Mpebelin Kekelengen Ibas Sangkep Nggeluh (Roma 12:9-13)

BAHAN PJJ GEREJA GBKP

TANGGAL 4 – 10 MEI 2014

Roma 12: 9 – 13.

Tema : Mpebelin Kekelengen Ibas Sangkep Nggeluh

LATAR BELAKANG

1.      Bahan oratenta sekali enda eme kata persinget rasul Paulus man perpulungen kristen i Roma gelah mengaplikasiken kiniteken ibas kegeluhenna tep-tep wari, khususna kerna kekelengen. Kalak kristen singgo ngaloken Kristus selaku TUhan, ras nggejapken ia ibenarken erkiteken kiniteken maka kegeluhen kalak kristen tep-tep harus teridah ibas sapih-sapih ia kalak kristen.

2.      Makna nggeluh ibas keleng ate man perpulungen Roma cukup mbelin kal, sebab enda banci ngerakut persadan sapih-sapih kalak kristen. Bagepe nggeluh egois, perpecahan ras kiniganjangan ukur, rsd lanai lit bas perpulungen. Jadi pengalaman perpecahan perpulungen kalak kristen i Roma lanai terulang. Sebab pernah jadi ibas tahun 49, erkiteken lit semangat nehken Berita keselamatan nandangi kalak si la tek man Yesus Kristus, maka terjadi me la siangkan sapih-sapih ia (Bah. Indonesia = kerusuhan/keributan).  Erkiteken sie me raja Klaudius mpelawes kalak kristen i Roma. Bagepe ibas Paulus ngajarken makna keleng ate, gelah perpulungen Roma la lit simeganjang ukur adi ia ndatken erbage-bage pemere Dibata (karisma sipelain-lain). Sebab pernah jadi i perpulungen Korinti, erkiteken karisma e, maka lit sierpengakap ia me “sihebatna”, emaka kalak si lenga ndatken karisma sibage kitik akapna. Jadi keleng ate ngenca sibanci “meredam” bahaya-bahaya perpecahan i tengah-tengah perpulungen.

3.      Keleng ate siharus icidahken ras ndalanken perpulungen eme keleng ate agape, ertina mpraktekken keleng ate harus murni, la banci pekulah-kulah. Perpulungen la banci mpraktekken keleng ate eros.  Keleng ate Agape enda me siicidahken Tuhan ibas Yesus Kristus guna nebusi dosa-dosa manusia. Bagi siteh lit 4 bentuk keleng ate eme 1). Keleng ate Agape siertina keleng ate si murni. 2). Keleng ate  Eros siertina keleng ate “simenginginkan”, janah enda bercampur baur ras hawa nafsu ras guna kesenangan pribadi. 3). Keleng ate Philia, siertina keleng ate antara persaudaraan/sahabat. 4). Keleng ate Storge siertina ungkapan keleng ate kodrati (orang tua nandangi anak ntah sebalikna).

4.      Selain keleng ate mpersadaken perpulungen, makna sideban eme perpulungen nggeluh ibas ketutusen erdahin guna Tuhan ,  sebab kalak kristen la terlepas ibas pelayanan, emaka tutus erdahin guna Tuhan harus tetap nggeluh. Bagepe nggeluh ibas pengarapen. Maksudna kalak kristen harus tetap nggeluh ibas pengharapan kerna kegeluhen nggeluh ras Yesus ibas wari sipepagi, emaka perpulungen harus tetap tek kerna kerehen Yesus sipeduakaliken. Kalak kristen harus tetap  megenggeng adi jumpa perbeben ras kiniseran, sebab sada paksa kalak kristen jumpa sibage. Bagepe harus tetap ertoto man Tuhan.  Sebab ertoto la saja sada komunikasi manusia ras Tuhan, tapi salah sada sibanci menahan kiniseran, emaka perpulungen banci nggeluh ibas keriahen.

5.      Bagepe keleng ate bermakna nampati kalak. Emaka keleng ate mendorong kalak kristen gelah banci ngerasken kinilitenna nandangi kalak simemerluken penampat. Jadi keleng ate mpeturah biak nampati man sapih-sapih ia. Termasuk uga alu meriah ukur kalak kristen ngalo-ngalo kalak sikesilang ibas rumahna. Bagepe ipihak sideban, Paulus paksa sie sangana ertugas mpepulung dana guna nampati perpulungen i Yerusalem sisangana ndatken kiniseran (bencana kelihen).   Jadi ibas kalak kristen mpraktekken keleng ate maka kalak kristen nggo ndalanken hukum kekelengen (band. Matius 22:37-40). Bagepe keleng ate eme tugas agama siharus idalanken.

APLIKASI

            Sangkep nggeluh eme salah sada pemere Dibata man banta. Salah sada dahin sangkep nggeluh eme ncidahken kekelengen i tengah-tengah keluarga, subuk ibas kepaten bagepe keriahen. Erkiteken sie me adi siperdiateken khususna sangkep nggeluh ibas keluarga kalak Karo, lit peran ras dahinna masing-masing. Janah salah sada tujun  kekelengen ibas sangkep nggeluh eme gelah gelah nggeluh sisampat-sampaten.

            Tapi siidah kekelengen ibas sangkep nggeluh pe tempa nggo urak. Memang lit piga-piga hal sierbahanca bage, eme ekonomi, pendahin ras ingan tading. Erkiteken sie me lit keluarga erpesta sada wari, bagepe lanai mengfungsiken dahin anak beru, sebab nggo icateringken. Bagepe nggo jarang sidahi-dahin (saling mengunjungi). Bagepe lit kita nggeluh rayo-ayo ibas berkeluarga.

             Persoalen sideban, erkiteken nggo urak kekelengen ndai, maka tempa-tempa mesera sitik kita mereken pinjaman man kade-kadenta, apai ka siidah kade-kadenta e, ekonomina kurang. Emaka mesera sitik mpraktekken ngerasken kinilitenta nandangi sangkep nggeluh simbutuhken penampatta. Jadi tempa-tempa la tek.

            Adi urak kekelengen ibas sangkep nggeluh e, tentuna berpengaruh kubas ikaten persadan keluarga e sendiri, termasuk i je, kesusuranta lanai sitandan.

            Gelah banci tetap nggeluh ikaten keleng ate ibas sangkep nggeluh, siharus lit man banta eme 1). Lit min  ketedehen ate nandangi keluarganta. 2).  Nggeluh berkeluarga la banci rayo-ayo. 3). Kelengilah Tuhan. Sebab ibas kita ngkelengi Tuhan berarti kita pe ngkelengi temanta manusia, termasuk keluarganta. 4). Nggeluh harmonis. Rsd.

Pdt. Steven Kumenit. STh.M.Min.

           

Pentar Ngaturken Pasu-Pasu Tuhan (Imamat 25:1-7, 18-22)

BAHAN PJJ GEREJA GBKP

TANGGAL 27 APRIL – 3 MEI 2014.

Imamat  25 : 1-7,  18-22

Tema : Pentar Ngaturken Pasu-Pasu Tuhan

LATAR BELAKANG

1.      Ibas perdalanen bangsa Israel ku taneh Kanaan, ngadi bangsa Israel i gunung Sinai, janah ope denga iterusken bangsa Israel perdalanenna, Tuhan ngerana man Musa selaku pemimpin bangsa Israel. Inti percakapan  Tuhan ras Musa eme kerna sada peraturan ntah pe undang-undang sabat, khususna kerna taneh ras tahun Yobel eme tahun pembebasen taneh.

2.      Peraturan ntah pe undang-undang kerna tahun sabat ras Yobel enda mbaba makna eme 1). Taneh siusahai tetap terpelihara, sebab kenca enem tahun iusahai, maka tahun pepituken harus ngadi lebe. Sebab tahun sabat ermakna : 1). Guna njaga kesuburan tanah. Sinuan-sinuan ras dukut-dukut sedekah sada tahun erbahanca taneh mpereh humus ras jadi subur. 2).  Lit makna kekelengen. i ja bangsa Israel mperdiateken kalak si musil. Kalak musil banci muat kai siturah ibas taneh e sedekah sada tahun. Alu bage kelangsungen nggeluh kalak musil lebih terjamin (band. Kel. 23:10-11). 3). Kerna pemeliharan Tuhan man bangsa Israel. Sebab  Tuhan mereken kecukupen pangan man bangsa Israel  arah taneh e. Bagepe ibas wari peenemken lebih ipasu-pasu Tuhan ka tole bangsa Israel emaka ibas tahun peenemken e bangsa Israel banci ndatken ulih juma siberlibat ganda. Banci bias guna 2 tahun. 4). Ibas bangsa Israel ndalanken peraturan ntah pe undang-undang enda, berarti bangsa Israel nggeluh ibas kebadiaan ras mbiar man Tuhan.

3.      Ibas tahun sabat enda bangsa Israel la banci nggeluh egois. Nggeluh alu dirina saja iukurina, tapi harus mperdiateken tinepa Tuhan sideban eme taneh. Pengekplotasian taneh, mbaba kecedan man manusia, sebab taneh simerupaken pemere Tuhan banci ceda. Emaka ibas bangsa Israel patuh ras ndalanken peraturan sabat e, berarti bangsa Israel nggeluh ibas kepatuhan man Tuhan saja.

4.      Kepatuhan man Tuhan mabai bangsa Israel nggeluh ibas keselamatan ras pasu-pasu Tuhan.  Tapi adi bangsa Israel la patuh man Tuhan, maka kelangsungen nggeluh bangsa Israel sedekah i taneh Kanaan la terjamin. Taneh mereken hasil simehuli man bangsa Israel. Emaka bangsa Israel la perlu mbiar. Sipenting bangsa Israel harus nggeluh ibas kepatuhan.

5.      Enda ikataken Tuhan sebab bangsa Israel kenca bengket ku taneh Kanaan, harus ncukupken keperlunna tep-tep wari arah kegeluhen pertanian nari. Emaka perlu kal bangsa Israel patuh nandangi tahun sabat e.

APLIKASI

            Salah sada pasu-pasu Tuhan sibanci siidah ras sigejapken eme kerna litna pendahin. Emaka la banci lang kita harus ngataken bujur man Tuhan. Caranta ngataken bujur man Tuhan la saja terjeng ibelasken, tapi pe harus erdahin alu tutus, ntah pe ncidahken etos kerja simehuli. Bagepe mpergunaken wari-wari e alu mehuli.

            Memang salah sada fungsi kita erdahin gelah tercukupi kebutuhen keluarganta, tapi labo berarti kita harus erdahin suari ras berngi. Ibas kegeluhenta tentuna lit paksa-paksa. Ibas erti kata, amin gia erdahin enda guna ncukupi kebutuhen ekonomi keluarga labo berarti la sikelengi dirinta, keluarga bagepe perpulungen, terlebih Tuhan. Emaka ibas kita pentar ngaturken waktu erdahin, e termasuk ngaturken jam istirahatta, sebab ibas kita beristirahat bermanfaat gelah kita tetap lit semangat erdahin, lit waktu ras keluarga, lit waktu ras perpulungen terlebih lit waktu guna Tuhan. Emaka gelah malem ateta, pentarlah kita ngaturken pasu-pasu Tuhan ibas kegeluhenta. Sebab labo berarti adi beristirahat kita maka ekonomi keluargata “terganggu”, lang. Tapi lebih asangken sie, ibas kita istirahat guna Tuhan, pasti ipasu-pasu Tuhan pendahinta ras ekonomi keluarganta. Tuhan pasti mereken kecukupen man banta. Si pasti adi kita erdahin tutuslah kita erdahin.

Pdt. Steven Kumenit, STh.M.Min.

Ukumenta Itanggung Yesus (Lukas 23:33-43)

SKHOTBAH JUMAT SIMBELIN 18 APRIL 2014

GEREJA GBKP

Introitus   :    Tapi si tuhuna ia nge si maba kiniseranta, ia nge si mersan si mesuita. Kiniseranna iakap kami mbarenda ukumen si ibereken Dibata man bana (Yesaya 53:4).

Ogen        :    Mazmur 22:2-12 (Responsoria)

Khotbah   :    Lukas 23:33-43 (Tunggal).

Tema        :    Ukumenta Itanggung Yesus.

LATAR BELAKANG

1.      Salah sada bentuk hukuman mate siilakoken pemerintah Romawi nandangi kalak jahat eme ipakuken i kayu persilang. Yesus raduken dua kalak penjahat ibaba ku bas ingan takal-takal guna iukum mate ntah pe ipakuken i kayu persilang. Ibas sienda maka Yesus ipeseri ras kalak jahat, padahal Yesus la erbahan sijahat, emaka la patut Yesus ihukum matei (band. Kai nina sekalak kalak jahat isamping Yesus- ayat  41).

2.      I datas kayu persilang Yesus ertoto man bapaNa nina o Bapa alemi min kalak enda sebab la iangkana kai siibahanna enda. Yesus ertoto guna kalak sinalibken Ia. Sebab adi tehna kai siilakoken kalak sinterem e tentuna Yesus la iukum mate. Enda me sada bentuk keleng ate siicidahken Yesus nandangi kalak singelaksanakan hukuman  mate e. termasuk guru-guru agama, pemimpin kalak Yahudi ras kalak Farisi.

3.      Bentuk penghukuman siidat Yesus amin gia seri ras kalak jahat eme  i pakuken i kayu persilang, tapi siidah lebih kejam perbahanan prajurit man Yesus asangken man dua kalak jahat siisamping Yesus. Yesus tuhu-tuhu isiksa ras iihina.

4.      Kai siinanami Yesus kerna kiniseran i kayu  persilang merupaken sada pengrealisasian ibas kerina nubuat nabi-nabi ras pengenehenen Yesus. Janah enda pe nggo ituriken Yesus man ajar-ajarNa. Emaka  la bo merawa Yesus kerna kai siibahan prajurit bagepe sekalak kalak jahat e man baNa.

5.      Ibas kayu persilang teridah maka ise sitek man Yesus selaku Raja, maka man bana ibereken nggeluh ibas keterkelinen. Nggeluh ras Yesus i Pardis. Enda me siikataken Yesus man salah sada kalak jahat siisampingna erkiteken iakukenna Yesus selaku Raja, tek ia ibas kerehen Yesus pagi.

APLIKASI

            Hukumen Yesus sada bukti keegoisan ras kiniganjangan ukur manusia. Adi iangka manusia kerna ise Yesus, tentuna la kap Yesus ihukumna i kayu persilang, tapi ukur sibersih nggo itutupi kuasa si iblis maka Yesus ihukum I kayu persilang.

            Dosa singelengketi manusia me si erbahanca, Tuhan reh ku tengah-tengahta guna nelamatken kita. Emaka adi sinen kerna kesalahan ras dosa siibahan kita, maka sepatutna kita nge si harus lit i kayu persilang e, labo Yesus. Yesus i kayu persilang ibas rangka ncidahken uga keleng ate Tuhan man manusia. Sebab ate Tuhan, kita selaku tinepaNa nggeluh ras Ia.

            I Kayu persilang teridah tuhu-tuhu Yesus ngkelengi kita, emaka ula kita mbiar adi kita jumpa perbeben ras kiniseran, sebab Tuhan pasti nampati kita. La ate Tuhan kita nggeluh ibas dosa, emaka ipulahi Tuhan me kita ibas erbage-bage perbeben ras kiniseran. Emaka ula bene pengarapenta man baNa. Teklah kita maka Tuhan pasti nampati kita.

Pdt. Steven Kumenit, STh.M.Min.