Nggeluh Ibas Kesah Dibata (Yehezkiel 36:26-33)

BAHAN PJJ GEREJA GBKP

TANGGAL 28 SEPTEMBER – 4 OKTOBER 2014

Esekiel 36 : 26 – 33

Tema : Nggeluh Ibas Kesah Dibata

LATAR BELAKANG

1.      Sijadi oratenta sendah eme Tuhan ngerana man bangsa Israel sisangana ibas pembuangan i Babel. I Babel sada ingan penghukuman, sekaligus “penempaham” man bangsa Israel gelah bangsa Israel jera ras mulih ku Tuhan saja. Sebab alasan Tuhan menghukum bangsa Israel ku Babel erkite-kiteken lagu langkah bangsa Israel lanai mehuli, nggeluh bangsa  Israel nggo nggeluh alu erbana-bana. Kinilapatuhen bangsa Israel man Tuhan teridah ibas saling membunuh ras nembah man berhala, emaka taneh pe nggo iliami (nggo najis).

2.      Sura-sura Tuhan mbebasken bangsa Israel i Babel nari, labo erkite-kiteken bangsa Israel, tapi erkiteken Tuhan si Badia. Guna kemulian Tuhan.  Tapi ope denga ibaba Tuhan bangsa Israel, ibadiaken Tuhan bangsa Israel lebe. Tujunna gelah kenca seh bangsa Israel i tanehna, bangsa Israel nggo nggeluh badia, bangsa Israel nggo nggeluh patuh ras Tuhan saja siisembahna. Emaka ibas rangka bangsa Israel nggeluh Badia, sipemena ibahan Tuhan eme ipirpiri Tuhan alu lau meciho ras mbersihken berhala-berhala ras perkara-perkara sideban ibas bangsa Israel nari, kenca sie ibereken Tuhan pusuh ras perukuren simbaru man bangsa Israel, bagepe Kesah Tuhan itamaken   man bangsa Israel.

3.      Makna Tuhan namakan KesahNa ibas pusuh bangsa Israel eme gelah bangsa Israel lit kepatuhen ngikuti ras ndalanken undang-undang Tuhan, alu bage la saja bangsa Israel terhindar ibas pernembeh ate Tuhan, tapi pe taneh e “terhindar” ibas kenajisan.

4.      Alu perbahanen Dibata e maka bangsa Israel nggo nggeluh ibas mbersih ras patuh man Tuhan. Ibas kegeluhen sibage sijadi eme bangsa Israel njadiken Tuhan jadi Tuhanna, janah bangsa Israel jadi bangsaNa. Amin bage gia kegeluhen bangsa Israel tetap iperdiateken Tuhan, gelah bangsa Israel la nggeluh alu erbana-bana.

5.      Perkuah ate Tuhan la saja simereken kebadian man bangsa Israel, tapi pe mereken kesejahteraan man bangsa Israel arah nambahi buah batang kayu as ulih juma. Pengertin enda pe gelah bangsa Israel mela kerna perbahanen si la mehuli sipernah ibahanna ras ciga atena kerna sie kejahaten.

APLIKASI

            Kesah Si Badia eme pribadi sideban Tuhan jine. Fungsi Kesah Si Badia erdahin bas kita eme selain pengkawali Tuhan man banta, gelah kita tetap nggeluh Badia. Emaka kalak singgeluh ibas pinpinen Kesah Si Badia, kegeluhenna nggeluh ibas kebujuren ras kedamen. Ibas erti kata ulih Kesah Si badia lit bas kita (band. Galati 5:21-23).

            Bagepe ibas kita ipinpin Kesah Si badia ntah pe nggeluh ibas Kesah Si badia maka kegeluhenta nggeluh ibas kemalemen ate. Sebab amin gia kita jumpa perbeben ras kiniseran, kita ndatken serpang pulah.

            Persoalen si lit man banta. Mekatep la sipediat Kesah Si Badia erdahin man banta. Gegeh ras kepentarenta jine sipake. Emaka sijadi eme kenca jumpa perbeben ras kiniseran lanai siteh dalan keluarna,emaka erdauhna kita ras Dibata.

Pdt. Steven Kumenit, STh.M.Min.

Ertoto Ras Erdahin (Ora Et Labora) (Kisah Para Rasul-Rasul 4:23-31)

PEKAN DOA

GEREJA GBKP

WARI VII, SABTU 27 SEPTEMBER 2014.

Introitus   :    Bahanlah si e kerina alu ertoto, mindo penampat man Dibata. Ertotolah i bas bukuna alu kuasa Kesah. Erkiteken si e erjaga-jaga dingen tutuslah kam i bas ertoto. Ertotolah rusur guna kerina anak-anak Dibata (Epesus 6:18).

Ogen        :    Yohanes 6:1-15.

Khotbah   :    Perbahanen Rasul-Rasul 4:23-31

Tema        :    Ertoto Ras Erdahin (Ora Et Labora)

LATAR BELAKANG

1. Bahan khotbahta sekali enda harus ioge ibas ayat 1 nari gelah siteh kerna turi-turin khotbahnta. Sebab turi-turin khotbahta jadi kenca Petrus ras Yohanes ibebasken pengadilen agama (sahendrin). Ibebasken erkite-kiteken Sahendrin la dat kesalahan, saja isuruhna gelah Petrus ras Yohanes ngadi mberitaken kerna Yesus Kristus. Janah enda ikatakenna man teman-temanna.

2.   Kenca teman-teman Petrus ras Yohens megi pengalamen Yohanes ras Petrus ibas sidang Sahendrin, ertoto ia kerina ngataken bujur man Tuhan kerna kemenangen Petrus ras Yohanes.

3.   Ibas pertoton e ngataken kerina penguasa, kalak Yahudi ras raja-raja la ngasup ngelawan kuasa Tuhan.  Amin gia Yesus secara kemanusian nggo mate tapi kuasaNa tetap nggeluh ras mereken gegeh man ajar-ajarNa guna mberitaken kerna keselamaten si lit bas diri Yesus Kristus.

4.   Bagepe kalak kristen ertoto gelah Tuhan mpengasup ia kerina guna ngasup mberitaken keselamaten, amin gia lit tantangan.  Enda tuhu-tuhu mereken sada motivasi simbaru man kalak kristen gelah la mbiar ibas mberitaken berita keselamaten, sebab ugapa pe mberatna tantangan siman hadapen, pasti Tuhan mereken serpang pulah man anak-anakNa. Emaka pemindon perpulungen eme gelah anggota perpulungen la mbiar nehken Berita keselamaten. Anggota perpulungen nggeluh ibas ketutusen ersaksi kerna Yesus Kristus.  Bagepe ibas pertoton e, perpulungen mindo man Tuhan gelah Tuhan mereken man kalak enda tanda-tanda sengget simbelin gelah kerina kalak banci muji Tuhan.

5.   Pemindon perpulungen iueken Tuhan alu tanda mugur-ugur rumah inganna pulung. Bagepe ia kerina idemi Kesah Si Badia. Jenari alu ukur sitetap iberitakenna beritakenna kata Dibata. Ibas situasi enda, ate Dibata ngataken man perpulungen maka Tuhan ras ia kerina.

APLIKASI

            Ora et Labora eme sada semboyan sirusur sibegi ibas kegeluhenta, saja ibas pengrealisasianna tempa-tempa nggo jarang kalak kristen ndalankenca. Padahal man banta enda penting kal, sebab ibas kita erdahin tentuna la saja siman ngalaken tawaran-tawaran doni enda sierbahanca kita gampang ndabuh ku bas dosa erkite-kiteken korupsi, rsd. Tapi pe gelah lit semangat simbaru ibas kita erdahin. Jadi ibas kita ertoto ras erdahin maka terjadi me man banta etos kerja kristen. Emaka marilah sibiasaken dirinta ope denga kita erdahin, ertoto lebe kita man Tuhan, gelah ipinpin Tuhan ibas pendahinta tep-tep wari, emaka ibas kita erdahin, silakoken e alu meriah ukur ras jadi panjur pasu-pasu Tuhan man kalak sideban.

Pdt. Steven Kumenit, STh. M.Min.

           

Toto Si Empelimbarui (Kisah Para Rasul_rasul 12:6-12)

PEKAN DOA

GEREJA GBKP

WARI VI, JUMAT 26 SEPTEMBER 2014

Introitus    :    E maka akukenlah dosandu sekalak-sekalak i lebe-lebe temanndu, janah ertotolah kam pekepar kerna teman, gelah malem kam. Pertoton kalak si bujur ergegeh kal (Jakup 5:16).

Ogen         :    Juna 2:1-10

Khotbah    :    Perbahanen Rasul-Rasul 12:6-12.

Tema         :    Toto Si Empelimbarui.

LATAR BELAKANG

1.      Sijadi bahan khotbahnta eme bagin simbelin ibas penghambatan perkembangen kalak sitek man Yesus Kristus. Janah gelah pengajaren  kekristenan la berkembang, maka Herodes nangkap ras memanjarakan, bagepe munuh pengikut Yesus, terlebih rasul-rasul. Iidah Herodes kai silakokenna e meriah ukur kalak Jahudi maka “reh kelekna” perbahanen Herodes e. Emaka isuruh Herodes nangkap ras memenjarakan si Petrus. Petrus eme sekalak Rasul si cukup berpengaruh paksa sie. Janah adi sinen perkembangen gereja, Petrus eme pemimpin gereja.

2.      Kiniteken ras pengarapan man Dibata erbahanca Petrus la mbiar, emaka pertunduh Petrus pe ntabeh amin gia ia sangana iibas penjara.

3.      Penemani Tuhan teridah arah Petrus, amin gia Petrus ipenjara ras ijaga tentera, tapi ngasup Dibata mulahi Petrus. Isuruh Tuhan MalaikatNa gelah ulahi Petrus ibas penjara nari. Janah perbahanan Tuhan man Petrus e la iteh penjaga penjara.

4.       Kuasa Tuhan mpengaruhi kegeluhen Petrus, emaka ibas karya keselamatan/pembebasan siilakoken Tuhan man Petrus la isadarina. Pelin-pelin  tuntunan Tuhan teridah, tapi kenca Petrus sadar maka igejapkenna enda labo merupaken sada pengenehenen tapi perbahanan sinyata siibahan Tuhan guna mbebasken ia, emaka pinter Petrus reh ku rumah  Maria nande Johanes guna jumpa ras teman-temanna. Memang paksa sie, erkiteken penganiayaan kekristenan paksa sie megegeh kal, maka kalak sitek pulung alu cebuni-cebuni. Bagepe pulung kalak sitek ibas rangka ertoto ras-ras.

5.      Salah sada inti pertoton perpulungen eme mbebasken Petrus ras pembebasan ibas penghambatan-penghambatan siilakoken pemerintah ras kalak Jahudi nari. Perpulungen erpenggejapen Tuhan ngenca sibanci mulahi Petrus ras nemani ras ngkawali perpulungen Tuhan.

APLIKASI

            Pertoton eme kesah kalak kristen, maksudna kita selaku kalak kristen harus tutus ertoto, sebab kita la saja ngerana ras Tuhan, tapi pe kita mindo penampat man Tuhan. Sigejapken adi la isampati Tuhan kegeluhenta la berarti, la lit gunana kegeluhenta e.

            Perbeben ras kiniseran mekatep mbaba kita ibas stres ras putus asa. Tempa-tempa la lit nari sibanci sibahan ibas kegeluhenta. Tapi ibas paksa enda kita ipersingeti, maka lit Tuhanta sierkuasa ras siperkeleng. Ia ngasup mulahi kita ibas erbage-bage perbeben ras kiniseran.

            Situhuna pertoton kalak kristen, la saja terjeng paksa kita jumpa perbeben ras kiniseran, tapi ibas kerina dampar kegeluhenta, subuk paksa meriah ukur, bagepe paksa ceda ate, rsd. Sebab ibas kita ertoto turah semangat ras gegeh simbaru guna nggeluh ibas kegeluhenta tep-tep wari. Gegeh ras semangat enda ibereken Tuhan, sebab la ate Tuhan kita kena cilaka. Ate Tuhan gelah kita tetap nggeluh ras Tuhan, ras nggeluh ibas rencanaNa.

Pdt. Steven Kumenit, STh.M.Min.

           

Kam Bagin Geluhku (Nehemia 1:1-11)

PEKAN DOA

GEREJA GBKP

WARI V, KAMIS 25 SEPTEMBER 2014

Introitus     :   Ertotolah katawari pe,  janah katakenlah bujur man Dibata i bas si kugapana pe. Enda me si ngena ate Dibata ibahanndu i bas geluhndu selaku kam kalak si enggo ersada ras Kristus Jesus (1 Tesalonika 5:17-18).

Ogen          :   1 Timotius 2:1-5

Khotbah    :   Nehemia 1:1-11.

Tema          :   Kam Bagin Geluhku

LATAR BELAKANG

1.      Nehemia eme sekalak kalak Yahudi si erdahin i Istana kerajaan Persia selaku juru minem raja. Tapi amin gia Nehemia enggo nggeluh sikap ije, tetap denga nge perukurenna ku Yerusalem, khususna kerna kegeluhen bangsa Yehuda. Erkiteken sie me tupung reh seninana eme Hanani ras piga-piga kade-kadena i Yerusalem nari, isungkunna kerna perkembangen kegeluhen kalak Yahudi kenca mulih ibas pembuangen. Idatna sada berita kepeken bangsa Yahudi  enggo gia mulih ibas pembuangen nari tapi tetap nggeluh ibas perbeben ras kiniseran. Enda jadi erkiteken, tembok Yerusalem enggo sontar ras bangsa i sekelewetna megombang nandangi bangsa Yahudi. Perlu siteh maka tembok Yahudi cukup penting ibas kegeluhen bangsa Yahudi.

2.      Kegeluhen siinanami bangsa Yahudi “genduari” iidah Nahemia berhubungen ras Dibata, sebab bangsa Yahudi merupaken bangsa Tuhan. Erkiteken sie me Nehemia reh ku Tuhan Alu pertoton. Nehemia la saja ertoto, tapi pe erpuasa piga-piga wari dekahna, iturikenna isi pusuhna ras keadaan bangsa Yahudi. La saja e, ertoto Nahemia kerna sebab akibat adi bangsa Israel erbahan dosa, ras uga kekelengen Tuhan seh man bangsa Israel adi bangsa Israel jera ibas dosa nari. Situhuna ibas pertoton Nehemia man Tuhan gelah Tuhan mulahi bangsa Israel ibas kiniseran nari, bagepe gelah ibahan Tuhan  mekuah  ate raja Persia eme Artaserses kempak Nehemia, sebab lit sura-surana reh ku Yerusalem guna mbangun tembok Yerusalem.

3.      Ertoto Nehemia man  Tuhan, sebab enda sada pendahin si cukup mbelin ras muat resiko si cukup mbelin ka, sebab la saja harus ngelawan bangsa-bangsa i sekelewet bangsa Israel, tapi pe harus ngelawan kibijaken raja, sebab enggo pernah iperentahken raja gelah pembangunan tembok Yerusalem ipengadi, erkiteken iakap, adi enggo dung tembok Yerusalem, bangsa Israel banci mberontak man kerajaan Persia. Emaka perbeben Nehemia enda, iendeskenna man Tuhan gelah Tuhan “meluluhken” pusuh raja ras nabut mulihi kebijakan raja e.

4.      Tindaken Nehemia guna nampati pembangunan tembok Yerusalem ras kegeluhen bangsa Israel, erkiteken iidah Nehemia, bangsa Israel enggo cukup ndekah tading i Yerusalem kenca mulih i Babel nari, tapi tetap denga nggeluh selaku bangsa si ceda, subuk kegeluhenna, bagepe tembok Yerusalem. Erkiteken sie me tergerak pusuh Nehemia guna mbangun kerina e, tapi enda kerina ipindona man Tuhan gelah Tuhan nehi sura-surana e.

5.      Isamping sie,  pertoton Nehemia sibersifat pemindon man Tuhan, gelah perkuah ate Tuhan seh man bangsa Israel.

APLIKASI

            Kita ras temanta idilo Tuhan guna nggeluh ibas persadan emaka penting man banta nggeluh ibas ketenangen ras kedamen. Bagepe ibas rangka nehken peraten Tuhan. Ibas rangka sie, siharus lit man banta eme kegeluhen sisaling mperdiateken sada ras sidebanna, sisaling mbutuhken sada ras sidebanna.

Rasul Paulus ngataken maka kita selaku kula ni Kristus harus nggeluh ibas persadan ras saling mbutuhken sada ras sidebanna, ula egois (band. 1  Kor 12: 1-26). Enda ngatakenca maka penting nggeluh ras-ras siirakut ibas palas sada kebersamaan. 

Tentuna nggeluh ibas kebersamaan harus melepaskan sipat egois ras nggeluh sisada-sisada, kita harus nggejapken maka temanta sideban eme bagin ibas geluhta, emaka kita harus saling mperdiateken sada ras sidebanna, kiniseran temanta, e ka merupaken kiniseranta, keriahen temanta, jadi keriahenta pe. Erkiteken sie me kita harus sitoto-toton ras sisampat – sampaten gelah kita terhindar ibas erbage-bage perbeben ras kiniseran nari, emaka kegeluhenta nggeluh alu teneng ras dame. Kita tuhu-tuhu “memecahkan” masalah alu ras-ras.

Pdt. Steven Kumenit, STh.M.Min.