Tetaplah Mpermuliaken Ia (Epesus 4:24-29)

BAHAN PJJ GEREJA GBKP

TANGGAL 23 – 29 NOPEMBER 2014.

Epesus 4:24-29.

Tema : Tetaplah Mpermuliaken Ia

LATAR BELAKANG

1.      Kota Epesus eme sada kota sicukup meriah, janah terkenal ibas zamanna. Sebab merupaken salah sada pusat penembahen. Emaka melala kal ijumpai ingan-ingan penembahen man Dewi Diana. Tapi kenca reh Rasul Paulus ngajarken kerna keselamaten si tuhu-tuhu, nterem jelma si tek man Jesus Kristus, termasuk piga-piga guru sibaso. Janah erkiteken tek ia man Jesus Kristus, maka itutungna itutungna buku-buku mantrana.

2.      Surat Epesus enda ikirim Paulus ibas penjara nari, ibas rangka mereken nasehat ras motivasi man perpulungen i Epesus  gelah tetap nggeluh selaku manusia simbaru, nggeluh sue ras tempas Dibata. Kerina enda berarti harus nggeluh sue ras singena ate Tuhan.

3.      Ibas oratenta sendah, penekanen Paulus eme makna nggeluh  ibas persadan. Nggeluh ibas persadan e tuhu-tuhu mabai perpulungen menghindari piga-piga hal si la mehuli, sincedai persadan eme erbual, merawa, ula bere kesempaten man si iblis, ula nangko, ula belasken cakap si la erturi-turin. Enda kerina bentuk manusia simale. Tapi siharus ilakoken eme simehuli singena ate Tuhan eme ula erbual, harus nuriken kerna situhu-tuhu, adi merawa ula seh erdosa, ula buniken rawandu she ben wari, ulanai nangko, tapi erdahinlah alu mehuli guna ncariken keperlunna, gelah banci nampati kalak sikepiceten, cakap si ergunalah sibelasken gelah erguna bagi simegisa. Ibas perpulungen Epesus ngelakoken enda kerina maka perpulungen nggo ncidahken telu hal eme 1). Sebage manusia tempas Dibata. 2). Nggeluh ibas keadilan. 3). Nggeluh ibas kebadiaan.

4.       Amin gia iblis nggo italuken Tuhan, tapi iblis tetap denga erdahin guna ngagalken pendahin Tuhan, termasuk kerna persadan kalak kristen. Sebab persadan kalak kristen ncidahken keleng ate Tuhan simegegeh ras nggeluh selaku gereja. Emaka iblis sipentar e muat kesempaten gelah persadan perpulungen e sontar.

5.      Perpulungen Epesus, tuhu-tuhu harus ncidahken kegeluhenna selaku manusia simbaru man sekelewetna. Kegeluhen simale, siperna ilakoken anggota perpulungen (band. Ope denga perpulungen nandai Kristus) ula nari ipraktekken ibas perpulungen. Sebab kegeluhen manusia simbaru nggeluh ibas dua hal eme 1). Keterhubungen ras Tuhan. I ja perpulungen harus ngataken bujur ibas keselamaten singgo ibereken Tuhan, bagepe ibas penemani Kesah Si badia man perpulungen. Erkiteken sie me maka perpulungen harus menghindari kerna si la mehuli. 2). Perpulungen nggeluh ibas ikaten siharmonis sada ras sideban. Bagepe harus nggeluh sikeleng-kelengen ras sisampat-sampaten. Ibas erti kata saling ngelai ras bertanggungjawab.

APLIKASI

            Kita pe selaku kalak kristen harus meteh maka kita enda pe nggo nggeluh ibas kegeluhen simbaru (manusia simbaru). Selaku manusia simbaru siharus ngelakoken kai singena ate Tuhan. Selalu manusia simbaru harus pala-palai menghindari dosa bagi erbual, merawa, nangko, rsd, sebab enda banci meneken karakterta selaku manusia tempas Dibata. Memang mekatep la terkuasai kita dirinta, emaka mekatep ka kita ngelakoken dosa, khususna erbual (dusta) ras merawa. Erbual berhubungen ras emosi, sebab adi lit anggota perpulungen erbual emaka banci merawa kalak man banta. Janah adi kita nggo merawa, maka seh la terkendaliken kita emosinta sierbahanca kita erdosa. Tapi amin bage gia, adi kita merawa ula seh min erdosa. Maksudna adi kita lalap merawa ras lanai terkendaliken kita rawanta, je me nggo ikuasai/ ipake iblis  kita, sidungna lit dosa siibahan kita erkite-kiteken rawanta e. Jadi kegeluhenta harus min ikuasai Kesah Si Badia, alu bage kita ngasup ngelakoken simehuli singena ate Tuhan. Perbahanen sibage me tentuna kita nggo mpermuliaken Tuhan.

Pdt. Steven Kumenit, STh.M.Min.     

Nggeluh Ras Ergakenlah Pemere Dibata (1 Petrus 4:7-11)

BAHAN PJJ GEREJA GBKP

TANGGAL 16 – 22 NOPEMBER 2014

1 Petrus 4 : 7-11

Tema : Nggeluh Ras Ergakenlah Pemere Dibata

LATAR BELAKANG

1.      Ibas oratenta penekanan utama eme kerna eskatologis (kerehen wari Tuhan).  Erkiteken sie selaku kalak kristen harus ngasup ngkuasai dirina gelah tetap jadi terang. Maksudna amin gia kalak kristen nggeluh ibas perbeben ras kiniseran erkiteke-kiteken tekanan pemerintah ras kalak Jahudi, tapi nggeluh  ertoto ras nehken kekelengen harus tetap nggeluh ras teridah  ibas kegeluhen kalak kristen tep-tep wari, sebab tujun kerina enda eme guna kemulian TUhan.

2.      Ertoto ras ncidahken kekelengen eme karakter kalak kristen. Tapi siutama siharus ilakoken kalak kristen eme kekelengen, sebab kekelengen namburi melala dosa. Pengertinna eme ibas kalak kristen mpraktekken kekelengen maka sada pihak kalak kristen nggo sadar kerna keselamatan siibereken Tuhan man bana. Ibas hal enda kiniteken harus erbuah. Bagepe ibas kalak kristen nehken kekelengen maka kalak sideban banci nggejapken keleng ate Tuhan, emaka ipujina Tuhan. Alu bage erkite-kiteken mprakatekken kekelengen nge maka kalak kristen sadar uga pentingna bas ia nggeluh ersada ras kristus, emaka ibas kalak kristen ncidahken kekelengen, berarti kiniteken kalak kristen  reh belinna.

3.      Penulis mpersingeti kalak kristen, erkiteke-kiteken nggo ndeher wari pendungi, maka kalak kristen ula sinik saja, tapi kesempaten sitersisa enda harus ipergunaken alu mehuli, sebab ibas mpergunaken alu waktu mehuli, singena ate Tuhan maka sialoken kalak kristen eme nggeluh ras Yesus, sebab kalak kristen nggo mpermuliaken Tuhan.

4.      Wari pendungi ipersingeti sebab ibas wari pendungi e,  Yesus reh mulihken ku doni enda. Radu ras enda iadilaNa kerina jelma. Emaka singena ate Tuhan bengket ras Ia ibas Surga, tapi sila ngena ate Tuhan, nggeluh ibas penghukuman Tuhan. Erkiteken sie me maka kalak kristen harus  merespon pendilo Tuhan e alu nggeluh mehuli ibas doni enda.

5.      Memanfaatkan waktu la saja terjeng ertoto ras nehken kekelengen, tapi kalak kristen isuruh mpergunaken kerina pemere-pemere Tuhan si lit bas ia. Gelah kalak sideban pe nggeluh ibas keselamaten, sebab nggo ipujina Tuhan Yesus.

APLIKASI

            Nterem denga nge kalak kristen silenga meteh kerna pemere-pemere Kesah Sibadia (Talenta) silit bas ia. Emaka dungna la ipakena pemere Dibata e si lit bas ia e. Tapi adi sadar kita maka kita kerina nggo ibereken erbage-bage pemere sirehna ibas Kesah Sibadia nari, situjunna guna kiniulinkalak sideban.

            Ibas minggu-minggu Adven sekali enda kita ipersingeti kerna 3 hal : 1). Relasinta ras Tuhan gelah ibas toto. 2). Ncidahken kekelengen man sapih-sapihnta manusia. 3). Mpergunaken pemere-pemere Tuhan e guna kiniulin kalak sideban gelah kalak sideban banci muji ras mpermuliaken Tuhan. Kerina enda harus sidalanken ibas kerina dampar kegeluhenta, subuk paksa kita jumpa perbeben ras kiniseran, bagepe paksa meriah ukur.

Pdt. Steven Kumenit, STh.M.Min.

Terandalken (Kejadian 39:21-23)

BAHAN PJJ GEREJA GBKP

TANGGAL 9 – 15 NOPEMBER 2014

Kejadin 39 : 21-23.

Tema : Terandalken

LATAR BELAKANG

1.      Amin gia Jusup idayaken senina-senina man kalak Ismael, janah kalak Ismael ndayaken Jusup man Potipar, tapi kiniteken Jusup tetap paguh. Enda teridah ibas 2 hal eme 1). Iajuk ras iendik-endik ndehara Potipar gelah Jusup nggit medem ras ia, tapi Jusup tetap la nggit. Erkiteken sie mela akapna maka iadukenna Jusup man perbulangenna (Potipar) alu ngataken maka Jusup nggo mperkosa ia, emaka Jusup itangkap ras ipenjaraken. 2). Ibas penjara Jusup tetap erbahan simehuli, emaka ngena ate penjaga penjara ia, emaka ndahin-dahin penjaga penjara kerna ngurus kerina tabanen,  iendeskenna man Jusup, janah  idahiken Jusup alu sikap.

2.      Ibas keadaan simesera pe, termasuk lalap igodai ndehara potipar, tapi tetap Jusup la nggit ncedai kinitekenna, maka ipasu-pasu Tuhan  ras ijagai Tuhan si Jusup.  Penjagaan Tuhan man Jusup teridah ibas hukumen siialoken Jusup eme Jusup ipenjaraken ngenca. Padahal undang-undang i kerajaan Mesir ngatakan, kalak pemerkosa ihukum mati. Bagepe Tuhan erdahin ibas diri Potipar, sebab Jusup ihukum potipar alu ipenjaraken ngenca.  

3.      Ngena ate kepala penjara man Jusup, erkite-kiteken Jusup ipasu-pasu Tuhan emaka kegeluhen Jusup dem alu kiniteruken ukur, mehuli. Bagepe amin gia Jusup ibas penjara tapi tetap idalanina hukuman penjara e alu mehuli.

4.      Situhuna kegeluhen ibas penjara la kap ntabeh, tapi erkite-kiteken ngena ate Tuhan man Jusup, maka Jusup banci ngenanami nggeluh mehuli si la inanami kalak sideban si lit ibas penjara.

5.      Amin gia Jusup ipenjaraken tapi tek Jusup, Tuhan sangana erdahin bas dirina, emaka la ia membentontak ibas ketidak adilan si ituduhken man bana. Tek Jusup penemani Tuhan banci mulahi kerina perbeben  ras kiniseranna. Janah realisasi penemani Tuhan eme ibas penjara Jusup banci ndatken kegeluhen simehuli. Bagepe adi sioge turi-turin Jusup enda, kepeken rencana Tuhan erdahin ibas diri Jusup. Ate Tuhan arah Yusup terjaga ntah pe terlindungi bangsa Israel. Erkiteken sie me Jusup ibas kerajaan Mesir iangkat raja jadi wakilna.

APLIKASI

            Ngenen kai sijadi man Jusup tentuna jadi penjembah man banta. Kita selaku kalak sitek man Tuhan harus tetap njaga kinitekenta gelah la bene. Sebab ibas kita tetap erkiniteken man Tuhan, kita la saja ipasu-pasu Tuhan, tapi pe ibereken Tuhan kepentaren ras gegeh guna banci ngalaken kerina perbeben ras kiniseran si reh man banta. Bagepe ibas kepentaren siibereken Tuhan man banta, banci mabai kegeluhenta tuhu-tuhu terandalkan. Kita ngasup ngelakoken kegeluhen ras dahin simehuli singena ate Tuhan, sierbahanca ngena ate Tuhan ras manusia.

            Adi nggeluhta terandalkan, maka kalak sideban la aru atena mpercayakan ndahin guna sidahiken, sebab tek ia adi kita sikerjakenca ugapa pe sikap, ntah pe terdahiken alu mehuli.

            Ibas sidahiken dahin alu bertanggungjawab, situhuna enda respon kiniteken nge sebab kinitekenta ngatakenca dahin siidahiken kita eme pemere Tuhan, emaka ibas kita ndahiken ndahin e tempa-tempa kita erdahin guna Tuhan, labo guna manusia. Janah singet pe ibas tutus kita ndahiken ndahin si kitik, ibereken Tuhan pagi ndahin siterbelinen.

Pdt. Steven Kumenit, STh.M.Min.