tentuna seh ku Babel. Tuhan la pernah ingkar kerna perpadanenNa ras bangsa Israel. Bagepe isingetken Yesaya maka selaku alat Tuhan, lit siharus idahikenna, janah enda sura-sura Tuhan man kerina jelma ras bangsa. Tugas simereken terang (keselamatan) man bangsa-bangsa. Pemedakken mata kalak pentang, mulahi kalak sitertutup ibas penjara sigelap.  Alu bagenda ibahan bangsa Israel maka igejapken kerina jelma/bangsa Tuhan e mehuli (band. Mazmur 145:9a).

4.      Bangsa Israel ibas kegeluhen i taneh pembuangen, babel, nggejapkenken lit sada hambatan ibas ia ersembah man Tuhan, enda erkiteken beban kiniseran siinanamina ibas taneh pembuangen.  Bagepe lit penggejapen sisalah bas bangsa Israel, eme ija lit sierpengakap maka Tuhan nggo nadingken ia. Erkiteken sie me maka nggo nterem kalak Israel ersembah man gana-gana bangsa Babel. Erkiteken sie me ipersinngeti Yesaya bangsa Israel kerna Tuhan. Tuhan bangsa Israel sada ngenca. Erkiteken sie bangsa Israel ersembah man Tuhan ngenca, la banci lit dibata-dibata sideban man bangsa israel.

5.      Kemulian hanya milik Tuhan, la lit man gana-gana. Ibas erti kata sinjadiken doni enda Tuhan ngenca, ras sinelamatken bangsa Israel, Tuhan ngenca. Gana-gana sitik pe la ikut muat bagin ibas sie. Emaka kemulian e milik pribadi Tuhan. Erpalasken enda, maka bangsa Israel harus ersembah man Tuhan saja.

APLIKASI

            Pendilo kalak sitek ibas doni enda eme jadi Terang i tengah-tengah doni enda. Pengertin jadi Terang eme kita jadi alat Tuhan guna nelamatken doni enda. Arah  kita kalak sideban banci ngidah keselamatan situhu-tuhu. Emaka sipaling penting bas kita, gelah kita nggeluh ibas terang, maka kegeluhenta nggeluh min ersada lebe  ibas Terang situhu-tuhu eme Yesus (band. Yohanes  9:5).

            Kegeluhen terang singgo ibereken Tuhan man banta, teridah min ibas kegeluhenta tep-tep wari. Ibas perbahanen simehuli singena ate Tuhan; ndalanken kebujuren, keadilan i tengah-tengah kita berbangsa ras bernegara merupaken sada bukti terang nggo ersinalsal isekelewetta.

            Kegeluhen terang merupaken sada bentuk guna mpehuli ras mbaba bangsa Indonesia ku kegeluhen silebih mehuli ras sejahteran.

            Marilah kita jadi terang i tengah-tengah bangsa indonesia, gelah kemerdekaan Indonesia banci sinanami alu meriah ukur. Bagepe marilah sitotoken gelah bangsa Indonesia enda nggeluh ibas kedamen ras kemajun.

Pdt. Steven Kumenit, STh.M.Min.