Kelengi Ras Pekena-Kena Rumah PertotoN (Ezra 8:24-30)

BAHAN PJJ GEREJA GBKP

TANGGAL 3 – 9 AGUSTUS 2014.

Esra 8 : 24 – 30.

Tema : Kelengi Ras Pekena-Kena Rumah Pertoton.

LATAR BELAKANG

1.      Kenca Kerajaan Babel italuken Kerajaan Persia, emaka alu ijin raja Kores (Raja Persia), bangsa Israel mulih ku Yerusalem. Tapi kota Yerusalem eme tembok Yerusalem bagepe  Rumah Pertoton nggo ceda. Padahal dua bangunan enda penting kal man bangsa Israel, khususna Rumah Pertoton. Rumah pertoton e ceda paksa agresi bangsa Babel ku Yerusalem. Bagepe la saja Rumah Pertoton e icedaken bangsa Babel, tapi kerina perkakas-perkakas si lit ibas rumah pertoton e ibuatna.

2.      Rumah Pertoton man bangsa Israel eme “jati diri” Israel, sebab Rumah Pertoton la saja ingan Dibata (Rumah Dibata), Tapi tanda maka bangsa Israel eme bangsa Tuhan, janah bangsa Israel lit ibas penjagaan Tuhan. Bagepe erkiteken i je Rumah Pertoton maka, bangsa Israel la nggeluh ibas adat, budaya ras agama bangsa sideban, sebab adi enda sijadi maka banci mpengaruhi ketutusa  bangsa Israel ersembah man Tuhan. Janah enda situhuna sipernah jadi, emaka bangsa Israel itaban/iambengken ku Babel.

3.      Ibas rangka mpekena-kena Rumah Pertoton, maka idilo Esra me imam-imam guna mereken pirak, emas ras kerina perkakas-perkakas rumah pertoton siisumbakenken raja Kores, pegawai-pegawai kerajaan Persia ras kalak Yahudi sendiri guna ipake ibas Rumah Pertoton. Fungsi kerina e me guna nampati pelayanan ibas Rumah Pertoton. Janah kenca nggo seh i Yerusalem, itimbang me kerina, jenari  ibereken man pengulu Imam, pengulu-penglu kalak Lewi, bagepe man pengulu-pengulu kalak Israel. Emaka ibaba imam-imam e kerina erta ras perkakas-perkakas Rumah Pertoton e.

4.       Emas, pirak ras perkakas-perkakas Rumah Pertoton nggo ibadiaken. Erkiteken kerina e nggo ipebadiaken, maka kalak sijaga barang-barang e harus ka kalak singgo ipebadiaken Tuhan, erkiteken sie me Idilo Esra imam-imam guna njaga ras mbaba barang-barang e seh ku Rumah Pertoton i Yerusalem, sebab i Yerusalem me pusat Rumah Pertoton.

5.      Emas, Pirak ras perkakas-perkakas Rumah Pertoton harus itimbang, gelah siteh barang-barang si lit ibas Rumah Pertoton e, emaka pengulu rumah pertoton harus njaga ras ngerawatsa.

APLIKASI

            Rumah Pertoton ntah pe gereja harus sipahami la saja sebagai ingan ersembah, tapi pe jadi sada simbol ketutusan kalak si tek man Tuhan. Sebab i je teridah, kalak situtus man Tuhan tentu reh ia ku gereja guna ersembah man Tuhan.

            Gelah malem ate kalak sireh kubas gereja guna ersembah maka ilitken me perkakas-perkakas ibas rumah pertoton eme perkakas guna lakon persadan ras lakon peridin, Saund system, alat musik, bangku, meja, rsd. Tapi siidah lit denga nge kita silenga terdilo guna ngerawat Gereja ras iventaris si nggo lit ibas gereja. Memang ibas perpulungen nggo lit pengurus gereja (Runggun Gereja), janah tanggungjawab pengurus gereja antara lain eme mpekena-kena rumah pertoton ras iventarisna, tapi kita  kalak sitek, lit tanggungjawabta guna njaga ras mpekena-kena Rumah Pertoton e, janah enda merupaken sada pendilo kiniteken. Jadi lit tanggungjawab runggun gereja, tapi lit ka tanggungjawab anggota perpulungen. Alu bage terjaga ras terawat me Rumah Pertoton e.

            Gereja ras iventaris la seri ras rumah pribadi, emaka harus sijaga ngelebihi rumah pribadita.

Pdt. Steven Kumenit, STh.M.Min.

Nggeluh Alu Mehuli (Titus 3: 6-11)

BAHAN PJJ GEREJA GBKP

TANGGAL 27 JULI – 2 AGUSTUS 2014.

Titus 3 : 6-11.

Tema : Nggeluh Alu Mehuli.

LATAR BELAKANG

1.      Surat Paulus man Titus eme sada pengelayasi ras mereken sada motivasi man Titus sisangana erdahin i Pulau Kreta gelah Titus tetap ngajarken kerna kiniteken situhu – tuhu, ras membimbing perpulungen ibas moral situhu-tuhu gelah nggeluh sue ras peraten Tuhan.

2.      Ibas rangka nggeluh erkiniteken man Tuhan, maka isingetken Paulus man Titus gelah igegehi Titus ngajarken kerna makna keselamatan singgo ialoken perpulungen. Erkiteken perpulungen nggo tek man Yesus maka Dibata mereken keselamatan man bana. Bagepe gelah perpulungen tetap nggeluh ibas keselamatan maka Kesah Si Badia ngarak-ngarak perpulungen gelah nggeluh sue ras peraten Dibata. Kegeluhen si sue ras peraten Dibata mabai perpulungen tetap nggeluh rembak ras Tuhan, emaka perpulungen ndatken kegeluhen situhu-tuhu si la erkeri-kerin. Sebab ibas pengangkan sibenar kerna keselamatan ras pengarak-ngarak Kesah Si Badia ibas kegeluhen perpulungen maka sijadi eme perpulungen  tutus erdahin ras metunggung i lebe-lebe Dibata bagepe geluhna erguna man manusia. Lebih asangken sie isilahken perpulungen kerna kai si la mehuli ras sisia – sia ibas kegeluhenna eme terombo nini-nini nai, rubat, ersoal jabab kerna undang-undang. Ibas kata persinget enda, ate Paulus gelah arah Titus, perpulungen banci ngangkai kegeluhen simbaru singgo jadi sikerajangenna.

3.      Ibas kegeluhen perpulungen lit pengajaras sipapak siatena “menggorogoti” kegeluhen kiniteken perpulungen eme kerna terombo nini-nini nai. Pengajaran sipapak enda ibabai guru-guru palsu sierdahin labo guna pelayanan tapi guna ndatken sen.Apai ka pengajaran siiajarkenna, kususna kerna terombo la mbangun kiniteken, tapi erbahanca turah perubatan, sebab ibas pengajaren e rusur jadi soal jabab, sebab i je rusur ncakapken kerna garis keturunan manusia ras generasi penerus.

4.      Pengajaran sipapak sideban eme kerna Yudaisme ntah pengajaren kerna undang-undang (hukum Taurat). Ibas pengajaren e lit ikatakenna soal mantangken piga-piga pangan. Ibas pengajaren e pe rusur terjadi la siangkan, emaka enda pe harus isilahi perpulungen. Sebab keselamten sialoken perpulungen labo arah undang-undang tapi arah perkuah ate Tuhan.

5.      Kata persinget sideban siibereken Paulus man Titus eme gelah Titus mpersingeti pengajar-pengajar sipapak seh dua kali, janah adi la jera maka sirangi saja ia. Memang harus siteh nggeluh jera ras ndalanken kai singena ate Tuhan tetap ibereken man kalak simaba ajaren sipapak, tapi adi la nggit ia jera, berarti ia simbaba dirina ibas dosa ras penghukuman Dibata nari ibas wari pendungi pagi, sebab ia nggo ersalah ras erdosa.

APLIKASI

            Kalak kristen idilo Tuhan guna nehken kerna kai simehuli ras benar ibas kegeluhenna tep-tep wari, janah enda tanda maka kalak kristen nggeluh ibas keselamatan. Nehken simehuli ras sibenar la saja arah kata, tapi teridah arah perbahanen. Kalak kristen ibas perbahanenna tep-tep wari harus ncidahken karakten kalak kristen situhu-tuhu.

            Ibas zaman sigenduari enda siidah cukup melala perbahanen-perbahan si la mehuli, tapi selaku kalak kristen ula ikut ibas perbahanen-perbahanen si la mehuli e, sebab e la orat nggeluh kalak kristen. Emaka gelah nggeluh selaku kalak kristen situhu-tuhu maka sipaling penting eme bagi siikataken rasul paulus eme nggeluh ibas pengarak-ngarak Kesah SiBadia, sebab ibas pengarak-ngarak Kesah Si Badia berarti kegeluhen kalak kristen nggit patuh man Tuhan ras nggit nggeluh mehuli ibas kegeluhenta tep-tep wari.

Pdt. Steven Kumenit,STh.M.Min.

Rurat, turah Ras Erbuah Ibas Kristus Jesus (Kolose 2: 6-10)

BAHAN PJJ GEREJA GBKP

TANGGAL 20 – 26 JULI 2014.

Kolose 2 : 6 – 10.

Tema : Rurat, turah Ras Erbuah Ibas Kristus Jesus.

LATAR BELAKANG

1.      Sijadi oratenta sendah eme surat Paulus simereken pergegeh man perpulungen i Epesus gelah tetap nggeluh ibas Kristus. Maksusna adi perpulungen nggo tek man Yesus selaku Tuhan, maka konsekwensina eme perpulungen ula terpengaruhi ibas ajaran-ajaran sipapak, tapi perpulungen harus tetap njemak kai siiajarken rasul-rasul (Paulus), sebab e pengajaren situhu-tuhu kerna keselamatan.

2.      Kata pergegeh ras motivasi siibereken Paulus enda, sebab paksa sie cukup kompleks permasalahan, bagepe ajaran-ajaran sipapak (band. Ayat 8).  Sebab arah kata-kata simehuli, lit piga-piga kalak siatena mpengaruhi perpulungen. Situasi enda harus ihindari perpulungen sebab enda la reh ibas Kristus nari. Erkiteken sie me pengajaren sipapak enda igelari Paulus eme  kepentaren si la erguna (band. = filsafat kosong).

3.      Enda harus ihindari Perpulungen, sebab kegeluhen perpulungen singgo tek man Yesus, ula icampur baurkan ibas pengajaran-pengajaran i luar Kristus, sierbahanca perpulungen bingung, janah adi nggo bingung, perpulungen lanai meteh apai sibenar ras apai si la benar, emaka perpulungen alu la isadarina nggo erbahan dosa. Padahal perpulungen nggo ibebasken Tuhan Yesus ibas dosa-dosa nari. Tuhu perpulungen nggo tek man Yesus Kristus selaku ulu keselamatan manusia, tapi enda awal ngenca, sebab perpulungen harus rurat ras nggeluh ras Yesus, gelah perpulungen Kolose lit pertumbuhan kiniteken. Rurat ras nggeluh ras Yesus, maka perpulungen ndatken kepentaren situhu-tuhu, sibanci mbedaken apai sisalah ras apai sibenar. Erkiteken sie me ipersingeti Paulus gelah perpulungen rurat ras nggeluh ibas Yesus. La e saja, tapi pe perpulungen harus nggeluh ngataken bujur man Dibata. Perpulungen harus rusur ngataken bujur man Dibata, sebab ibas perkuah ate Tuhan maka perpulungen Kolose banci nggeluh ibas keselamatan, janah ibas rusurna perpulungen ngataken bujur, maka ipasu-pasu Tuhan perpulungen ras tetap itemani ras ijagai Kesah Si Badia, sebab bentuk pengataken bujur eme berarti pepulungen nggit nggeluh meteruk ukur ras Tuhan saja siisembahna.

4.      Isingetken Paulus man perpulungen Kolose, gelah perpulungen Kolose tek man Kristus saja, sebab Kristus eme Dibata jine sireh ku doni enda ras jadi rupa manusia, emaka biak Dibata siserta e lit bas Kristus. Sebab ibas perpulungen tek saja man Yesus ras tetap bertumbuh ibas Yesus maka alu sendirina perpulungen lanai tek ibas pengajaran-pengajaran sipapak (band. Kepentaren  si la erguna).

5.      Kuasa Kristus ganjangan kap asangken kerina kuasa-kuasa si lit ibas doni enda, termasuk kuasa – kuasa ibas doni enda ras kuasa pemerentah si la eridah. Adi kuasa Kristus ganjangan asangken kerina kuasa, maka seharusna min perpulungen mengandalkan Krisus saja.

APLIKASI

            Ibas perkembangan doni sigenduari enda, cukup melala simeraguken kerna Yesus Kristus eme Tuhan. Tapi ibas pengajaren Paulus sekali enda,  kita isingetken mulihi maka Kristus eme Dibata, erkiteken sieme kita selaku kalak sitek harus tetap njemak enda ras tetap tek maka Yesus eme Tuhan jine.

            Harus siteh Yesus Kristus eme ulu kegeluhenta. Memang ibas perkembangen sigenduari lit ajar singataken maka i luar Yesus banci selamat. Pengangkan sibage harus iergai ras ihormati, tapi kita selaku kalak sitek man Yesus Kristus harus tetap nggeluh ibas Yesus, sebab nggeluh ibas Yesus lit jaminan keselamatan. Erkiteken sie me kita harus rurat ras nggeluh ibas Yesus. Sebab Yesus eme ulu kegeluhenta, emaka kalak sirurat ras nggeluh ras Yesus ndatken kegeluhen situhu-tuhu. Ibas erti kata kegeluhen kinitekenta lalap ertumbuh, sebab kegeluhenta bagi batang kayu situmbuh ideher lau anak, sindatken kecukupen lau ras nakan tep-tep wari (bnd. Mazmur 1:3).  Bagepe singgeluh ras Yesus teridah ibas kegeluhenna tep-tep wari eme ndele atena adi la ndalanken kai singena ate Tuhan, emaka nehken Berita Simehuli, subuk perbahanan bagepe perkataan) ngenca siidalankenna, gelah doni enda terkelin. Janah seharusna min kegeluhen sibage nggo teridah ibas kegeluhenta tep-tep wari, sebab selain GBKP nggo berumur 124 tahun, tapi pe GBKP nggo njayo sedekah 73 tahun. Jadi situhuna enda jadi persinget man banta, erkiteken genduari kita selaku gereja GBKP nggo njayo. Berarti teridah min kedewasaanta ras kemandirian ibas erkiniteken man Tuhan ras ndalanken tri tugas gereja. Jadi amin gia kita nggeluh ibas budaya tapi ula min kinitekenta man Yesus ercambur ras kiniteken sindekah, hanya erkiteken ndalanken pendilonta ibas budaya, termasuk budaya Karo.

Perlu pe siteh GBKP njayo eme ibas tgl 23 Juli 1941. Tanggal enda eme sidang Sinode sipemena i Sibolangit.

Pdt. Steven Kumenit, STh.M.Min.

Nggeluh Bujur Ras Benar (Roma 8:1-11)

BAHAN PJJ GEREJA GBKP

TANGGAL 13 – 19 JULI 2014.

Roma 8 : 1 – 11.

Tema : Nggeluh Bujur Ras Benar.

LATAR BELAKANG

1.      Arah surat enda, rasul Paulus mereken sada pengangkan kerna dosa ras akibatna, bagepe nggeluh kalak kristen ibas persadan ras Yesus man perpulungen Roma khususna man kalak Yahudi.

2.      Kalak singgeluh ibas Yesus Kristus lanai ndatken penghukumen sirasa lalap, sebab dosa lanai erkuasa man bana. Dosa simereken kematen man manusia nggo italuken Yesus ibas kematenNa, janah ibas kekeken Yesus,  mereken keselamatan ras kemerdekaan man manusia. Emaka kalak singgeluh ibas keselamatan ulanai nggeluh ibas kedagingan, ntah pe nggeluh erbahan dosa, sebab kalak singgeluh ibas kedagingan ntah dosa she ndigan pe la ngasup pesenangken Tuhan , tapi justru jadi imbang Tuhan. Tapi sebalikna kalak singgeluh ibas Kesah Dibata, nggeluh me ia ibas kegeluhen janah malem atena, sebab kegeluhenna nggeluh ibas penjayamen Tuhan.

3.      Kegeluhen keselamatan ras kemerdekaan manusia jadi erkite-kiteken Kesah, sebab Kesah Dibata erdahin man kerina kalak silit ibas persadan ras Yesus Kristus guna ipegegehi gelah kalak sitek banci naluken kuasa dosa, emaka kalak sitek ngasup nggeluh ibas ngena ate Tuhan ntah pe nggeluh ibas rangka pesenangken pusuh Tuhan.

4.      Undang-undang (Taurat) la ngasup nelamatken manusia. Tuhu undang-undang berisi tuntutan Dibata nandangi bangsaNa guna nggeluh tutus, nggeluh ersembah man Tuhan saja bagepe sikeleng-kelengen ras sisampat-sampaten. Tapi adi manusia ernalem man undang-undang, ntah pe tek maka Tuhan erngena ate  man manusia erkiteken matuhi undang-undang e,  maka manusia e ihukum erpalasken kai silit ibas undang-undang e.  Ibas tuntutan undang-undang maka tep-tep tahun ibas wari raya perdamen, kalak Yahudi harus mpersembahken  sada asuh-asuhen simbur janah darehna ipirpiri idatas peti perpadanan. Janah enda ilakoken erkelang-kelangken imam. Tapi keselamaten siialoken perpulungen, la nai erpalasken asuh-asuhen ras dareh e ras erkelangken imam, tapi Yesus sendiri sijadi persembahen. Kula ras dareh Yesus jadi persembahen pengalemi dosa manusia.

5.      Tole, ipersingeti Paulus perpulungen kerna nggeluh jadi sikerajangan Kristus. Adi Kesah Kristus ringan bas pusuh perpulungen, maka sikerajangan Kristus me ia. Bagepe adi Kristus ringan bas anggota perpulungen maka kula singgo  mate erkiteken dosa,  ndatken kegeluhen secara pertendin. Sebab Dibata singgo mpekeke Yesus, ia ka simereken kegeluhen man kula si nggo mate e.

APLIKASI

            Ibas perkuah ate Tuhan  maka kita nggeluh ibas keselamaten ras kemerdekaan. Dosa nggo italuken Yesus. Tapi amin gia dosa nggo italuken Yesus, tapi tetap dengan ia erdahin guna ndarami ise siman njergemenna. Kalak kristen si la setia me sasaran utamana.

            Erkiteken kita nggo nggeluh ibas keselamatan ras kemerdekaan, bagepe kita nggo jadi sikerajangan Kristus maka ate Tuhan gelah kita tetap jadi sikerajangan Kristus maka Kesah Sibadia ngarak-ngarak pusuh ras peratenta gelah kita tetap erbahan simehuli singena ate Tuhan, ibas perbahanenta sitep-tep wari ngasup kita pesenangken pusuh Tuhan. Tandana kita erbahan simehuli, maka kegeluhenta harus nggeluh bujur ras benar. Sebab kegeluhen sibageme kita ndatken pasu-pasu Tuhan, emaka selaku kalak sierkiniteken man Tuhan la perlu kita mbiar nggeluh i tengah-tengah doni enda sebab gegeh Kesah Sibadia nampati kita guna ndalanken kai singena ate Tuhan.

Pdt. Steven Kumenit, STh.M.Min.